We jun winaq kusikʼij uwach ri xkʼulmatajik, are kʼu qas ta kchoman chrij ronojel ri kʼo chupam, weneʼ kpe pa ujolom ri pregunta che tajin kojchʼaw chrij. Ri qastzij are che xekʼojiʼ kebʼ winaq che Mefibóset kibʼiʼ; y we kqanikʼoj ronojel ri xkʼulmatajik, kʼo jun jastaq kqetaʼmaj chrij.

Ri qʼatal tzij Saúl xekʼojiʼ siete ukʼojol y kebʼ umiʼal. Ri nabʼe ralkʼwal xkʼojik are ri Jonatán. Tekʼuriʼ xkʼojiʼ chi jun ukʼojol rukʼ ri Rizpá, Mefibóset ubʼiʼ. Ri Jonatán xuqujeʼ xkʼojiʼ jun ukʼojol Mefibóset ubʼiʼ. Rumal laʼ, Mefibóset ubʼiʼ ri ukʼojol ri Saúl y xkʼojiʼ jun uwiʼ umam che xuqujeʼ Mefibóset ri ubʼiʼ.

Are kʼu, ¿jasche ri David xeʼujach e jujun achijabʼ rech xekamisaxik? Jun qʼij, ri qʼatal tzij Saúl xumaj retzelaxik kiwach ri gabaonitas che e kʼo chkixoʼl ri israelitas y xraj xeʼukamisaj. Ri kbʼixik, are che xeʼukamisaj e kʼi chke ri gabaonitas. Utz ta xubʼan ri Saúl, rumal che pa taq ri uqʼij ri Josué ri e kʼamal taq bʼe ke ri gabaonitas xkibʼan jun achilanik kukʼ ri e kʼamal taq bʼe ke ri israelitas (Jos. 9:3-27).

Ri achilanik kʼa tajin kbʼan na pa taq ri uqʼij ri Saúl. Are kʼu ri Saúl nim ta xril wi ri achilanik kʼo chkixoʼl, rumal che xeʼukamisaj kʼi gabaonitas. Ri xkʼulmatajik are che ri Saúl y ri e rachalaxik xeʼux ajmakibʼ che «kamisanik» (2 Sam. 21:1). Are chiʼ xux qʼatal tzij ri David, ri gabaonitas xkibʼij che ri xkʼulmatajik. Ri David xutaʼ chke jas kkaj kubʼano rech ksukʼumataj ri nimalaj makaj xubʼan ri Saúl y jeriʼ kkiya bʼe che ri Jehová keʼutewchij. Ri gabaonitas xkitaʼ ta pwaq, xaneʼ xkibʼij che ri David che kkaj kekamisax siete ukʼojol ri Saúl (Núm. 35:30, 31). Rumal laʼ, ri David xubʼan ri xtaʼ che (2 Sam. 21:2-6).

Pa riʼ ri tiempo, e kaminaq chi ri Saúl y ri Jonatán. Are kʼu ri Mefibóset ukʼojol kan ri Jonatán, kʼa kʼas na. Ri areʼ xqʼaj ri raqan are chiʼ kʼa akʼal na y jun ta che ubʼanik kʼax chke ri gabaonitas ri xtaqan wi ri Saúl, ri umam. Y ri David ubʼim che ri Jonatán che kubʼan utz chke ri rachalaxik, jun chke are ri Mefibóset (1 Sam. 18:1; 20:42). Ri bʼantajik kubʼij wariʼ chrij ri David: «Ri ajawinel [...] xutoqʼobʼisaj uwach ri Mefibóset, ukʼojol ri Jonatán, riʼ umam ri Saúl, rumal ri tastalikalaj chiʼnik ri qas kbʼan na, ri ubʼim ri areʼ xuqujeʼ ri Jonatán» (2 Sam. 21:7).

Paneʼ jeriʼ, ri David xubʼan ri xkitaʼ ri gabaonitas. Xtaqanik che kekamisax kebʼ chke ri ukʼojol ri Saúl, jun chke Mefibóset ri ubʼiʼ, y e cinco uwiʼ taq umam (2 Sam. 21:8, 9). Rukʼ ri xubʼan ri David, xkuyutaj ri makaj ri xbʼanik rumal che xekamisax ri gabaonitas.

Wajun bʼantajik kʼo kukʼut chqawach. Wet mat kʼo kimak ri e kebʼ ralkʼwal ri Saúl y ri e cinco uwiʼ taq umam, kqabʼij riʼ che ri Jehová utz ta ri xubʼano che xaq xuya bʼe xekamisaxik, rumal che pa ri utaqanik qas uqʼalajisam che ri alkʼwalaxelabʼ utz taj kekamik rumal ri kimak ri e kitat kinan. Ri utaqanik kubʼij: «Chkijujunal kekam na kimak kech ri kimak» (Deut. 24:16). Wariʼ kojutoʼ che uchʼobʼik che ri e ukʼojol y ri uwiʼ taq umam ri Saúl che xekamik e jun riʼ che kikamisaxik ri gabaonitas. Xekamik rumal che e ajmakibʼ.

Rukʼ ri qilom chik, ¿jas kqetaʼmaj chrij wajun bʼantajik? Che kʼo ta jun winaq kkunik kubʼij che umak ta ri kubʼano, rumal che kuchomaj o kubʼij che xaq xiw tajin kunimaj ri taqanik kyaʼ che. Xaneʼ, rajawaxik kchoman chrij jas kuriq rumal ri kubʼano. Kʼo jun proverbio kubʼij: «Qas chawilaʼ na jawijeʼ keʼayaʼ wi ri awaqan, amaqʼel kʼut katakʼalej na kowilaj ulew. Majuluchʼij ri abʼe; chaqʼilaʼ awibʼ che kiyaʼik ri itzel taq uxoʼl awaqan» (Prov. 4:24-27; Efes. 5:15).