1, 2. Junam rukʼ ri kubʼij Salmo 25:14, ¿jas rajawaxik kqabʼano rech kʼo jun utzalaj qachilanik rukʼ ri Jehová?

 ¿JAS kachomaj at, jas bʼantajik laʼ rajawaxik kukʼut jun rech kuchʼij jun achilanik? Rajawaxik kkikʼut loqʼoqʼenik y kkitoʼ la kibʼ. Weneʼ katchoman ta chrij ri xeʼn ibʼ. Are kʼu junam rukʼ ri kubʼij ri texto re wajun kʼutunem, ri kkaj keʼux rachiʼl ri Jehová rajawaxik kkixeʼj kibʼ chuwach (chasikʼij uwach Salmo 25:14).

² Qonojel rajawaxik kqaxej qibʼ chuwach ri Jehová paneʼ kʼi o kʼi ta tiempo tajin kqapatanij. Are kʼu, ¿jas kraj kubʼij kqaxeʼj qibʼ chuwach ri Dios? ¿Jas kojtoʼwik rech kqanaʼ wajun xeʼn ibʼ riʼ? Y ¿jas kqetaʼmaj chrij ri xeʼn ibʼ che xkinaʼ ri Abdías, ri kinimal kojol tabʼal toqʼobʼ Jehoiadá y ri qʼatal tzij Jehoás?

3. ¿Jas kojutoʼ wi ri xeʼn ibʼ?

³ Unaʼik ri xibʼin ibʼ are ri kqanaʼ chuwach jun winaq o jun jastaq che kubʼan kʼax chqe. Utz che kqanaʼ wajun xibʼin ibʼ riʼ rumal che kojutoʼo rech kqetaʼmaj jas kqabʼano. Chqilampeʼ jujun taq kʼutbʼal. Rumal che kqaxej qibʼ kojtzaqik kojutoʼo rech kojkʼojiʼ ta chutzaʼm jun siwan. Y rumal che kqaxej qibʼ kqariq jun kʼax kojbʼe ta pa jun lugar che kqachomaj che kbʼan kʼax chqe. Y rumal che kqaxej qibʼ kqatzaq jun qachiʼl kqaj taj kqabʼij jun tzij o kqabʼan jun jastaq che kubʼan kʼax che.

4. ¿Jas kraj ri Satanás kqanaʼ chrij ri Jehová?

⁴ Ri Satanás kraj che ri winaq kkixibʼij kibʼ chuwach ri Jehová. Kraj che kqakoj ri xubʼij ri Elifaz che ri Job: che  kqachomaj che ri Jehová sibʼalaj kʼan, kutoj ukʼaxel ri kʼax y kkikot ta rukʼ ri kqabʼano (Job 4:18, 19). Ri kraj are che kqaya kan upatanexik ri Jehová. Rech kqakʼulmaj ta wariʼ rajawaxik kqaxibʼij qibʼ chuwach ri Jehová.

5. ¿Jas kraj kubʼij unaʼik xibʼin ibʼ chuwach ri Dios?

⁵ ¿Jas kubʼan ri winaq che kuxibʼij ribʼ chuwach ri Dios o nim kril wi? Kubʼan ta jun jastaq che kubʼan kʼax che ri rachilanik rukʼ rumal che kuloqʼoqʼej. Ri Jesús are jun winaq che xuxibʼij ribʼ chuwach ri Dios (Heb. 5:7). Are kʼu ri xunaʼo are ta jun xibʼin ibʼ che kunaʼ jun chuwach jun itzel winaq (Is. 11:2, 3). Xaneʼ ri areʼ kuloqʼoqʼej ri uTat rukʼ ronojel ranimaʼ y kraj kunimaj (Juan 14:21, 31). Ri oj xuqujeʼ nim kqil wi ri Jehová y kqaj kqapatanij, rumal che are jun Dios kloqʼoqʼenik, kʼo unojibʼal, sukʼ y kʼo uchuqʼabʼ. Xuqujeʼ qetaʼm che we kojniman che, kkikot qukʼ. Y we kojniman taj kuya bʼis che rumal che sibʼalaj kojraj (Sal. 78:41; Prov. 27:11).

6. ¿Jas rajawaxik kqabʼano rech kqaxibʼij qibʼ chuwach ri Dios? (Salmo 34:11).

⁶ Ri unaʼik xibʼin ibʼ are ta jun bʼantajik che kqanaʼ chik are chiʼ kojalaxik (chasikʼij uwach Salmo 34:11). Rech kqakʼut wajun bʼantajik, rajawaxik kojchoman chrij ri ubʼantajik ri Jehová rukʼ ri jastaq ubʼanom. Junam rukʼ ri unojibʼal, ri uchuqʼabʼ y ri uloqʼoqʼebʼal, wariʼ kojutoʼo rech más kqaloqʼoqʼej y más nim kqilo (Rom. 1:20). Jun qachalal ixoq Adrienne ubʼiʼ xubʼij: «Are chiʼ kwil ri unojibʼal ri Jehová pa ri jastaq che ubʼanom, kinutoʼ che uchʼobʼik che uyaʼom ri utaqanik rumal che kraj ri utzilal chwe». Are chiʼ ri qachalal xuchʼobʼ wariʼ, xuchomaj: «Kwaj taj kinbʼan jun jastaq che kubʼan kʼax che ri wachilanik rukʼ ri Jehová». Utz we katas jubʼiqʼ atiempo che wajun semana rech katchoman chrij jun jastaq che ubʼanom ri Jehová. We kabʼano katutoʼo rech más kaloqʼoqʼej y nim kawil wi ri Jehová (Sal. 111:2, 3).

7. ¿Jas kojutoʼ wi ri chʼawem rech kqaxibʼij qibʼ chuwach ri Jehová?

⁷ Jun chi jastaq che kojutoʼo rech kqakʼutu che kqaxej qibʼ che ri Jehová are che amaqʼel kqabʼan qachʼawem che. Rumal che are chiʼ más kojchʼaw rukʼ ri Dios más kqakojo che qastzij kʼolik. Knaʼtaj ri nimalaj uchuqʼabʼ chqe are chiʼ kqataʼ ri utobʼanik rech kqachʼij jun kʼax. Are chiʼ kqamaltyoxij che che xuya ri uKʼojol rumal qech, knaʼtaj chqe che sibʼalaj kojraj. Y are chiʼ kqata che che kukʼam qabʼe rech kqachʼobʼ ri kqabʼan chuwach jun kʼax knaʼtaj ri nimalaj unojibʼal chqe. Ri e chʼawem riʼ kojutoʼo rech más nim kqil wi ri Jehová y kqaxutuj apachike jastaq che kubʼan kʼax che ri qachilanik rukʼ.

8. ¿Jas rajawaxik kqabʼano rech kqaya ta kan unaʼik xibʼin ibʼ chuwach ri Jehová?

⁸ Rech kqaya ta kan unaʼik xibʼin ibʼ chuwach ri Jehová, rajawaxik amaqʼel kqanikʼoj ri Biblia rech kʼo kqetaʼmaj chkij ri xkiya kan jun utz kʼutbʼal y ri xkibʼan ta ri utz. Chqilampeʼ oxibʼ chke ri e kʼutbʼal riʼ. Nabʼe, kojchʼaw na chkij e kebʼ sukʼ taq upatanelabʼ ri Jehová: ri Abdías, che are kilow ri rachoch ri qʼatal tzij Acab, y ri kinimal kojol tabʼal toqʼobʼ Jehoiadá. Tekʼuriʼ kqil na ri ukʼutbʼal ri qʼatal tzij Jehoás re Judá, che nabʼe xupatanij ri Jehová tekʼuriʼ xuya kanoq.

9. ¿Jas xtobʼan wi ri xibʼin ibʼ che xunaʼ ri Abdías che ri Dios? (1 Reyes 18:3, 12).

⁹ Ri nabʼe mul che kchʼaw ri Biblia chrij ri Abdías b kubʼij wariʼ: ri Abdías «ri kqʼijilan che ri Ajawaxel rukʼ nim ilik» (chasikʼij uwach 1 Reyes 18:3, 12). ¿Jas xtobʼan wi ri xibʼin ibʼ che xunaʼ ri Abdías che ri Dios? Xutoʼo rech xkubʼsax kʼuʼx chrij. Rumal laʼ, ri qʼatal tzij xukoj che rilixik ri kajwataj pa ri rachoch (chajunamisaj rukʼ Nehemías 7:2). Xuqujeʼ xutoʼo rech xkʼojiʼ ukowil ukʼuʼx che sibʼalaj xajwataj che. ¿Jasche? Rumal che xkʼojiʼ pa ri utiempo ri itzelalaj qʼatal tzij Acab, che «nim kʼu na ri etzelal ri xeʼubʼan chkiwach ri ajawinelabʼ ri xeʼajawin nabʼe chuwach» (1 Rey. 16:30). Che xuqujeʼ kʼulan rukʼ jun ixoq Jezabel ubʼiʼ, che xuqʼijilaj ri Baal y itzel xril ri Jehová. Rumal laʼ, xraj xusachisaj uwach ri qastzij qʼijilanik pa Israel, ri qʼatal tzij re ri norte. Xuqujeʼ xeʼukamisaj e kʼi qʼaxal taq tzij (1 Rey. 18:4). ¡Sibʼalaj xkiriq kʼax riʼ ri upatanelabʼ ri Jehová pa riʼ ri tiempo!

10. ¿Jas xubʼan ri Abdías che ukʼutik che kʼo ukowil ukʼuʼx?

¹⁰ ¿Jas xubʼan ri Abdías che ukʼutik che kʼo ukowil ukʼuʼx? Are chiʼ ri Jezabel xumajij kikamisaxik ri e qʼaxal taq utzij ri Jehová ri Abdías xerowaj e 100 chke «pa taq qʼat re kawinaq taq lajuj (50, 50)» y «xeʼentzuq kʼu chilaʼ» (1 Rey. 18:13, 14). Wet xretaʼmaj ri Jezabel ri xubʼan ri Abdías xukamisaj ta riʼ. Ri Abdías kraj taj kkamisaxik. Are kʼu rumal che kuloqʼoqʼej ri Jehová y ri upatanelabʼ, xuya ri ukʼaslemal pa kʼax.

11. ¿Jas kkibʼan ri upatanelabʼ ri Jehová che resaxik uwach ri Abdías? (Xuqujeʼ chawilaʼ ri wachbʼal).

¹¹ Kimik sibʼalaj e kʼi qachalal che e kʼo pa e tinamit jawiʼ qʼatem wi uwach ri qachak che ri Dios keniman chke ri e qʼatal taq tzij. Are kʼu junam rukʼ ri xubʼan ri Abdías are más nim kkil wi ri uqʼijilaxik ri Dios (Mat. 22:21). Kkikʼutu che kkixeʼj kibʼ chuwach ri Dios are chiʼ are keniman  che chkiwach ri winaq (Hech. 5:29). Rumal laʼ, chkʼuyal kkitzijoj ri utzij ri Dios y kkibʼan ri kiriqbʼal ibʼ (Mat. 10:16, 28). Xuqujeʼ kkiya ri kajwataj chke ri kachalal pa ri kikojonik. Chqilampeʼ ri ukʼutbʼal jun qachalal Henri ubʼiʼ, che kel pa África jawiʼ xqʼatex wi na uwach ri qachak che ri Dios. Pa riʼ ri tiempo ri a Henri xtobʼan che ujachik wuj chke ri e qachalal. Xubʼij: «Sibʼalaj kinxeʼj wibʼ, are kʼu rumal che sibʼalaj nim kwil wi ri Jehová xinutoʼo rech xinxeʼj ta wibʼ». Ri at xuqujeʼ katkunik kakʼut kowil kʼuxaj we kaxeʼj awibʼ chuwach ri Dios.

12. ¿Jas xkibʼan ri Jehoiadá y ri rixoqil che ukʼutik che e sukʼ che ri Jehová?

¹² Rumal che ri kinimal kojol tabʼal toqʼobʼ Jehoiadá xuxibʼij ribʼ chuwach ri Jehová, xkunik xux sukʼ y xeʼutoʼ nikʼaj chik rech kkiqʼijilaj ri Jehová. Are chiʼ ri Atalía jun itzelalaj ixoq, ral ri Jezabel, xeʼukamisaj ri uwiʼ taq umam rech are kkanaj kan che qʼatal tzij pa Judá, ri Jehoiadá xukʼutu che kuxeʼj ribʼ chuwach ri Dios (2 Crón. 22:10, 11). Rumal che are chiʼ ri rixoqil Jehosabeat ubʼiʼ xrowaj kan jun chke ri uwiʼ umam ri Atalía, Jehoás ubʼiʼ, ri Jehoiadá xutoʼo. Rumal laʼ, xsach ta kiwach ri e qʼatal taq tzij che xepe pa ri ufamila ri David. Pa riʼ ri tiempo weneʼ más che 100 ujunabʼ chik ri Jehoiadá. Are kʼu xuxeʼj ta ribʼ che ri Atalía, rumal che más nim xril wi ri Jehová (Prov. 29:25).

13. ¿Jas xubʼan ri Jehoiadá che ukʼutik chi jumul ri usukʼilal che ri Jehová?

¹³ Are chiʼ ri Jehoás siete ujunabʼ, ri Jehoiadá xukʼut chi jumul ri usukʼilal che ri Jehová rumal che xuchomaj ubʼanik jun jastaq. We ronojel utz kel chuwach ri xuchomaj ubʼanik, ri Jehoás jun chke ri rachalaxik ri David kux qʼatal tzij. Are kʼu we utz ta kel ri xuchomaj ubʼanik ri Jehoiadá weneʼ kkamisax. Rukʼ ri utobʼanik ri Jehová, ri e kʼamal taq bʼe y ri e levitas utz xel ri xuchomaj ubʼanik. Xukoj ri Jehoás che qʼatal tzij y xutaq ukamisaxik ri Atalía (2 Crón. 23:1-5, 11, 12, 15; 24:1). Tekʼuriʼ «xubʼan kʼu na jun kʼulwachinik rukʼ ri Ajawaxel, ri ajawinel xuqujeʼ ri tinimit, chi ri e areʼ xkikoj kibʼ chuxeʼ chi keʼux utinimit ri Ajawaxel» (2 Rey. 11:17). «Xuqujeʼ xeʼukoj chajil taq uchiʼja pa taq ri okibʼal chupam ri rachoch ri Ajawaxel, rech man kʼo ta jun kok ta pa jun okibʼal ri kʼo ta jun tzʼilol che jas ri kubʼij ri pixabʼ» (2 Crón. 23:19).

14. ¿Jas eqeleʼn xyaʼ che ri Jehoiadá rumal che xuxeʼj ribʼ chuwach ri Jehová?

¹⁴ Ri Jehová ubʼim kan wariʼ: «Kinyaʼ kiqʼij ri keyoʼw nuqʼij», y are laʼ ri xubʼan rukʼ ri Jehoiadá (1 Sam. 2:30). Rumal che xtzʼibʼax kan pa ri uTzij ri Dios ri utz taq jastaq che xubʼan wajun kinimal kojol tabʼal toqʼobʼ riʼ, rech kʼo kqetaʼmaj oj chrij (Rom. 15:4). Y are chiʼ xkam ri Jehoiadá «xmuq kʼu chupam ri uTinamit ri David, kukʼ taq ri ajawinelabʼ, rumal rech chi sibʼalaj utz xubʼan rukʼ ri Israel, rukʼ ri Dios xuqujeʼ rukʼ ri rachoch» (2 Crón. 24:15, 16).

15. ¿Jas kqetaʼmaj chrij ri Jehoiadá? (Xuqujeʼ chawilaʼ ri e wachbʼal).

¹⁵ Ri xukʼulmaj ri Jehoiadá kojutoʼo rech kqaxej qibʼ chuwach ri Dios. Ri e kʼamal taq bʼe utz che kkesaj uwach ri Jehoiadá are chiʼ kekʼaskʼat che kichajixik ri upatanelabʼ ri Jehová (Hech. 20:28). Ri e qachalal che nim chi kijunabʼ che kkixeʼj kibʼ che ri Jehová y amaqʼel  kkikʼut ri kisukʼilal che sibʼalaj nim kibʼanik chuwach. Ri alabʼom alitomabʼ kʼo kekunik kketaʼmaj chrij ri xubʼan ri Jehová che rilik ri Jehoiadá, rumal che kunaʼtajisaj chke che rajawaxik nim kekil wi ri e qachalal che nim chi kijunabʼ (Prov. 16:31). Y chukʼisbʼal, qonojel kʼo kqetaʼmaj chkij ri e kʼamal taq bʼe y ri levitas, che rajawaxik kojniman chke ri kekʼamow qabʼe kimik y keqatoʼ che ri kkichaʼ ubʼanik (Heb. 13:17).

16. ¿Jas xkʼutuwik che ri Jehoás ko ta pa ri ukojonik?

¹⁶ Are chiʼ kʼa majaʼ na ujunabʼ ri Jehoás xniman che ri Jehová, rumal che xtoʼ rumal ri Jehoiadá (2 Rey. 12:2). Are kʼu, are chiʼ xkam ri Jehoiadá xniman ta chik, rumal che are xutatabʼej ri xkibʼij ri príncipes apóstatas che. Y ri xkʼulmatajik are che ri areʼ y ri tinamit «xekiyaʼ kʼu qʼijilanik chke taq ri e uwachbʼal ri Asera xuqujeʼ chke juleʼ taq e diosibʼ chik» (2 Crón. 24:4, 17, 18). Paneʼ kʼax xunaʼ ri Jehová are kʼu, «xeʼutaq kʼu ne uloq qʼaxal taq tzij chke rech kkibʼano chi ketzelej rukʼ». Are kʼu «man xkiyaʼ ta kʼu kixikin ri winaq chke ri kipixbʼenik». Xuqujeʼ xkinimaj ta ri xubʼij ri qʼaxal tzij Zacarías, che are ri uprimo ri Jehoás. Y xaq uwiʼ chik ri Jehoás xutaq ukamisaxik ri Zacarías, paneʼ bʼanom kʼi toqʼobʼ che rumal ri ufamilia (2 Crón. 22:11; 24:19-22).

17. ¿Jas xuriq ri Jehoás?

¹⁷ Ri Jehoás xuxeʼj ta chi ribʼ chuwach ri Dios, rumal laʼ xuriq kʼi kʼax, rumal che ri  Jehová ubʼim: «Ri kketzelaj nuwach kekʼis na pa yoqʼik» (1 Sam. 2:30). Y qas je xkʼulmatajik, rumal che are chiʼ ri sirios xechʼojin rukʼ ri Jehoás xekichʼako paneʼ e kʼi ta más chkiwach ri rajchʼojabʼ ri Jehoás, y «nimalaj yawabʼ xkiyaʼ kanoq». Are chiʼ xetzalij bʼi ri sirios, xkamisax ri Jehoás kumal ri upatanelabʼ rumal che xukamisaj ri Zacarías. Y rumal che sibʼalaj xubʼan itzelal xmuq ta pa «ri kimuqubʼal taq ri ajawinelabʼ» (2 Crón. 24:23-25).

18. Junam rukʼ ri kubʼij Jeremías 17:7, 8, ¿jas rajawaxik kqabʼano rech kqabʼan ta qe ri xubʼan ri Jehoás?

¹⁸ Junam rukʼ jun cheʼ che okinaq ta bʼi ri raʼ pa ri ulew y rech ktzaq taj rajawaxik jun toqʼabʼal re. Je xukʼulmaj ri Jehoás are chiʼ xkam ri Jehoiadá xutaʼ ri molom taq tzij y xuya kan upatanexik ri Jehová. Kʼo kqetaʼmaj chrij ri xkʼulmatajik, are wariʼ: kqapatanij ta ri Jehová xa rumal che je kkibʼan ri e qachalal o ri e qafamilias. Rech kʼo jun ko qakojonik, nim kqil wi ri Jehová y kqaloqʼoqʼej, rajawaxik kqanikʼoj uwach ri Biblia, kojchoman chrij y kqabʼan qachʼawem che ri Jehová (chasikʼij uwach Jeremías 17:7, 8; Col. 2:6, 7).

19. ¿Jas kraj ri Jehová kqabʼano?

¹⁹ Ri Jehová kutaʼ ta kʼaxalaj taq jastaq chqe che kojkun ta che ubʼanik. Xaneʼ kubʼij wariʼ chqe pa Eclesiastés 12:13: «Nim bʼaʼ chawilaʼ wi ri Dios cheʼatzʼaqatisaj taq kibʼanik ri e utaqomal, are kʼu waʼ ri rajawaxik ubʼanik rumal ronojel winaq». We kqaxej qibʼ chuwach ri Jehová kojkunik kqachʼij apachike uwach kʼax y amaqʼel kojux sukʼ chuwach ri Jehová, junam rukʼ ri xkibʼan ri Abdías y Jehoiadá. Kʼo ta jun riʼ ksachow uwach ri qachilanik rukʼ ri Jehová.