Kipreguntas ri sikʼinelabʼ
¿Jas kqabʼan che uchʼobʼik ri kubʼij Salmo 12:7?
Ri versículo are kchʼaw chkij ri winaq.
Ri David kubʼij pa ri Salmo 12:1-4 che «man e kʼo ta chi ri winaq ri e jik kanimaʼ». Y pa Salmo 12:5-7 kubʼij:
«‹Chke ri mebʼayibʼ
xuqujeʼ ri man kʼo ta kichuqʼabʼ
kbʼan paqʼalenik chke xuqujeʼ kbʼan chke chi kkiriq kʼaxkʼolil.
Rumal riʼ kamik kinwalijik kamik, keʼenyaʼ kʼu chke ri sibʼalaj kirayim uloq›.
Ri e uchiʼnik ri Ajawaxel e chʼajchʼoj;
¡junam rukʼ ri saq pwaq ri sibʼalaj chʼajchʼoj na ri porom wuqubʼ mul chupam ri jorno!
Lal, Ajawaxel, kujchajij na la;
¡amaqʼel kujesaj na la pa kiqʼabʼ we winaq riʼ!».
Pa ri versículo 5 kukʼutu che ri Dios keʼutoʼ na ri winaq che tajin kkiriq kʼax.
Y ri versículo 6 kubʼij wariʼ: «Ri e uchiʼnik ri Ajawaxel e chʼajchʼoj; ¡junam rukʼ ri saq pwaq ri sibʼalaj chʼajchʼoj[!]». Waʼ taq tzij riʼ kukʼut ri kqanaʼ chrij ri uTzij ri Dios (Sal. 18:30; 119:140).
Pa jujun biblias ri Salmo 12:7 kubʼij: «Kujchajij na la». Y ri versículo 6 kubʼij wariʼ: «E uchiʼnik [uTzij] ri Ajawaxel», rumal laʼ e kʼo jujun kkichomaj che ri Dios are kuchajij na ri uTzij. Qetaʼm che ri Dios xuchajij ri Biblia chkiwach ri winaq che xkaj xkisachisaj uwach (Is. 40:8; 1 Ped. 1:25).
Are kʼu chojchoman chrij ri kubʼij ri versículo 5. Chilaʼ kubʼij che ri Jehová keʼutoʼ y keʼuchajij ri winaq che tajin «kkiriq kʼaxkʼolil» y kuya ta kan kitoʼik (Job 36:15; Sal. 6:4; 31:1, 2; 54:7; 145:20).
Rumal laʼ ¿jas chrij kchʼaw wi ri versículo 7, la chkij ri winaq o chrij ri uTzij ri Dios?
Are chiʼ kqanikʼoj más chrij ri kubʼij ri Salmo, qas kqachʼobʼo che are kchʼaw chkij ri winaq.
Ri Salmo 12:1, 2 kchʼaw chkij ri itzel taq winaq che kkibʼij molom taq tzij chke ri sukʼ taq upatanelabʼ ri Jehová. Tekʼuriʼ kubʼij che ri Jehová kusachisaj na kiwach ri kkibʼan molom taq tzij. Ri Salmo qas kukʼut chqawach che ri Dios kutoʼ na uwiʼ ri utinamit.
Rumal laʼ, are chiʼ ri versículo 7 kubʼij: «Kujchajij na la», tajin kchʼaw chqij ri oj upatanelabʼ ri Dios che kbʼan kʼax chqe kumal ri itzel taq winaq.
Are kʼu ¿jasche jujun chke ri traducciones re ri Biblia kubʼij «keʼachajij na»? Kubʼij wariʼ rumal che je tzʼibʼatal pa ri Escrituras hebreas. Are kʼu pa ri Septuaginta griega xkoj waʼ taq tzij riʼ: «Kujchajij na la». Wariʼ are kchʼaw chkij ri sukʼalaj taq upatanelabʼ ri Dios che tajin kbʼan kʼax chke. Ri e areʼ kechajix na «pa kiqʼabʼ we winaq riʼ» che kkibʼan itzelal (Sal. 12:7, 8). Jun traducción re ri Escrituras hebreas pa ri chʼabʼal arameo, kubʼij wariʼ: «Ri at AJAWAXEL, keʼatoʼ na ri sukʼ taq winaq, keʼachajij chkiwach ri e bʼanal taq itzelal». Rumal laʼ ri Salmo 12:7 are ta tajin kchʼaw chrij ri uTzij ri Dios.
Wajun versículo riʼ kukʼut chqawach che ri Dios amaqʼel keʼutoʼ ri sukʼ taq upatanelabʼ.
