KʼUTUNEM 28
BʼIXONEM 123 Rukʼ sukʼilal chojniman che ri utinamit ri Dios
¿Jas kabʼan che uchʼobʼik jachike ri qastzij y jachike ri molom tzij?
«Ko bʼaʼ chixtakʼaloq. Chikojoʼ ri qastzij, je jas jun pas ximibʼal re ri uxeʼ ipam» (EFES. 6:14).
KYAʼ UBʼIXIK
¿Jas kqabʼan che retaʼmaxik ri qastzij che kuya ubʼixik ri Jehová y ri molom taq tzij che kubʼij ri Satanás y ri e qakʼulel?
1. ¿Jas kanaʼ at chrij ri qastzij che kʼo pa ri Biblia?
RI UPATANELABʼ ri Jehová nim kqil wi ri qastzij che kʼo pa ri Biblia. Ronojel ri kojkojon chrij pa ri Biblia esam wi (Rom. 10:17). Qas kqakojo che are ri Jehová xbʼanowik che xkʼojiʼ ri nabʼe congregación cristiana jetaneʼ «raqan ja xuqujeʼ ri toʼbʼal re ri qastzij» (1 Tim. 3:15). Y rukʼ ronojel qanimaʼ kojniman chke ri kkikʼam qabʼe, rumal che ri kkibʼij chqe pa ri Biblia kkesaj wi y kkibʼij chqe ri rajawaxik kqabʼano rech kqaya ta kan upatanexik ri Dios (Heb. 13:17).
2. Junam rukʼ ri kubʼij Santiago 5:19, ¿jas kʼax weneʼ kqariq ri oj upatanelabʼ ri Jehová?
2 Paneʼ qas kqakoj ri kubʼij ri Biblia y kojniman che ri utinamit ri Jehová, are kʼu we man kqachajij qibʼ weneʼ nojimal kqakoj ri molom taq tzij che kbʼix chqe (chasikʼij Santiago 5:19). Ri Satanás kraj che kqakubʼsaj ta chi qakʼuʼx chrij ri kubʼij ri Biblia o che kojniman ta chi che ri utinamit ri Jehová (Efes. 4:14).
3. ¿Jasche rajawaxik are kqakoj ri kubʼij ri Biblia? (Efesios 6:13, 14).
3 (Chasikʼij Efesios 6:13, 14). Naj ta chik, ri Satanás kubʼan na che ri winaq kkita na molom taq tzij rech kechʼojin rukʼ Jehová (Apoc. 16:13, 14). Y qetaʼm che ri Satanás más kukoj na uchuqʼabʼ rech ri upatanelabʼ ri Jehová kkiya kan upatanexik (Apoc. 12:9). Rumal laʼ rajawaxik che kqachʼobʼo jachike riʼ ri qastzij y jachike ri molom tzij y are kqanimaj ri kubʼij ri Jehová (Rom. 6:17; 1 Ped. 1:22). Unimaxik ri kubʼij ri Dios kojutoʼo rech kojkam ta pa ri nimalaj kʼaxkʼolil.
4. ¿Jas kqil na pa wajun kʼutunem riʼ?
4 Pa wajun kʼutunem riʼ, kqil na kebʼ bʼantajik che kojutoʼo rech xaq xiw kqakoj ri kubʼij ri Biblia y kojniman che ri utinamit ri Jehová. Y kqil na oxibʼ jastaq che rajawaxik kqabʼano rech amaqʼel kqakoj ri kubʼij ri Biblia.
E BʼANTAJIK CHE KOJUTOʼO RECH KQETAʼMAJ WE QASTZIJ RI TAJIN KBʼIX CHQE
5. ¿Jas kojutoʼ wi ri noʼw ibʼ chuwach ri Jehová rech kqetaʼmaj chrij ri qastzij?
5 Ri now ibʼ chuwach ri Jehová. Are chiʼ jun winaq kunaʼ ribʼ chuwach ri Jehová, rukʼ wariʼ tajin kukʼutu che loqʼ ri Jehová chuwach y che kubʼan ta jun jastaq che kuya bʼis che. Rech kojqaj chuwach ri Jehová rajawaxik kqetaʼmaj jas riʼ ri utz y ri utz taj, ri qastzij y ri molom tzij (Prov. 2:3-6; Heb. 5:14). Kqaj taj che ri xibʼin ibʼ chkiwach ri winaq are más nim na chuwach ri loqʼoqʼebʼal che kqanaʼ che ri Jehová, rumal che ri utz kkil ubʼanik ri winaq utz ta kril ri Jehová.
6. ¿Jas xubʼan chke ri 10 espías ri xibʼin ibʼ chkiwach ri winaq?
6 We más kqaxiʼj qibʼ chkiwach ri winaq y nim ta más ri qaloqʼoqʼebʼal che ri Jehová, weneʼ kubʼano che kqakoj ri molom taq tzij che kʼo ta ubʼanik rukʼ ri kubʼij ri Jehová. Chojchoman chkij ri 12 espías che xebʼe che rilik ri ulew che kuya na ri Jehová chke ri israelitas. E 10 chke sibʼalaj xkixiʼj kibʼ chkiwach ri cananeos y xkikubʼsaj ta kikʼuʼx chrij ri Jehová, rumal laʼ xkibʼij: «[¡]Man kojkuʼin ta che kichʼakik taq we winaq riʼ! Ri e areʼ sibʼalaj kʼo na kichuqʼabʼ chqawach oj» (Núm. 13:27-31). Paneʼ chkiwach ri e areʼ ri cananeos más kʼo na kichuqʼabʼ. Are kʼu, are chiʼ xkibʼij che kekun ta che kichʼakik ri kikʼulel, tajin ta kkikubʼsaj kikʼuʼx chrij ri Jehová. Are ta xechoman chrij ri kraj ri Jehová che kkibʼan ri israelitas. We ta xnaʼtaj chke ri ubʼanom ri Jehová che kitoʼik nabʼe kanoq. Qas xkichʼobʼ riʼ che ri e kikʼulel kekun taj kechʼojin rukʼ ri Jehová che kʼo nim uchuqʼabʼ. Are kʼu ri Josué y ri Caleb xkixiʼj ta kibʼ: ri e areʼ xkikubʼa kikʼuʼx chrij ri Jehová y are xkibʼan ri kqaj chuwach. Rumal laʼ xkibʼij wariʼ che ri tinamit: «We ri Ajawaxel kutoqʼobʼisaj qawach, kojutoʼ na che okem chupam we ulew riʼ kuyaʼ kʼu na chqe» (Núm. 14:6-9).
7. ¿Jas kojtoʼwik rech kqaya ta kan uloqʼoqʼexik ri Jehová? (Xuqujeʼ chawilaʼ ri wachbʼal).
7 Ri kojtoʼwik rech kqaya ta kan uloqʼoqʼexik ri Jehová are che kojchoman na chrij ri utz krilo, je wariʼ utz ri kqachaʼ ubʼanik pa ri qakʼaslemal (Sal. 16:8). Are chiʼ kasikʼij chrij ri ukʼaslemal jun winaq pa ri Biblia, chachomaj: «We ta xinkʼojiʼ chilaʼ, ¿jas ta riʼ ri xinchaʼ ubʼanik?». Jun kʼutbʼal, chachomaj che atatabʼem ri tajin kkibʼij ri 10 espías. ¿La kakoj ri kkibʼij y kayaʼo che ri xibʼin ibʼ chkiwach ri winaq kchʼakan pa wiʼ? ¿O más kakubʼsaj akʼuʼx chrij ri Jehová y kabʼan ri kqaj chuwach? Kʼi chke ri israelitas xkikoj taj che ri Josué y ri Caleb tajin kkibʼij ri qastzij. ¿Jas xkikʼulmaj rukʼ wariʼ? Xekun taj xeʼok pa ri Tzujum Ulew (Núm. 14:10, 22, 23).
¿Jachin riʼ kakoj re? (Chawilaʼ ri párrafo 7).
8. ¿Jas e bʼantajik rajawaxik kekʼojiʼ qukʼ y jasche?
8 Machʼachʼem. Ri Jehová kukʼut ri qastzij chkiwach ri machʼalik taq winaq (Mat. 11:25). Are chiʼ xkʼut ri qastzij chqawach, xqamachʼ qibʼ y xqaya bʼe chke ri nikʼaj chik xojkitoʼo (Hech. 8:30, 31). Are kʼu, rajawaxik kqachajij qibʼ rech kqabʼan ta nimal. Ri nimal kubʼano che kqachomaj che más nim ubʼanik ri kqabʼij chuwach ri kubʼij ri Biblia y ri utinamit ri Jehová.
9. ¿Jas kojtoʼwik rech amaqʼel kqakʼut machʼachʼem?
9 ¿Jas kojtoʼwik rech amaqʼel kqakʼut machʼachʼem? Chnaʼtaj chqe che ri Jehová más nim na ubʼanik chqawach (Sal. 8:3, 4). Y kojkunik kqabʼij che ri Jehová che kojutoʼo rech amaqʼel kojux machʼalik taq winaq y kqayaʼo che kukʼam qabʼe. Ri Jehová kojutoʼ na rech are kqabʼan ri kubʼij ri Biblia y ri utinamit y are ta kqabʼan ri kqaj oj. Are chiʼ kqasikʼij ri Biblia, chqilaʼ jasche ri Jehová are utz keril ri winaq che kkimachʼ kibʼ y itzel keril ri kkibʼan nimal. Y are chiʼ kyaʼ jun eqeleʼn chawe pa ri congregación, amaqʼel chakʼutuʼ machʼachʼem y mabʼano che ri nikʼaj chik nim katkil wi.
¿JAS RAJAWAXIK KQABʼANO RECH AMAQʼEL KQANIMAJ RI KUBʼIJ RI BIBLIA?
10. ¿E jachin tajin kukoj ri Jehová che ukʼamik ubʼe ri utinamit?
10 Amaqʼel chojniman che ri utinamit ri Jehová. Pa ri ojer Israel, ri Jehová xukoj ri Moisés y ri Josué rech kkibʼij che ri tinamit ri rajawaxik kubʼano (Jos. 1:16, 17). Ri israelitas xkiriq utzilal are chiʼ xkinimaj ri xbʼix chke kumal ri winaq che e chaʼom rumal ri Jehová. Are chiʼ xqʼax ri tiempo y are chiʼ xkʼojiʼ ri nabʼe congregación cristiana, ri Jehová xeʼukoj ri 12 apóstoles rech kkibʼij chke ri cristianos ri rajawaxik kkibʼano (Hech. 8:14, 15). Qʼaxinaq chi jujun junabʼ, xekoj jujun kʼamal bʼe re Jerusalén. Are chiʼ ri cristianos xkibʼan ri xbʼix chke, «ko xetakʼabʼax pa ri kikojonik. Ronojel qʼij kekʼiyirik» (Hech. 16:4, 5). Kamik, ri Jehová kojutewchij are chiʼ kqabʼan ri kubʼij ri utinamit. Are kʼu, ¿jas kunaʼ riʼ ri Jehová we kojniman ta chke ri achijabʼ che uchaʼom rech kkikʼam qabʼe? Rech kqetaʼmaj wariʼ, chqilaʼ ri xkʼulmatajik are chiʼ ri israelitas xa jubʼiqʼ chi kraj keʼok pa ri Tzujum Ulew.
11. ¿Jas xkikʼulmaj ri winaq che xeniman ta che ri uchaʼom ri Jehová rech kukʼam ubʼe ri utinamit? (Xuqujeʼ chawilaʼ ri wachbʼal).
11 Are chiʼ ri israelitas e bʼenaq rech keʼok pa ri Tzujum Ulew, jujun achijabʼ che nim kibʼanik xkixutuj ri taqanik che uyaʼom ri Jehová che ri Moisés. Xkibʼij: «Ronojel ri tinamit [xaq xiw ta ri Moisés] tastajinaq rumal ri Dios, kʼo kʼut ri Ajawaxel qukʼ qonojel» (Núm. 16:1-3). Qastzij che chuwach ri Jehová «ronojel ri tinamit» are tastalik, are kʼu ri areʼ uchaʼom ri Moisés rech kukʼam ubʼe ri tinamit (Núm. 16:28). Rumal laʼ, are chiʼ kʼax xechʼaw che ri Moisés, jetaneʼ che ri Jehová tajin kkibʼij wi. Are ta xechoman chrij ri kraj ri Dios, xaneʼ are ri kkaj ri e areʼ, are xkaj che nim xeʼil wi. Ri Jehová xusachisaj kiwach ri itzel taq kʼamal bʼe riʼ y ri kʼi israelitas che xeteriʼ chkij (Núm. 16:30-35, 41, 49). Ri Jehová je kubʼan kamik, keʼuxutuj ri winaq che keniman ta che ri utinamit.
¿Jachin ta xatoʼ uwiʼ riʼ? (Chawilaʼ ri párrafo 11).
12. ¿Jasche kqakubʼsaj qakʼuʼx chrij ri utinamit ri Jehová?
12 Kʼo rumal che kqakubʼsaj qakʼuʼx chrij ri kuya ubʼixik ri utinamit ri Jehová. Are chiʼ ri kʼamal taq bʼe che e kʼo pa ri utinamit ri Jehová kkilo che rajawaxik kqʼalajisax más chrij jun texto rech ri Biblia o chrij ri qachak, utz che aninaq kqanimaj ri kkibʼij (Prov. 4:18). Ri e areʼ aninaq kkikʼex ri rajawaxik kkʼexik rumal che kkaj kkibʼan ri kraj ri Jehová. Y kkikoj kichuqʼabʼ rech pa ri Biblia kkesaj wi ri kkiya ubʼixik, ri utzalaj taq tzij che rajawaxik kojkojon chrij.
13. ¿Jas riʼ «ri utzalaj tzij ri man kʼo ta etzelal che» y jas rajawaxik kqabʼan rukʼ?
13 «Ri utzalaj tzij ri man kʼo ta etzelal che» (2 Tim. 1:13). ¿Jas riʼ «ri utzalaj tzij ri man kʼo ta etzelal che»? Are ri kubʼij ri Biblia (Juan 17:17). Ronojel ri kojkojon chrij pa ri Biblia esam wi. Ri utinamit ri Jehová ubʼim chqe che amaqʼel kqabʼan ri kubʼij ri Biblia. Kqariq utzilal we amaqʼel kqabʼano.
14. ¿Jas xbʼanowik che jujun cristianos xkiya kan «ri utzalaj tzij ri man kʼo ta etzelal che»?
14 ¿Jas kqariq riʼ we kqaya kan ubʼanik «ri utzalaj tzij ri man kʼo ta etzelal che»? Chqilaʼ ri xkʼulmataj pa ri nabʼe siglo. Jujun cristianos tajin kkibʼij che ri uqʼij ri Jehová ya xopanik. Weneʼ kʼo jun carta che kubʼij chrij wariʼ, che jetaneʼ are ri apóstol Pablo xtzʼibʼanik. Jujun cristianos re Tesalónica xechoman ta na chrij we qastzij ri tajin kbʼixik xaneʼ xkikojo y xkitzijoj chke nikʼaj chik. Xkikoj ta riʼ ri xbʼix chke we ta are xnaʼtaj ri ukʼutum kan ri Pablo chkiwach (2 Tes. 2:1-5). Ri Pablo xubʼij chke che kkikoj ta ronojel ri kbʼix chke. Y rech kkikʼulmaj ta chi jumul wariʼ, xubʼij ri e tzij riʼ are chiʼ xukʼis utzʼibʼaxik ri ukabʼ carta, xubʼij: «In Pablo kinyaʼ rutzil iwach rukʼ ri nuqʼabʼ. Are wetal waʼ pa ronojel wuj ri kintzʼibʼaj chiwe. Je kintzʼibʼam waʼ» (2 Tes. 3:17).
15. ¿Jas kqabʼan che uxutuxik ri molom taq tzij che kilitajik che jetaneʼ qastzij? Chayaʼ jun kʼutbʼal. (Xuqujeʼ chawilaʼ ri e wachbʼal).
15 ¿Jas kqetaʼmaj chrij ri xutzʼibʼaj ri Pablo chke ri tesalonicenses? We kqata jun noticia che kʼo ta ubʼanik rukʼ ri kubʼij ri Biblia, maqakoj ri kbʼixik. Pa ri ojer Unión Soviética, ri e qakʼulel xkitaq jun carta —kubʼij che are ri central mundial xtaqow loq— jawiʼ kubʼij che utz we kkibʼan jun organización rech kajwataj ta chi ri kitobʼanik ri nikʼaj chik chke. Paneʼ ri carta kubʼij che are ri central mundial xtaqow loq, are kʼu ri qachalal che kkiloqʼoqʼej ri Jehová, xkikoj ta ri xbʼix chke. Xkilo che ri kubʼij ri carta junam ta rukʼ ri ketaʼmam. Kamik, ri e qakʼulel are kkikoj ri internet rech kojkisacho y kkijach qawach. Kqachajij qibʼ rech kubʼan ta kebʼ qakʼuʼx y qas kqil na che ri kqatatabʼej y ri kqasikʼij kʼo ubʼanik rukʼ ri qastzij che kʼo pa ri Utzij ri Dios (2 Tes. 2:2; 1 Juan 4:1).
Mikoj ri molom taq tzij che kilitajik che jetaneʼ qastzij. (Chawilaʼ ri párrafo 15). a
16. Junam rukʼ ri kubʼij Romanos 16:17, 18, ¿jas kqabʼan kukʼ ri kkiya kan upatanexik ri Jehová?
16 Katas ta awibʼ chke ri keqʼijilan che ri Jehová. Ri Dios kraj che qonojel kqaqʼijilaj pa junamam y kojkun che ubʼanik wariʼ we amaqʼel kqakoj ri kubʼij ri Biblia. Ri kkiya kan ubʼanik ri kubʼij ri Biblia, kkibʼano che kkʼojiʼ tasoj ibʼ pa ri congregación. Rumal laʼ ri Dios kubʼij chqe che kqaxutuj ri kachilanik ri winaq riʼ rech kqaya ta kan upatanexik (chasikʼij Romanos 16:17, 18).
17. ¿Jas kkʼulmatajik we kqaya ta kan ubʼanik ri kubʼij ri Biblia?
17 We kqakubʼsaj qakʼuʼx chrij ri Biblia y kqabʼan ri kubʼij, kuriq ta kʼax riʼ ri qakojonik (Efes. 4:15, 16). Kqakoj ta riʼ ri molom taq tzij che kubʼij ri Satanás y ri Jehová kojuchajij na riʼ pa ri nimalaj kʼaxkʼolil. Qas chqakubʼsaj qakʼuʼx chrij ri qastzij y «are kʼu ri Dios aj jamaril kakʼojiʼ na» qukʼ (Filip. 4:8, 9).
BʼIXONEM 122 Ko chojtakʼaloq, kʼo ta kojsilabʼanik
a RI KUKʼUT RI E WACHBʼAL: Ri wachbʼal riʼ xaq jun kʼutbʼal. Ri e qachalal re ri ojer Unión Soviética xopan jun carta kukʼ che jetaneʼ are ri central mundial xtaqow bʼik, are kʼu are ri e qakʼulel xetaqowik. Kamik, weneʼ ri e qakʼulel kkiya molom taq tzij chrij ri utinamit ri Jehová pa internet rech kqakoj ri molom taq tzij che kkibʼij.
