Rech kojqaj chuwach ri Jehová rajawaxik kkʼojiʼ qakojonik. Are kʼu ri Biblia kubʼij che konojel taj kkechbʼej ri kojonik (2 Tes. 3:2). Are chiʼ ri apóstol Pablo xutzʼibʼaj waʼ taq tzij riʼ, are xchʼaw chkij «ri itzel taq winaq ri e lawalo» che kkaj kkibʼan kʼax che. Are kʼu ri xubʼij chrij ri kojonik weneʼ xuqujeʼ kchʼaw chkij nikʼaj chi winaq. Jun kʼutbʼal, e kʼi winaq kkikoj taj che kʼo jun Dios che xubʼan ronojel ri jastaq (Rom. 1:20). Nikʼaj chik kkibʼij che weneʼ kʼo jun che nim na ubʼanik chkiwach ri winaq. Are kʼu are ta waʼ ri kojonik che kraj ri Jehová kkʼojiʼ rukʼ jun winaq.

Rech kojqaj chuwach ri Dios rajawaxik qas kqakojo che kʼolik y che keʼutewchiʼj na ri kʼo jun nim kikojonik (Heb. 11:6). Y ri kojonik are jun chke ri uwachinik ri uxlabʼixel. Rumal laʼ, we kqaj che ri Jehová kuya ri ruxlabʼixel chqe, rajawaxik kqataʼ che (Luc. 11:9, 10, 13). Xuqujeʼ rajawaxik kqasikʼij ri Biblia —ri uTzij che rukʼ ri ruxlabʼixel xtzʼibʼaxik— y kojchoman chrij ri kqasikʼij y kqabʼan pa ri qakʼaslemal. Ri uxlabʼixel kʼut kʼo kubʼan pa ri qakʼaslemal y kubʼano che kkʼojiʼ jun qakojonik che kqaj chuwach ri Jehová.