1. ¿Jas pixabʼ kuya Filipenses 2:3, xuqujeʼ jas utzilal kqariqo we kqabʼan pa qakʼaslemal?

RI OJ upatanelabʼ ri Jehová kojmachʼachʼik xuqujeʼ kqanimaj ri e utaqanik, rumal che kqachʼobʼo che areʼ retaʼm ri qas utz chqe (Efes. 4:22-24). Ri machʼachʼem kubʼano che are kqabʼan ri urayibʼal ri Jehová are ta ri qe oj xuqujeʼ kqachomaj che ri e nikʼaj chik más nim na kibʼanik chqawach oj. We kqabʼan wariʼ, kkʼojiʼ jun utz qachilanik rukʼ ri Jehová xuqujeʼ kukʼ ri e qachalal (chasikʼij uwach Filipenses 2:3).

2. a) ¿Jas pixabʼ xuya ri apóstol Pablo? b) ¿Jas kqetaʼmaj pa wajun kʼutunem riʼ?

² We kqachajij ta qibʼ kqesaj uwach riʼ ri kibʼantajik ri e winaq re wajun uwach Ulew riʼ che are ri ubʼanik nimal xuqujeʼ ri xaq xiw uchomaxik ri kajwataj chke. * E jujun cristianos re ri nabʼe siglo xuqujeʼ xkiriq wajun kʼax riʼ, rumal laʼ ri apóstol Pablo xuya wajun pixabʼ riʼ che ri congregación re Roma: «Rumal kʼu ri toqʼobʼ ri yoʼm chwe, kinbʼij chiwe chijujunal, kʼo jun muchomaj chi nim ubʼanik, xaneʼ xaq jas ri taqal che» (Rom. 12:3). We kqilo, Pablo xubʼij che rajawaxik kkʼojiʼ jun utz qachomanik chqij. Ri machʼachʼem kojutoʼ rech kqachomaj taj che más nim qabʼanik o che kʼo ta qapatan. Pa wajun kʼutunem riʼ, kqil oxibʼ jastaq jachiʼ rajawaxik kqakʼut wi machʼachʼem rech xaq xiw ta kojchoman chqij oj: pa ri kʼulanem, ri eqelen pa ri utinamit ri Jehová xuqujeʼ ri redes sociales.

3. a) ¿Jasche konojel ri kekʼuliʼ kkʼulmataj kʼax chkixoʼl? b) ¿Jas kkibʼan e jujun chuwach ri e kʼax riʼ?

³ Jehová kraj che ri e kʼulanik kekikotik. Rumal che qonojel oj ajmakibʼ, qonojel taj junam ri qachomanik. Ri apóstol Pablo xubʼij che ri kekʼulik kkiriq jujun kʼax (1 Cor. 7:28). E jujun kʼulaj kkichomaj che amaqʼel kechʼojinik rumal laʼ weneʼ kkichomaj che utz taj che xekʼuliʼik. We ri kichomanik xaq junam rukʼ kech ri winaq che ketaʼm ta uwach ri Dios, kkichomaj riʼ che are más utz we kkijach kibʼ.

4. ¿Jas jastaq utz taj kqachomaj?

⁴ Kqachomaj taj che ksukʼumataj ta chi ri qakʼulanem. Qetaʼm ri kubʼij ri Biblia che xaq xiw kuya kchup ri kʼulanem we jun chke ri kʼulaj kubʼan inmoralidad sexual (Mat. 5:32). Rumal laʼ, are chiʼ kqariq kʼax pa ri qakʼulanem junam rukʼ ri xubʼij ri Pablo, kqaya taj che ri ubʼanik nimal kubʼano che kqachomaj wariʼ: «¿La kuya wajun kʼulanem riʼ ronojel ri kajwataj chwe? ¿La kuya ri loqʼoqʼebʼal che qas taqal chwe? ¿La kinriq más kikotemal rukʼ jun winaq chik?». Wajun chomanik riʼ kukʼutu che ri winaq xaq xiw kchoman chrij ri kajwataj che. Ri e winaq che ketaʼm ta uwach ri Dios kkibʼij riʼ chqe che are kqabʼan ri kubʼij ri qanimaʼ xuqujeʼ are kqatzukuj ri kyaʼow kikotemal chqe, paneʼ wariʼ kraj kubʼij kqachup ri qakʼulanem. Are kʼu ri kkaj che ri Dios kukʼam kibʼe kkinimaj wajun pixabʼ riʼ: «Kʼo jun mutzukuj xuwi ri qas utz che, xaneʼ xuqujeʼ ri utz na chke ri juleʼ chik» (Filip. 2:4). Jehová kraj che kqachajij ri qakʼulanem are ta kqakʼis tzij pa uwiʼ (Mat. 19:6). Jehová kraj che kqabʼan ri kraj areʼ are ta ri kqaj oj.

5. Junam rukʼ ri kubʼij Efesios 5:33, ¿jas rajawaxik kkibʼan che kichʼabʼexik kibʼ ri e kʼulanik?

⁵ Rajawaxik che ri e kʼulanik kkiloqʼoqʼej  kibʼ xuqujeʼ nim kkil wi kibʼ (chasikʼij uwach Efesios 5:33). Ri Biblia kukʼut chqawach che are utz kojchoman chrij ri kqaya are ta chrij ri kyaʼ chqe (Hech. 20:35). Rech ri e kʼulanik kkiloqʼoqʼej kibʼ xuqujeʼ nim kkil kibʼ, rajawaxik e kebʼ kemachʼachʼik. Wariʼ kubʼano che xaq xiw ta kchoman chrij ri kajwataj che xaneʼ ri kajwataj che ri jun chik (1 Cor. 10:24).

6. ¿Jas kqetaʼmaj chrij ri xubʼij Steven xuqujeʼ Stephanie?

⁶ Rumal ri machʼachʼem, e kʼi kʼulaj Testigos más kekikotik. Jun kʼutbʼal, jun qachalal ubʼiʼ Steven kubʼij: «We kachiʼl kibʼ, kkitoʼ la kibʼ riʼ, más na chiʼ kʼo kʼax chkixoʼl. Are ta kkibʼij ‹¿jas ri más utz chwe in?›, xaneʼ are kkibʼij ‹¿jas ri más utz chqe?›». Ri rixoqil ubʼiʼ Stephanie, xaq junam kuchomaj. Kubʼij: «Nijun kraj che kkʼojiʼ rukʼ jun winaq che ukʼulel. Are chiʼ junam ta ri qachomanik, kqakoj qachuqʼabʼ che rilik jasche xaq ta junam. Kqabʼan qachʼawem che ri Jehová, kqatzukuj tobʼanik pa ri e qawuj tekʼuriʼ kojchʼaw chrij ri kʼax. Kqakoj qachuqʼabʼ chuwach ri kʼax are ta kojchʼojin chbʼil qibʼ». We jun chke kuchomaj taj che más nim ubʼanik chuwach ri ukʼulaj kubʼano che más kekikotik.

7. ¿Jas bʼantajik rajawaxik kukʼut jun qachalal we kyaʼ jun eqelen che?

⁷ Ukojik qachuqʼabʼ che upatanexik ri Jehová sibʼalaj nim ubʼanik chqawach (Sal. 27:4; 84:10). Sibʼalaj utz che jun qachalal achi kraj kchakun más pa ri utinamit ri Jehová. Ri Biblia kubʼij: «We kʼo jun ri kraj kkoj che solinel ke ri komon kojonelabʼ, utzalaj chak riʼ kraj» (1 Tim. 3:1). Are kʼu, we kyaʼ jun eqelen che, utz taj che kubʼan nim che ribʼ (Luc. 17:7-10). Ri rajawaxik kubʼano are che keʼupatanij ri e nikʼaj chik rukʼ machʼachʼem (2 Cor. 12:15).

8. ¿Jas kqetaʼmaj chrij ri Diótrefes, Uzías xuqujeʼ Absalón?

⁸ Ri Biblia kchʼaw chkij winaq che xkibʼan nim che kibʼ. Jun kʼutbʼal, Diótrefes xukʼut ta machʼachʼem rumal che xraj xux «nim uqʼij» pa ri congregación (3 Juan 9). Uzías xukʼutu che kubʼan nim che ribʼ are chiʼ xubʼan jun chak che yaʼtal ta che kubʼano (2 Crón. 26:16-21). Ri Absalón qas xnaʼw che ukojik kikʼuʼx ri e winaq rech kkunik kux qʼatal tzij (2 Sam. 15:2-6). Ri e bʼantajik riʼ qas kkikʼutu che ri Jehová utz ta keril ri e winaq che kkibʼan nim che kibʼ (Prov. 25:27). Ri kkibʼan nim che kibʼ xuqujeʼ ri xaq xiw kechoman chrij ri kajwataj chke kkiriq ta utzilal (Prov. 16:18).

9. ¿Jas kʼutbʼal xuya ri Jesús chqawach?

⁹ Ri Jesús xuya jun utzalaj kʼutbʼal chqawach. Ri Biblia kubʼij che «paneʼ junam uwachbʼal rukʼ ri Dios man xunaʼ ta ribʼ chi junam ta rukʼ ri Dios» (Filip. 2:6). Paneʼ Jesús are ri ukabʼ winaq más nim ubʼanik, are kʼu xuchomaj taj che nim ubʼanik. Xubʼij wariʼ chke ri utijoxelabʼ: «Are kʼu ri chʼutiʼn na chixoʼl iwonojel, are waʼ kux na nim uqʼij» (Luc. 9:48). Sibʼalaj nim ubʼanik che kojchakun kukʼ ri precursores, siervos ministeriales, kʼamal bʼe re ri congregación y re circuito che kemachʼachʼik junam rukʼ ri Jesús. Are chiʼ ri oj upatanelabʼ ri Jehová kojmachʼachʼik, kqakʼut ri loqʼoqʼebʼal che kukʼutu che qas oj utinamit ri Jehová (Juan 13:35).

10. ¿Jas kqabʼano we kʼo kʼax pa ri congregación are kʼu kqachomaj che utz ta tajin kbʼan che rilik?

¹⁰ ¿Jas kqabʼano we kʼo kʼax pa ri congregación are kʼu kqachomaj che utz ta tajin kbʼan che rilik? Utz taj che kojchʼachʼatik, xaneʼ rajawaxik kojmachʼachʼik xuqujeʼ kqaya  ri qatobʼanik chke ri kkikʼam ubʼe ri congregación (Heb. 13:17). ¿Jas kojutoʼ che ubʼanik wariʼ? Chqachomaj: «¿La qas nimalaj kʼax ri tajin kkʼulmatajik? We rajawaxik ksukʼumaxik, ¿la are ri tiempo che ubʼanik? ¿La yaʼtal chwe in kinsukʼumaj? Qas chachomaj, ¿jas ri kwaj: la are kwaj che kʼo utz achilanik pa ri congregación o xa kwaj che nim kinilik?».

11. Junam rukʼ ri kubʼij Efesios 4:2, 3, ¿jas kkʼulmatajik we kojmachʼachʼik are chiʼ kqapatanij ri Jehová?

¹¹ Ri Jehová más nim kril ri machʼachʼem xuqujeʼ ri utz achilanik pa ri congregación chuwach ri ubʼanik kʼi chak. Rumal laʼ, chqakojoʼ qachuqʼabʼ rech kojmachʼachʼik are chiʼ kqapatanij ri Jehová. Rukʼ wariʼ kojtobʼanik rech kʼo utz achilanik pa ri congregación (chasikʼij uwach Efesios 4:2, 3). Chqakojoʼ ri qatiempo che utzijoxik ri utzij ri Dios. Chqakʼutuʼ utzilal chke ri e nikʼaj chik. Chqakʼutuʼ hospitalidad chke konojel, xaq xiw ta chke ri kʼo keqelen (Mat. 6:1-4; Luc. 14:12-14). We kqabʼan ronojel wariʼ, ri e nikʼaj chik xaq xiw ta kkil ri kojkun che ubʼanik, xaneʼ are kkilo che kojmachʼachʼik.

12. ¿Jas kubʼij ri Biblia chrij ri achilanik?

¹² Jehová kraj che kqakoj ri qatiempo rech kojkʼojiʼ kukʼ ri e qachiʼl xuqujeʼ kukʼ ri qafamilia (Sal. 133:1). Ri Jesús xekʼojiʼ utz taq rachiʼl (Juan 15:15). Ri Biblia kchʼaw chrij ri utzilal kqariqo we kʼo utz taq qachiʼl (Prov. 17:17; 18:24). Xuqujeʼ kubʼij che utz taj kqatas qibʼ chke ri e nikʼaj chik (Prov. 18:1). E kʼi kkichomaj che ri redes sociales kubʼano che e kʼo kʼi qachiʼl  xuqujeʼ kqanaʼ taj che xaq qatukel. Are kʼu we kqakoj ri redes sociales rajawaxik kqachajij qibʼ chuwach.

13. ¿Jasche e jujun winaq che kkikoj ri redes sociales kebʼisonik xuqujeʼ kkinaʼo che xaq kitukel e kʼolik?

¹³ E jujun kkibʼij che, ri winaq che kkikoj kʼi tiempo che rilik fotos xuqujeʼ ri kkibʼij ri e nikʼaj chik pa ri redes sociales kubʼano che kkinaʼ che xaq kitukel e kʼolik xuqujeʼ kkinaʼ nim bʼis. ¿Jasche? Jun rumal are che e kʼi winaq kkikoj wachbʼal pa ri redes sociales che nim ubʼanik pa ri kikʼaslemal: kkikoj jeʼlalaj taq fotos kech e areʼ, kech ri e kachiʼl xuqujeʼ ri lugares che e bʼenaq wi. Ri keʼilow ri fotos riʼ, weneʼ kkichomaj che kʼo ta kikotemal pa ri kikʼaslemal e areʼ. Jun qachalal che kʼo 19 ujunabʼ kubʼij: «Sibʼalaj kinbʼisonik are chiʼ kwil e nikʼaj chik sibʼalaj kekikot pa ri kʼisbʼal taq qʼij re ri semana are kʼu ri in xaq in kʼo cho wachoch».

14. ¿Jas kubʼan che qatoʼik 1 Pedro 3:8 rech utz ukojik kqabʼan che ri redes sociales?

¹⁴ Kuya kkoj ri redes sociales are kʼu rajawaxik utz kbʼan che ukojik, jun kʼutbʼal, kqakojo rech kojchʼaw kukʼ ri qafamilia xuqujeʼ ri e qachiʼl. Are kʼu, qilom che kʼi chke ri winaq che kkikoj jastaq pa ri redes sociales xa nimal kkibʼano. Jetaneʼ tajin kkibʼij «chiniwilaʼ». E jujun kkitzʼibʼaj itzel taq tzij chrij ri kifoto o chrij ri kech ri nikʼaj chik. Wariʼ kjunamataj ta rukʼ ri bʼantajik che ri cristianos rajawaxik kkikʼutu, junam rukʼ ri machʼachʼem xuqujeʼ ri unaʼik pa kanimaʼ ri kkinaʼ ri e nikʼaj chik (chasikʼij uwach 1 Pedro 3:8).

15. ¿Jas tobʼanik kuya ri Biblia chqe rech kqabʼan ta nim che qibʼ?

¹⁵ We kqakoj ri redes sociales, utz che kqachomaj: «¿Jas ubʼanik ri fotos, ri videos xuqujeʼ ri tzij che kintzʼibʼaj chupam? ¿La kukʼutu che xa nimal kinbʼano? ¿La kubʼano che ri e nikʼaj chik kʼax kkinaʼ o kkinaʼ titikil?». Ri Biblia kubʼij: «Ronojel ri kʼo cho ri uwach Ulew, ri itzel urayibʼal ri qatiʼjal, ri itzel urayibʼal ri qabʼaqʼwach, ri jastaq ri man kʼo ta kipatan ri nim keqil wi pa ri qakʼaslemal, ronojel waʼ man rukʼ ta ri Tataxel kel wi uloq, xaneʼ cho ri uwach Ulew» (1 Juan 2:16). Jun comentario re ri Biblia kuya ubʼixik che ri tzij «ri jastaq  ri man kʼo ta kipatan ri nim keqil wi pa ri qakʼaslemal» kchʼaw chrij jun winaq che «kraj kux nim ubʼanik chkiwach ri e nikʼaj chik». Ri oj cristianos rajawaxik taj che ri e nikʼaj chik nim kojkilo. Xaneʼ rajawaxik kqanimaj wajun pixabʼ riʼ: «Maqanimarisaj qibʼ, maqakʼiʼaqalaʼ tzij chbʼil taq qibʼ, mape qoyowal che jun chik we kuriq utzil» (Gál. 5:26). We kojmachʼachʼik, kqabʼan ta qe ri kkibʼan ri winaq che ketaʼm ta uwach ri Dios.

16. ¿Jasche kqaj taj kqabʼan nim che qibʼ?

¹⁶ Rajawaxik kqakʼut machʼachʼem, rumal che ri kkibʼan nimal kkikʼut ta jun «utzalaj chomanik» (Rom. 12:3). Xaneʼ amaqʼel kechʼojinik xuqujeʼ xaq xiw kechoman chrij ri kajwataj chke. Xuqujeʼ, kʼi taq mul ri kkichomaj y ri kkibʼano kubʼan kʼax chke e areʼ y chke ri e nikʼaj chik. We kkikʼex ta ri kichomanik, Satanás kusach ri kichomanik (2 Cor. 4:4; 11:3). Ri e winaq che kemachʼachʼik kkichomaj taj che más nim kibʼanik o che kʼo ta kipatan, xuqujeʼ kkichʼobʼo che ri e nikʼaj chik más nim na kibʼanik (Filip. 2:3). Xuqujeʼ, ketaʼm che «ri Dios keʼukʼulelaj ri winaq ri nimaʼq kkinaʼ kibʼ, kubʼan kʼu toqʼobʼ chke ri e machʼamoj» (1 Ped. 5:5). Ri kʼo jun utz kichomanik kkaj taj che utz ta keʼil rumal ri Dios.

17. ¿Jas rajawaxik kqabʼano we kqaj che amaqʼel kojmachʼachʼik?

¹⁷ We kqaj che amaqʼel kojmachʼachʼik, rajawaxik kqanimaj wajun pixabʼ riʼ: «Iwesam chi kʼu bʼik ri ojer ikʼaslemal xuqujeʼ ri jastaq ri xibʼan nabʼe kanoq. Iwatzʼyaqim chi iwibʼ rukʼ ri kʼakʼ ikʼaslemal». Kajwataj nim chuqʼabʼ che ubʼanik wariʼ, rumal che rajawaxik kqanikʼoj ri ukʼutbʼal ri Jesús xuqujeʼ kqakoj qachuqʼabʼ rech kqabʼan qe ri xubʼan areʼ (Col. 3:9, 10; 1 Ped. 2:21). Are kʼu ubʼanik wariʼ kuya utzilal. We kqakoj qachuqʼabʼ rech kojmachʼachʼik, ri qafamilia más kekikotik, kʼo junamil pa ri congregación xuqujeʼ utz ukojik kqabʼan che ri redes sociales. Y ri más nim ubʼanik are che kojqaj chuwach ri Jehová y areʼ kojutewchij.