1. Junam rukʼ ri kubʼij pa 1 Pedro 5:2, ¿jas eqeleʼn yaʼom chke ri kʼamal taq bʼe?

 RI Jehová uyaʼom chke ri kʼamal taq bʼe re ri congregación che kekichajij ri qachalal. Rumal laʼ, ri e areʼ nim kkil wi wajun eqeleʼn riʼ y kkikoj kichuqʼabʼ che kichajixik ri e qachalal (Jer. 23:4; chasikʼij uwach 1 Pedro 5:2). ¡Sibʼalaj kojkikotik che e kʼo kʼamal taq bʼe pa ri congregaciones!

2. ¿Jas kʼax kkiriq e jujun kʼamal taq bʼe?

² Ri kʼamal taq bʼe sibʼalaj kechakun pa ri congregación rech kekilij ri qachalal. Chqilampeʼ ri xukʼulmaj jun qachalal kʼamal bʼe Tony ubʼiʼ, che kel pa Estados Unidos. Ri areʼ xretaʼmaj che rajawaxik taj kukʼam ronojel eqeleʼn kyaʼ che. Kubʼij: «Are chiʼ xumajij ri COVID-19, kʼo kʼi chak kbʼan pa ri congregación, rajawaxik kil ri kbʼan chke ri e riqbʼal ibʼ y ri utzijoxik ri utzij ri Dios, y ri in amaqʼel kinkʼam ri eqeleʼn kyaʼ chwe. Xinkoj nuchuqʼabʼ che ubʼanik. Are kʼu, are chiʼ xqʼax ri tiempo xwilo che tajin ta chi kinnikʼoj ri Biblia y kinbʼan ta chi más nuchʼawem». Jun chi kʼamal bʼe Ilir ubʼiʼ, che kel pa Kosovo, kʼax xubʼan che unimaxik ri kubʼij ri utinamit ri Jehová rumal che kʼo chʼoj pa ri utinamit. Kubʼij: «Are chiʼ ri sucursal xubʼij chwe che keʼensolij ri qachalal jawiʼ tajin kbʼan wi más chʼoj, xinxibʼij wibʼ rumal che kʼax ubʼanik y unimaxik ronojel ri xubʼij». Y jun misionero re Asia Tim ubʼiʼ, kubʼij: «Jujun taq mul sibʼalaj kinkos che kichajixik ri e qachalal». ¿Jas kkibʼan ri kʼamal taq bʼe chuwach ri e kʼax riʼ?

3. ¿Jasche rajawaxik qonojel kqesaj uwach ri Gedeón?

³ Ri kʼamal taq bʼe kʼo kʼi kketaʼmaj chrij ri qʼatal tzij Gedeón (Heb. 6:12; 11:32). Ri Gedeón xuchajij y xukʼam ubʼe ri utinamit ri Dios (Juec. 2:16; 1 Crón. 17:6). Xuqujeʼ yaʼom ri eqeleʼn chke ri kʼamal taq bʼe kimik che kkichajij ri  upatanelabʼ ri Dios pa we kʼaxalaj taq qʼij che oj kʼo wi (Hech. 20:28; 2 Tim. 3:1). Kʼo kʼi kqetaʼmaj chrij ri Gedeón, rumal che ri areʼ xuchʼobʼo jas ri kkun ta che ubʼanik, xmachʼachʼik, xnimanik y xkʼojiʼ ukowil ukʼuʼx. Xuqujeʼ, ri ukʼutbʼal keʼutoʼ ri congregaciones rech nim kkil ri chak che kkibʼan ri kʼamal taq bʼe y kkiya ri kitobʼanik chke rukʼ ronojel kanimaʼ (Heb. 13:17).

4. ¿Jas xubʼan ri Gedeón che ukʼutik che xuchʼobʼ ri kkun ta che ubʼanik y xmachʼachʼik?

⁴ Ri Gedeón xuchʼobʼ ri kkun ta che ubʼanik y sibʼalaj xmachʼachʼik. b Rumal che, are chiʼ jun ángel xubʼij che che xchaʼ rumal ri Jehová rech keresaj ri israelitas pa kiqʼabʼ ri madianitas, ri Gedeón xubʼij wariʼ: «Ri e wachalaxik e are ri sibʼalaj e mebʼaʼ na chkiwach konojel ri e ramaqʼ ri aj Manasés, in kʼut ri in chʼiʼp na chkixoʼl konojel ri wachalal» (Juec. 6:15). Ri areʼ xuchomaj che kkun taj kubʼan wajun chak riʼ. Are kʼu ri Jehová xubʼij che che kkunik, y qas je xkʼulmatajik.

5. ¿Jas kkibʼan ri kʼamal taq bʼe che ukʼutik che qas kkichʼobʼ ri kekun ta che ubʼanik y qas kemachʼachʼik?

⁵ Ri kʼamal taq bʼe kkikoj kichuqʼabʼ che uchʼobʼik ri kekun ta che ubʼanik y kemachʼachʼik (Miq. 6:8; Hech. 20:18, 19). Kkibʼan ta nim che kibʼ rumal ri kenaʼw che ubʼanik, y kkichomaj taj che kʼo ta kipatan are chiʼ kʼo kesach wi. Are kʼu, rukʼ ri kkibʼano kqʼalajinik we qas kkichʼobʼ ri kekun ta che ubʼanik y we qas kemachʼachʼik. Chqilampeʼ jujun kʼutbʼal, weneʼ jun kʼamal bʼe kukʼam kʼi eqeleʼn are kʼu weneʼ krilo che kkun ta chi che ubʼanik. Weneʼ kbʼix utz taq tzij che rumal ri chak che kubʼano o weneʼ kyoqʼik we kʼo utz ta kubʼano. ¿Jas tobʼanik kuya ri ukʼutbʼal ri Gedeón chke ri kʼamal taq bʼe we kkikʼulmaj wariʼ?

6. ¿Jas kkibʼan ri kʼamal taq bʼe che resaxik uwach ri Gedeón? (Xuqujeʼ chawilaʼ ri wachbʼal).

⁶ Chitaʼ tobʼanik. Ri Gedeón xuchʼobʼo che kʼo kkun ta che ubʼanik, rumal laʼ xutaʼ tobʼanik chke e nikʼaj chik (Juec. 6:27, 35; 7:24). Are laʼ ri kkibʼan ri kʼamal taq bʼe. Ri qachalal Tony che xojchʼaw kan chrij pa ri párrafo 2, kubʼij: «Rumal ri  xbʼan che nukʼiyisaxik xwetaʼmaj che rajawaxik kinkʼam apachike chak, paneʼ kʼax kinbʼan che ubʼanik. Rumal laʼ, xinchomaj kinchʼaw chrij wariʼ pa ri qaqʼijilanik re ri familia rech kqachʼobʼo che kʼo kojkun ta che ubʼanik y xintaʼ che ri wixoqil che kubʼij chwe jas ri kuchomaj. Xuqujeʼ xwil jun video che kʼo pa jw.org, ubʼiʼ Junam rukʼ Jesús, cheqatoʼ xuqujeʼ chqaya kichuqʼabʼ nikʼaj chik». Chqilampeʼ ri utzilal xuriq ri qachalal Tony rumal che xutaʼ kitobʼanik e nikʼaj chik, kubʼij: «Xaq ta chi nutukel kinwilij ri congregación, rumal laʼ más kʼo chi nutiempo che usikʼixik ri Biblia, ubʼanik nuchʼawem y ubʼanik chi nikʼaj jastaq re ri nukojonik».

7. ¿Jas kkibʼan ri kʼamal taq bʼe che resaxik uwach ri Gedeón are chiʼ keyoqʼik? (Santiago 3:13).

⁷ Mape iwoyowal we kixyoqʼik. Kqʼalajin ri qas ubʼantajik jun kʼamal bʼe are chiʼ kyoqʼik. ¿Jas kutoʼ wi ri ukʼutbʼal ri Gedeón? Ri Gedeón xuchʼobʼo che are ta jun tzʼaqatalaj winaq, rumal laʼ are chiʼ xyoqʼ kumal ri achijabʼ re Efraín aninaq taj xpe royowal (Juec. 8:1-3). Xaneʼ xeʼutatabʼej ri achijabʼ riʼ, rukʼ machʼachʼem y utzalaj taq tzij xkunik xuqasaj ri koyowal. Are je kkibʼan ri kʼamal taq bʼe ri kʼo kinoʼj, aninaq taj kpe koyowal rukʼ ri kbʼix chke xaneʼ kkitatabʼej ri winaq y rukʼ utz taq tzij ketzijon rukʼ (chasikʼij uwach Santiago 3:13). Ri kkibʼan ri e kʼamal bʼe riʼ sibʼalaj ktobʼanik rech kʼo jamaril pa ri congregación.

8. ¿Jas kkibʼan ri kʼamal taq bʼe are chiʼ kyaʼ kiqʼij rumal ri kkibʼano? Chayaʼ jun kʼutbʼal.

⁸ Chiyaʼ uqʼij ri Jehová rukʼ ronojel ri kibʼano. Are chiʼ ri Gedeón xekichʼak ri madianitas, xraj che are xyaʼ uqʼij ri Jehová are ta ri areʼ (Juec. 8:22, 23). ¿Jas kkibʼan ri kʼamal taq bʼe che resaxik uwach ri Gedeón? Kkiya uqʼij ri Jehová rukʼ ri kekun che ubʼanik (1 Cor. 4:6, 7). Jun kʼutbʼal, are chiʼ kbʼix che jun kʼamal bʼe che sibʼalaj utz kubʼan che uyaʼik jun tijonik o jun chʼabʼal. Utz che kubʼij che pa ri uTzij ri Dios xresaj wi y che are ri utinamit ri Jehová yaʼowinaq ri tijonik che. Utz che ri kʼamal taq bʼe kkitaʼ chbʼil kibʼ che we ri kkikʼutu kuya uqʼij ri Jehová o xa are kyaʼ kiqʼij. Chojchomanampeʼ chrij ri xukʼulmaj jun qachalal Timothy ubʼiʼ. Are chiʼ xux kʼamal bʼe, sibʼalaj utz kunaʼo kuya chʼabʼal. Ri areʼ kubʼij: «Ri e qachalal sibʼalaj kkibʼij utzalaj taq tzij chwe, rumal che are chiʼ kinmajij ri chʼabʼal kinkoj utzalaj taq tzij y kʼutbʼal. Are kʼu xwilo che xa in tajin kkiya nuqʼij, are ta ri Jehová y ri uTzij». Are chiʼ xqʼax ri tiempo ri a Timothy xrilo che rajawaxik kukʼex ri kubʼan che uyaʼik ri chʼabʼal rech are ta kyaʼ uqʼij (Prov. 27:21). ¿Jas xubʼan ri a Timothy? Ri areʼ kubʼij: «Kimik ri e qachalal kkibʼij chwe che ri chʼabʼal xinyaʼo xeʼutoʼ che uchʼijik jun kʼax o más xeʼuqebʼsaj rukʼ ri Jehová. Más utz chi kintaʼ ri kkibʼij rumal che are kuya uqʼij ri Jehová».

9. ¿Jas jastaq xubʼan ri Gedeón che ukʼutik che knimanik y kʼo ukowil ukʼuʼx? (Chawilaʼ ri wachbʼal re ri uwach ri wuj).

⁹ Are chiʼ ri Jehová xuchaʼ ri Gedeón che qʼatal tzij, xqʼalajinik we knimanik y we kʼo ukowil ukʼuʼx. Xbʼix che che kusachisaj uwach ri altar che xubʼan ri utat che ri Baal (Juec. 6:25, 26). Are chiʼ jumul xeʼumulij e kʼi rajchʼojabʼ, ri Jehová xubʼij che che keresaj bʼi nikʼaj rumal che más e kʼi kʼo rukʼ (Juec. 7:2-7). Xuqujeʼ xnimanik are chiʼ ri Jehová xubʼij che che pa nikʼaj aqʼabʼ kbʼe chkij ri ukʼulel (Juec. 7:9-11).

10. ¿Jas kkʼutuwik we jun kʼamal bʼe knimanik?

 ¹⁰ Ri kʼamal taq bʼe rajawaxik kenimanik (Sant. 3:17). Are chiʼ jun kʼamal bʼe knimanik kuya bʼe riʼ che kkʼam ubʼe rumal ri utinamit ri Jehová y rumal ri Biblia, je wariʼ kuya jun utz kʼutbʼal chke ri qachalal. Are kʼu weneʼ jujun taq mul kʼax kubʼan che unimaxik ri taqanik che kyaʼik. Weneʼ kutaʼ chbʼil ribʼ we utz kunimaj ri taqanik che kyaʼ che. O weneʼ kbʼix che che kubʼan jun jastaq pa ri ukojonik che weneʼ kubʼano che kkʼam bʼi pa cárcel. We je kkʼulmataj wariʼ, ¿jas kkibʼan ri kʼamal taq bʼe che resaxik uwach ri Gedeón?

11. ¿Jas ketoʼw ri kʼamal taq bʼe rech kenimanik?

¹¹ Qas chitatabʼej ri pixabʼ kyaʼ chiwe y chinimaj. Ri Dios xubʼij che ri Gedeón jas kubʼan che usachisaxik uwach ri altar che xubʼan kan ri utat, jawiʼ kubʼan wi jun altar che ri Jehová y jas chikop rajawaxik kuya chuwach. Ri Gedeón aninaq xunimaj ri xbʼix che. Kimik, xuqujeʼ ri utinamit ri Jehová kutaq lo cartas, kuya anuncios, pixabʼ y taqanik chke ri kʼamal taq bʼe rech kojkichajij. Sibʼalaj keqaj ri kʼamal taq bʼe rumal che kkibʼan ronojel ri kubʼij lo ri utinamit ri Jehová. Rumal ri kinimanik, qonojel kqariq utzilal (Sal. 119:112).

12. Are chiʼ ri utinamit ri Jehová kukʼex jun jastaq, ¿jas rajawaxik kkibʼan ri kʼamal taq bʼe rech kkinimaj ri kubʼij Hebreos 13:17?

¹² Chixkikot rukʼ ri kchaʼ ubʼanik. Chnaʼtaj chqe che ri Jehová xubʼij che ri Gedeón che keʼutaq bʼi kʼi ajchʼojabʼ cho kachoch (Juec. 7:8). Weneʼ xuchomaj wariʼ: «¿Jasche ri Jehová je xubʼij wariʼ? ¿La qas kojchʼakan riʼ?». Paneʼ je wariʼ xuchomaj ri Gedeón xunimaj ri xbʼix che. ¿Jas kkibʼan ri kʼamal taq bʼe che resaxik uwach? Kkinimaj ri utaqanik ri utinamit ri Jehová (chasikʼij uwach Hebreos 13:17). Jun kʼutbʼal, pa ri 2014, ri jikalaj pataninel xukʼex ri kbʼan che utojik ri e Ja rech Ajawbʼal y ri e ja rech nimaʼq taq riqbʼal ibʼ (2 Cor. 8:12-14). Ojer, are chiʼ kbʼan jun Ja rech Ajawbʼal xa kqaj ri pwaq chke ri congregaciones, tekʼuriʼ are chiʼ kbʼantaj ri ja ktzalix ri pwaq. Are kʼu kimik riʼ, cho ronojel ri uwach Ulew ktas kan pwaq che kkoj che ubʼanik Ja rech Ajawbʼal, paneʼ ri congregación che kbʼan wi ri ja kʼi ta pwaq kuyaʼo. Are chiʼ jun kʼamal bʼe José ubʼiʼ xretaʼmaj wariʼ, xuchomaj: «Weneʼ pa nikʼaj chi tinamit utz kel wariʼ, are kʼu waral je taj. Kbʼan ta riʼ kyak jun Ja rech Ajawbʼal». Paneʼ je waʼ xkʼulmatajik ri areʼ xuya ri utobʼanik, rumal laʼ kubʼij: «Xnaʼtaj chwe ri kubʼij pa Proverbios 3:5, 6, che rajawaxik kinkubʼsaj nukʼuʼx chrij ri Jehová. ¡Utz elenaq ri chaʼom ubʼanik! Rumal che bʼanom kʼi Ja rech Ajawbʼal y oj kunaq qayaʼom ri qatobʼanik».

13. a) ¿Jas qas retaʼm ri Gedeón? b) ¿Jas kkibʼan ri kʼamal taq bʼe che resaxik uwach? (Xuqujeʼ chawilaʼ ri wachbʼal).

 ¹³ Rukʼ ukowil ikʼuʼx chibʼanaʼ ri kqaj chuwach ri Jehová. Ri Gedeón xunimaj ri Jehová paneʼ kʼax ri xtaʼ che y xuxibʼij ribʼ (Juec. 9:17). Are kʼu chiʼ xbʼix che che ktoʼ rumal ri Jehová, xukubʼsaj ukʼuʼx che qastzij ktoʼ che uchajixik ri utinamit ri Jehová. Ri e kʼamal bʼe che keʼel pa jun tinamit jawiʼ qʼatem wi ri qachak che ri Dios kejunamataj rukʼ ri Gedeón. Rumal che rukʼ kowil kʼuxaj kkilo jas kkibʼan che ri riqbʼal ibʼ y utzijoxik ri utzij ri Dios paneʼ kekʼam bʼi pa cárcel, kkʼot kichiʼ kumal ri policías, keʼesax lo pa ri kichak o itzel keʼilik. c Are chiʼ kpe ri nimalaj kʼaxkʼolil rajawaxik riʼ che ri kʼamal taq bʼe rukʼ kowil kʼuxaj kkibʼan ri kubʼij ri utinamit ri Dios chke apastaneʼ ri kʼax kkikʼulmaj. Weneʼ rech kqaya ubʼixik ri qʼatoj tzij pa kiwiʼ ri winaq che ri Biblia kujunamaj rukʼ nimaʼq taq saqbʼach. O are chiʼ kkibʼij chqe jas rajawaxik kqabʼano are chiʼ kpe ri Gog re Magog chqij (Ezeq. 38:18; Apoc. 16:21).

14. ¿Jas xubʼan ri Gedeón che ukʼutik che sibʼalaj xchakunik?

¹⁴ Rumal che qʼatal tzij ri Gedeón pa Israel sibʼalaj xchakunik. Are chiʼ ri madianitas xeʼanimaj bʼi chaqʼabʼ, ri Gedeón xeroqotaj pa ri liʼanik re Jezreel kʼa chuchiʼ ri nimaʼ Jordán, che sibʼalaj nojinaq che qʼayes y kʼix (Juec. 7:22). ¿Jas xkibʼan ri Gedeón are chiʼ xkil wariʼ? ¿La xekiterneʼj ta chik? ¡Je taj! Paneʼ ri Gedeón y ri 300 ajchʼojabʼ e kosinaq chik xkiqʼaxej ri nimaʼ Jordán y xkiya ta kan koqotaxik ri kikʼulel kʼa xekiriqa na (Juec. 8:4-12).

15. ¿Jas kkojow pa kʼax ri kikojonik ri kʼamal taq bʼe?

¹⁵ Ri kʼamal taq bʼe sibʼalaj kekosik rumal che kekichajij ri e qachalal pa ri congregación y ri kifamilia. ¿Jas kkibʼan ri  kʼamal taq bʼe che resaxik uwach ri Gedeón we je kkinaʼ wariʼ?

16-17. a) ¿Jas xtoʼw ri Gedeón rech xuchʼij ri kʼax? b) ¿Jas qas ketaʼm ri kʼamal taq bʼe? (Isaías 40:28-31; xuqujeʼ chawilaʼ ri wachbʼal).

¹⁶ Chikojoʼ che ri Jehová kuya na ichuqʼabʼ. Are wariʼ xubʼan ri Gedeón, y amaqʼel xtoʼ rumal ri Jehová (Juec. 6:14, 34). Jumul, ri Gedeón y ri rajchʼojabʼ xekoqotaj e kebʼ qʼatal taq tzij madianitas che e bʼenaq chkij ri kicamellos (Juec. 8:12, 21). Are kʼu, rukʼ ri utobʼanik ri Jehová xekiriqaʼ ri kikʼulel. Ri kʼamal taq bʼe re kimik rajawaxik kkikubʼsaj kikʼuʼx chrij ri Jehová rumal che are ri Dios ri «man kchuqchubʼ ta[j] mawi kkosik». Ri areʼ kuya ri chuqʼabʼ chke che kajwatajik (chasikʼij uwach Isaías 40:28-31).

¹⁷ Chqilampeʼ ri xukʼulmaj ri qachalal Matthew, che kʼo pa ri Comité che Ketzijon kukʼ ri Hospitales. Kubʼij: «Qas wilom che qastzij ri kubʼij pa Filipenses 4:13. Rumal che are chiʼ sibʼalaj in kosinaq y kinnaʼo che kinchʼij ta chik kintaʼ che ri Jehová che kuya nuchuqʼabʼ che kitoʼik ri e qachalal. Qas nunaʼom che ri Jehová jetaneʼ uyaʼom jun inyección chwe che uyaʼik nuchuqʼabʼ». Ri kʼamal taq bʼe kejunamataj rukʼ ri Gedeón, rumal che sibʼalaj kechakunik paneʼ sibʼalaj kkiriq kʼax. Are kʼu rajawaxik kkichʼobʼo jas ri kekun ta che ubʼanik paneʼ kkaj kkibʼano. Xuqujeʼ apastaneʼ ri kʼax kkiriqo kkikubʼsaj kikʼuʼx che ri Jehová qas keʼutoʼ wi (Sal. 116:1; Filip. 2:13).

18. Junam rukʼ ri qilom chik, ¿jas kkibʼan ri kʼamal taq bʼe che resaxik uwach ri Gedeón?

¹⁸ Junam rukʼ ri qilom, ri kʼamal taq bʼe kʼo kketaʼmaj chrij ri Gedeón. Rajawaxik keʼux machʼalik taq winaq are chiʼ kyaʼ eqeleʼn chke, are chiʼ kbʼix utz taq tzij chke o keyoqʼik. Xuqujeʼ rajawaxik kenimanik y kkikʼut kowil kʼuxaj más na are chiʼ knaqajin ri kʼisbʼal. Xuqujeʼ rajawaxik kkikubʼsaj kikʼuʼx chrij ri Jehová che apastaneʼ ri kkiriqo keʼutoʼ na. Rumal laʼ «nim cheʼiwilaʼ wi ri je kibʼanik jas ri areʼ» rumal che sibʼalaj kechakunik (Filip. 2:29).