Xinalax pa ri 19 re mayo re ri junabʼ 1940 pa ri tinamit Amiún (Líbano). Xokʼow kebʼ oxibʼ junabʼ xojbʼe pa ri tinamit Trípoli. Ri nufamilia sibʼalaj e utz, ketaʼm uwach ri Jehová y kkiloqʼoqʼej. Oj cinco qachalal qibʼ, e oxibʼ ixoqibʼ y oj kebʼ achijabʼ, in ri in chʼiʼp chke konojel. Ri nufamilia are ta más nim kril ri uchʼakik pwaq, xaneʼ are usikʼixik uwach ri Biblia, bʼenam pa ri e riqbʼal ibʼ y kitoʼik e nikʼaj chi winaq rech kketaʼmaj uwach ri Dios.

Pa ri qacongregación e kʼo kebʼ oxibʼ qachalal e chaʼom rech kebʼe pa ri kaj. Jun chke are ri qachalal Michel Aboud, che are kyaʼow ri etaʼmabʼal chrij ri Biblia pa ri tiempo riʼ. Ri areʼ xretaʼmaj chrij ri Biblia pa Nueva York y pa taq ri junabʼ 1920 xumajij utzijoxik utzij ri Dios pa Líbano. Knaʼtaj chwe che ri qachalal Michel Aboud sibʼalaj nim keril wi y sibʼalaj xeʼutoʼ ri qachalal Anne y Gwen Beavor, e kebʼ qachalal che xkibʼan graduar kibʼ pa ri Tijobʼal rech Galaad. E areʼ xeʼux e utzalaj taq achiʼl chke ri qafamilia. Qʼaxinaq chi kʼi junabʼ, sibʼalaj xinkikotik are chiʼ xinriq chi ri al Anne pa Estados Unidos. Are chiʼ xqʼax chi jubʼiqʼ tiempo xinriq chi ri al Gwen che xkʼuliʼ rukʼ ri qachalal Wilfred Gooch, pa ri tiempo riʼ tajin kepatanin pa ri sucursal re Londres (Inglaterra).

Are chiʼ kʼa in akʼal na e kʼi ta Testigos e kʼo pa Líbano. Paneʼ jeriʼ, xqakʼut ri kubʼij ri uTzij ri Dios chke ri winaq. Paneʼ e kʼi kʼamal taq bʼe re ri qastzij taj kojonem xkaj taj, are kʼu xqaya ta kan ubʼanik. Kimik knaʼtaj jujun jastaq chwe che xqakʼulmaj.

Jumul, are chiʼ tajin kqatzijoj ri utzij ri Dios rukʼ ri wanabʼ al Sana pa jun chke ri apartamentos re jun nimalaj ja. Tajin kojtzijon rukʼ jun chke ri winaq kʼate xqilo xopan jun sacerdote, weneʼ xa kʼo xsikʼin apanoq. Xumaj uyoqʼik ri wanabʼ y xupuyij o xuchʼikmayij lo pa ri gradas. Aninaq xopan ri policía, xqachomaj che xa kʼo jun winaq xbʼanow toqʼobʼ rech xusikʼij apanoq. Xojkitoʼ y xkiyak ri wanabʼ rumal che kʼa jelaʼ xeqaj wi y xsokotajik. Xkichap bʼi ri sacerdote y are chiʼ e kʼo chi pa ri estación re ri policía xkiriq jun qʼaqʼ rukʼ. Ri kinimal ri policía xubʼij che: «¿Jas qas abʼanik at? Paneʼ kabʼij che at pataninel re ri Dios, are kʼu más kinimal elaqʼomabʼ y kamisanelabʼ katilitajik».

Xuqujeʼ ksach ta chwe are chiʼ e qachiʼl ri qachalal xqatoj bʼi jun alaj chʼichʼ rech xojukʼam bʼi che utzijoxik utzij ri Dios pa jun alaj tinamit che naj kʼo wi. Kʼate keqil e kʼi winaq xepe che qachʼayik, are ri sacerdote kʼo pa ri tinamit xemulin loq rumal che utz ta krilo che xojopan chilaʼ. Xkimaj ukʼaqik abʼaj chqij y ri nutat xsokotaj ri ujolom. Knaʼtaj chwe che sibʼalaj kturuw ukikʼel chupalaj, rachiʼl ri nunan xeʼaqʼan pa ri alaj chʼichʼ y oj sibʼalaj qaxiʼm qibʼ oj teren chkij. Ksach ta chwe ri xubʼij ri nunan are chiʼ tajin kusuʼ ri upalaj ri nutat: «Jehová, chakuyuʼ kimak, rumal che kkichʼobʼ ta ri tajin kkibʼano».

Jumul chik xojbʼe che kisolixik ri nufamilia pa ri tinamit jawiʼ xinkʼiy wi. Are chiʼ xojopan rukʼ ri numam kʼate kqilo kʼo ri obispo rukʼ, jun kʼamal bʼe che nim kil wi kumal ri winaq. Areʼ retaʼm che ri nutat nunan e testigos rech Jehová. Paneʼ kʼate seis nujunabʼ, xuta chwe: «¿Jasche kʼa majaʼ kabʼan aqasanjaʼ?». Xinbʼij che che kʼa in akʼal na y rech kinkunik kinbʼan nuqasanjaʼ rajawaxik kwetaʼmaj más chrij ri Biblia y kkʼojiʼ jun ko nukojonik. Rumal che utz ta xuta ri xinbʼij che, xubʼij che ri numam che xa kʼo ta nukʼixbʼal chinupalaj.

Qastzij che xkʼulmataj jujun jastaq che e utz taj. Are kʼu konojel ta ri winaq re Líbano e itzel taq winaq xaneʼ utz qakʼulaxik kkibʼano. Rumal laʼ, sibʼalaj utz kel ri utzijoxik utzij ri Dios chqawach y e kʼi winaq kqaya etaʼmanik re ri Biblia chke.

Are chiʼ kʼa in kʼo na pa ri tijobʼal, jun qachalal re Venezuela xopan pa ri qatinamit Líbano. Xumaj bʼenam pa ri riqbʼal ibʼ pa ri qacongregación y xkimaj uchʼabʼexik kibʼ rukʼ ri wanabʼ ri al Wafa. Are chiʼ xqʼax ri tiempo xekʼuliʼk y xebʼe pa Venezuela. Are chiʼ ri al Wafa kutaq lo cartas, kubʼij lo che ri nutat che kojbʼe pa Venezuela rumal che sibʼalaj kojubʼisoj y rumal laʼ xojbʼek.

 Xojopan pa Caracas pa ri 1953 y ri qachoch kʼo chunaqaj ri palacio re ri presidente. Rumal che kʼa in akʼal na sibʼalaj utz kwilo are chiʼ kokʼow bʼi ri presidente pa ri uchʼichʼ. Are kʼu ri nutat nunan kʼax xkiriqo rech xukʼam kiwach chilaʼ rumal che kʼakʼ ronojel ri jastaq; ri tinamit, ri chʼabʼal, ri kibʼantajik ri winaq, ri rikil y ri clima. Y kʼo jun jastaq che sibʼalaj bʼisobʼal xkʼulmatajik are chiʼ kʼate tajin kukʼam kiwach chilaʼ.

Xaq kʼateʼ ri nutat xunaʼo che qas ta utz kʼolik. Are kʼu xqamayo rumal che kʼo ta jumul kyawajik, are jun achi che kʼo uchuqʼabʼ. Xqetaʼmaj che kʼo cáncer chupam rumal laʼ xbʼan operar. Are kʼu, chiʼ kʼate jun semana qʼaxinaq, xkamik.

Wariʼ xuya jun nimalaj bʼis chqe. Kʼate 13 nujunabʼ, kqariq ta chik jas kqabʼano y xqachomaj che ronojel xkʼis chilaʼ. Naj tiempo ri nunan sibʼalaj xbʼisonik rumal che amaqʼel knaʼtaj ri nutat che, are kʼu xqachʼobʼo che kʼo ta kqachʼako we xaq xiw kojchoman chrij ri xkʼulmatajik y ri Jehová xuya qachuqʼabʼ. Are chiʼ 16 chi nujunabʼ y xinbʼan graduar wibʼ che bachillerato pa Caracas, xinchʼobʼo che rajawaxik kintoʼ ri nufamilia.

Pa riʼ ri tiempo, ri wanabʼ ri al Sana xkʼuliʼ rukʼ Rubén Araujo che xubʼan graduar ribʼ pa ri Tijobʼal rech Galaad y xtzalij bʼi chilaʼ pa Venezuela, tekʼuriʼ xkichomaj kebʼe pa Nueva York. Ri nufamilia kichomam che rajawaxik kinbʼe pa ri universidad, rumal laʼ xinteriʼ bʼi chkij ri al Sana y ri rachajil pa Nueva York rech kinok pa universidad chilaʼ. Are chiʼ in kʼo chi chilaʼ, ri utz kikʼutbʼal xinutoʼ rech xinkowirisaj ri nukojonik. Xuqujeʼ pa ri congregación Brooklyn Spanish che kinbʼe wi, e kʼo qachalal che sibʼalaj e ko pa ri kikojonik. E kebʼ chke ri qachalal riʼ are ri e qachalal Milton Henschel y Frederick Franz che tajin kepatanin pa ri Betel re Brooklyn.

Are chiʼ ya kinkʼis ri nabʼe junabʼ pa ri universidad, xinchoman chrij ri tajin kinbʼan pa ri nukʼaslemal. Pa ri wuj Ri Chajinel nusikʼim kʼi kʼutunem che kchʼaw chrij ri upatanexik más ri Jehová, rumal laʼ xinchomaj che kʼo rajawaxik kinbʼano. Xwilo che ri precursores, ri betelitas che e kʼo pa ri nucongregación sibʼalaj kekikotik y kwaj in kinux junam kukʼ e areʼ. Are kʼu xwilo che kinkun taj, rumal che nubʼanom ta nuqasanjaʼ. Rumal laʼ xinchomaj ujachik ri nukʼaslemal che ri Jehová y pa ri 30 re marzo re 1957 xinbʼan nuqasanjaʼ.

Are chiʼ nubʼanom chi nuqasanjaʼ xinchomaj ubʼanik jun jastaq nim ubʼanik: upatanexik más ri Jehová. Xwaj xinux precursor, are kʼu xinchʼobʼo che are jun jastaq nim ubʼanik y weneʼ kʼo jujun taq kʼax kinriqo. ¿Jas kinbʼano rech kinkunik kinbʼe pa ri universidad y kinbʼan ri precursorado? Pa ri cartas che xqataqalaʼ  chbʼil qibʼ rukʼ ri nunan y kukʼ ri wachalal che e kʼo kan pa Venezuela, xinbʼij chke che kinbʼe ta chi pa ri universidad y kinmaj ubʼanik ri precursorado.

Pa junio re 1957 xintzalij bʼi pa Caracas. Are kʼu chiʼ xinopan kukʼ ri nufamilia xwilo che kʼo rajawaxik chke, rajawaxik kirajil rech kʼo kkitijo, kkijo y nikʼaj chi jastaq. Xinchomaj jas kinbʼan che kitoʼik. Xtzujux jun chak chwe, are kʼu ri rumal che xintzalij bʼi pa Venezuela are che kinux precursor. Rumal laʼ xinchomaj ubʼanik ri kebʼ jastaq. Pa kʼi junabʼ, sibʼalaj kʼi horas xinkoj pa ri nuchak ronojel taq qʼij, are kʼu xuqujeʼ xinux precursor. Wariʼ xubʼano che sibʼalaj xlatzʼobʼ nuwach, are kʼu xuya nimalaj kikotemal chwe.

Jun chi jastaq che xuya nimalaj kikotemal chwe are retaʼmaxik uwach ri al Sylvia, jun jeʼlikalaj qachalal che kel Alemania, che sibʼalaj kuloqʼoqʼej ri Jehová y chilaʼ kʼo wi pa Venezuela kukʼ ri utat unan. Are chiʼ xqʼax ri tiempo xojkʼuliʼk y xekʼojiʼ e kebʼ qalkʼwal: ri a Michel (che kqabʼij a Mike che) y ri al Samira. Xuqujeʼ xqachomaj che utz kkʼojiʼ ri nunan qukʼ rech kqachajij, paneʼ xinkun ta chik xinbʼan ri precursorado rumal che rajawaxik kenwilij ri nufamiliares, are kʼu amaqʼel xinkʼut ri ubʼantajik jun precursor. Pa ronojel taq ri qavacaciones xqabʼan ri precursorado auxiliar rukʼ ri al Sylvia.

Ri e qalkʼwaʼl kʼa e kʼo na pa ri tijobʼal are chiʼ xkʼulmataj ri xinbʼij chiwe nabʼe. Ri qastzij kʼo kʼi jastaq we y nim kinkil wi ri e winaq che kechakun pa taq taq ri bancos. Are kʼu, ri más xwaj are che kchʼobʼotaj nuwach che in jun pataninel re ri Jehová. Rumal laʼ, in y ri al Sylvia xqamaj rilik jas qas rajawaxik chqe. Xqachomaj che we kinya kan ri nuchak, ktoj lo riʼ ri tiempo che xinchakun pa ri banco. Rumal che kʼo ta qakʼas, we xaq xiw kqaloqʼ ri jastaq ri más rajawaxik chqe, ri pwaq che kya lo chwe naj kuchʼij riʼ.

Kʼax xinriq che ubʼanik wariʼ, are kʼu ri loqʼalaj wixoqil y ri nunan sibʼalaj xinkitoʼo. Rumal laʼ, xinchʼobʼ chi jumul che kinkunik kinpatanij más ri Jehová. ¡Sibʼalaj xinkikotik! Xwilo che kʼo ta chi jas kqʼaten nuwach, are kʼu xaq kʼateʼ kʼo chi jun jastaq xkʼulmatajik.

Ri kunanel xubʼij chqe che kkʼojiʼ jun alaj qalkʼwaʼl. Sibʼalaj xojkikotik, are kʼu ri in kʼa tajin kinchoman na chrij ri precursorado. Xqachʼobʼo che xa jubʼiqʼ chi kraj kkʼojiʼ ri alaj  qaneʼ y sibʼalaj kojkikotik che kʼo chi jun kʼakʼ qafamiliar. Are kʼu, ¿jas kkʼulmataj rukʼ ri qachomam ubʼanik? ¿la kinkun na che ubʼanik ri precursorado?

Xqaya ta kan ubʼanik ri qachomam loq. Ri alaj neʼ xkʼojiʼ pa ri abril re 1985, a Gabriel xqakoj che ri ubʼiʼ. Xinya kan ri chak pa ri banco y xinux chi jumul precursor regular pa ri junio re 1985. Are chiʼ xqʼax ri tiempo xinux jun chke ri e kʼo pa ri Comité re Sucursal re ri tinamit Venezuela. Rumal che ri sucursal kʼo pa 80 kilómetros (50 millas) che Caracas, rajawaxik kebʼ oxibʼ mul kinbʼe pa jun semana.

Ri sucursal kʼo pa ri tinamit La Victoria ubʼiʼ, rumal laʼ xqaj xojopan pa ri tinamit riʼ rumal che chilaʼ kʼo wi ri Betel. Are jun jastaq kʼax ubʼanik, are kʼu nim kwil wi y sibʼalaj kinmaltyoxij ri utobʼanik ri nufamilia. Ri wanabʼ al Baha ubʼiʼ xubʼij che kuchajij ri qanan. Ri a Mike kʼulan chik, are kʼu ri al Samira y ri a Gabriel kʼa e kʼo na qukʼ. Rumal laʼ rajawaxik xekiya kan ri e kachiʼl che e kʼo chilaʼ. Ri loqʼalaj nuSylvia xukoj uchuqʼabʼ rech xukʼam uwach pa ri tinamit ri xojopan wi, rumal che más nitzʼ chuwach ri tinamit Caracas. Kʼi jastaq xekʼextajik, rumal che xuqujeʼ rajawaxik xqakʼamanisaj qibʼ rech xojkʼojiʼ qonojel pa jun nitzʼ ja are chiʼ xojopan pa ri tinamit La Victoria.

Tekʼuriʼ xekʼextaj chi kʼi jastaq. Ri a Gabriel xkʼuliʼk, ri al Samira xutzukuj jawi kkʼojiʼ wi utukel. Xuqujeʼ pa ri 2007, in y ri al Sylvia xojsikʼix pa Betel, are jun nimalaj tewchibʼal qariqom. Ri a Mike ri qanabʼeʼal, kʼamal bʼe re jun congregación y precursor rachiʼl ri al Mónica, ri rixoqil. Ri a Gabriel xuqujeʼ kʼamal bʼe y tajin kepatanin pa Italia rukʼ ri al Ambra, ri rixoqil. Ri al Samira are jun precursora y tajin ktobʼan lo pa ri rachoch che ubʼanik ri chak che kbʼan pa Betel.

Kʼo kʼi jastaq nuchaʼom pa ri nukʼaslemal y sibʼalaj uyaʼom nim kikotemal chwe. Sibʼalaj kinmaltyoxinik, rumal ronojel ri jastaq nubʼanom che upatanixik ri Jehová. Pa ronojel ri nukʼaslemal wilom che sibʼalaj nim ubʼanik kkʼojiʼ jun utz qachilanik rukʼ. Apastaneʼ unimal o unichʼal ri kqachaʼ ubʼanik pa qakʼaslemal, ri Jehová kkunik kuya chqe «ri jamaril ri nim chuwach ronojel noʼj» (Filip. 4:6, 7). In y ri al Sylvia sibʼalaj kojkikot che upatanixik ri Jehová pa Betel, y kqachomaj che sibʼalaj utz ronojel ri qachaʼom ubʼanik, rumal che amaqʼel qabʼanom pa qakʼaslemal ri ubʼim ri Jehová.