1. ¿Jas rajawaxik kqabʼano rech kojkʼasiʼ kanoq are chiʼ kpe ri uqʼij ri Jehová?

 ARE chiʼ ri Biblia kchʼaw chrij «ri uqʼij ri Ajawaxel» kraj kubʼij ri qʼij are chiʼ ri Jehová kusachisaj kiwach ri e ukʼulel y keʼutas kan ri upatanelabʼ. Ojer kanoq je xubʼan ri Jehová, xukʼajisaj kiwach e jujun tinamit (Is. 13:1, 6; Ezeq. 13:5; Sof. 1:8). Kmajtaj «ri uqʼij ri Ajawaxel» are chiʼ ksachisax kiwach ri e qastzij taj kojonem y kkʼis pa ri chʼoj re Armagedón. Rech kojkʼasiʼ kan pa ri qʼij riʼ, rajawaxik kʼo kqabʼan kimik. Rumal laʼ, ri Jesús xubʼij che rajawaxik amaqʼel kojkʼaskʼatik más na are chiʼ oj kʼo chi pa ri «nimalaj kʼaxkʼolil» (Luc. 12:40; Mat. 24:21).

2. ¿Jasche rajawaxik kqetaʼmaj ri kubʼij ri nabʼe wuj che xutaq bʼi ri apóstol Pablo chke ri tesalonicenses?

² Pa ri nabʼe wuj che xutaq bʼi ri apóstol Pablo chke ri tesalonicenses xutzʼibʼaj bʼi kʼi kʼutbʼal rech kekʼaskʼat che reyexik ri uqʼij ri Jehová. Ri Pablo retaʼm che kraj na kʼi tiempo rech kpe ri uqʼij ri Jehová (2 Tes. 2:1-3). Are kʼu, xubʼij che rajawaxik kekʼaskʼat che reyexik wajun qʼij. Ri oj xuqujeʼ rajawaxik je kqabʼano. Chqilampeʼ jas xubʼij kan ri areʼ chrij 1) ri upetik ri uqʼij ri Jehová, 2) e jachin kekam kanoq y 3) jas rajawaxik kqabʼano rech kojkʼasiʼ kanoq.

3. ¿Jasche ri uqʼij ri Jehová kjunamataj rukʼ jun elaqʼom? (Xuqujeʼ chawilaʼ ri e wachbʼal).

³ «Je upetik jas ri elaqʼom chaqʼabʼ» (1 Tes. 5:2). Are laʼ ri nabʼe chke ri oxibʼ kʼutbʼal che xukoj ri Pablo are chiʼ xchʼaw chrij ri uqʼij ri Jehová. Ri elaqʼomabʼ aninaq keʼelaqʼanik,  chaqʼabʼ kkibʼano y kkibʼij taj jas qʼij keʼopanik. Are je ri uqʼij ri Jehová, aninaq kpetik y xaq kʼateʼ kpetik. Rumal laʼ, weneʼ ri oj qastzij cristianos kqamay ri kkʼulmatajik. Are kʼu ksachisax ta kan qawach oj xaq xiw ri itzel taq winaq.

4. ¿Jasche kjunamax ri upetibʼal ri uqʼij ri Jehová rukʼ jun yawabʼ ixoq?

⁴ «Jas ri uqʼoxowem ri ixoq ri yawabʼ winaq» (1 Tes. 5:3). Jun yawabʼ ixoq retaʼm taj jas qʼij kkʼojiʼ ri ral, are kʼu retaʼm che xaq kʼateʼ kpe ri qʼoxom che y kʼo ta jun kqʼatenik. Xaq junam rukʼ qetaʼm taj jampaʼ kumajij ri uqʼij ri Jehová, are kʼu qas qetaʼm che kpe wi na y kʼo ta jun kqʼaten ri qʼatoj tzij che kubʼan pa kiwiʼ ri itzel taq winaq.

5. ¿Jas kjunamataj wi ri nimalaj kʼaxkʼolil rukʼ ri saqaribʼal?

⁵ Kjunamataj rukʼ ri saqaribʼal. Waral ri Pablo xchʼaw chi jumul chrij ri elaqʼom y xujunamaj ri uqʼij ri Jehová rukʼ ri saqaribʼal (1 Tes. 5:4). Junam rukʼ jun elaqʼom weneʼ kunaʼ taj ksaqarik, rumal che bʼenaq ukʼuʼx che relaqʼaxik ri jastaq. Are je kkʼulmataj pa ri nimalaj kʼaxkʼolil, ri winaq che kkibʼan itzelal chkʼuyal kqʼalajisax na ri kimak. Kqabʼan ta qe junam kukʼ, xaneʼ chojkʼaskʼat che reyexik ri uqʼij ri Jehová are chiʼ kqabʼan ta ri itzel krilo y kqakoj qachuqʼabʼ che ubʼanik «ronojel utzil, sukʼil xuqujeʼ qastzij» (Efes. 5:8-12). Ri Pablo xukoj chi kebʼ kʼutbʼal che kchʼaw chkij ri ksachisax kan kiwach pa ri uqʼij ri Jehová.

6. ¿Jas kraj kubʼij che e warinaq ri winaq? (1 Tesalonicenses 5:6, 7).

⁶ «Ri kewarik» (chasikʼij uwach 1 Tesalonicenses 5:6, 7). Ri Pablo xeʼujunamaj  ri winaq che ksachisax kiwach rukʼ jun winaq che kwarik. Are chiʼ jun winaq kwarik kunaʼ ta ri kkʼulmatajik y kuchʼobʼ taj jas kubʼano, are laʼ ri kkikʼulmaj ri winaq che kʼo ta kikojonik (Rom. 11:8). Kkikoj taj che oj kʼo chi pa ri kʼisbʼal taq qʼij, paneʼ kʼi jastaq kkʼutuwik y che naqaj chik kʼo wi ri nimalaj kʼaxkʼolil. Are chiʼ kʼo jun kʼax kkʼulmatajik e kʼi kkʼastaj ri kichomanik y kkaj kketaʼmaj chrij ri uQʼatbʼal tzij ri Dios. Are kʼu e kʼo jujun kkiya kan retaʼmaxik, jetaneʼ kewar chi jumul. E kʼo chi nikʼaj kekojon chrij jun qʼatoj tzij che kubʼan na ri Dios, are kʼu kkichomaj che kbʼeyetaj na riʼ (2 Ped. 3:3, 4). Are kʼu oj qetaʼm che rajawaxik amaqʼel kojkʼaskʼatik.

7. ¿Jasche ri Dios xeʼujunamaj ri e qʼabʼarelabʼ kukʼ ri winaq che kusachisaj na kiwach?

⁷ «Ri keqʼabʼarik». Ri apóstol Pablo xeʼujunamaj ri winaq che ksachisax kiwach kukʼ ri qʼabʼarelabʼ. Rumal che jun qʼabʼarel kchoman taj y utz ta ri kuchaʼ ubʼanik. Xaq junam kukʼ ri itzel taq winaq kkaj taj kkikʼex ri kikʼaslemal, rumal laʼ ksachisax kiwach. Ri Pablo xubʼij chke ri cristianos che rajawaxik qas kechomanik y keʼux ta qʼabʼarelabʼ (1 Tes. 5:6). Jun biblista xubʼij wariʼ: «Jun winaq che qʼabʼarel taj qas kʼo ri uchomanik pa saq y qas kril na jachike ri utz y ri utz taj, jeriʼ utz ri kuchaʼ ubʼanik». ¿Jasche rajawaxik kʼo ri qachomanik pa saq? Rumal che kʼo jastaq kbʼanowik che weneʼ kubʼano che kqanim qibʼ pa política. Más na are chiʼ knaqajin ri uqʼij ri Jehová weneʼ kojtaqchiʼx más rech kqaya ri qatobʼanik pa política, pa manifestaciones, pa ri chʼoj y pa nikʼaj chi kʼax che kbʼan pa ri tinamit. Kqabʼisoj ta más jas kqabʼan chuwach ri e jastaq riʼ, rumal che ri ruxlabʼixel ri Dios kojutoʼ rech utz ri kqachaʼ ubʼanik (Luc. 12:11, 12).

8. Junam rukʼ ri kubʼij 1 Tesalonicenses 5:8, ¿jas rajawaxik kqabʼano rech kojkʼaskʼatik? (Xuqujeʼ chawilaʼ ri wachbʼal).

⁸ Ri tobʼal uwo kʼuxaj y ri toʼbʼal jolomaj. Ri Pablo xeʼujunamaj ri cristianos kukʼ ajchʼojabʼ che kekʼaskʼatik y kikojom ri katzʼyaq re chʼoj (chasikʼij uwach 1 Tesalonicenses 5:8). Jun ajchʼoj más kkʼaskʼatik are chiʼ kʼo pa ri chʼoj. Kqakʼutu che kojkʼaskʼat che reyexik ri uqʼij ri Jehová are chiʼ kqakʼut ri qakojonik y ri qaloqʼoqʼebʼal, che kjunamataj rukʼ ri tobʼal uwo ukʼuʼx jun ajchʼoj y ri eyebʼal che kjunamataj rukʼ ri tobʼal jolomaj. Rumal laʼ, sibʼalaj rajawaxik che kqakʼut ri e bʼantajik riʼ.

9. ¿Jas kojutoʼ wi ri qakojonik?

⁹ Junam rukʼ ri tobʼal uwo ukʼuʼx jun ajchʼoj kuchajij ri ranimaʼ, are je kubʼan ri loqʼoqʼebʼal y ri kojonik chqe oj. Kojutoʼ rech kqaya ta kan upatanexik ri Jehová y ri Jesús. Rumal ri qakojonik qas kqakojo che ri Jehová kojutewchij we kqapatanij rukʼ ronojel qachuqʼabʼ (Heb. 11:6). Xuqujeʼ ri kojonik kojutoʼ rech kojux sukʼ che ri Jesús paneʼ kqariq kʼax. Rech kqakowirisaj ri qakojonik y kqachʼij ri kʼax utz kqetaʼmaj chkij ri e qachalal che kiriqom kʼax rumal ri kikojonik o rumal che kʼo ta kirajil. Y rech are ta kbʼe qakʼuʼx che utzukuxik pwaq chqesaj kiwach ri e qachalal che más e okinaq il che upatanexik ri Jehová. b

10. ¿Jas kojutoʼ wi ri loqʼoqʼebʼal che kqanaʼ che ri Dios y chke ri qajil qatzʼaqat?

¹⁰ Rech kojkʼaskʼatik y kqachʼobʼ ri kqabʼano rajawaxik kqakʼut loqʼoqʼebʼal (Mat.  22:37-39). Jun kʼutbʼal, ri loqʼoqʼebʼal che kqanaʼ che ri Jehová kojutoʼ rech kqaya ta kan utzijoxik ri utzij paneʼ kqariq kʼax (2 Tim. 1:7, 8). Y rumal che keqaj ri winaq kqakoj qachuqʼabʼ che utzijoxik ri utzij ri Dios chke, paneʼ pa teléfono o pa carta. Y kqachomaj taj che kkikʼex ta wi ri kikʼaslemal (Ezeq. 18:27, 28).

11. ¿Jas kqabʼan che kilik ri qachalal we keqaloqʼoqʼej? (1 Tesalonicenses 5:11).

¹¹ Xuqujeʼ keqaloqʼoqʼej ri qachalal are chiʼ kqakubʼsaj kikʼuʼx y kqaya kichuqʼabʼ (chasikʼij uwach 1 Tesalonicenses 5:11). Ri ajchʼojabʼ che junam kechʼojinik kkitoʼ la kibʼ. Rumal laʼ, xa ta chubʼanik riʼ kkibʼano kkibʼan kʼax che jun kachiʼl. Rajawaxik je kqabʼan oj kukʼ ri qachalal, kqabʼan ta kʼax chke y kqatoj ta ukʼaxel ri kʼax che kbʼan chqe (1 Tes. 5:13, 15). Jun chi ukʼutik kqabʼano che keqaj ri e qachalal are che nim keqil wi ri e kʼamal taq bʼe pa ri congregación (1 Tes. 5:12). Chojchomanampeʼ chrij ri congregación re Tesalónica. Are chiʼ ri Pablo xutzʼibʼaj bʼi ri carta chke, weneʼ kʼateʼ jun junabʼ kʼo ri congregación. Rumal laʼ, weneʼ ri e kʼamal taq bʼe kʼo ta más ketaʼmabʼal y kʼo kesach wi, are kʼu rajawaxik kenimaxik. Are chiʼ más knaqajin ri nimalaj kʼaxkʼolil, más rajawaxik riʼ kqanimaj ri kkibʼij ri e kʼamal taq bʼe, rumal che weneʼ kkun ta chi ri central mundial y ri sucursal che ukʼamik qabʼe. Rumal laʼ, kimik rajawaxik che nim keqil wi ri e kʼamal taq bʼe y are ta kqil ri kesach wi. Chnaʼtaj chqe che are ri Jehová kojowinaq ri Jesús rech kukʼam kibʼe ri e sukʼalaj taq achijabʼ riʼ.

12. ¿Jas kubʼan ri eyebʼal che uchajixik ri qachomanik?

¹² Junam rukʼ jun tobʼal jolomaj sibʼalaj nim ktobʼan wi che jun ajchʼoj, ri eyebʼal kuchajij ri qachomanik. Rumal che kqakubʼsaj qakʼuʼx chrij ri utzujum ri Dios chqe, kqachʼobʼo che ronojel ri jastaq che kutzujuj wajun uwach Ulew riʼ kʼo ta upatan (Filip. 3:8). Ri tewchibʼal che kuya na ri Dios chqe  kukubʼsaj qakʼuʼx. Are laʼ ri xukubʼsaj kikʼuʼx ri qachalal Wallace y Laurinda, che kepatanin pa África. Xa pa oxibʼ semanas jun chke xkam ri utat y ri jun chik ri unan. Xekun taj xebʼe kukʼ ri kifamilia rumal ri COVID-19. Ri qachalal Wallace kubʼij: «Ri kʼastajibʼal sibʼalaj inutoʼm, rumal che are ta kinchoman chrij ri kʼax xkiriqo are chiʼ majaʼ kekamik. Xaneʼ are kinchoman chrij ri kikotemal kkinaʼo are chiʼ kekʼastajisax loq. Wariʼ ukubʼsam nukʼuʼx y qas ta kinbʼisonik».

13. ¿Jas rajawaxik kqabʼano rech ri Jehová kuya ri ruxlabʼixel pa qawiʼ?

¹³ «Michup ri uqʼaqʼ ri Uxlabʼixel» (1 Tes. 5:19). Ri Pablo xujunamaj ri uxlabʼixel rukʼ jun qʼaqʼ che kbʼakʼow pa qanimaʼ. Rumal wariʼ kqaj kqabʼan ri kqaj chuwach ri Jehová y kʼo qachuqʼabʼ che upatanexik (Rom. 12:11). ¿Jas rajawaxik kqabʼano rech ri Jehová kuya ri ruxlabʼixel pa qawiʼ? Rajawaxik kqataʼ che, kqanikʼoj ri uTzij y kqabʼan ri kubʼij ri utinamit. We kqabʼan wariʼ kqakʼut ri «uwachinik ri Uxlabʼixel» (Gál. 5:22, 23).

14. ¿Jas rajawaxik kqabʼano we kqaj kuya ri ruxlabʼixel ri Dios pa qawiʼ? (Xuqujeʼ chawilaʼ ri e wachbʼal).

¹⁴ Ri Jehová kuya ri ruxlabʼixel pa qawiʼ, are kʼu rajawaxik kqachajij qibʼ rech kchup ta «ri uqʼaqʼ ri Uxlabʼaxel». Rech ri Jehová kuya ri ruxlabʼixel pa qawiʼ rajawaxik chʼajchʼoj ri qachomanik, rumal laʼ kresaj pa qawiʼ we kqaya bʼe che kok tzʼil taq chomanik pa qajolom (1 Tes. 4:7, 8). ¿Jas más rajawaxik kqabʼano? Ri Pablo xubʼij: «Miwetzelaj uwach ri kitzij ri kkiqʼaxej tzij chke ri winaq ri yoʼm chke rumal ri Dios» (1 Tes. 5:20). Pa wajun versículo, ri tzij «ri kkiqʼaxej tzij» kraj kubʼij ri kuya ubʼixik ri Dios rumal ri ruxlabʼal, junam rukʼ ri kyaʼ ubʼixik chrij ri uqʼij ri Jehová. Ri oj kqachomaj taj che kbʼeyetaj na ri upetibʼal ri uqʼij ri Jehová o che kqil ta chi ri Armagedón,  xaneʼ kqachomaj che naqaj chi kʼo wi. Rumal laʼ, kqakoj qachuqʼabʼ che ukʼutik utz taq bʼantajik y kojniman che ri Dios ronojel taq qʼij (2 Ped. 3:11, 12).

15. ¿Jas rajawaxik kqabʼano rech kojsubʼ taj? (1 Tesalonicenses 5:21).

¹⁵ Pa ri petinaq ri e ukʼulel ri Dios kkibʼij na: «Utz uj kʼolik, man kʼo ta kqakʼulmaj» (1 Tes. 5:3). Kkimajij ubʼixik kʼi molom taq tzij che keʼusubʼ e kʼi winaq (Apoc. 16:13, 14). ¿La kqakoj oj riʼ ri kkibʼij? Rech kojsubʼutaj taj, rajawaxik kqabʼan wariʼ: «Chitijtobʼej ronojel» (chasikʼij uwach 1 Tesalonicenses 5:21). Ri tzij griega «chitijtobʼej» kkojik rech jun winaq krilo we jun jastaq qas che oro o plata bʼanom wi. Rajawaxik je kqabʼano oj, rajawaxik kqanikʼoj ronojel we qastzij ri kbʼixik o ri kkʼutik. Rajawaxik che ri tesalonicenses xkibʼan wariʼ, are kʼu ri oj más rajawaxik chi na kqabʼano rumal che más tajin knaqajin ri nimalaj kʼaxkʼolil. Kqatatabʼej ta ronojel ri kkibʼij ri winaq o ri kkʼutik, xaneʼ chqilaʼ jas kubʼij ri uTzij ri Dios y ri utinamit ri Jehová. Jeriʼ kʼo ta kojsubʼuwik (Prov. 14:15; 1 Tim. 4:1).

16. ¿Jas utzujum ri Dios chqe y jas rajawaxik kqabʼan kimik?

¹⁶ Qetaʼm che e kʼi testigos rech Jehová kekʼasiʼ kan pa ri nimalaj kʼaxkʼolil, are kʼu qetaʼm taj jas kqakʼulmaj chqajujunal (Sant. 4:14). Paneʼ kojkʼasiʼ kan pa ri nimalaj kʼaxkʼolil o kojkam neʼ, are kʼu qas qetaʼm che ri Jehová kuya na ri kʼaslemal kʼo ta ukʼisik chqe. Ri e chaʼom che kebʼe pa ri kaj kkiqʼat tzij rukʼ ri Cristo, are kʼu ri kbʼix nikʼaj chi chij chke kekʼojiʼ kan cho ri uwach Ulew. Ri rajawaxik kqabʼan kimik are che ksach ta chqe ri kʼaslemal kʼo ta ukʼisik che utzujum ri Dios y chojkʼaskʼat che reyexik ri uqʼij ri Jehová.