KʼUTUNEM 8
BʼIXONEM 130 Chqetaʼmaj ukuyik makaj
Ri kqabʼan che resaxik uwach ri Jehová are chiʼ kqakuy kimak ri nikʼaj chik
«Jas ri Ajawaxel xusach ri imak ix, je chibʼanaʼ ix xuqujeʼ» (COL. 3:13).
KYAʼ UBʼIXIK
¿Jas kojkunik kqabʼano rech kqakuy umak jun winaq che ubʼanom kʼax chqe?
1, 2. a) ¿Jampaʼ kʼax kqariq che ukuyik umak jun winaq? b) ¿Jas xubʼan ri qachalal Denise rech xukʼutu che xukuy umak ri achi?
¿LA KʼAX kabʼan che ukuyik umak jun chik? Kʼi chqe kʼax kqabʼan che ukuyik kimak ri nikʼaj chik y más na are chiʼ kkibʼan jastaq o kkibʼij tzij che sibʼalaj kuya bʼis chqe. Pero kojkunik kqasach kan pa qajolom y kqakuy umak ri xbʼanow kʼax chqe. Chojchoman chrij ri xukʼulmaj jun qachalal ixoq ubʼiʼ Denise, a che xukuy umak jun winaq che xubʼan kʼax che ri ufamilia. Pa ri junabʼ 2017, ri areʼ y ri u familia xebʼe che rilik ri central mundial kech ri testigos rech Jehová. Are chiʼ e bʼenaq pa ri bʼe jun carro xupotzʼij ribʼ rukʼ ri kech. Ri qachalal Denise xsach na; pero, chiʼ xkʼastajik, xretaʼmaj che ri kebʼ ral sibʼalaj xkiriq kʼax y ri rachajil ubʼiʼ Brian, xkamik. Ri qachalal Denise kubʼij: «Sibʼalaj xinbʼisonik y kinriq ta chik jas kinbʼano». Are chiʼ xqʼax ri tiempo xretaʼmaj che ri achi xa ta utijom droga, qʼabʼarel o xa ta tajin kril ri ubʼe. Rumal laʼ ri qachalal Denise xutaʼ ri utobʼanik ri Jehová rech kunaʼ jamaril pa ranimaʼ y kel ri royowal chrij ri achi.
2 Xbʼixik che kbʼe ri achi pa cárcel rumal che xkam jun winaq pa ri accidente paneʼ umak taj. Pero jun chke ri winaq che kʼo chilaʼ pa ri tribunal xubʼij che ri qachalal Denise che rukʼ ri kuya ubʼixik kilik jampaʼ junabʼ kqʼat puwiʼ ri achi. Ri qachalal Denise kubʼij: «Are chiʼ knaʼtaj ri accidente chwe kinnaʼo che jetaneʼ kʼo jun nimalaj sokotajinaq chwe y kkʼaq atzʼam chuwach». Xa jujun semanas qʼaxinaq, ri qachalal Denise xbʼe pa ri tribunal rech kubʼij ri xkʼulmataj pa ri accidente. ¿Jas ri xubʼij? Xutaʼ che ri juez che kutoqʼobʼisaj uwach ri achi. b Are chiʼ xbʼitaj wariʼ rumal ri qachalal, ri juez xutzoqopij oqʼej y xubʼij: «25 junabʼ chik tajin kinqʼat tzij pa kiwiʼ ri winaq y kʼateʼ nabʼe mul kinta ri e tzij riʼ. Ri más kkaj ri u familia ri winaq che kkamik are che kkʼajisax uwach ri xbʼanow kʼax chke. Kʼateʼ nabʼe mul kinto che jun winaq kutaʼ che ktoqʼobʼisax uwach y kukuy umak ri xbʼanow kʼax che».
3. ¿Jas xubʼan ri qachalal Denise rech xukuy umak ri achi?
3 ¿Jas xtoʼw ri qachalal Denise rech xukuy umak ri achi? Are xchoman chrij ri kubʼan ri Jehová che ukuyik qamak (Miq. 7:18). We nim kqil wi che ri Jehová kukuy qamak, kojkun riʼ kqakuy kimak ri nikʼaj chik.
4. ¿Jas kraj ri Jehová kqabʼano? (Efesios 4:32).
4 Ri Jehová kukuy qamak y kraj che xuqujeʼ kqakuy kimak ri nikʼaj chik (chasikʼij Efesios 4:32). Kraj che rukʼ ronojel qanimaʼ kqakuy kimak ri kkibʼan kʼax chqe (Sal. 86:5; Luc. 17:4). Pa wajun kʼutunem riʼ kqil na oxibʼ jastaq che kojutoʼo rech kqakuy kimak ri nikʼaj chik.
XAQ TA KAKʼUʼ O KAWOWAJ RI BʼIS CHE KANAʼO
5. ¿Jas kqanaʼo are chiʼ kbʼan kʼax chqe? (Proverbios 12:18).
5 Weneʼ jun winaq kubʼan kʼax o kubʼij tzij che kuya jun nimalaj bʼis chqe, y más kojbʼisonik we are jun qa familia o jun qamigo kbʼanow wariʼ chqe (Sal. 55:12-14). Jujun taq mul, ri bʼis che kqanaʼo kjunamatajik are chiʼ kojsokotaj rumal jun espada (chasikʼij Proverbios 12:18). Weneʼ kqaj taj kqakʼutu che xbʼan kʼax chqe. Pero we kqabʼan wariʼ jetaneʼ kqayaʼo che kchʼik jun cuchillo chqe y kqesaj taj. Kel ta riʼ ri bʼis chqe we kqakʼut ta ri kqanaʼo y kqabʼij taj.
6. ¿Jas ri nabʼe kqabʼano are chiʼ kbʼan kʼax chqe?
6 Are chiʼ kbʼan kʼax chqe, weneʼ ri nabʼe kqabʼano are kpe qoyowal. Ri Biblia kubʼij che are waʼ ri kubʼan ri winaq are chiʼ kbʼan kʼax che. Are kʼu xuqujeʼ kubʼij che utz taj kqaya bʼe che ri oyowal ktaqan pa qawiʼ (Sal. 4:4; Efes. 4:26). ¿Jasche? Rumal che ri kqanaʼo weneʼ nojimal kubʼano che kqabʼan ri utz taj. Y ri oyowal kuya ta utzilal chqe (Sant. 1:20). Chnaʼtaj chqe: kojkun taj kqabʼano che mat kpe qoyowal are chiʼ kbʼan kʼax chqe, pero kojkunik kqakuy umak ri winaq.
Kojkun taj kqabʼano che ma ta kpe qoyowal, pero kojkunik kqakuy makaj
7. ¿Jas más kqanaʼo are chiʼ kbʼan kʼax chqe?
7 ¿Jas más kqanaʼo are chiʼ kbʼan kʼax chqe? Chojchoman chrij ri qachalal Ann che kubʼij: «Are chiʼ kʼa in nitzʼ na, ri nutat xuya kan ri nunan y xkʼuliʼ rukʼ ri ixoq che xinuchajij o ri qajikʼ. Xinnaʼo che xaq nutukel xinkanaj kanoq. Y are chiʼ ri nutat xekʼojiʼ ralkʼwal rukʼ ri ixoq, xinnaʼo che kinraj ta chik. Amaqʼel xinchomaj che kʼo ta nijun kinraj». Jun qachalal ixoq ubʼiʼ Georgette kubʼij ri xunaʼo are chiʼ ri rachajil xuchʼabʼej jun chi ixoq: «Sibʼalaj xinbʼisonik. Oj nitzʼaq na are chiʼ xqachʼobʼ qawach. ¡Xqachilaj qibʼ pa ri precursorado!». Jun qachalal ubʼiʼ Naomi kubʼij: «Xinchomaj taj che ri wachajil kubʼan kʼax chwe. Are chiʼ xubʼij chwe che tajin kril pornografía, xinnaʼo che jetaneʼ xuchʼabʼej jun chi ixoq».
8. a) ¿Jasche rajawaxik kqakuy kimak ri nikʼaj chik? b) ¿Jas utzilal kqariqo are chiʼ kqakuy kimak ri nikʼaj chik? (Chawilaʼ ri recuadro « ¿Jas kinbʼano we ri xubʼan jun winaq xuya kan jun nimalaj bʼis chwe?»).
8 Kojkun taj kqabʼano che ri nikʼaj chik mat kkibʼan kʼax chqe, pero kojkunik kqachomaj ri kqabʼan chuwach. Y ri más utz che kqabʼano are kqakuy kimak. ¿Jasche? Rumal che loqʼ ri Jehová chqawach y ri areʼ kraj kqakuy kimak ri nikʼaj chik. Y we xaq qoyowal wi na y kqakuy ta kimak ri nikʼaj chik, weneʼ kqachomaj ta na ri kqabʼano y weneʼ kqariq qayabʼ (Prov. 14:17, 29, 30). Chqilampeʼ ri xubʼij jun qachalal ubʼiʼ Christine: «Are chiʼ xaq kinchoman na chrij ri xbʼan chwe, kinkikot taj, kintij ta chi nuwa y kok ta chi nuwaram. Xuqujeʼ aninaq kpe woyowal y wariʼ kubʼan kʼax che ri nukʼulanem y ri wachilanik kukʼ ri nikʼaj chik».
9. ¿Jasche rajawaxik kqaya kan ri oyowal?
9 ¿Y we kutaʼ ta kuybʼal umak ri winaq che xubʼan kʼax chqe? Paneʼ je wariʼ, kʼo kojkunik kqabʼano rech xaq ta kojbʼisonik. Ri qachalal Georgette, che xojchʼaw kan chrij pa ri párrafo 7, kubʼij: «Kʼi tiempo xqʼaxik, pero xel ri woyowal chrij ri achi che nabʼe kanoq wachajil. Tekʼuriʼ xinnaʼ jun nimalaj jamaril». Are chiʼ xaq ta kojchoman chrij ri xbʼan chqe, wariʼ kojutoʼ rech amaqʼel taj kqakʼol oyowal. Y je wariʼ kojchoman ta chi chrij ri xbʼan chqe y kojkikot chi jumul pa ri qakʼaslemal (Prov. 11:17). Are kʼu, weneʼ awetaʼm che rajawaxik kakuy umak ri winaq are kʼu kanaʼo che majaʼ na katkun che ubʼanik. Chqilampeʼ ri katkunik kabʼano.
XAQ TA KATCHOMAN CHRIJ RI XBʼAN CHAWE
10. ¿Jasche kajwataj tiempo rech kojbʼison ta chik rumal ri kʼax che xbʼan chqe? (Xuqujeʼ chawilaʼ ri e wachbʼal).
10 ¿Jas katkunik kabʼano rech xaq ta katchoman chrij ri xbʼan chawe y rech katbʼison ta chik? Nabʼe, chayaʼ che kqʼax ri tiempo. Chojchoman chrij jun winaq che kuriq jun accidente. Paneʼ bʼenaq chi rukʼ ri doctor, pero kajwataj tiempo rech kutzirik. Xa junam rukʼ, kajwataj tiempo chqe rech kqanaʼ ta chi bʼis y kqakuy umak ri winaq rukʼ ronojel qanimaʼ (Ecl. 3:3; 1 Ped. 1:22).
Are chiʼ jun winaq kuriq jun accidente. Paneʼ bʼenaq chi rukʼ ri doctor, pero kajwataj tiempo rech kutzirik. Xa junam rukʼ, kajwataj tiempo chqe rech kqanaʼ ta chi bʼis y kqakuy umak ri winaq rukʼ ronojel qanimaʼ. (Chawilaʼ ri párrafo 10).
11. ¿Jas kubʼan ri oración che qatoʼik rech kqakuy kimak ri nikʼaj chik?
11 Ukabʼ, chataʼ che ri Jehová che katutoʼo rech kakuy umak ri winaq che xubʼan kʼax chawe. c Ri qachalal Ann, che xojchʼaw kan chrij pa ri párrafo 7, kubʼij ri xubʼan ri oración che utoʼik: «Xinbʼij che ri Jehová che kukuy numak y ke ri nu familia rumal che kʼi kojsach wi. Tekʼuriʼ xintzʼibʼaj jun carta che ri nutat y ri rixoqil, xinbʼij chke che kinkuy kimak». Ri qachalal Ann kubʼij che kʼax xuriq che ubʼanik wariʼ, xuqujeʼ xubʼij: «Rumal che xinkuy kimak, weneʼ pa jun qʼij ri nutat y ri rixoqil kkaj kketaʼmaj chrij ri Jehová».
12. ¿Jasche rajawaxik chrij ri Jehová kqakubʼsaj wi qakʼuʼx y are ta chrij ri kqanaʼo? (Proverbios 3:5, 6).
12 Urox, chakubʼsaj akʼuʼx chrij ri Jehová, chrij ta ri kanaʼo (chasikʼij Proverbios 3:5, 6). Ri Jehová retaʼm ri kajwataj chqe (Is. 55:8, 9). Ri areʼ kutaʼ ta jastaq che xa kubʼan kʼax chqe. Rumal laʼ, are chiʼ kubʼij che kqakuy ri makaj, areʼ retaʼm che wariʼ kuya utzilal chqe (Sal. 40:4; Is. 48:17, 18). Are kʼu, we are más kojchoman chrij ri kqanaʼo, kojkun ta riʼ kqakuy umak ri winaq (Prov. 14:12; Jer. 17:9). Naomi, che xojchʼaw kan chrij pa ri párrafo 7, kubʼij: «Nabʼe xinchomaj che kʼo ta kubʼano che kinkuy ta umak ri wachajil rumal che tajin kril pornografía. Kwaj taj che jumul chik kubʼan kʼax chwe o ksach che ri bʼis xinnaʼo. Xinchomaj che ri Jehová retaʼm ri tajin kinaʼo. Pero are chiʼ xqʼax ri tiempo xinchʼobʼo che paneʼ ri Jehová retaʼm ri tajin kinnaʼo wariʼ kraj ta kubʼij che utz krilo. Ri areʼ retaʼm ri tajin kinnaʼ pa ri wanimaʼ y retaʼm che aninaq taj ksach chwe ri xubʼan ri wachajil, pero kraj che kinkuy umak». d
CHAKʼEXAʼ RI KANAʼO
13. Junam rukʼ ri kubʼij Romanos 12:18-21, ¿jas rajawaxik kqabʼano?
13 Are chiʼ kqakuy umak jun winaq che xubʼan kʼax chqe xaq xiw ta kqabʼij che kqaj taj kojchʼaw chrij ri kʼax che xubʼano. Xaneʼ kʼo rajawaxik kqabʼano. We are jun qachalal pa ri utinamit ri Jehová, rajawaxik kqatzukuj ri kqabʼano rech kʼo jamaril chqaxoʼl (Mat. 5:23, 24). Kqakʼex ri oyowal rukʼ ri toqʼobʼisal wachaj y ri ukuyik mak (chasikʼij Romanos 12:18-21; 1 Ped. 3:9). ¿Jas kojtoʼwik rech kojkun che ubʼanik?
14. ¿Jas rajawaxik kqabʼano y jasche?
14 Rajawaxik kqakoj qachuqʼabʼ che rilik ri winaq junam rukʼ ri kubʼan ri Jehová. Ri areʼ kril ri utz taq qabʼantajik (2 Crón. 16:9; Sal. 130:3). Qastzij che we are más kojchoman chrij ri utz che kubʼan ri winaq, qas kqetaʼmaj riʼ ri utz taq ubʼantajik; pero we are kqil ri ksach wi kqil ta riʼ ri utz ubʼantajik. Oj kojchaʼowik jas kqabʼan che rilik ri winaq. We are kqil ri utz che kkibʼan ri nikʼaj chik kʼax ta kqabʼan riʼ che ukuyik kimak. Chojchoman chrij jun qachalal ubʼiʼ Jarrod, kubʼij: «Kʼax ta kinbʼan che ukuyik umak jun qachalal we are más kinchomaj ri utz che kubʼano chuwach ri ksach wi».
15. ¿Jasche utz we kabʼij che ri winaq che kakuy umak?
15 Kʼo jun chik katkunik kabʼano: chabʼij che ri winaq che kakuy umak. ¿Jasche rajawaxik kabʼan wariʼ? Chatchoman chrij ri kubʼij ri qachalal Naomi: «Ri wachajil xutaʼ chwe ‹¿La akuyum chi numak?›. Are chiʼ xwaj xinbʼij che nukuyum chi umak xinkun taj xinbʼij. Xinwilo che nukuyum ta umak rukʼ ronojel wanimaʼ. Are chiʼ xqʼax ri tiempo xinkunik xinbʼij che ‹Kinkuy amak›. Sibʼalaj xinmay ri utzilal xuya wariʼ che ri wachajil y chwe in. Ri areʼ sibʼalaj xkikotik, xutzoqopij oqʼej y ri in xinnaʼ jun nimalaj jamaril. Y je wariʼ xinkubʼsaj chi jumul nukʼuʼx chrij y kamik kʼo chi jun utzalaj achilanik chqaxoʼl».
16. ¿Jas xawetaʼmaj chrij ri ukuyik mak?
16 Ri Jehová kraj che kqakuy makaj (Col. 3:13). Are kʼu jujun taq mul kʼax kqabʼan che ubʼanik. Pero kojkun che ubʼanik we kqabʼan ri xqil pa wajun kʼutunem riʼ: che xaq ta kqakʼuʼ ri bʼis che kqanaʼo, xaq ta kojchoman chrij ri xbʼan chqe y kqakʼex ri kqanaʼo (chawilaʼ ri recuadro « Oxibʼ jastaq kojtoʼwik rech kqakuy makaj»).
CHOJCHOMAN CHRIJ RI UTZILAL KQARIQO ARE CHIʼ KQAKUY MAKAJ
17. ¿Jas utzilal kqariqo are chiʼ kqakuy makaj?
17 Kʼo kʼi rumal che rajawaxik kqakuy makaj. Chqilampeʼ jujun chke. Nabʼe, kqesaj uwach ri Jehová y kqakikotemaj (Luc. 6:36). Ukabʼ, kqakʼutu che kqamaltyoxij che ri Jehová kukuy qamak (Mat. 6:12). Y urox, kqariq ta yabʼil y kekʼojiʼ utz taq qamigos.
18, 19. ¿Jas kqariqo are chiʼ kqakuy kimak ri nikʼaj chik?
18 Are chiʼ kqakuy kimak nikʼaj chik, kqariq tewchibʼal che qachomam taj. Chqilaʼ ri xukʼulmaj ri qachalal Denise, che xojchʼaw chrij pa ri párrafo 1. Ri areʼ retaʼm taj che ri achi ri xbʼanow ri accidente, uchomam kukamisaj ribʼ are chiʼ kkʼis ri juicio. Pero sibʼalaj xumayo are chiʼ Denise xukuy ri umak rumal laʼ xumaj jun etaʼmanik re ri Biblia kukʼ ri Testigos.
19 Weneʼ kqachomaj che ukuyik umak jun winaq sibʼalaj kʼax ubʼanik. Pero are chiʼ kqakuy umak jun winaq kqariq kikotemal (Mat. 5:7). Rumal laʼ, chqesaj uwach ri Jehová y chqakuyuʼ kimak ri nikʼaj chik.
BʼIXONEM 125 Utz ke ri kel kikʼuʼx
a Kʼexom jujun bʼiʼaj.
b Are chiʼ jun cristiano kukʼulmaj wariʼ, chkijujunal kkil ri rajawaxik kkibʼano.
c Chawilaʼ pa jw.org ri videos rech ri e bʼixonem Hay que perdonar, Te perdono y Es hora de hacer las paces.
d Rilik pornografía are jun makaj y ri kbʼanow wariʼ kubʼan kʼax che ri ukʼulaj, pero rukʼ ta waʼ kekunik kkijach kibʼ.
