RI AL Lisa a kubʼij che ri más utz xril chke ri testigos rech Jehová are che kkikʼut utzilal. Y ri al Anne xuqujeʼ je kubʼij wariʼ: «Are chiʼ xwetaʼmaj kiwach ri testigos rech Jehová, ri más utz xwil chke are ri utzilal kkikʼutu». Paneʼ ri e kebʼ qachalal riʼ kimik nim chi kkil usikʼixik ri Biblia y kechoman chrij, are kʼu ri utzilal che xkikʼut ri qachalal chke are más xeʼutoʼ rech xkaj xketaʼmaj chrij ri qastzij.

¿Jas kqabʼan che ukʼutik utzilal y che kuya tobʼanik chke ri e nikʼaj chik? Chqilaʼ kebʼ jastaq che kojkunik kqabʼano: rukʼ ri qatzij y rukʼ ri kqabʼano. Tekʼuriʼ kqetaʼmaj na e jachin chke rajawaxik kqakʼut wi utzilal.

Pa ri capítulo 31 re Proverbios kchʼaw chrij ri utzalaj ixoq rumal che «amaqʼel ktzijon rukʼ noʼj, rukʼ kʼu loqʼoqʼebʼal kʼuxaj» kchʼawik (Prov. 31:26). Ri areʼ kchoman chrij wajun taqanik riʼ are chiʼ kchʼawik y rech utz kubʼan che ubʼixik ri utzij. Ri e tat nan rajawaxik je kkibʼano. Rumal laʼ, e kʼi chke ri e tat nan qas ketaʼm che we kʼax kkibʼan che uchʼabʼexik ri kalkʼwal xa kkibʼan kʼax chke. Y we kkikʼut ta loqʼoqʼebʼal chke, weneʼ keʼajawax ta kumal ri e kalkʼwal. Are kʼu, we kekichʼabʼej rukʼ loqʼoqʼebʼal y utzilal, más kʼax ta kkibʼan riʼ ri e kalkʼwal che kinimaxik.

Qonojel kojkunik kqakʼut utzilal chiʼ kojchʼawik. Pa ri nabʼe taq tzij re Proverbios 31:26 kubʼij wariʼ: «Amaqʼel ktzijon rukʼ noʼj». Wariʼ kraj kubʼij che are chiʼ majaʼ kojchʼawik rajawaxik che qas kqachomaj na ri tzij che kqakojo y ri kqabʼan che ubʼixik. Más na are chiʼ oj kʼo chuwach jun kʼax o jun chʼoj, utz che kojchoman chrij wariʼ: «Ri kinbʼij, ¿la ktobʼanik rech kqaj ri oyowal o xa kunimarisaj ri kʼax?» (Prov. 15:1). Rumal laʼ, qas chqachomaj na ri kqabʼij are chiʼ majaʼ kojchʼawik.

Jun chi proverbio kubʼij: «E kʼo jachin taq kesokon kumal ri kitzij» (Prov. 12:18). We kojchoman chrij ri kubʼan ri qatzij chke ri e nikʼaj chik, kojutoʼo rech kqachomaj na ri kqabʼij. Rumal laʼ, rajawaxik kqakʼut loqʼoqʼebʼal kʼuxaj are chiʼ kojchʼawik rech kqabʼan ta kʼax che jun chi winaq (Efes. 4:31, 32). Ri kqachomaj kʼo ubʼanik rukʼ ri kqabʼij, rumal laʼ rajawaxik kʼo utz taq qachomanik rech utz ri tzij kqakojo are chiʼ kojchʼawik. Ri Jehová uyaʼom jun utz kʼutbʼal chqawach. Are chiʼ ri Elías ri upatanel sibʼalaj uxibʼim ribʼ, ri Jehová xutaq lo jun ángel che uyaʼik uchuqʼabʼ y xuchʼabʼej rukʼ «jun chʼuchʼujalaj uxlabʼik ri xaq nojimal [x]tatajik» (1 Rey. 19:12). Tekʼuriʼ, ri ukʼutik utzilal xaq xiw ta kqakʼut rukʼ ri qatzij. Xuqujeʼ rajawaxik kqakʼut rukʼ ri kqabʼano. Chqilampeʼ jas kqabʼan che ukʼutik.

Resaxik uwach ri Jehová kraj kubʼij che kojchʼaw rukʼ utz taq tzij y kqakʼut utzilal (Efes. 4:32; 5:1, 2). Ri al Lisa che xojchʼaw kaq chrij pa ri nabʼe párrafo, qas xrilo che ri Testigos kkikʼut utzilal che. Kubʼij: «Are chiʼ xqakʼex qachoch rukʼ ri nufamilia, kebʼ kʼulaj che e Testigos xkitaʼ permiso  pa ri kichak rech kojkitoʼ che ukʼolik ri jastaq qe. Y pa ri tiempo riʼ majaʼ kinmajij retaʼmaxik chrij ri Biblia». Ri xkibʼan ri e kebʼ kʼulaj riʼ xubʼano che ri al Lisa xraj xretaʼmaj más chrij ri Jehová.

Ri al Anne che xuqujeʼ xojchʼaw kan chrij pa ri nabʼe párrafo, xuqujeʼ utz xril ri utzilal che xkikʼut ri Testigos. Kubʼij: «Kinkubʼsaj ta nukʼuʼx chrij nijun winaq rumal ri itzelal che kʼo cho ri uwach Ulew». Xuqujeʼ kubʼij: «Chiʼ xwetaʼmaj kiwach ri Testigos, xinchomaj che weneʼ qas ta rukʼ ronojel kanimaʼ kkibʼan ri jastaq. Y xinchomaj, ¿jasche sibʼalaj e utz wukʼ? Are kʼu ri kyaʼow etaʼmanik re ri Biblia chwe sibʼalaj utz ranimaʼ rumal laʼ xinkubʼsaj nukʼuʼx chrij». ¿Jas utzilal xuya wariʼ che ri al Anne? Ri areʼ kubʼij: «Chiʼ xqʼax ri tiempo, qas xbʼe nukʼuʼx chrij ri tajin kwetaʼmaj pa ri Biblia».

We kqilo, ri e kebʼ qachalal riʼ sibʼalaj nim xkil ri utzilal che xkikʼut ri e Testigos chke, y xtobʼanik rech más xkaj xketaʼmaj chrij ri Biblia. Xuqujeʼ xeʼutoʼo rech kkikubʼsaj kikʼuʼx chrij ri Jehová y ri e qachalal.

E jujun kʼax ta kkibʼano kechʼawik, ketzeʼnik rumal ri kibʼantajik. Are kʼu, xaq xiw ta wariʼ rajawaxik kqabʼano rech kqakʼut utzilal chke ri winaq junam rukʼ ri kubʼan ri Dios (chajunamisaj rukʼ Hechos 28:2).

Ukʼutik utzilal are jun chke ri uwachinik ri ruxlabʼixel ri Dios (Gál. 5:22, 23). Rumal laʼ, rech kqakʼut wajun bʼantajik riʼ y kqesaj uwach ri Jehová y ri Jesús, rajawaxik kqataʼ ri ruxlabʼixel ri Dios rech kojutoʼ che uchomaxik y ubʼanik utz taq jastaq. Xuqujeʼ rumal che oj utijoxelabʼ ri Cristo, rajawaxik kqakʼut utzilal chke ri e nikʼaj chik rumal che kqaloqʼoqʼej ri Dios y ri qajil qatzʼaqat. Are chiʼ kqanaʼ loqʼoqʼebʼal, kojkunik kqakʼut utzilal che are jun bʼantajik che sibʼalaj nim ubʼanik y kqaj chuwach ri Jehová.

Más kʼax ta kqabʼan che ukʼutik utzilal chke ri kkibʼan utzilal chqe o chke ri qetaʼm kiwach (2 Sam. 2:6). Jun jastaq che kqabʼano rech kqakʼutu che nim kqil ri kkibʼan chqe are che kojmaltyoxinik (Col. 3:15). Are kʼu, ¿jas kkʼulmatajik we kqachomaj che kʼo jun winaq taqal ta che kqakʼut utzilal che?

Chojchoman chrij wariʼ: ri Jehová kukʼut utzilal chke konojel ri winaq. Y ri Biblia kukʼut wariʼ chqawach pa ri Escrituras Griegas Cristianas rumal che kʼi mul kukoj ri tzij nimalaj loqʼoqʼebʼal kʼuxaj. ¿Jas kubʼan ri Dios che ukʼutik wajun bʼantajik riʼ?

Chojchoman chrij ri utzilal che ukʼutum ri Jehová chke e millones y millones winaq are chiʼ uyaʼom ri kajwataj chke rech kʼo kikʼaslemal (Mat. 5:45). Xuqujeʼ, are chiʼ majaʼ kqetaʼmaj uwach, ri areʼ ya ukʼutum chi ri rutzilal chqe (Efes. 2:4, 5, 8). Jun kʼutbʼal, xuya ri xa jun uKʼojol pa qawiʼ rech kkam rumal qech. Rumal laʼ ri apóstol Pablo xutzʼibʼaj che kojkunik kqariq utzilal rumal «ri nimalaj uloqʼoqʼebʼal kʼuxaj [...] ri Dios» (Efes. 1:7). Jun chi jastaq, paneʼ kojmakunik y kqabʼan jastaq chuwach ri Jehová che utz taj, are kʼu ri areʼ amaqʼel kukʼam qabʼe. Ri tijonik y ri utzij che uyaʼom chqe kjunamataj rukʼ «ri musmul» jabʼ che sibʼalaj kjororik (Deut. 32:2). Rumal laʼ, kojkun taj kqatoj ronojel ri utzilal che ukʼutum chqe. Y ri kqariq na pa ri petinaq kʼo ubʼanik rukʼ ri rutzilal ri Jehová (chajunamisaj rukʼ 1 Pedro 1:13).

¿La mat qastzij che ri rutzilal ri Jehová kubʼano che más kqaj kojqebʼ rukʼ y kqabʼan qe junam rukʼ areʼ? Rumal laʼ, chqakʼutuʼ utzilal chke konojel xa ta chke e jujun. Y ronojel taq qʼij chqabʼanaʼ ri utzil chke e nikʼaj chik junam rukʼ ri Jehová (1 Tes. 5:15). Rumal che we kqabʼan wariʼ, kojjunamataj rukʼ ri uqʼaqʼil ri qʼaqʼ are chiʼ sibʼalaj kʼo tew. Y konojel ri qafamilia, ri e qachalal pa ri congregación, ri e qachiʼl pa ri chak, pa ri tijobʼal y ri e qakʼulja utz kkinaʼ riʼ kekʼojiʼ qukʼ.

Chojchoman chrij jun qafamilia o jun qachalal pa ri congregación che rajawaxik kqakʼut utzilal che. Weneʼ kajwataj utoʼik che ujosqʼixik ri rachoch, ri ujardín, uloqʼik jastaq re pa ri kʼaybʼal o ubʼanik chi jun toqʼobʼ che. ¿Y jas kqabʼan che ukʼutik utzilal chke ri e winaq are chiʼ kqatzijoj ri utzij ri Dios? Are chiʼ keqatoʼ ri rajawaxik tobʼanik chke.

Chqesaj uwach ri nimalaj uloqʼoqʼebʼal ukʼuʼx ri Jehová rukʼ ri kojchʼawik y ri kqabʼano.