KʼUTUNEM 25
BʼIXONEM 7 Jehová, kuya nuchuqʼabʼ
Chnaʼtaj chqe che ri Jehová are ri kʼaslik Dios
«¡Kʼasal ri Ajawaxel!» (SAL. 18:46).
KYAʼ UBʼIXIK
Ri utzilal kqariqo are chiʼ ksach ta pa qajolom che tajin kqapatanij ri kʼaslik Dios.
1. ¿Jas kojtoʼwik rech kqaya ta kan upatanexik ri Jehová paneʼ kqariq kʼi kʼax?
RI Biblia kubʼij che oj kʼo pa «kʼaxalaj taq qʼij» (2 Tim. 3:1). Cho wajun uwach Ulew riʼ qonojel kqariq kʼax, are kʼu ri oj upatanelabʼ ri Dios xuqujeʼ kojtereneʼx rumal ri qakojonik. ¿Jas kojtoʼwik rech kqaya ta kan upatanexik ri Jehová paneʼ kqariq kʼax? Ri kojtoʼwik, are che knaʼtaj chqe che ri Jehová are ri kʼaslik Dios (Jer. 10:10; 2 Tim. 1:12).
2. ¿Jas kubʼan ri Jehová che ukʼutik che are ri «kʼaslik Dios»?
2 Ri Jehová are jun Dios che qas kʼaslik, rumal laʼ kojutoʼo are chiʼ kajwataj chqe y kutzukuj ri kubʼan che qatoʼik (2 Crón. 16:9; Sal. 23:4). Are chiʼ ksach ta pa qajolom che ri Dios qas kʼaslik, kojutoʼ rech kqachʼij apachike uwach kʼax. Chqilampeʼ ri xubʼan ri David che ubʼanik wariʼ.
3. ¿Jas xraj xubʼij ri David are chiʼ xubʼij: «¡Kʼasal ri Ajawaxel!»?
3 Ri David qas xuchʼobʼ uwach ri Jehová y xukubʼsaj ukʼuʼx chrij. Are chiʼ ri Saúl y nikʼaj chi winaq xkaj xkikamisaj, xutaʼ ri utobʼanik ri Jehová (Sal. 18:6). Are chiʼ ri David xrilo che xtaʼ ri uchʼawem y xtoʼik, xubʼij: «¡Kʼasal ri Ajawaxel!» (Sal. 18:46). Rukʼ ri xubʼij xaq xiw ta xukʼutu che kkojon chrij ri Dios xuqujeʼ xukʼutu che qas kukubʼsaj ukʼuʼx chrij ri Jehová. Jun wuj kubʼij: «Ri David xukojo che ri Dios qas kʼaslik y che amaqʼel kutoʼ ri utinamit». Ri David qas xril ri xubʼan ri Jehová che utoʼik y wariʼ xubʼano che más xukubʼsaj ukʼuʼx chrij y che xuya ta kan upatanexik (Sal. 18:28, 29, 49).
4. ¿Jas tewchibʼal kqariqo we kqakojo che ri Jehová are jun kʼaslik Dios?
4 Rech kqaya ta kan upatanexik ri Jehová rukʼ kikotemal rajawaxik kqetaʼmaj che are ri kʼaslik Dios. Wariʼ kuya qachuqʼabʼ rech kqachʼij apachike kʼax y rech kqabʼan ronojel ri kojkun che ubʼanik rech kqaya ta kanoq.
RI KʼASLIK DIOS KUYA ACHUQʼABʼ
5. ¿Jas kojtoʼwik rech kojkunik kqachʼij ri kʼax che kqakʼulmaj? (Filipenses 4:13).
5 Are chiʼ knaʼtaj chqe che ri Jehová are ri kʼaslik Dios, kojkun riʼ kqachʼij apachike uwach kʼax y kqakubʼsaj qakʼuʼx che amaqʼel kojutoʼo. Are ri Dios che kʼo ronojel ukuʼinem y kʼo ta jun kʼax che mat kkunik kojutoʼ chuwach (chasikʼij Filipenses 4:13). Retaʼmaxik wariʼ, kubʼano che más kqakubʼsaj qakʼuʼx chrij. Are chiʼ kqil ri kubʼan ri Jehová che qatoʼik chuwach jun kʼax che paneʼ nim ta ubʼanik, kukʼut chqawach che kojutoʼ na are chiʼ kqariq nimaʼq taq kʼax.
6. ¿Jas xukʼulmaj ri David rech qas xukubʼsaj ukʼuʼx chrij ri Jehová?
6 Chqilaʼ kebʼ jastaq che xukʼulmaj ri David y ri xubʼan che ukubʼsaxik ukʼuʼx chrij ri Jehová. Are chiʼ kʼa ala na y tajin keʼuyuqʼuj ri e uchij ri utat, xpe jun koj y xukʼam bʼi jun chij y pa jun mul chik xpe jun oso xuqujeʼ xukʼam bʼi jun chij. Pa waʼ kebʼ mul riʼ, ri David xutereneʼj ri koj y ri oso y xeʼukamisaj. Rumal che retaʼm che are ri Jehová ri xyaʼow uchuqʼabʼ, kʼo ta jumul xubʼij che rukʼ ri uchuqʼabʼ ri areʼ xeʼukamisaj ri e awaj riʼ (1 Sam. 17:34-37). Ri David xsach ta pa ujolom ri xubʼan ri Jehová che utoʼik. Amaqʼel xchoman chrij y wariʼ xutoʼo rech más xukubʼsaj ukʼuʼx chrij ri kʼaslik Dios y che ktoʼ na pa ri petinaq.
7. ¿Jas xchoman ri David chrij y jas xubʼan wariʼ rech xkunik xchʼojin rukʼ ri Goliat?
7 Ri David kʼa ala na are chiʼ xbʼe che kilik ri ajchʼojabʼ re Israel. Xrilo che ri ajchʼojabʼ sibʼalaj kixiʼm kibʼ rumal che ri Goliat tajin kubʼij wariʼ: «Keʼentzur ri ajchʼojabʼ ri e kʼo pa Israel» (1 Sam. 17:10, 11). Ri ajchʼojabʼ xkixeʼj kibʼ rumal ri xuya ubʼixik ri Goliat (1 Sam. 17:24, 25). Are kʼu ri David xuxiʼj ta ribʼ. Chuwach ri areʼ ri Goliat xa tajin «keʼutzur ri rajchʼojabʼ ri kʼaslik Dios», y xaq xiw ta tajin keʼutzur ri ajchʼojabʼ re Israel (1 Sam. 17:26). Ri David xchoman chrij ri Jehová. Xukubʼsaj ukʼuʼx che ktoʼ na rumal junam rukʼ xbʼan che utoʼik kukʼ ri e chij. Y rukʼ ri utobʼanik ri Jehová, ri David xkunik xukamisaj ri Goliat (1 Sam. 17:45-51).
8. ¿Jas kojtoʼwik rech qas kqakubʼsaj qakʼuʼx chrij ri Jehová are chiʼ kqariq kʼax? (Xuqujeʼ chawilaʼ ri wachbʼal).
8 Junam rukʼ ri David, ri oj xuqujeʼ kojkunik kqachʼij ri kʼax we knaʼtaj chqe che ri kʼaslik Dios amaqʼel kojutoʼo (Sal. 118:6). Más kqakubʼsaj qakʼuʼx riʼ chrij ri Dios are chiʼ kqasikʼij ri xubʼan che kitoʼik ri upatanelabʼ re ojer (Is. 37:17, 33-37). Xuqujeʼ chasikʼij ri kyaʼ ubʼixik pa jw.org chrij ri ubʼanom ri Jehová che kitoʼik ri qachalal re kamik. Y chatchoman chrij ri ubʼanom che atoʼik at. Weneʼ kachomaj che ri Jehová at utoʼom ta chuwach jun oso o jun koj junam rukʼ ri xubʼan rukʼ ri David. Are kʼu ri qas qetaʼm are che kʼi ubʼanom pa ri qakʼaslemal. Jun kʼutbʼal, uyaʼom bʼe chqe rech kojux rachiʼl (Juan 6:44). Y ri at ayaʼom ta kan upatanexik rumal che tajin katutoʼo. Utz we kataʼ che che katutoʼo rech knaʼtaj chawe ri ubʼanom che utzalixik ri achʼawem y ri ubʼanom che atoʼik are chiʼ xajwataj chawe. Are chiʼ knaʼtaj chawe ri ubʼanom ri Jehová che atoʼik kubʼano che kakubʼsaj más akʼuʼx chrij y che amaqʼel katutoʼ na.
Ri kqabʼan che uchʼijik ri kʼax kʼo ubʼanik rukʼ ri uQʼatbʼal tzij ri Dios. (Chawilaʼ ri párrafos 8 y 9).
9. ¿Jas kqabʼan che rilik ri kʼax che kqakʼulmaj? (Proverbios 27:11).
9 Retaʼmaxik che ri Jehová are ri kʼaslik Dios kojutoʼo rech kkʼojiʼ jun utz qachomanik chrij ri kʼax che kqariqo. Je wariʼ kqakikotemaj ri Jehová rumal che ri Satanás kubʼij che are chiʼ kqariq jun kʼax kqaya kan upatanexik ri Jehová (Job 1:10, 11; chasikʼij Proverbios 27:11). Rumal laʼ, are chiʼ kqakʼut sukʼilal y kqaya ta kan upatanexik ri Jehová kqakʼutu che ri Satanás are jun bʼanal tzij. ¿La kʼax tajin kabʼan che uriqik ri pwaq, tajin katterneʼx kumal ri qʼatal taq tzij, katkitatabʼej ta ri winaq are chiʼ katzijoj ri utzij ri Dios o tajin kariq jun chi kʼax? We tajin kakʼulmaj wariʼ, chnaʼtaj chawe che are chiʼ kariq kʼax katkunik kakikotemaj ri Jehová. Masach pa ajolom che ri Jehová kuya taj che kariq jun kʼax che mat katkunik kachʼijo (1 Cor. 10:13). Kuya na ri chuqʼabʼ che qas kajwataj chawe.
RI KʼASLIK DIOS KATUTEWCHIʼJ NA
10. ¿Jas kubʼan ri kʼaslik Dios che kitoʼik ri keqʼijilan che?
10 Ri Jehová keʼutewchiʼj ri kepatanin che (Heb. 11:6). Kamik kubʼano che kojkikotik, kqanaʼ jamaril pa qanimaʼ y pa ri petinaq kqariq ri kʼaslemal kʼo ta ukʼisik. Qas qetaʼm che ri areʼ kraj y kkunik kojutewchij. Retaʼmaxik wariʼ kojutoʼo rech kqabʼan ronojel ri kojkun che ubʼanik rech kqapatanij, junam rukʼ ri xkibʼan ri upatanelabʼ re ojer. Chqilaʼ ri xubʼan ri Timoteo (Heb. 6:10-12).
11. ¿Jas xbʼanowik che ri Timoteo qas xraj xeʼutoʼ ri congregaciones ojer? (1 Timoteo 4:10).
11 (Chasikʼij 1 Timoteo 4:10). Ri Timoteo xukubʼsaj ukʼuʼx chrij ri kʼaslik Dios. Y qas retaʼm che ktewchiʼx na rumal ri Jehová. Rumal laʼ xubʼan ronojel ri xkun che ubʼanik rech xupatanij ri Jehová y xeʼutoʼ ri nikʼaj chik. ¿Jas ri xubʼano? Ri apóstol Pablo xutoʼo rech xux jun utz ajtij, rech kuya utz taq chʼabʼal y rech kuya jun utz kʼutbʼal chke ri alabʼom alitomabʼ y ri nim chi kijunabʼ. Xyaʼ nimaʼq taq eqeleʼn che che kʼax ubʼanik, junam rukʼ kipixbʼexik ri nabʼe taq cristianos rukʼ loqʼoqʼebʼal are chiʼ xajwataj chke (1 Tim. 4:11-16; 2 Tim. 4:1-5). Ri Timoteo retaʼm che ri Jehová nim xril ri chak che tajin kubʼano, paneʼ ri nikʼaj chik nim ta xkilo (Rom. 2:6, 7).
12. ¿Jas kbʼanowik che ri kʼamal taq bʼe qas kekilij ri qachalal re ri congregaciones? (Xuqujeʼ chawilaʼ ri wachbʼal).
12 Kamik ri kʼamal taq bʼe qas ketaʼm che ri Jehová nim kril ri chak che tajin kkibʼano. E kʼo jujun taq kʼamal bʼe che xaq xiw ta kkichajij ri congregación, kkitzijoj ri utzij ri Dios, xaneʼ xuqujeʼ kkiya ri kitobʼanik pa construcción y pa ri labores de socorro. E jujun chik kekisolij ri qachalal che e yawabʼ o kechakun kukʼ ri Comités che Ketzijon kukʼ ri Hospitales. Ri kʼamal taq bʼe ketaʼm che ri e qachalal e rech ri Jehová man e rech ta jun winaq. Rumal laʼ, rukʼ ronojel kanimaʼ kkibʼan ri chak che yaʼom chke y ketaʼm che ri Jehová keʼutewchiʼj na (Col. 3:23, 24).
Ri kʼaslik Dios katutewchiʼj na rumal ri chak che kabʼan pa ri congregación. (Chawilaʼ ri párrafos 12 y 13).
13. ¿Jas kunaʼ ri Jehová are chiʼ krilo che kqakoj qachuqʼabʼ che upatanexik?
13 Qonojel taj kojkunik kojux kʼamal taq bʼe, are kʼu qonojel kʼo kojkunik kqaya che ri Jehová. Ri areʼ nim kril wi ri kqabʼan che upatanexik. Y nim kril wi ri kuchuj che kqayaʼo paneʼ nim taj. Ri areʼ sibʼalaj kkikotik are chiʼ kaya jun acomentario paneʼ kaxiʼj awibʼ. Y kkikotik are chiʼ kakuy umak jun winaq che xubʼan jun kʼax chawe. Paneʼ kachomaj che nim ta ri tajin kabʼan che upatanexik ri Jehová, chnaʼtaj chawe che ri areʼ nim kril wi ri kabʼano. Sibʼalaj katraj y katutewchiʼj na (Luc. 21:1-4).
AMAQʼEL CHQAPATANIJ RI KʼASLIK DIOS
14. ¿Jasche kqabʼij che we qas kqakojo che ri Jehová are ri kʼaslik Dios kojutoʼo rech kqaya ta kan upatanexik? (Xuqujeʼ chawilaʼ ri wachbʼal).
14 We qas kqakojo che ri Jehová are ri kʼaslik Dios, amaqʼel riʼ kojux sukʼ che. Are laʼ ri xubʼan ri José. Xuxutuj ubʼanik jun itzel makaj rumal che kraj taj kubʼan jun jastaq che utz ta kril ri Dios (Gén. 39:9). Rech ri oj xuqujeʼ kojux sukʼ che ri Jehová, rajawaxik kqabʼan qachʼawem che, kqasikʼij ri Biblia y kojchoman chrij ri kqasikʼij uwach. Jeriʼ kkʼiy ri qachilanik rukʼ ri Dios. We kqil ri Jehová junam rukʼ ri xubʼan ri José, kqabʼan ta jun jastaq riʼ che utz ta krilo (Sant. 4:8).
Jun utz awachilanik rukʼ ri kʼaslik Dios katutoʼo rech kaya ta kan upatanexik. (Chawilaʼ ri párrafos 14 y 15).
15. ¿Jas kqetaʼmaj chrij ri xkibʼan ri israelitas are chiʼ xekʼojiʼ pa ri desierto? (Hebreos 3:12).
15 Ri kkikoj ta kichuqʼabʼ che rilik che ri Jehová are ri kʼaslik Dios kkiya kan upatanexik riʼ. Chqilampeʼ ri xkikʼulmaj ri israelitas are chiʼ e kʼo pa ri desierto. Ketaʼm che ri Jehová qas kʼolik, are kʼu xubʼan kebʼ kikʼuʼx y xkichomaj che we ri Jehová qas kuya ri kajwataj chke. Rumal laʼ xkibʼij: «¿La kʼo [...] ri Ajawaxel qukʼ o man kʼo taj?» (Éx. 17:2, 7). Y rumal laʼ xkinimaj ta chi ri Dios. Kqaj taj kqabʼan qe ri xkibʼano (chasikʼij Hebreos 3:12).
16. ¿Jas kbʼanowik che kkʼojiʼ pa kʼax ri qakojonik?
16 Wajun uwach Ulew riʼ kubʼano che kʼax kqabʼan che unimaxik ri Jehová. E kʼi winaq kekojon ta chrij ri Dios y weneʼ kqachomaj che kkiriq ta kʼax paneʼ kkipatanij taj. Ronojel wariʼ weneʼ kukoj pa kʼax ri qakojonik. Qastzij che ri oj kojkojon chrij ri Dios, are kʼu weneʼ kqachomaj che kkun taj kojutoʼo. Je wariʼ xukʼulmaj ri xtzʼibʼan ri Salmo 73. Ri areʼ xrilo che ri keniman ta che ri Dios kʼo ta jun kʼax kkikʼulmaj. Y wariʼ xubʼano che xuchomaj we kʼo upatan kupatanij ri Jehová o kʼo taj (Sal. 73:11-13).
17. ¿Jas kojtoʼwik rech amaqʼel kojkʼojiʼ chunaqaj ri Jehová?
17 ¿Jas xtoʼw ri salmista rech xukʼex ri uchomanik? Are xchoman chrij ri kkikʼulmaj ri kkiya kan upatanexik ri Jehová (Sal. 73:18, 19, 27). Y xchoman chrij ri tewchibʼal che kuriq na we kupatanij ri Jehová (Sal. 73:24). Ri oj xuqujeʼ kojkunik kojchoman chrij ronojel ri tewchibʼal che uyaʼom ri Jehová chqe y che we ta mat kqapatanij ri Jehová kqariq ta riʼ ri tewchibʼal riʼ. We kojchoman chrij ronojel wariʼ kqaya ta kan upatanexik riʼ ri Jehová y kqabʼij qe riʼ ri xubʼij ri salmista: «Ri in kʼut kinqebʼ rukʼ ri Dios, are waʼ ri utz na chwe in» (Sal. 73:28).
18. ¿Jasche kqabʼij che kqachʼij na apachike uwach kʼax pa ri petinaq?
18 Kojkunik kqachʼij apachike uwach kʼax che kqariq kamik, rumal che tajin kqapatanij ri «kʼaslik Dios» (1 Tes. 1:9). Ri Jehová are ri kʼaslik Dios, kel ukʼuʼx chqe y amaqʼel kojutoʼo. Xeʼutoʼ ri upatanelabʼ ojer xuqujeʼ kojutoʼ na oj kamik. Xa jubʼiqʼ kraj kkʼulmataj na ri nimalaj kʼaxkʼolil, are kʼu ri Jehová kojutoʼ na chuwach (Is. 41:10). «Je kʼu riʼ kkubʼiʼ qakʼuʼx, kuyaʼ kqabʼij: ‹Ri Ajawaxel are toʼl wech, man kinxeʼj ta wibʼ›» (Heb. 13:5, 6).
BʼIXONEM 3 At kaya nuchuqʼabʼ, kubʼsal nukʼuʼx, xuqujeʼ rech ko wanimaʼ
