1, 2. a) ¿Jampaʼ, jawchiʼ y jasche xutzʼibʼaj ri Pablo ri Carta a los Efesios? b) ¿Jas preguntas kqatzalij na uwach?

 ARE chiʼ ri apóstol Pablo kʼo pa cárcel pa Roma, xraj xuya kichuqʼabʼ ri rachalal. Are kʼu, rumal che kkun taj kopan kukʼ, xa xutzʼibʼaj bʼi kʼi cartas chke. Jun chke ri cartas riʼ, are ri xutaq bʼi chke ri cristianos pa Éfeso pa ri junabʼ 60 o 61 (Efes. 1:1; 4:1).

² Qʼaxinaq chi weneʼ 10 junabʼ che ri apóstol Pablo xkʼojiʼ pa Éfeso y xutzijoj ri utzij ri Dios chike ri winaq (Hech. 19:1, 8-10; 20:20, 21). Ri areʼ sibʼalaj keʼuloqʼoqʼej ri cristianos y xraj xeʼutoʼo rech xeʼux sukʼ che ri Jehová. Are kʼu, ¿jasche xchʼaw chrij ri saqil y ri qʼequmalil pa ri cartas che xutaq bʼi chke ri kebʼe pa ri kaj? ¿Y jas kqetaʼmaj oj chrij ri pixabʼ che xuya chke? Pa wajun kʼutunem riʼ kqil na ri kirespuestas ri kebʼ preguntas riʼ.

XEʼEL LO PA RI QʼEQUMALIL

3. ¿Jas e kʼutbʼal xukoj ri Pablo pa ri capítulo 5 re Efesios?

³ Ri Pablo xubʼij chke ri cristianos re Éfeso: «Ri ikʼaslemal ojer kʼo pa ri qʼequʼm. Are kʼu ri kamik kʼo chik pa ri saqil» (Efes. 5:8). Ri areʼ xukoj ri saqil y ri qʼequmalil che kʼutbʼal are chiʼ xchʼaw chrij ri xkibʼan ri efesios che ukʼexik ri kikʼaslemal. Nabʼe, chqilaʼ jasche xubʼij chke che ri kikʼaslemal «ojer kʼo pa ri qʼequʼm».

4. ¿Jasche kqabʼij che ri efesios e kʼo pa qʼequmalil rumal ri kojonem che qastzij taj?

⁴ E kʼo pa qʼequmalil rumal ri kojonem che qastzij taj. Are chiʼ majaʼ kketaʼmaj ri qastzij y majaʼ keʼux cristianos, ri efesios xkibʼan jastaq re ri qastzij taj kojonem y xekojon chrij ri magia. Pa Éfeso kʼo ri diosa Ártemis, che pa ri  tiempo riʼ are jun chke ri e siete dioses che más nim kibʼanik cho ri uwach Ulew. E kʼi winaq keʼopan pa wajun templo riʼ che kiqʼijilaxik e kʼi taq tyox. E kʼi ajkʼayibʼ che kkichʼak nim pwaq rumal che kkikʼayij nitzʼaq taq templos rech ri diosa Ártemis (Hech. 19:23-27). Xuqujeʼ ri winaq che keʼel pa Éfeso etaʼmatal kiwach rumal che kkibʼan ri magia (Hech. 19:19).

5. ¿Jasche kqabʼij che ri efesios e kʼo pa qʼequmalil rumal ri tzʼil taq mak?

⁵ E kʼo pa qʼequmalil rumal ri tzʼil taq mak. Ri winaq che e kʼo pa Éfeso sibʼalaj utz kkil ubʼanik ri tzʼil taq mak y kʼo ta kikʼixbʼal che ubʼanik wariʼ. Are chiʼ kkibʼan ri kinamaqʼil re ri kikojonem e naqʼatal che ubʼanik ri relaciones sexuales (Efes. 5:3). Ri winaq «xkibʼan ko che ri kanimaʼ», kraj kubʼij che kkinaʼ ta chi kʼax (Efes. 4:17-19). Pa nikʼaj chi tzij kʼo ta chi kubʼan ri retaʼmabʼal kikʼuʼx chke y kkichomaj ta chik che ri Jehová itzel kril ri kkibʼano. Rumal che kekun ta che rilik ri utz y ri utz taj, ri Pablo xubʼij che e «kʼo pa ri qʼequʼm. Man kʼo ta kikʼaslemal aj Dios».

6. ¿Jasche xubʼij ri Pablo che ri efesios e kʼo «chik pa ri saqil»?

⁶ Are kʼu jujun chke ri efesios xeʼel lo pa qʼequmalil, rumal laʼ ri Pablo xubʼij wariʼ chke: «Ri ikʼaslemal ojer kʼo [...] chik pa ri saqil rumal rech chi ix jun chik rukʼ ri Ajawaxel» (Efes. 5:8). Xkimajij ubʼanik pa ri kikʼaslemal ri xketaʼmaj pa ri uTzij ri Jehová, che kjunamataj rukʼ jun saqil che xukʼam kibʼe (Sal. 119:105). Xkiya kan ubʼanik ri kkibʼan ri qastzij taj kojonem y xkiya kan ubʼanik ri inmoralidad sexual. Xkesaj uwach ri Dios xuqujeʼ xkikoj kichuqʼabʼ che uqʼijilaxik y che ubʼanik ri kqaj chuwach (Efes. 5:1).

7. ¿Jas kjunamataj wi ri qaqʼij kimik rukʼ ri xkikʼulmaj ri cristianos re Éfeso?

⁷ Junam rukʼ wariʼ, are chiʼ majaʼ kqetaʼmaj ri qastzij, qonojel xojkʼojiʼ pa qʼequmalil re ri qastzij taj kojonem y pa qʼequmalil rumal ri tzʼil taq mak. Jujun chqe weneʼ xojbʼe pa taq nimaqʼij re ri qastzij taj  kojonem y weneʼ jujun chqe xqabʼan ri tzʼil taq makaj. Are kʼu, are chiʼ xqetaʼmaj uwach ri Jehová, xqakʼex ronojel ri qakʼaslemal, xqamajij ubʼanik ri utz krilo y xqaxutuj ri itzel krilo. Wariʼ uyaʼom kʼi utzilal chqe (Is. 48:17). Are kʼu, jujun taq mul kʼax kqabʼan che uxutuxik ri qʼequmalil y kqabʼan qech «ri kkibʼan ri e aj saqilal». Chqilaʼ jas kojtoʼw che ubʼanik wariʼ.

CHQAXUTUJ RI QʼEQUMALIL

8. Junam rukʼ ri kubʼij Efesios 5:3-5, ¿jas rajawaxik kkixutuj ri efesios?

⁸ (Chasikʼij Efesios 5:3-5). Rech ri cristianos re Éfeso naj kekʼojiʼ wi che ri qʼequmalil re ri tzʼil taq mak, rajawaxik kkikoj kichuqʼabʼ che uxutuxik ronojel ri jastaq che itzel kril ri Jehová. Wariʼ xaq xiw ta kchʼaw chrij ri inmoralidad sexual, xaneʼ xuqujeʼ ri itzel taq tzij. Ri Pablo xunaʼtaj chke che rajawaxik kkixutuj ronojel ri jastaq riʼ we kkaj kekʼojiʼ chuxeʼ «ri rajawibʼal ri Cristo ri xuqujeʼ rech ri Dios».

9. ¿Jasche rajawaxik kqaxutuj ronojel ri kʼo ubʼanik rukʼ ri inmoralidad sexual?

⁹ Oj xuqujeʼ rajawaxik kqachajij qibʼ rech kqabʼan ta «ri jastaq ri man kʼo ta kechbʼex chke; ri kkibʼan ri winaq ri e kʼo pa ri qʼequʼm» (Efes. 5:11). Qastzij che are chiʼ jun winaq kuya ta kan rilik o utaʼik itzel taq jastaq o inmoralidad sexual, o kchʼaw ne chrij, weneʼ wariʼ kubʼano che kqaj pa jun makaj (Gén. 3:6; Sant. 1:14, 15). Jun kʼutbʼal, pa jun tinamit jun jupuq Testigos xkibʼan jun grupo pa internet rech kkitaq mensajes chilaʼ. Nabʼe, kʼi chke are kechʼaw chrij ri kikojonik. Are kʼu nojimal xkʼextaj ri kkitzijoj o ri kkitaq pa ri mensajes, are chi más tajin kechʼaw chrij ri sexo. Are chiʼ xqʼax ri tiempo, kʼi chke xeqaj pa mak kukʼ achijabʼ e ixoqibʼ y kʼi chke xkibʼij che xkibʼan wariʼ rumal ri mensajes che kkitaq pa ri grupo.

10. ¿Jas kraj ri Satanás che kqabʼano? (Efesios 5:6).

¹⁰ Jun chke ri kubʼan ri Satanás are che kusach ri kichomanik ri winaq rech kkil taj jas riʼ ri utz y ri utz taj (Is. 5:20; 2 Cor. 4:4). Rumal laʼ, kqamay taj che ri winaq pa wajun uwach Ulew riʼ kkaj kkikʼex ri qachomanik y kkaj kqachomaj che ri tzʼil taq jastaq y ri inmoralidad sexual kʼo ta kubʼano (2 Ped. 2:19). Rumal laʼ e kʼo películas, programas re televisión y sitios pa internet che kʼo jastaq chupam che utz ta kril ri Jehová. Ri Satanás kraj che kqachomaj che ronojel ri jastaq che kkibʼan ri winaq pa ri uwach Ulew kʼo ta kubʼano, xaneʼ kuya kikotemal (chasikʼij Efesios 5:6).

11. Junam rukʼ ri xukʼulmaj ri qachalal Angela, ¿jasche rajawaxik che kqabʼan ri kubʼij Efesios 5:7? (Xuqujeʼ chawilaʼ ri e wachbʼal).

¹¹ Ri Satanás kraj che kojkʼojiʼ kukʼ ri winaq che kkipatanij ta ri Jehová. Rumal laʼ, ri Pablo xubʼij chke ri efesios che kekʼojiʼ ta kukʼ winaq che kkibʼan itzel taq jastaq. Xubʼij chke: «Mibʼan bʼaʼ iwe kukʼ jas ri kkibʼan ri e areʼ» (Efes. 5:7). Oj qas kajwatajik che más kqachajij na qibʼ chuwach ri xkibʼan ri efesios. ¿Jasche? Rumal che pa taq ri qaqʼij kimik xaq xiw ta kqachajij qibʼ chkiwach ri winaq che e kʼo chqanaqaj, xaneʼ xuqujeʼ ri winaq che keqariq pa taq ri redes sociales. Jun qachalal ixoq che kel pa Asia ubʼiʼ Angela a kubʼij ri kʼax che kuya ri redes sociales: «Nojimal kukʼex ri achomanik we man  kachajij awibʼ. Xinwilo che kʼo ta chi kubʼan chwe we kekʼojiʼ wachiʼl che keniman ta che ri kubʼij ri Biblia. Y xinchomaj che kʼo ta kubʼano we kinbʼan jujun jastaq che utz ta kril ri Jehová». ¡Sibʼalaj utz che ri kʼamal taq bʼe xkitoʼ ri qachalal riʼ rech xukʼex ri ukʼaslemal! Ri areʼ kubʼij: «Chanim riʼ are más kinchoman chi chrij ri wachilanik rukʼ ri Jehová y are ta chi ri jastaq che kʼo pa internet».

12. ¿Jas rajawaxik kqabʼano we kqaj kqanimaj ri kubʼij ri Jehová?

¹² Paneʼ ri winaq kkibʼij che kʼo ta kubʼan ri itzel taq jastaq che kkibʼano, are kʼu ri oj kqakoj ta ri kkibʼij; qetaʼm che are jun molom tzij (Efes. 4:19, 20). Chojchoman chrij wariʼ: «¿La kinxutuj ri kachilanik ri winaq che nim ta kkil ri Jehová, junam kukʼ ri wachiʼl pa ri escuela, pa ri chak o nikʼaj chik? ¿La rukʼ kowil kʼuʼx kintoʼ uwiʼ ri kubʼij ri Biblia paneʼ ri winaq kkibʼij chwe che utz ta ri kinbʼano?». Y junam rukʼ ri kubʼij 2 Timoteo 2:20-22, rajawaxik che qas kqil na e jachin taq keqachilaj paneʼ pa ri congregación. Chnaʼtaj chqe che konojel taj kojkitoʼo rech kqapatanij ri Jehová.

CHQABʼANAʼ BʼAʼ QE JUNAM «RI KKIBʼAN RI E AJ SAQILAL»

13. ¿Jas kraj kubʼij che kqaya ta kan ubʼanik «ri kakibʼan ri e aj saqilal»? (Efesios 5:7-9).

¹³ Are chiʼ ri Pablo xubʼij chke ri cristianos re Éfeso che rajawaxik kkixutuj ri qʼequmalil, xubʼij wariʼ chke: «Chibʼanaʼ bʼaʼ iwech ri kakibʼan ri e aj saqilal» (chasikʼij Efesios 5:7-9). ¿Jas kraj kubʼij wariʼ? Pa kebʼ oxibʼ tzij, xubʼij chke che kkikʼutu che e qastzij cristianos. Rech kojkunik kqabʼan wariʼ, rajawaxik kqabʼan kʼi jastaq. Jun chke are usikʼixik ri Biblia ronojel taq qʼij y ri e qawuj. Are chiʼ kqabʼan wariʼ, chojchoman chrij ri xubʼan ri Jesucristo y ri xukʼut kanoq, «ri uchaj ri uwach ulew» (Juan 8:12; Prov. 6:23).

14. ¿Jas tobʼanik kuya ri ruxlabʼixel ri Dios chqe?

¹⁴ Kajwataj ri utobʼanik ri ruxlabʼixel ri Dios chqe rech kqaya ta kan ubʼanik «ri kakibʼan ri e aj saqilal». ¿Jasche? Rumal che kʼax ukʼutik sukʼilal pa wajun uwach  Ulew riʼ che nojinaq che itzelal (1 Tes. 4:3-5, 7, 8). Ri ruxlabʼixel ri Dios kojutoʼ chuwach ri kichomanik ri winaq che kʼo ta ubʼanik rukʼ ri utaqanik ri Dios. Xuqujeʼ kojutoʼo rech kqakʼut «ronojel utzil, sukʼil xuqujeʼ qastzij» (Efes. 5:9).

15. ¿Jas rajawaxik kqabʼano rech kyaʼtaj ri ruxlabʼixel ri Dios chqe? (Efesios 5:19, 20).

¹⁵ Ri Jesús xubʼij, che ri Jehová «kuyaʼ na ri Ruxlabʼal [...] chke ri winaq ri kkitaʼ che» (Luc. 11:13). Rumal laʼ, rech kyaʼtaj ri ruxlabʼixel ri Jehová chqe, rajawaxik kqataʼ che pa chʼawem. Jun chik che kojtoʼwik rech kqariq ri ruxlabʼixel ri Jehová are che kqaqʼijilaj pa taq ri e riqbʼal ibʼ kukʼ ri qachalal (chasikʼij Efesios 5:19, 20). Ri ruxlabʼixel ri Jehová che kkʼojiʼ chqaxoʼl kojutoʼo rech kqabʼan ri kqaj chuwach.

16. ¿Jas kojtoʼwik rech utz ri kqachaʼ ubʼanik pa ri qakʼaslemal? (Efesios 5:10, 17).

¹⁶ Are chiʼ kqachaʼ ubʼanik jun jastaq pa ri qakʼaslemal che nim ubʼanik, rajawaxik kojchoman chrij «jas ri urayibʼal» ri Jehová y kqabʼano (chasikʼij Efesios 5:10, 17). Are chiʼ kqatzukuj pixabʼ chrij ri kqaj kqabʼan pa ri qakʼaslemal, rukʼ wariʼ tajin kqakʼutu che kqaj kqetaʼmaj ri kuchomaj ri Jehová chrij ri kqachaʼ ubʼanik. Y are chiʼ kqabʼano, qas utz riʼ ri kqachaʼ ubʼanik pa ri qakʼaslemal.

17. ¿Jas kqabʼano rech qas utz kqabʼan che ukojik ri tiempo? (Efesios 5:15, 16, xuqujeʼ chawilaʼ ri wachbʼal).

¹⁷ Ri Pablo xubʼij chke ri cristianos re Éfeso che qas utz kkibʼan che ukojik ri tiempo (chasikʼij Efesios 5:15, 16). Ri Satanás kraj che are kbʼe qakʼuʼx chrij ri jastaq pa ri uwach Ulew y kqaya ta chi qatiempo che upatanixik ri Dios (1 Juan 5:19). Weneʼ kʼax taj che kbʼe qakʼuʼx chrij ri pwaq, ri e tijobʼal re wajun uwach Ulew riʼ o ri chak y are ta chi kqapatanij ri Jehová. We tajin kqakʼulmaj wariʼ, kukʼutu che tajin kqabʼan chi qe ri kkibʼan ri winaq che kkipatanij ta ri Dios. Qastzij che  awas ta ri jastaq riʼ, are kʼu kqaj taj che are ri más nim ubʼanik pa ri qakʼaslemal. Rech kqaya ta kan ubʼanik «ri kakibʼan ri e aj saqilal», rajawaxik che qas utz kqabʼan che ukojik «taq ri qʼij che ubʼanik ri utz», kraj kubʼij, che are kqabʼan ri más nim ubʼanik.

18. ¿Jas xubʼan ri qachalal Donald rech qas utz xubʼan che ukojik ri tiempo?

¹⁸ Chqatzukuj ri kqabʼano rech kqapatanij más ri Jehová. Are waʼ ri xubʼan ri qachalal Donald, che kel pa Sudáfrica. Ri areʼ kubʼij: «Xinchoman chrij ri kinkun che ubʼanik y xintaʼ che ri Jehová che kinutoʼo rech kinpatanij más. Xinbʼij che che kinutoʼ che uriqik jun nuchak che kuya bʼe chwe rech kintzijoj más ri utzij. Y rukʼ ri utobʼanik ri Jehová, xinkunik xinriqo. Rumal laʼ, oj kebʼ rukʼ ri wixoqil xqamajij upatanexik ri Jehová pa tiempo completo».

19. ¿Jas rajawaxik kqabʼano rech amaqʼel kqabʼan «ri kakibʼan ri e aj saqilal»?

¹⁹ Qastzij riʼ che ri carta che xutzʼibʼaj ri Pablo chke ri efesios xeʼutoʼo rech xkikʼut sukʼilal che ri Jehová y kojutoʼ oj kimik. Junam rukʼ ri qilom chik, kojutoʼo rech kqil na jas etzʼanem kqabʼano y e jachin taq keqachaʼ che qachiʼl. Xuqujeʼ kojutoʼo rech más kqanikʼoj ri Biblia, je wariʼ kqayaʼo che ri saqil kukʼam qabʼe. Y ri ruxlabʼixel ri Dios kojutoʼo rech kqakʼut utz taq bʼantajik. We kqaya ta kan ubʼanik ri pixabʼ che xuya ri Pablo, qas kqakikotemaj riʼ ri Jehová rukʼ ri kqachaʼ ubʼanik pa ri qakʼaslemal. We kqabʼan ronojel wariʼ, kojkun riʼ che uxutuxik ri qʼequmalil y kojkʼojiʼ pa ri saqil.