1, 2. ¿Jas kjunamataj wi ri qaqʼij rukʼ ri uqʼij ri Lot?

 JE Kqanaʼ oj kimik junam rukʼ ri xunaʼ ri Lot are chiʼ kqil ri tzʼil taq jastaq che kkibʼan ri winaq. Ri Lot xubʼisoj ri xkibʼan ri itzel taq winaq, rumal che retaʼm che ri Jehová itzel kril ri itzelal (2 Ped. 2:7, 8). Xuqujeʼ rumal che ri areʼ nim kril wi ri Jehová y kuloqʼoqʼej, itzel xril ri itzelal che xkibʼan ri winaq. Jeʼ tajin kkibʼan ri winaq kimik, nim ta kkil wi ri utaqanik ri Jehová. Rech kqabʼan ta qe junam kukʼ, rajawaxik che ri oj kqaxej qibʼ chuwach ri Dios y kqaloqʼoqʼej (Prov. 14:2).

² Ri Dios kukoj ri wuj re Proverbios che qatoʼik rech kqabʼan ri kqaj chuwach. Qonojel ri oj cristianos, achijabʼ, ixoqibʼ, alabʼom alitomabʼ, akʼalabʼ y nim chi kijunabʼ kojkunik kqariq utz taq pixabʼ pa ri wuj re Proverbios.

3. Junam rukʼ ri kubʼij Proverbios 17:3, ¿jasche rajawaxik kqachajij ri qanimaʼ? (Xuqujeʼ chawilaʼ ri e wachbʼal).

³ Rajawaxik kqachajij ri qanimaʼ rumal che ri Jehová kunikʼoj. Wariʼ kraj kubʼij che ri Jehová kril ri kkil ta ri winaq, rumal che retaʼm ronojel (chasikʼij uwach Proverbios 17:3). Are chiʼ ri Jehová krilo che rukʼ ronojel qanimaʼ kqanimaj ri e utaqanik sibʼalaj kojuloqʼoqʼej. We kʼo qanojibʼal kqakoj ta riʼ ri molom taq tzij re ri Satanás y kqabʼan ta qe ri kkibʼan ri winaq (Juan 4:14; 1 Juan 5:18, 19). Y are chiʼ kojqebʼ más rukʼ ri Jehová, más nim kqil wi y más kqaloqʼoqʼej. Jeriʼ kqabʼan ta jastaq che kuya bʼis che. Rumal laʼ, we oj kʼo chuwach jun makaj chojchoman chrij wariʼ: «We ri Jehová sibʼalaj kinraj, ¿jasche kinbʼan wariʼ?» (1 Juan 4:9, 10).

4. ¿Jasche ri xibʼin chuwach ri Dios xutoʼ jun qachalal ixoq?

 ⁴ Jun qachalal re Croacia Marta ubʼiʼ b che xa jubʼiqʼ xraj xqaj pa jun mak, kubʼij: «Qas ta kʼo chi saq ri nuchomanik. Y kʼax xinbʼan che ukojik nuchuqʼabʼ chuwach ri nurayinik, are kʼu rumal ri xibʼin ibʼ kinnaʼ chuwach ri Jehová xinutoʼoʼ». ¿Jas xubʼano? Ri areʼ kubʼij che xchoman chrij ri kʼax che kuriqo we kmakunik. Xuqujeʼ ri oj chojchoman chrij ri kʼax kqariqo we kqabʼan jun mak. Y ri más kʼax are che kqaya bʼis che ri Jehová y kojkun ta chik kqaqʼijilaj (Gén. 6:5, 6).

5. ¿Jas xawetaʼmaj chrij ri xukʼulmaj ri qachalal Leo?

⁵ Jun winaq che qas kuxibʼij ribʼ chuwach ri Dios, kubʼij taj che umak taj kmakunik y kerachilaj ta winaq che kkiqʼijilaj ta ri Jehová. Are laʼ ri xretaʼmaj ri qachalal Leo che kel pa República Democrática del Congo. Are chiʼ qʼaxinaq chi kajibʼ junabʼ che ubʼanom uqasanjaʼ, xumajij kachilaxik winaq che kkipatanij ta ri Jehová. Xuchomaj che kʼo ta kkʼulmatajik we kubʼan ta re ri kkibʼan ri e rachiʼl. Are kʼu je ta xelik, rumal che nojimal xumaj qʼabʼarik y ubʼanik tzʼil taq mak junam kukʼ ri e rachiʼl. Are kʼu xnaʼtaj che ri kikʼutum ri unan utat Testigos chuwach y xchoman chrij ri utzalaj ukʼaslemal nabʼe kanoq. Rumal laʼ, xuya kan ubʼanik ri tajin kubʼano y rukʼ ri kitobʼanik ri kʼamal taq bʼe xtzalij lo rukʼ ri Jehová. Kimik, kʼamal bʼe chik y precursor especial.

6. ¿E jachin chkij kojchʼaw na pa wajun kʼutunem riʼ?

⁶ Chqanikʼoj ri capítulo 9 re Proverbios che kuyaʼ utz taq pixabʼ chqe qonojel, achijabʼ y ixoqibʼ. Pa wajun kʼutunem  kojchʼaw na chkij e kebʼ ixoqibʼ, jun kukʼutunisaj ri nojibʼal y ri jun chik ri kʼo ta unoʼj. c Are chiʼ kqanikʼoj ri nikʼaj chi párrafos, kqilo che ri winaq ri e kʼo pa uqʼabʼ ri Satanás utz kkil ubʼanik ri tzʼil taq mak y rilik pornografía (Efes. 4:19). Rumal laʼ, rajawaxik kqaya ta kan unaʼik xibʼin ibʼ chuwach ri Jehová y kqaxutuj ri itzelal (Prov. 16:6). Ri e kebʼ ixoqibʼ che kojchʼaw na chkij kkitzukuj ri kʼo ta kinoʼj, «ri e konabʼ». Jetaneʼ pa kijujunal ri e kebʼ ixoqibʼ kkisikʼij pa kachoch y kkibʼan jun utzalaj waʼim kukʼ (Prov. 9:1, 5, 6, 13, 16, 17). Are kʼu junam ta kkiriq ri keʼok pa kachoch ri e kebʼ ixoqibʼ riʼ. Chqilampeʼ jas kkiriqo.

7. Junam rukʼ ri kubʼij pa Proverbios 9:13-18, ¿jas kʼax kkiriq ri keʼok pa rachoch ri ixoq «ri man kʼo ta unoʼj»? (Xuqujeʼ chawilaʼ ri wachbʼal).

⁷ Chojchomanampeʼ chrij ri sikʼinik che kuya ri ixoq «ri man kʼo ta unoʼj» (chasikʼij uwach Proverbios 9:13-18). Kʼo ta ukʼixbʼal che ubʼixik wariʼ: «¡Tisaj waral, kʼojolabʼ ri kʼa majaʼ kiwesaj inoʼj!». Jewaʼ kubʼan che kisikʼixik ri kʼo ta kinojibʼal che utijik jun utzalaj rikil. ¿Y jas kkiriq ri keʼok pa ri rachoch? «Ri kamikal». Kʼateʼ ta nabʼe mul waʼ kchʼaw ri Proverbios chrij jun ixoq junam rukʼ waʼ. Pa ri nikʼaj kan capítulos kchʼaw chrij «ri ixoq ri man kʼo ta kux chawe» y ri ixoq che kubʼan tzʼil taq mak. Tekʼuriʼ kubʼij wariʼ chrij: «Ri utaqexik ri bʼe ri kbʼe cho rachoch we ixoq riʼ, [...] kkʼaman bʼik pa ri kamikal» (Prov. 2:11-19). Y Proverbios 5:3-10 kubʼij chqe che kqachajij qibʼ chuwach jun chi ixoq. Rumal che «ri bʼinem rukʼ we ixoq riʼ kkʼaman bʼik pa ri kamikal».

8. ¿Jas rajawaxik kkichaʼ ubʼanik ri kesikʼix rumal ri ixoq «ri man kʼo ta unoʼj»?

⁸ Konojel ri kesikʼix rumal ri ixoq «ri man kʼo ta unoʼj» rajawaxik kkichomaj we kkikʼamo o kkixutuj. ¿Jampaʼ kkʼulmataj wariʼ? Are chiʼ kojopan chuwach jun makaj: ri inmoralidad sexual o ri pornografía. ¿Jas kqabʼan chkiwach ri e jastaq riʼ?

9, 10. ¿Jasche rajawaxik kqaxutuj ri inmoralidad sexual?

⁹ Kojkunik kqaxutuj ri inmoralidad sexual, rumal che ri wuj re Proverbios kubʼij che ri ixoq «ri man kʼo ta unoʼj» kubʼij wariʼ: «Ri elaqʼam jaʼ are sibʼalaj kiʼ na». ¿Jas kraj kubʼij «ri elaqʼam jaʼ»? Ri Biblia  kubʼij che ri relaciones sexuales chkixoʼl ri e kʼulanik are jun jaʼ kjororik (Prov. 5:15-18). Xaq xiw ri e kʼulan chuwach qʼatbʼal tzij kekunik kkibʼan ri relaciones sexuales. Are kʼu «ri elaqʼam jaʼ» kjunamataj ta rukʼ ri jaʼ che kjororik. Are waʼ ri kraj kubʼij ri kkibʼan ri inmoralidad sexual, rumal che xa kkowaj kibʼ kkibʼano junam rukʼ jun elaqʼom. «Ri elaqʼam jaʼ» kiʼ chkiwach ri winaq rumal che utz kkinaʼ ubʼanik, are kʼu kʼa rumal che tajin kril ri Jehová (1 Cor. 6:9, 10).

¹⁰ Ri kkibʼan ri inmoralidad sexual kkiriq kʼi kʼax, rumal che weneʼ kkinaʼ kʼixbʼal, kkinaʼo che kʼo ta chi kipatan, e tzʼil, kkibʼan kʼax chke ri kifamilia y kkʼojiʼ kalkʼwal paneʼ kkaj taj. Rumal laʼ, rajawaxik kqaxutuj ri sikʼinik re ri ixoq «ri man kʼo ta unoʼj». E kʼi chke ri kkibʼan ri inmoralidad sexual kekam pa ri kikojonik rumal che ksach uwach ri kachilanik rukʼ ri Jehová y weneʼ kkiriq yabʼil che keʼukʼam bʼi pa kamikal (Prov. 7:23, 26). Pa ri versículo 18 re ri capítulo 9 kukʼisbʼej rukʼ ri e tzij riʼ: ri e rulaʼ e kʼo «chupam ri rajawbʼal ri kamikal». ¿Jas kʼu che e kʼi kkikʼam ri sikʼinik che kuya ri ixoq «ri man kʼo ta unoʼj» we xa kkiriq kʼax? (Prov. 9:13-18).

11. ¿Jasche utz taj kqil pornografía?

¹¹ Rajawaxik kqachajij qibʼ chuwach ri pornografía rumal che kʼo pa apachike lugar. E jujun kkibʼij che kʼo ta kubʼano we kqilo, are kʼu xa molom tzij. Ri pornografía kubʼan kʼax che ri winaq, rumal che nim ta chi kril ribʼ, nim ta chi keril ri e nikʼaj chik y kkun ta chik kuya kan rilik. Chnaʼtaj chqe che kʼax chi resaxik pa qajolom ri tzʼil taq wachbʼal y kukʼasuj más ri itzel taq qarayinik (Col. 3:5; Sant. 1:14, 15). Rumal laʼ, ri e winaq che kkil pornografía keqaj pa ri inmoralidad sexual.

12. ¿Jas rajawaxik kqabʼano we xaq kʼateʼ kqʼalajin lo jun tzʼil wachbʼal chqawach?

¹² ¿Jas kqabʼano we xaq kʼateʼ kqʼalajin lo jun tzʼil wachbʼal chqawach? Rajawaxik aninaq kqaya kan rilik. We knaʼtaj chqe che más nim ubʼanik ri qachilanik rukʼ ri Jehová, kojutoʼ rech kqaxutuj ri itzel taq wachbʼal. E kʼo wachbʼal che e pornografía taj, are kʼu kukʼasuj itzel taq rayinik chqe. Rajawaxik keqaxutuj ri tzʼil taq wachbʼal riʼ, rumal che kqaj taj kojmakun pa qanimaʼ (Mat. 5:28, 29). Jun qachalal David ubʼiʼ re Tailandia kubʼij: «Amaqʼel kinchoman chrij wariʼ: ‹¿La utz kril ri Jehová ri tajin kwilo paneʼ pornografía taj?›. Uchomaxik wariʼ in utoʼm rech utz ri kinchaʼ ubʼanik».

13. ¿Jas kojtoʼwik rech utz ri kqachaʼ ubʼanik?

¹³ We kqaxibʼij qibʼ chuwach ri Jehová kojutoʼ rech utz ri kqachaʼ ubʼanik. Rumal laʼ, Proverbios 9:10 kubʼij: «Ri noʼj kachapletajik rumal ri [xeʼn ibʼ chuwach ri Dios]». Wariʼ kojutoʼ che uchʼobʼik ri capítulo 9 re Proverbios che kchʼaw chrij ri ixoq che qas kʼo unoʼj.

14. ¿Jas jun chi sikʼinik kqariq pa Proverbios 9:1-6?

¹⁴ (Chasikʼij uwach Proverbios 9:1-6). Waral kqil jun sikʼinik che xuya ri Dios chqe, ri xojbʼanowik y ri kyaʼow ri nojibʼal (Prov. 2:6; Rom. 16:27). Waral ri Proverbios tajin kchʼaw chrij jun nimalaj ja che kʼo siete raqan. Wariʼ kukʼut chqawach che ri Jehová sibʼalaj utz y keʼukʼulaj konojel ri kkaj kkitatabʼej ri upixabʼ.

15. ¿Jas sikʼinik kuya ri Dios chqe?

¹⁵ Rumal che ri Jehová sibʼalaj ksipanik kuya utz taq jastaq chqe. Qas kqʼalajin  ri ubʼantajik ri Jehová rukʼ wajun ixoq che kubʼij pa ri capítulo 9 re Proverbios che kukʼutunisaj ri qastzij nojibʼal. Wajun ixoq uyaʼom chi ronojel puwiʼ ri mesa, ri tiʼj y ri vino (Prov. 9:2). Xuqujeʼ, pa ri versículos 4 y 5, ri qastzij nojibʼal kubʼij wariʼ chke ri kʼo ta kinojibʼal: «Chixpetoq che utijik iwe ri nuwa». ¿Jasche rajawaxik kqakʼam ri sikʼinik kuya ri ixoq? Rumal che ri Jehová keʼuchajij y kuya kinojibʼal ri e ralkʼwal. Kraj taj che kqariq kʼax y kʼateʼ kqabʼisoj chi pa ronojel ri qakʼaslemal ri xqabʼano. Rumal laʼ, «ri Ajawaxel kuya ri utobʼanik xuqujeʼ kerilij ri kukʼam jun sukʼalaj kʼaslemal» (Prov. 2:7). We kqaxej qibʼ chuwach ri Jehová, kqanimaj riʼ ri upixabʼ y kqabʼan ri kqaj chuwach, jeriʼ kojkikot pa ronojel ri qakʼaslemal (Sant. 1:25).

16. ¿Jas xuchaʼ ubʼanik ri qachalal Alain rumal che xuxibʼij ribʼ chuwach ri Jehová, y jas utzilal xuriqo?

¹⁶ Chqilampeʼ jun kʼutbʼal che we kqaxibʼij qibʼ chuwach ri Jehová kojutoʼ rech utz ri kqachaʼ ubʼanik. Ri qachalal Alain che are jun maestro pa jun tijobʼal, kubʼij wariʼ: «E kʼi wachiʼl maestros kkibʼij che utz kil películas che kʼo pornografía chupam, rumal che kʼo ketaʼmax chupam». Are kʼu ri qachalal Alain retaʼm che utz ta wajun chomanik riʼ. Kubʼij ri xubʼano: «Rumal che kinxibʼij wibʼ chuwach ri Jehová, xinxutuj rilik ri películas riʼ. Y xinbʼij chke ri maestros jasche kwil taj». Ri qachalal xubʼan ri xubʼij ri qastzij nojibʼal: «Chixbʼinoq jachaʼ ri winaq ri kekʼoxomanik» (Prov. 9:6). Rumal wariʼ, e jujun maestros xkimajij retaʼmaxik chrij ri Biblia y bʼenam pa ri e riqbʼal ibʼ.

17, 18. ¿Jas utzilal tajin kkiriq kimik ri kkikʼam ri usikʼinik ri qastzij nojibʼal? ¿Y jas kkiriq na pa ri petinaq? (Xuqujeʼ chawilaʼ ri wachbʼal).

¹⁷ Ri e kebʼ ixoqibʼ che xojchʼaw chkij, kukʼut chqawach che ri Jehová kraj kojkikot pa ri qakʼaslemal. Ri kkikʼam ri sikʼinik re ri ixoq «ri man kʼo ta unoʼj» utz kkinaʼ ubʼanik ri inmoralidad sexual. Xaq xiw kechoman chrij ri kkibʼan kimik y are ta ri kʼax kkiriq na. Rumal laʼ, kkiriq ri «kamik chupam ri rajawbʼal ri kamikal» (Prov. 9:13, 17, 18).

¹⁸ Are kʼu, ri kkikʼam ri usikʼinik ri qastzij nojibʼal kkiriq utzilal. Rumal che tajin kkitij jun utzalaj rikil che kubʼan ta kʼax (Is. 65:13). Ri Jehová xubʼij wariʼ che ri qʼaxal tzij Isaías: «Qas utz nutatabʼexik chibʼanaʼ, kebʼitij kʼu na utzalaj taq qʼobʼisabʼal, kebʼitij na jeʼlalaj taq jastaq» (Is. 55:1, 2). Rumal laʼ, tajin kqetaʼmaj uloqʼoqʼexik  ri kqaj chuwach ri Jehová y uxutuxik ri utz ta krilo (Sal. 97:10). Xuqujeʼ kojkikot che kisikʼixik chi nikʼaj rech kkiriq ri utzalaj taq noʼj che kuya ri qastzij nojibʼal. Kojjunamataj kukʼ ri aj ikʼabʼ (mos) che kubʼij pa ri capítulo 9 re Proverbios che xetaq bʼi «che uraqik kichiʼ puwiʼ ri utanataʼil ri tinamit». Ri kqakʼam ri sikʼinik kqariq utzilal kimik y pa ri petinaq. We kojbʼin «jachaʼ ri winaq ri kekʼoxomanik» kqariq ri kʼaslemal kʼo ta ukʼisik (Prov. 9:3, 4, 6).

19. Junam rukʼ ri kubʼij Eclesiastés 12:13, 14, ¿jas rajawaxik kqabʼano? (Xuqujeʼ chawilaʼ ri recuadro « Ri utzilal kqariqo we kqaxibʼij qibʼ chuwach ri Dios»).

¹⁹ (Chasikʼij uwach Eclesiastés 12:13, 14). Rumal che oj kʼo chi pa ri kʼisbʼal taq qʼij sibʼalaj kʼo kʼi itzelal. Are kʼu ri oj kqaj kqaya ta kan unaʼik xibʼin ibʼ chuwach ri Jehová. Rech jeriʼ kqachajij ri qanimaʼ, oj chʼajchʼoj chuwach ri Dios y kqaya ta kan rachilaxik. Rumal che kqaloqʼoqʼej ri Jehová y nim kqil wi, kqaya ta kan kisikʼixik ri winaq rech kkiriq ri qastzij nojibʼal y kkiriq utzilal.