¿Jasche jun rachalaxik ri Elimélec xraj taj xkʼuliʼ rukʼ ri Rut? (Rut 4:1, 6).

Ojer kanoq are chiʼ jun achi kkamik y kʼo ta ralkʼwal kkanaj kan rukʼ ri rixoqil, amaqʼel kchomaxik jas kbʼan che ri rulew y jas kbʼanik rech ksach ta uwach ri ubʼiʼ ri familia. Ronojel wariʼ kyaʼ ubʼixik pa ri taqanik che xyaʼ che ri Moisés.

We jun achi kkamik o kukʼayij ri rulew rumal che xbʼe pa mebʼayil, ri rachalal o jun chi rachalaxik kkunik kuloqʼ kan ri ulew rech kkʼojiʼ na pa uqʼabʼ ri familia (Lev. 25:23-28; Núm. 27:8-11).

¿Jas kbʼanik rech ksach ta ri ubʼiʼ ri ufamilia ri achi che xkamik? Rajawaxik kkʼuliʼ jun rachalal rukʼ ri rixoqil rech kkʼojiʼ jun kalkʼwal y jeriʼ ksach ta uwach ri ubʼiʼ ri familia, y ri akʼal krechbʼej kan ri ulew. Wariʼ kbʼix kʼulanem rukʼ ri recham che. Wajun taqanik riʼ ktobʼanik rech kʼo kchajin ri malkaʼn (Deut. 25:5-7; Mat. 22:23-28). Are waʼ ri xbʼan rukʼ ri Rut, xkʼuliʼ rukʼ jun uqʼabʼ rachalaxik ri rachajil.

Chojchoman chrij ri xukʼulmaj ri Noemí. Ri areʼ kʼulan rukʼ ri Elimélec. Are kʼu, are chiʼ xkam ri Elimélec y ri e kebʼ ral, kʼo ta chi kyoʼw ri kajwataj che (Rut 1:1-5). Are chiʼ ri Noemí xtzalij pa Judá xubʼij che ri Rut, ri ralibʼ, che kubʼij che ri Boaz, jun uqʼabʼ rachalaxik ri Elimélec, rech kuloqʼ kan ri ulew (Rut 2:1, 19, 20; 3:1-4). Ri Boaz retaʼm che kʼo jun chi kachalaxik che nabʼe rajawaxik kechʼaw rukʼ (Rut 3:9, 12, 13). Ri Biblia kubʼij ta ri ubʼiʼ xaq «achalaxik» kchaʼ che.

Nabʼe, wajun achi riʼ xraj xuloqʼ ri ulew paneʼ retaʼm che rajawaxik kusach urajil (Rut 4:1-4). Xuqujeʼ retaʼm che ri Noemí riʼj chik. Rumal laʼ, xuchomaj che utz kkanaj kan ri rulew ri Elimélec pa uqʼabʼ.

Are kʼu, are chiʼ xretaʼmaj che rajawaxik kkʼuliʼ rukʼ ri Rut, xraj ta chik xuloqʼ ri ulew. Xubʼij: «Kinkun taj kinbʼan ri loqʼoj, kraj ne kinbʼan kʼax che ri wechbʼal» (Rut 4:5, 6). ¿Jasche xraj ta chik xuloqʼo?

Rumal che we jun achi riʼ o jun chi rachalaxik kkʼuliʼ rukʼ ri Rut y kkʼojiʼ jun kalkʼwal, ronojel ri rulew ri Elimélec kqʼax kan pa uqʼabʼ ri akʼal. Y ¿jas kkʼulmataj riʼ rukʼ ri rechbʼal ri achi? Ri Biblia kubʼij taj, are kʼu chqilampeʼ ri rumal che weneʼ xukʼam taj.

• Nabʼe, weneʼ xuchomaj che xaq kusach urajil, rumal che ri rulew ri Elimélec kyaʼ kan che ri akʼal y che ta ri areʼ.

• Ukabʼ, are che keʼutzuq ri Rut y ri Noemí.

• Urox, are che we kekʼojiʼ más ralkʼwal rukʼ ri Rut rajawaxik riʼ kujach ri rechbʼal chke ri ral ri Rut y chke ri e nikʼaj chi ralkʼwal areʼ.

• Ukaj, we ri achi kʼo ta ralkʼwal rukʼ jun chi ixoq, ronojel riʼ ri rechbʼal areʼ y re ri Elimélec kqʼax pa uqʼabʼ ri ralkʼwal che kkʼojiʼ rukʼ ri Rut. Rumal laʼ, ri rechbʼal kkanaj kan pa uqʼabʼ ri akʼal che rukʼam ri ubʼiʼ ri Elimélec, y pa ubʼiʼ ta areʼ. Are kʼu, ri achi xraj taj xtobʼan rukʼ ri Noemí rumal che kraj taj kutzaq ri rechbʼal. Xaneʼ xuya kan bʼe che ri Boaz, jun chi achalaxik rech kuloqʼ kan ri ulew. Are kʼu, ri Boaz xraj xuloqʼ ri rulew ri rachalaxik rech «ri echbʼal kajeqiʼ pa ri ubʼiʼ ri Mahlón» (Rut 4:10).

Rukʼ wariʼ xqʼalajinik che ri jun achi xaq xiw xchoman chrij areʼ, rumal che kraj taj ksach uwach ri ubʼiʼ y ri rechbʼal. Are kʼu, kʼo ta xupatanij ronojel ri xubʼano rumal che xsach wi uwach ri ubʼiʼ. Xuqujeʼ xyaʼ ta ri nimalaj eqeleʼn che che xuriq ri Boaz: xux uqʼabʼ taq rachalaxik ri Jesucristo. Kʼax xuriq wajun achi riʼ, rumal che xaq xiw xchoman chrij y xraj taj xutoʼ jun winaq che kʼo kajwataj che (Mat. 1:5; Luc. 3:23, 32).