Ri nupapá xux na kʼamal bʼe pa ri Iglesia Unida de Canadá. Rumal riʼ ronojel taq domingo aqʼabʼil kojutaq bʼi rukʼ ri wanabʼ rech kyaʼ etaʼmanik re ri Biblia chqe kukʼ nikʼaj chi akʼalabʼ. Kʼateʼ riʼ kojbʼe pa ri iglesia a las once. Y bʼenaqʼij kojteriʼ bʼi chrij ri numamá pa ri Ja rech Ajawbʼal. Xqilo che kejunamataj ta ri kebʼ kojonem riʼ.

Ri a Bob Hutcheson y ri rixoqil Marion, e rachiʼl ri numamá, xeʼux testigos rech Jehová. Rumal che ri numamá xubʼij chke ri tajin kretaʼmaj chrij ri Biblia. Pa ri 1958, ri a Bob y ri al Marion xinkikʼam bʼi kukʼ ri oxibʼ kalkʼwal pa Nueva York pa jun Asamblea Internacional ubʼiʼ «Voluntad Divina» che ocho qʼij xuchʼijo. Rumal laʼ, nim kwil wi che xinkikʼam bʼik, kʼo xubʼan pa ri nukʼaslemal rumal che xeʼok il chwe.

Are chiʼ in akʼal na xinkʼojiʼ pa jun finca che e kʼo kʼi awaj chupam y utz kinwil kichajixik. Rumal laʼ xwaj xwetaʼmaj chrij Veterinaria. Ri numamá xubʼij che jun kʼamal bʼe re ri congregación ri kwaj kinbʼano y xubʼij chwe che oj kʼo chi pa ri «kʼisbʼal taq qʼij». Rumal laʼ, rajawaxik xinchoman chrij jas kubʼan ri wachilanik rukʼ ri Jehová we kinbʼe pa ri universidad (2 Tim. 3:1). Xinchoman chrij ri xubʼij ri qachalal chwe rumal laʼ xinbʼe ta chik.

 Are kʼu wetaʼm taj jas kinbʼano are chiʼ kinbʼan graduar wibʼ. Ronojel taq sábados y domingos kinel che utzijoxik ri utzij ri Dios, are kʼu utz ta kinwilo y xinchomaj che kinkun ta wi kinux precursor. Ri nupapá y ri nutío kkaj kinchakun pa jun empresa che kchʼobʼotaj uwach, ri kyaʼ wi seguros chke ri winaq pa Toronto. Ri nutío nim ubʼanik chupam ri empresa rumal laʼ xinmajij chak chilaʼ.

Rumal che kʼi horas kinchakunik y kukʼ winaq che kkipatanij ta ri Jehová in kʼo wi. Kʼo ta chi kubʼij nukʼuʼx che upatanexik ri Jehová. Pa ri tiempo riʼ xinkʼojiʼ rukʼ ri numam che Testigo taj. Are kʼu, are chiʼ xkamik rajawaxik xintzukuj jawiʼ kinkʼojiʼ wi.

Ri a Bob y al Marion, ri xinkikʼam bʼi pa ri nim riqbʼal ibʼ pa ri 1958, xeʼux jetaneʼ nutat nunan. Rumal che xkiyaʼo xinkanaj kukʼ pa ri kachoch y xinkitoʼ pa ri nukojonik. Xinbʼan nuqasanjaʼ pa ri 1960 rukʼ ri a John, jun chke ri kalkʼwal. Rumal che ri a John xux precursor, in xuqujeʼ xwaj xintzijoj más ri utzij ri Dios. Ri e qachalal xkil ri utzalaj chak che tajin kinbʼano, rumal laʼ xinkikoj che siervo re ri Escuela del Ministerio Teocrático. a

Pa ri 1966, xinkʼuliʼ rukʼ ri al Randi Berge, jun utzalaj precursora che kraj kuya tobʼanik jawiʼ rajawaxik ktzijox wi ri utzij ri Dios. Ri solinel re circuito xubʼij chqe che utz we kojbʼe che uyaʼik tobʼanik pa ri congregación re Orillia (Ontario). ¡Rumal laʼ xojbʼek y xqakʼam bʼi ri jastaq qech!

Rumal che ri wixoqil Randi sibʼalaj utz kril utzijoxik ri utzij ri Dios, xinutoʼo rech xinux precursor are chiʼ kʼateʼ xojopan pa Orillia y xwaj xinux jun utzalaj ajtij. Ukojik ri Biblia y kitoʼik ri nikʼaj chik sibʼalaj xuya kikotemal chwe. Jumul xojkunik xqatoʼ jun kʼulaj pa Orillia rech xkijach ri kikʼaslemal che ri Jehová.

Jun qʼij are chiʼ xinbʼe pa Toronto, xwetaʼmaj uwach jun qachalal Arnold MacNamara ubʼiʼ, jun chke ri kilow ri chak pa Betel. Ri areʼ xutaʼ chqe we kqaj kojux precursores especiales. Aninaq xinbʼij che: «Kqaj, are kʼu kqaj taj che pa Quebec kojtaq wi bʼik». Rumal che jalan kenwil ri winaq che kechʼaw pa francés che keʼel chilaʼ. Pa taq ri junabʼ riʼ ri winaq re Quebec xkiyak kibʼ chrij ri qʼatbʼal tzij rumal che kkaj kkitas kibʼ chrij Canadá.

Are kʼu ri Arnold xubʼij chwe: «Xaq xiw tajin keqataq bʼi ri precursores especiales pa Quebec». Kʼo ta chi xinbʼij. Wetaʼm che ri al Randi kraj kojbʼe chilaʼ. Are chiʼ xqʼax ri tiempo, xinchʼobʼo che qas utz ri xqachaʼ ubʼanik pa ri qakʼaslemal.

Are chiʼ xqakʼis ri curso re ri chʼabʼal francés che xyaʼ chqe pa cinco semanas, xojtaq bʼi rukʼ ri al Randi y jun chi kʼulaj pa Rimouski ri kʼo pa 540 kilómetros che ri noreste re Montreal. Pa ri tiempo riʼ kʼa majaʼ qas kinkunik kinchʼaw pa francés. Rumal laʼ, are chiʼ tajin kinsikʼij jujun anuncios pa ri riqbʼal ibʼ, xinbʼij che pa ri nim riqbʼal ibʼ keʼopan e kʼi «qachalal avestruces», are kʼu ri qas xwaj xinbʼij are che keʼopan ri «qachalal re Austria».

Are chiʼ xojkʼojiʼ pa ri Rimouski, xaq xiw ta ri oj kebʼ kʼulaj xojkʼojiʼ pa jun ja xaneʼ xuqujeʼ xekʼojiʼ kajibʼ qachalal alitomabʼ qukʼ y ri kʼulaj Huberdeau xuqujeʼ ri kebʼ kalkʼwal alitomabʼ. Ri familia Huberdeau xubʼan alquilar jun ja che kʼo siete cuartos chupam y qonojel kqatoʼ qibʼ che utojik. «Ri Casa Blanca» kojchaʼ che rumal che saq kkaʼyik. Oj 12 xojkʼojiʼ chilaʼ y jujun taq mul oj 14. Pa ri tiempo riʼ oj precursores especiales rukʼ ri wixoqil Randi rumal laʼ aqʼabʼil kojel bʼi che utzijoxik ri utzij ri Dios y chaqʼabʼ chik kojok loq. Sibʼalaj xqamaltyoxij che amaqʼel kʼo jun qachalal che kbʼe qukʼ paneʼ sibʼalaj kʼo tew.

Xukʼam qawach chkij ri precursores y xojux jetaneʼ jun familia. Kʼi mul kqanukʼ qaqʼaqʼ rech kojtʼuyiʼ chrij kqabʼan qaʼempanadas ri kbʼix pierogis che, xuqujeʼ pa taq sábados jun qachalal kubʼan tocar jun instrumento y oj kojbʼixonik xuqujeʼ kojxojowik.

E kʼi winaq xnimar ri kikojonik pa ri tinamit Rimouski. Xa pa cinco junabʼ e kʼi chke ri tajin kketaʼmaj chrij ri Biblia xkibʼan kiqasanjaʼ, wariʼ sibʼalaj xuya kikotemal chqe y ri kikʼiyal ri publicadores pa ri congregación xopan pa 35.

Xojux utz taq tzijol utzij ri Dios are chiʼ xojkʼojiʼ pa Quebec. Ri Jehová ronojel tiempo xojutoʼo y xuya ri kajwataj chqe xuqujeʼ xqetaʼmaj más kiwach ri winaq ri kechʼaw pa francés, rumal laʼ xbʼe qakʼuʼx chrij ri kichʼabʼal y ri kicultura. Chilaʼ xjaqtaj wi ri qachomanik y kimik nim kqil wi nikʼaj chi culturas (2 Cor. 6:13).

Are chiʼ xqʼax ri tiempo, ri sucursal xutaʼ chqe we kqaj kojbʼe pa Tracadie, jun tinamit ri kʼo pa ri este re ri Nueva Brunswick. Pa ri tiempo riʼ kqariq taj jas kqabʼano rumal che kʼateʼ xqamaj ubʼanik alquilar jun qachoch y tajin kinchakun nikʼaj qʼij pa jun escuela. Y kʼi chke ri tijoxelabʼ majaʼ naj xeʼux publicadores no Bautizados y kʼateʼ xmajix uyakik jun Ja rech Ajawbʼal. Rumal laʼ kqachʼobʼ taj jas kqabʼano.

Pa ri fin de semana xqabʼan qachʼawem chrij ri kqachaʼ ubʼanik. Xojbʼe pa Tracadie y xqilo che  kjunamataj ta rukʼ Rimouski. Tekʼuriʼ xqachomaj che are ri Jehová tajin kojtaqow bʼi chilaʼ, xojbʼek rech kqilo we qas kojutoʼ ri Jehová y ri areʼ qas xojutoʼo (Mal. 3:10). Ri al Randi ronojel tiempo inutoʼm, are chiʼ xojbʼe pa Tracadie qas ta kʼax xqariqo rumal che ri areʼ kuchʼobʼo che are ri Jehová tajin kojtaqow bʼik, are ta kchoman chrij ri kʼax che kqariqo y amaqʼel kkikotik.

Xa jun kʼamal bʼe kʼo pa ri congregacion pa Tracadie, ri Robert Ross y ri rixoqil Linda, che tajin kepatanin chilaʼ e precursores y are chiʼ xkʼojiʼ ri nabʼe kalkʼwal xekanaj chilaʼ. Paneʼ kʼo kʼi kkibʼano rumal ri kalkʼwal, are kʼu sibʼalaj xkiya qachuqʼabʼ rumal che utz qakʼulaxik xkibʼan pa ri kachoch y rukʼ ronojel kanimaʼ kkitzijoj ri utzij ri Dios.

Kebʼ junabʼ chik oj precursores pa Tracadie are chiʼ xbʼix chwe che kinux solinel re circuito. Rumal laʼ siete junabʼ xeqasolij congregaciones re ri chʼabʼal inglés, tekʼuriʼ xojtaq bʼi pa jun circuito re ri chʼabʼal francés pa Quebec. Ri solinel re distrito, Léonce Crépeault ubʼiʼ, xubʼij chwe che utz ri chʼabʼal che xinyaʼo. b Are kʼu xuqujeʼ xubʼij chwe jas ri kinsukʼumaj, jumul xubʼij wariʼ chwe: «¿La awetaʼm jas rajawaxik kabʼano rech ri chʼabʼal che kayaʼo qas kʼo ktobʼan wi?». Rukʼ wariʼ xinsukʼumaj ri kinbʼan che uyaʼik ri e chʼabʼal.

Ksach ta chwe ri xqabʼan pa ri Asamblea Internacional «Fe Victoriosa» ubʼiʼ che xbʼan pa Montreal pa ri junabʼ 1978. Xinchakun pa ri Departamento re Alimentos, y qeyem che keʼopan 80,000 winaq. Are kʼu pa wajun asamblea riʼ jalan chi ri xbʼan che uyaʼik ri rikil, rumal che xekʼextaj ri máquinas, xkʼex ri rikil y ri kbʼan che ubʼanik. Qakʼamom bʼi 20 remolques rech kqakʼol ri tiʼj chupam y nikʼaj chi jastaq che kqaj taj kubʼan kʼax, are kʼu jujun taq mul qas ta ktobʼanik. Y matam xojok pa ri estadio che ubʼanik ri wa. Rumal che are chiʼ xa jun qʼij kraj che kbʼan ri nim riqbʼal ibʼ, xbʼan jun etzʼanem pa ri estadio. Xyaʼ bʼe che xojok bʼik, are kʼu kʼa pa nikʼaj aqʼabʼ. ¡Rajawaxik aqʼabʼ keqatzij ri hornos! Sibʼalaj xojkosik, are kʼu kʼo xwetaʼmaj chkij ri qachalal, rumal che sibʼalaj xechakunik, e ko pa ri kikojonik y amaqʼel kekikotik. Pa ri tiempo riʼ xenriq utz taq wachiʼl y che  kimik e wachiʼl na. Sibʼalaj kojkikotik che xbʼan ri nim riqbʼal ibʼ pa Quebec, jawiʼ xbʼan wi kʼax chqe ri oj testigos rech Jehová kumal ri qakʼulel pa ri 1940 y 1950.

Kʼi xwetaʼmaj chkij nikʼaj chi solinelabʼ pa taq ri e nim riqbʼal ibʼ, che xebʼan pa Montreal. Jumul, ri qachalal David Splane, che kimik are jun chke ri Jupuq Ajkʼamal bʼe cho ronojel uwach Ulew, xux kʼamal bʼe kech ri e nim riqbʼal ibʼ. Y pa jun chi nim riqbʼal ibʼ che xbʼanik xyaʼ wajun eqeleʼn chwe, y ri qachalal David xinutoʼo.

36 junabʼ xojkʼojiʼ pa ri circuito, tekʼuriʼ pa ri 2011 xinux ajtij pa ri Tijobʼal chke ri e Kʼamal bʼe re Congregación. Pa ri kebʼ junabʼ xaq ta pa jun lugar xojwar wi rukʼ ri wixoqil, xaneʼ pa 75 jalajoj taq lugares. Paneʼ xqariq kʼax, are kʼu utz xel ronojel. Are chiʼ kkʼis ri semana ri kʼamal taq bʼe sibʼalaj xkimaltyoxij, rumal che ri Jupuq Ajkʼamal bʼe cho ronojel uwach Ulew kok il chke.

Tekʼuriʼ xyaʼ ri eqeleʼn chwe che xinux ajtij pa ri Tijobʼal chke ri kkiya ubʼixik ri Ajawbʼal. Kʼi taq mul, ri tijoxelabʼ sibʼalaj kekosik rumal che kʼi ri kkibʼano: siete horas kekʼojiʼ pa ri tijobʼal, tres horas kkitijoj kibʼ pa jun qʼij y weneʼ cuatro o cinco asignaciones kkiya pa jun semana. Ri in y ri jun chi ajtij kqabʼij chke che xaq xiw kekunik kkibʼan wariʼ rukʼ ri utobʼanik ri Jehová. Man ksach ta chwe are chiʼ ri tijoxelabʼ sibʼalaj kkimayo che rukʼ ri utobʼanik ri Jehová kʼi kekun che ubʼanik.

Rumal che ri numamá xel ukʼuʼx chke ri tijoxelabʼ wariʼ xubʼano che xnimar ri kikojonik y xubʼano che ri nupapá xukʼex ri uchomanik chrij ri qastzij. Are chiʼ oxibʼ qʼij chik kaminaq ri numamá, xqamayo rumal che ri nupapá xbʼe pa jun riqbʼal ibʼ. Y man xuya ta kan bʼenam pa ri e riqbʼal ibʼ pa 26 junabʼ. Paneʼ ri nupapá xubʼan ta ri uqasanjaʼ are kʼu ri kʼamal taq bʼe xkibʼij chwe che areʼ ri nabʼe kopan pa ri Ja rech Ajawbʼal.

Ri numamá xux jun utz kʼutbʼal chqawach kukʼ ri oxibʼ wanabʼ. Ri oxibʼ wanabʼ y ri kachajil tajin kkipatanij ri Jehová rukʼ sukʼilal. E kebʼ e kʼo pa Betel: jun kʼo pa Portugal y jun chik pa Haití.

Oj precursores especiales rukʼ ri wixoqil Randi pa Hamilton (Ontario). Are chiʼ in solinel, utz kqilo kojbʼe kukʼ ri qachalal are chiʼ kekisolij ri winaq y kkiya etaʼmanik re ri Biblia chke. Are kʼu kimik sibʼalaj kojkikotik rumal che xeqariq winaq che kqaya etaʼmanik re ri Biblia chke y tajin knimar ri kikojonik. Xuqujeʼ tajin kqetaʼmaj más kiwach ri qachalal pa ri congregación y kuya qachuqʼabʼ are chiʼ kqilo che ri Jehová keʼutoʼo are chiʼ kkiriq kʼax.

Sibʼalaj kojkikot rukʼ ri wixoqil Randi are chiʼ knaʼtaj chqe ri xkibʼan ri qachalal che qatoʼik. Ri oj xuqujeʼ tajin kqakʼut chkiwach ri nikʼaj chik che kel qakʼuʼx chke y tajin keqatoʼo rech kkipatanij más ri Jehová (2 Cor. 7:6, 7). Kʼo jun qachalal ixoq che precursora y ri e ral. Xintaʼ che ri rachajil ri qachalal we ri areʼ kraj kux precursor. Are kʼu xubʼij che tajin keʼutoʼ oxibʼ precursores. Are kʼu xinbʼij che: «¿La mat más kkun na riʼ ri Jehová che kitoʼik?». Xinbʼij che che utz riʼ we kubʼan re ri tajin kkibʼan ri ufamilia. Are chiʼ qʼaxinaq chi seis ikʼ xumajij ri precursorado.

Oj kebʼ rukʼ ri wixoqil Randi kqaya na «kitzijoxik taq ri e nimaʼq taq» uchak ri Jehová chke «ri kʼa majaʼ keʼalaxik», y kqaj che kkinaʼ kikotemal che upatanixik ri Jehová junam rukʼ ri kikotemal che tajin kqanaʼo oj kimik (Sal. 71:17, 18).