1. Junam rukʼ ri kubʼij Génesis 3:15, ¿jas xubʼan ri Jehová are chiʼ Adán y Eva xemakunik?

 ARE chiʼ Adán y Eva xemakunik, ri Jehová aninaq xuya jun profecía rech kʼo keyebʼal ri e kalkʼwal. Kqariq wajun profecía pa Génesis 3:15 (chasikʼij uwach).

2. ¿Jasche sibʼalaj nim ubʼanik ri profecía re Génesis 3:15?

² Wajun profecía kriqitaj pa ri nabʼe wuj re ri Biblia. Y, ronojel ri nikʼaj chi wuj che kʼo pa ri Biblia kʼo ubʼanik rukʼ wajun profecía riʼ. Junam rukʼ ri rij jun libro che are kchapow ri uxaq rech ktukin taj, ri profecía re Génesis 3:15 are ri ktobʼanik rech ri nikʼaj chi wuj re ri Biblia xa junam ri kuya ubʼixik. ¿Jas riʼ ri kuya ubʼixik? Che ri Dios kutaq lo jun kolonel rech kusachisaj uwach ri Itzel y ri ketobʼan rukʼ. * ¡Wariʼ sibʼalaj kuya kikotemal chke ri keniman che ri Jehová!

3. ¿Jas kqil na pa wajun kʼutunem?

³ Pa wajun kʼutunem riʼ kqil na ri kirespuestas jujun preguntas che kʼo ubʼanik rukʼ Génesis 3:15: ¿jachin chkij tajin kchʼaw wi wajun profecía riʼ?, ¿jas tajin kbʼan che utzʼaqatisaxik? y ¿jas kubʼan che qatoʼik kimik?

4. ¿Jachin riʼ ri «kumatz» y jasche qetaʼm?

⁴ Pa Génesis 3:14, 15 kchʼaw chrij jun «kumatz», «ri rijaʼlil» ri kumatz, jun «ixoq» y ri «rijaʼlil» ri ixoq. Rukʼ  ri utobʼanik ri Biblia, kojkunik kqetaʼmaj e jachin riʼ. * Nabʼe, kubʼij che ri «kumatz» are ta jun qastzij chikop. Wet are jun qastzij kumatz xuchʼobʼ ta riʼ are chiʼ xqʼat tzij pa uwiʼ rumal ri Jehová pa ri jardín de Edén. Ri jun kumatz riʼ are jun uxlabʼal che kʼo unojibʼal. Ri Biblia kuqʼalajisaj jachinoq. Pa Apocalipsis 12:9 kubʼij che ri «ojer kumatz» are ri Itzel, Satanás. Are kʼu, ¿jachin riʼ ri rijaʼlil ri kumatz?

5. ¿E jachin riʼ ri rijaʼlil ri kumatz?

⁵ Are chiʼ ri Biblia kukoj ri tzij «ijaʼlil» tajin kchʼaw chrij jun etal, jachaʼ jun winaq che kresaj uwach ri unojibʼal y ri uchomanik ri utat. Rumal laʼ ri rijaʼlil ri kumatz are ri e uxlabʼal y ri e winaq che kkikʼulelaj ri Jehová y ri utinamit, junam rukʼ ri kubʼan ri Satanás. Chkixoʼl wariʼ e kʼo ri ángeles che xeqaj lo pa ri uwach Ulew pa taq ri uqʼij ri Noé y ri e winaq che kkibʼan itzelal junam rukʼ ri kitat, ri Itzel (Gén. 6:1, 2; Juan 8:44; 1 Juan 5:19; Jud. 6).

6. ¿Jasche are ta ri Eva «ri ixoq» che kubʼij Génesis 3:15?

⁶ Chqilaʼ jachin riʼ «ri ixoq». ¿La are ri Eva? Man are taj. ¿La are kʼu jun ral ri Eva? Man are taj. Rumal che ri profecía kubʼij che ri rijaʼlil ri ixoq kuwachʼ ri ujolom ri kumatz. Y junam rukʼ ri ya xqilo, ri kumatz are jun uxlabʼal, ri Satanás. Rumal laʼ, wet are jun ral ri Eva man kkun ta riʼ kukʼis tzij puwiʼ ri Satanás. ¿Jachin kʼu riʼ ri ixoq?

7. ¿Jas kojuto wiʼ Apocalipsis 12:1, 2, 5, 10 che uchʼobʼik jachin ri ixoq che kuya ubʼixik Génesis 3:15?

⁷ Pa ri kʼisbʼal wuj che kʼo pa ri Biblia  kuya ubʼixik jachin riʼ ri ixoq che kubʼij pa Génesis 3:15 (chasikʼij uwach Apocalipsis 12:1, 2, 5, 10). Kubʼij che are ta jun qas ixoq. Rumal che kubʼij che kʼo ri ikʼ chuxeʼ ri raqan y pa ujolom kʼo jun corona re 12 chʼumil. Y kkʼojiʼ jun ral, y ri ral are ri uQʼatbʼal tzij ri Dios. Rumal che wajun Qʼatbʼal tzij riʼ je kʼo pa ri kaj ri ixoq xuqujeʼ je kʼo pa ri kaj. Rumal laʼ, wajun ixoq riʼ are ri jun uchʼaqapil ri utinamit ri Jehová che kʼo pa ri kaj, kraj kubʼij ri sukʼalaj taq ángeles (Gál. 4:26).

8. Junam rukʼ ri kubʼij Génesis 22:15-18, ¿jachin riʼ ri unimal ri rijaʼlil ri ixoq, y jampaʼ xuxik?

⁸ Rumal ri uTzij ri Dios kojkunik kqachʼobʼo jachin ri unimal ri rijaʼlil ri ixoq. Kubʼij che pa ri ufamilia ri Abrahán kpe wi (chasikʼij uwach Génesis 22:15-18). Y ri profecía riʼ qas xkʼulmatajik rumal che ri Jesús je xpe pa ri ufamilia ri Abrahán (Luc. 3:23, 34). Are kʼu ri rijaʼlil ri ixoq man are ta qas jun winaq, rumal che jun winaq kkun ta riʼ kusachisaj uwach ri Satanás. Rumal laʼ, are chiʼ ri Jesús kʼo chi 30 ujunabʼ, xchaʼ rumal ri ruxlabʼixel ri Jehová, y je riʼ xux ri chaʼom che uqʼatik tzij. Xuqujeʼ xux ri unimal rijaʼlil ri ixoq (Gál. 3:16). Y are chiʼ kaminaq chik y xkʼastajisaxik, ri Dios xubʼano che xux nim uqʼij y xuya «ronojel taqanik pa ri kaj, ronojel taqanik cho ri uwach ulew» pa uqʼabʼ, xuqujeʼ rech kkun «che kisachik kiwach ri e uchak ri Itzel» (Heb. 2:7; Mat. 28:18; 1 Juan 3:8).

9, 10. a) ¿E jachin chi e kʼo pa ri rijaʼlil ri ixoq y jampaʼ keʼux rijaʼlil? b) ¿Jas kqanikʼoj na chanim riʼ?

⁹ E kʼo chi nikʼaj pa ri rijaʼlil ri ixoq. Ri apóstol Pablo xubʼij e jachin taq waʼ ri rijaʼlil ri ixoq are chiʼ xubʼij waʼ taq tzij riʼ chke ri e chaʼom kebʼe pa ri kaj y chke e nikʼaj chi winaq: «We ix rech ri Cristo, qas ix rijaʼlil ri Abrahán riʼ, xuqujeʼ echbʼenelabʼ jas ri ubʼim ri Dios pa ri uchiʼm uloq che ri Abrahán» (Gál. 3:28, 29). Are chiʼ ri Jehová kuchaʼ jun winaq rukʼ ri ruxlabʼixel, wajun winaq riʼ kux rijaʼlil ri ixoq. Rumal laʼ, ri rijaʼlil ri ixoq are ri Jesús y ri 144,000 che kkiqʼat tzij rukʼ (Apoc. 14:1). Ri e areʼ kkikoj kichuqʼabʼ che resaxik uwach ri unojibʼal y ri ubʼantajik ri kiTat Jehová.

¹⁰ Chanim riʼ qilom chik e jachin riʼ ri ketzijox pa Génesis 3:15. Tekʼuriʼ kqanikʼoj na ri tajin kubʼan ri Jehová rech ktzʼaqat wajun profecía riʼ, xuqujeʼ kqil na jas tobʼanik kuya wajun profecía riʼ chqe.

11. ¿Jas xbʼan che ukatzik «ri uxeʼ raqan» ri rijaʼlil ri ixoq?

¹¹ Pa Génesis 3:15 kubʼij che ri kumatz kukatz «ri uxeʼ raqan» ri rijaʼlil ri ixoq. Y wariʼ xkʼulmatajik are chiʼ ri Satanás xeʼukoj ri judíos y ri romanos rech xkikamisaj ri Jesús, ri uKʼojol ri Dios (Luc. 23:13, 20-24). Are chiʼ jun winaq kuriq kʼax che ri uxeʼ raqan kkun ta chik kbʼin pa jun tiempo. Junam rukʼ wariʼ, are chiʼ xkam ri Jesús, jetaneʼ ri rijaʼlil ri ixoq kʼo ta chi xubʼano rumal che ri Jesús oxibʼ qʼij xkamik (Mat. 16:21).

12. ¿Jampaʼ y jas kbʼan che uwachʼik ri ujolom ri kumatz?

¹² Rech ktzʼaqat ri kubʼij pa Génesis 3:15, ri Jesús rajawaxik kkʼojiʼ ta kan pa ri muqbʼal, rumal che ri profecía kubʼij che ri rijaʼlil ri ixoq kuwachʼ ri ujolom ri kumatz. Ri uxeʼ raqan ri Jesús xkunatajik. Rumal che churox qʼij xkʼastajisax pa uxlabʼal y che kkam ta wi. Y, are chiʼ  kopan ri qʼij che uchʼikom chi ri Dios, ri Jesús kuwachʼ ri ujolom ri Satanás kraj kubʼij che kusachisaj uwach (Heb. 2:14). Ri kkiqʼat tzij rukʼ ri Cristo kkitoʼ na rech kkisukʼumaj ri uwach Ulew, kkesaj bʼik kojonel ri e ukʼulel ri Dios, che are ri rijaʼlil ri kumatz (Apoc. 17:14; 20:4, 10). *

13. Rumal che tajin ktzʼaqat wajun profecía riʼ, ¿jas kojutoʼ wi?

¹³ We ri at ajachom chi ri akʼaslemal che ri Dios, kʼo kubʼan riʼ ri profecía pa akʼaslemal. Are chiʼ ri Jesús xpe cho ri uwach Ulew xukʼut ri ubʼantajik ri utat (Juan 14:9). Rukʼ ri ukʼutbʼal ojutoʼm rech kqetaʼmaj uwach ri Jehová y kqaloqʼoqʼej. Xuqujeʼ oj utoʼm rukʼ ri kukʼutu y ri tajin kubʼan che ukʼamik ubʼe ri utinamit ri Jehová kimik. Ukʼutum chqawach ri kqabʼan pa ri qakʼaslemal rech kkikot ri Jehová qumal. Xuqujeʼ ri ukʼastajibʼal ri Jesús uyaʼom nimalaj utzilal chqe qonojel rumal che rukʼ ri ukikʼel «kresaj [...] konojel ri qamak» (1 Juan 1:7).

14. ¿Jasche qetaʼm che ri profecía che xuya ubʼixik ri Jehová pa ri jardín de Edén aninaq taj xtzʼaqatik?

¹⁴ Rukʼ ri xuya ubʼixik ri Jehová pa ri jardín de Edén kukʼutu che aninaqil taj ktzʼaqat wajun profecía. Kajwataj tiempo rech kekʼojiʼ na rijaʼlil ri ixoq, rech ri Itzel keʼumulij na ri keteriʼ chrij xuqujeʼ rech kkikʼulelaj kibʼ. ¿Jas tobʼanik kuya chqe retaʼmaxik wariʼ? Kojutoʼ che uchʼobʼik jun jastaq, che ri e winaq che e kʼo pa uqʼabʼ ri Satanás itzel kekil ri upatanelabʼ ri Jehová. Are chiʼ qʼaxinaq chi kʼi siglos, jewaʼ ri xubʼij ri Jesús chke ri utijoxelabʼ (Mar. 13:13; Juan 17:14). Qas qilom che tzʼaqatinaq jun chʼaqap che wajun profecía riʼ, más na pa ri kʼisbʼal 100 junabʼ. ¿Jasche kqabʼij?

15. a) ¿Jasche ri e winaq más itzel chik kojkilo? b) ¿Jasche rajawaxik kqaxibʼij ta qibʼ che ri Satanás?

¹⁵ Pa ri 1914 ri Jesús xux Qʼatal tzij y xresaj lo ri Satanás pa ri kaj. Rumal laʼ ri Satanás tajin kubʼan kʼi kʼax pa ri uwach Ulew y xa jubʼiqʼ chik kraj ksachisax uwach (Apoc. 12:9, 12). Are kʼu xaq ta tʼuyul che reyexik jampaʼ ksachisax uwach. Xaneʼ tajin kubʼan kʼi kʼax che ri utinamit ri Jehová (Apoc. 12:13, 17). Xuqujeʼ rumal laʼ ri e winaq más itzel chik kkil ri upatanelabʼ ri Jehová. Are kʼu kqaxibʼij ta qibʼ che ri Satanás y ri e teren chrij. Xaneʼ kqabʼij qe junam rukʼ ri xubʼij ri apóstol Pablo: «We kʼo ri Dios qukʼ, ¿jachin ta ri kujkʼulelanik?» (Rom. 8:31). Kojkunik kqakubʼsaj qakʼuʼx chrij ri Jehová rumal che kʼi chke ri profecías che bʼim pa Génesis 3:15 tzʼaqatinaq chik.

16-18. ¿Jas tobʼanik uyaʼom chke ri qachalal Curtis, Ursula y Jessica are chiʼ xkichʼobʼ ri kubʼij Génesis 3:15?

¹⁶ Ri ubʼim ri Jehová pa Génesis 3:15 kojutoʼ che uchʼijik ri kʼax. Jun qachalal misionero ubʼiʼ Curtis, che kʼo pa ri tinamit Guam kubʼij: «Jujun taq mul are chiʼ kinriq kʼax kqaj uchuqʼabʼ ri nukojonik che ri Jehová. Are kʼu are chiʼ kinchoman chrij ri kʼo pa Génesis 3:15 kinutoʼ rech kinkubʼsaj nukʼuʼx chrij ri nuTat che kʼo pa ri kaj». Ri qachalal riʼ sibʼalaj kraj che kopan ri qʼij che ksachisax uwach ronojel ri itzelal che kʼolik.

 ¹⁷ Jun qachalal ubʼiʼ Ursula che kel pa ri tinamit Baviera (Alemania) kubʼij che uchʼobʼik ri profecía che kʼo pa Génesis 3:15 xutoʼ rech kukojo che ri Biblia qastzij are ri uTzij ri Dios. Y jun jastaq che sibʼalaj xuya tobʼanik che are che konojel ri profecías che kʼo pa ri Biblia kʼo ubʼanik rukʼ ri kʼo pa Génesis 3:15. Ri qachalal kubʼij che sibʼalaj xopan pa ranimaʼ che ri Jehová aninaq xutzukuj jas xubʼano rech keʼutoʼ ri e winaq.

¹⁸ Jun qachalal re Micronesia ubʼiʼ Jessica kubʼij: «Sibʼalaj xinkikotik are chiʼ xwetaʼmaj ri qastzij che kʼo pa ri Biblia. ¡Y che tajin ktzʼaqat ri profecía che kʼo pa Génesis 3:15! Wariʼ kunaʼtasaj chwe che ri qakʼaslemal riʼ are ta ri qas kʼaslemal. Xuqujeʼ wajun profecía riʼ kinutoʼ rech qas kinkojo che are chiʼ kqapatanij ri Jehová ri areʼ kuya jun utzalaj kʼaslemal chqe kimik y pa ri petinaq».

19. ¿Jasche qas qetaʼm che ktzʼaqat na ronojel ri kubʼij pa Génesis 3:15?

¹⁹ Junam rukʼ ri xqetaʼmaj tajin chi ktzʼaqat ri profecía che kʼo pa Génesis 3:15. Qetaʼm chik jachin ri rijaʼlil ri ixoq y jachin ri rijaʼlil ri kumatz. Y che ri Jesús, are jun qʼatal tzij chik pa ri kaj, che kkam ta chik xuqujeʼ nim uqʼij chik. Y xa jubʼiqʼ chik kraj ketzʼaqat ri e chaʼom kebʼe pa ri kaj, ri e nikʼaj chi rijaʼlil ri ixoq. Rumal che ya xtzʼaqat ri nabʼe uchʼaqapil ri profecía, qas qetaʼm che ktzʼaqat na ri kʼisbʼal uchʼaqapil are chiʼ ¡kwachʼ ri ujolom ri kumatz! Kuya jun nimalaj jamaril chqe are chiʼ ksachisax uwach ri Satanás. Are kʼu are chiʼ majaʼ kopan ri tiempo riʼ kojqʼitaj taj. Y chqakubʼsaj qakʼuʼx chrij ri Jehová rumal che yaʼtal che. Y rumal ri rijaʼlil ri ixoq «konojel kʼut ri nimaʼq taq tinamit cho ri uwach ulew» kkiriq kʼi tewchibʼal (Gén. 22:18).