Pa ri kebʼ versículos riʼ kyaʼ ubʼixik nueve bʼantajik che rajawaxik kkikʼut ri cristianos. Ri texto kubʼij: «Are kʼu waʼ ri uwachinik ri uxlabʼixel: kʼo loqʼoqʼebʼal kikʼuʼx ri winaq, kekikotik, kʼo jamaril chkixoʼl kukʼ nikʼaj chik, kʼo kikochʼonik, chʼuchʼuj ri kanimaʼ, kkibʼanalaʼ toqʼobʼ, e jik pa ri kitzij, man kkinimarisaj ta kibʼ, xuqujeʼ ketaqan pa kiwiʼ chbʼil kibʼ. Man kʼo ta pixabʼ ri kubʼij chi ma ta kebʼan we jastaq riʼ». Are kʼu ri ruxlabʼixel ri Dios xaq xiw ta kojutoʼ che ukʼutik ri e bʼantajik riʼ.

Chqilaʼ ri xutzʼibʼaj ri apóstol Pablo nabʼe chuwach ri versículos riʼ: «Qʼalaj ri kichak ri kkibʼan ri kirayibʼal aj winaq re mak: kemakun kukʼ ixoqibʼ achijabʼ, kkibʼan tzʼil taq jastaq, kkibʼan kʼixbʼal taq jastaq, kekiqʼijilaj taq diosibʼ, kkibʼan itzinik, kkikʼulelaj kibʼ, kkiyak chʼoj, kpe koyowal we jun chik kuriq utzil. Chanim kpe koyowal, xaq xuwi kkibʼan ri utz kkil wi ri e areʼ, kkitas kibʼ chkij nikʼaj chik, kkikʼam jalajoj taq nojibʼal. Man kkaj taj kkiriq utzil nikʼaj chik, keqʼabʼarik, kkibʼan nimalaj mak are taq kkimulij kibʼ che nimaʼq taq waʼim. Xuqujeʼ kkibʼan nikʼaj jastaq chik ri man e utz taj» (Gál. 5:19-21). Rumal laʼ wariʼ kukʼutu che weneʼ ri Pablo xuya ubʼixik che e kʼo «nikʼaj jastaq chik» chupam ri e itzel taq rayinik «rech ri uwach Ulew» junam che kuya ubʼixik Colosenses 3:5. Xaq junam xkʼulmataj rukʼ ri e nueve bʼantajik che xubʼij ri apóstol Pablo pa Gálatas 5:22, 23. Pa ri lista riʼ, Pablo xuya ta ubʼixik ronojel ri e bʼantajik che ri uxlabʼixel kojutoʼ che ukʼutik.

Kqachʼobʼ wariʼ are chiʼ kqajunamaj ri bʼantajik kubʼij pa Gálatas rukʼ ri xubʼij ri apóstol Pablo che ri congregación re Éfeso: «Ri uwachinik kʼu ri saqilal are ronojel utzil, sukʼil xuqujeʼ qastzij» (Efes. 5:8, 9). We kqilo, ri utzil, ri sukʼilal xuqujeʼ ri qastzij are jun chke ri uwachinik ri saqilal, are kʼu xuqujeʼ are jun chke «ri uwachinik ri uxlabʼixel» che xa xutzʼibʼaj ta ri Pablo pa Gálatas 5:22, 23.

Kjunamataj rukʼ wariʼ, Pablo xubʼij che Timoteo che kukoj uchuqʼabʼ che ukʼutik seis bʼantajik: «Chawilaʼ awibʼ rech kabʼan ri sukʼ, katniman che ri Dios xuqujeʼ katkojon che, keʼaloqʼoqʼej nikʼaj chik, kachʼij ri kʼax, manimarisaj awibʼ» (1 Tim. 6:11). Xaq xiw oxibʼ chke —ri kojonik, ri loqʼoqʼenik xuqujeʼ ri apacibilidad— are e jujun chke «ri uwachinik ri uxlabʼixel». Are kʼu kajwataj che Timoteo ri utobʼanik ri uxlabʼixel rech kkunik kukʼut ri e nikʼaj chi bʼantajik che ri Pablo xuya ubʼixik: ri ukʼutik sukʼilal, unimaxik ri Dios xuqujeʼ ukʼutik kochʼonik (chajunamisaj rukʼ Colosenses 3:12; 2 Pedro 1:5-7).

Rumal laʼ, Gálatas 5:22, 23 kuya ta ubʼixik ronojel ri e bʼantajik che ri cristianos rajawaxik kqakʼut rukʼ ri utobʼanik ri ruxlabʼal ri Dios. Wariʼ kojutoʼ che ukʼutik ri nueve bʼantajik re «ri uwachinik ri uxlabʼixel». Are kʼu kʼo más bʼantajik che kojkunik kqakʼutu are chiʼ kojkʼiy más pa ri qakojonik xuqujeʼ chiʼ kqakʼut «ri kʼakʼ kʼaslemal, jas ri kqaj chuwach ri Dios, qas pa sukʼilal xuqujeʼ qas pa ri chʼajchʼojil, ri ktaqan wi ri uqastzij» (Efes. 4:24).