1. ¿Jas rajawaxik kkichaʼ ubʼanik konojel ri e winaq?

 KIMIK konojel ri winaq rajawaxik kkichaʼ we are kkitoʼ uwiʼ ri uQʼatbʼal tzij ri Jehová o are kkitoʼ uwiʼ ri Satanás. Rajawaxik xa jun kkichaʼ. Y ri kkichaʼ ubʼanik kʼo ubʼanik rukʼ kikʼaslemal pa ri petinaq, we kkiriq ri kʼaslemal kʼo ta ukʼisik o kkiriq taj (Mat. 25:31-33, 46). Pa ri «nimalaj kʼaxkʼolil» o gran tribulación konojel ri e sukʼ taq upatanelabʼ ri Dios kkoj jun etal chke che kukʼutu che kekʼasiʼ kanoq (Apoc. 7:14; Ezeq. 9:4, 6). Y ri e winaq che kojom ri etal re ri itzel awaj chke ksachisax na kiwach (Apoc. 14:9-11).

2. a) ¿Jas kubʼij Hebreos 10:35-39 chqe che rajawaxik kqabʼano? b) ¿Jas kojutoʼ wi ri wuj re Apocalipsis?

² (Chasikʼij uwach Hebreos 10:35-39). Sibʼalaj utz riʼ we ri at ya xachaʼ utoʼik uwiʼ ri uQʼatbʼal tzij ri Jehová, y qastzij riʼ che kawaj keʼatoʼ e nikʼaj chik rech je kkibʼano. Ri kubʼij ri wuj re Apocalipsis sibʼalaj katutoʼ riʼ rumal che xuqujeʼ kuya ubʼixik ri kkikʼulmaj ri winaq che keniman ta che ri Jehová. Y ri kkikʼulmaj ri winaq che kkitoʼ uwiʼ ri uQʼatbʼal tzij. Sibʼalaj utz che kqanikʼoj wajun wuj riʼ rumal che kojutoʼ rech kqaya ta kan upatanixik ri Jehová. Xuqujeʼ kojutoʼ rech keqatoʼ e nikʼaj chik rech je kkibʼano y keʼel ta kanoq.

3. ¿Jas preguntas kqatzalij na uwach pa wajun kʼutunem riʼ?

³ Pa wajun kʼutunem riʼ kqatzalij uwach waʼ taq kebʼ preguntas: ¿jas kkiriq na ri kkitoʼ uwiʼ ri uQʼatbʼal tzij ri Dios? y ¿jas kkiriq na ri kkitoʼ uwiʼ ri kaq rij itzel awaj che kuya ubʼixik ri wuj re Apocalipsis?

4. ¿E jachin ri jupuq winaq xeril ri Juan che e kʼo rukʼ ri Jesús pa ri kaj?

⁴ Ri apóstol Juan xeril e kebʼ jupuq winaq che kkitoʼ uwiʼ ri uQʼatbʼal tzij ri Dios y ketewchixik. Ri nabʼe jupuq are ri 144,000 winaq che kebʼe pa ri kaj (Apoc. 7:4). Ri e areʼ ketobʼan che uqʼatik tzij rukʼ ri Jesús pa uwiʼ ri uwach Ulew (Apoc. 5:9, 10; 14:3, 4). Ri Juan xeril ri e 144,000 winaq riʼ che e kʼo rukʼ ri Jesús pa ri juyubʼ Sion (Apoc. 14:1).

5. ¿Jas kkiriq na ri e chaʼom che e kʼo na cho ri uwach Ulew?

⁵ Xumaj lo pa ri kiqʼij ri apóstoles kʼa kimik tajin kechaʼ ri e 144,000 che kebʼe pa ri kaj (Luc. 12:32; Rom. 8:17). Are kʼu xbʼix che ri Juan che pa ri kʼisbʼal taq qʼij e kʼo na jujun chke ri e chaʼom riʼ cho ri uwach Ulew. Y are chiʼ majaʼ kumajij ri nimalaj kʼaxkʼolil kkoj ketal, wariʼ kraj kubʼij che keqaj chuwach ri Jehová (Apoc. 7:2, 3; 12:17). Tekʼuriʼ pa ri nimalaj kʼaxkʼolil, ri e kʼasal na cho ri uwach Ulew kekʼam bʼi pa ri kaj rech kkiqʼat tzij rukʼ ri Jesús y kukʼ ri e nikʼaj chik kachiʼl (Mat. 24:31; Apoc. 5:9, 10).

6, 7. a) ¿Jas jupuq winaq xril chi ri Juan pa ri visión, y jas qetaʼm chkij e areʼ? b) ¿Jasche rajawaxik che ri e chaʼom che kebʼe pa ri kaj y ri e «kʼiʼalaj winaq» nim kkil ri kubʼij pa Apocalipsis capítulo 7?

⁶ Are chiʼ xilitaj ri 144,000 rumal ri Juan xuqujeʼ xeril chi «kʼiʼalaj winaq». Xaq xiw che ri ukabʼ jupuq winaq riʼ kbʼan taj keʼajilaxik (Apoc. 7:9, 10). ¿Jas xubʼij ri Juan chkij wajun jupuq riʼ? Ri areʼ xubʼij: «E are waʼ ri e elinaq uloq pa ri nimalaj kʼaxkʼolil, ri kichʼajom ri katzʼyaq, xkisaqarisaj pa ri ukikʼel ri Alaj Chij» (Apoc. 7:14). Are chiʼ qʼaxinaq chi ri nimalaj kʼaxkʼolil ri «kʼiʼalaj winaq» riʼ kekʼojiʼ kan cho ri uwach Ulew y kkiriq kʼi tewchibʼal (Sal. 37:9-11, 27-29; Prov. 2:21, 22; Apoc. 7:16, 17).

⁷ Paneʼ kojbʼe pa ri kaj o kojkanaj kan cho ri uwach Ulew rajawaxik che qonojel oj kʼo «pa ri foto» che kuya ubʼixik pa ri wuj re Apocalipsis capítulo 7. Are chiʼ kopan ri tiempo riʼ, qastzij riʼ che ri upatanelabʼ ri Dios sibʼalaj kekikotik rumal che are xkitoʼ uwiʼ ri uqʼatbʼal tzij ri Jehová. ¿Jas más kuya ubʼixik ri wuj re Apocalipsis chrij ri nimalaj kʼaxkʼolil? (Mat. 24:21).

8. ¿Jas kbʼantajik are chiʼ kumaj ri nimalaj kʼaxkʼolil, y jas kkibʼan ri winaq?

⁸ Junam che xqil kan pa ri jun kʼutunem, ri e qʼatal taq tzij cho ri uwach Ulew xa jubʼiqʼ chi kraj che kkisachisaj uwach ri Nimalaj Babilonia, kraj kubʼij ronojel ri e kojonem che qastzij taj (Apoc. 17:16, 17). Y rukʼ wariʼ kumajij ri nimalaj kʼaxkʼolil. ¿La kraj kubʼij wariʼ che e kʼi winaq keqebʼ más rukʼ ri Jehová? Je taj, xaneʼ are kkitzukuj tobʼanik kukʼ ri e qʼatal taq tzij y ri e ajkʼayibʼ. Pa ri capítulo 6 re Apocalipsis, kubʼij che ri e qʼatbʼal taq tzij y ri e ajkʼayibʼ kejunamataj rukʼ juyubʼ. Y rumal che are ta kkitoʼ uwiʼ ri uQʼatbʼal tzij ri Dios, keʼux ukʼulel ri Jehová (Luc. 11:23; Apoc. 6:15-17).

9. ¿Jasche e kʼi winaq kebʼe chkij ri upatanelabʼ ri Jehová pa ri nimalaj kʼaxkʼolil, y jas kkibʼan na?

⁹ Pa wajun nimalaj kʼaxkʼolil riʼ e kʼi winaq kekaʼy chke ri upatanelabʼ ri Jehová. Rumal che xaq xiw e areʼ kkiya  ta kan uqʼijilaxik ri Jehová y kkitoʼ ta uwiʼ ri «xibʼibʼal awaj» (Apoc. 13:14-17). Rumal wariʼ ri e ukʼulel ri Jehová kkibʼan na kʼax chke ri upatanelabʼ pa ronojel ri uwach Ulew. Y ri jupuq winaq riʼ che kebʼanow kʼax chke, kbʼix Gog re Magog chke (Ezeq. 38:14-16).

10. Junam rukʼ ri kubʼij pa Apocalipsis 19:19-21, ¿jas kubʼan ri Jehová are chiʼ krilo che kbʼan kʼax chke ri upatanelabʼ?

¹⁰ ¿Jas kubʼan ri Jehová chiʼ krilo che kbʼan kʼax chke ri upatanelabʼ? Ri areʼ kubʼij: «Ktzijtzobʼ na ri woyowal» (Ezeq. 38:18, 21-23). Pa ri capítulo 19 re Apocalipsis kuya ubʼixik che ri Jehová kutaq lo ri uKʼojol che kitoʼik ri upatanelabʼ y che usachisaxik kiwach ri e ukʼulel. Are kʼu ri Jesús xaq ta utukel kpetik, xaneʼ e rachiʼl «ri ajchʼojabʼ ri e kʼo pa ri kaj» kraj kubʼij, ri ángeles y ri e 144,000 (Apoc. 17:14; 19:11-15). ¿Y jas kukʼisbʼej wajun chʼoj riʼ? Are che ri e winaq che kkitoʼ ta uwiʼ ri uQʼatbʼal tzij ri Jehová y kkibʼan kikʼulel che ksachisax kiwach (chasikʼij uwach Apocalipsis 19:19-21).

11. ¿Jas ri jastaq kuya ubʼixik ri wuj re Apocalipsis che sibʼalaj kuya kikotemal?

¹¹ ¿Jas kkinaʼ riʼ ri cristianos rumal che xekʼasiʼ kanoq are chiʼ xsachisax kiwach ri ukʼulel ri Jehová? ¡Sibʼalaj kekikot riʼ! Y, konojel ri e kʼo pa ri kaj xuqujeʼ kekikot riʼ are chiʼ ksachisax uwach ri Nimalaj Babilonia (Apoc. 19:1-3). Are chiʼ kʼulmatajinaq chi ronojel wariʼ, ri wuj re Apocalipsis kubʼij che kbʼan jun jastaq che sibʼalaj kuya kikotemal chqe, «ri ukʼulanem ri Alaj Chij» (Apoc. 19:6-9).

12. Junam rukʼ ri kubʼij Apocalipsis 21:1, 2, ¿jampaʼ kbʼan ri kʼulanem pa ri kaj?

¹² ¿Jampaʼ kbʼan ri kʼulanem? Paneʼ konojel ri e 144,000 e kʼo chi pa ri kaj are chiʼ majaʼ kumaj ri Armagedón, are kʼu rukʼ ta wariʼ kbʼan ri kʼulanem (chasikʼij uwach Apocalipsis 21:1, 2). Xaneʼ kbʼanik are chiʼ bʼantajinaq chi ri chʼoj re Armagedón, y sachisam chi kiwach konojel ri e ukʼulel ri Jehová (Sal. 45:3, 4, 13-17).

13. ¿Jas ubʼanik ri kʼulanem kbʼan pa ri kaj?

¹³ ¿Jas ubʼanik ri kʼulanem kbʼan pa ri kaj? Junam che kkʼulmataj pa jun kʼulanem, kʼo jun achi y jun ixoq. Rumal laʼ pa ri kʼulanem che kbʼan pa ri kaj, ri Jesús jetaneʼ are ri ala che kkʼuliʼ na, y ri e 144,000 jetaneʼ che are ri ali. Rukʼ wajun kʼulanem riʼ ri Jesús y ri 144,000 kkimajij uqʼatik tzij cho ri uwach Ulew pa 1,000 junabʼ (Apoc. 20:6).

14, 15. Junam rukʼ ri kiwil pa ri wachbʼal re ri uwach ri wuj, ¿jas rukʼ kejunamataj wi ri 144,000 che kuya ubʼixik pa Apocalipsis 21?

¹⁴ Pa ri capítulo 21 re Apocalipsis kujunamaj ri 144,000 rukʼ jun jeʼlalaj tinamit ubʼiʼ «ri kʼakʼalaj Jerusalén» (Apoc. 21:2, 9). Wajun tinamit riʼ «e kʼo kabʼlajuj utakʼalibʼal», y chilaʼ tzʼibʼatal wi «ri kabʼlajuj kibʼiʼ ri kabʼlajuj taqom ri e rech ri Alaj Chij». Qastzij riʼ che ri Juan sibʼalaj xkikotik are chiʼ xril wariʼ. ¿Jasche? Rumal che tzʼibʼatal ri ubʼiʼ chuwach jun chke ri abʼaj (Apoc. 21:10-14; Efes. 2:20).

¹⁵ Ri tinamit riʼ che xril ri Juan, kjunamataj ta chi rukʼ jun tinamit. Rumal che ri bʼe bʼanom che qʼan pwaq, ri 12 uchiʼ taq ja bʼanom che 12 perlas, ri e utapya y ri e utakʼalibʼal kojom jeʼlalaj taq  ketzʼebʼalil, y ri unimal ri raqan xaq junam rukʼ ri uwach (Apoc. 21:15-21). Are kʼu ri Juan xrilo che kʼo jun jastaq kʼo ta chupam. ¿Jas riʼ? Ri areʼ xubʼij: «Man xinwil ta kʼu ri qʼijilabʼal chupam. Are kʼu ri qʼijilabʼal re we tinamit riʼ are ri Ajawaxel, Dios ri kʼo ronojel ukunem xuqujeʼ ri Alaj Chij. Ri tinamit man kajwataj ta ri qʼij che rech kuyaʼ ri usaqil, mawi rajawaxik ri ikʼ che. Are kʼu ri ujuluwem ri Dios xjuluw puwiʼ, are kʼut ri uchaj are ri Alaj Chij» (Apoc. 21:22, 23). Ri e kʼo pa ri Kʼakʼ Jerusalén kekunik kkil uwach ri Jehová (Heb. 7:27; Apoc. 22:3, 4). Rumal laʼ kbʼixik che ri Jehová y ri Jesús e are ri templo.

16. ¿Jas tewchibʼal kkiriq na ri winaq pa ri Mil Junabʼ che kuqʼat tzij ri Jesús?

¹⁶ Ri cristianos che e chaʼom, sibʼalaj kekikotik are chiʼ kechoman chrij wajun tinamit riʼ. Are kʼu ri cristianos che kʼo keyebʼal cho ri uwach Ulew xuqujeʼ rajawaxik kketaʼmaj chrij wariʼ. Rumal che pa ri Mil Junabʼ che kuqʼat tzij ri Jesús, ri Kʼakʼ Jerusalén kuya lo kʼi tewchibʼal pa kiwiʼ ri winaq. Ri Juan xrilo che ri taq tewchibʼal riʼ junam rukʼ «jun nimaʼ re kʼaslemal» y pa ri kebʼ uchiʼ ri nimaʼ kʼo wi «ri cheʼ re kʼaslemal» che ri e uxaq «kekoj na che kikunaxik ri nimaʼq taq tinamit» (Apoc. 22:1, 2). Rumal laʼ, konojel ri winaq che kekʼojiʼ na pa ri kotzʼiʼjalaj uwach Ulew kkiriq na waʼ taq tewchibʼal. Y ri kenimanik nojimal chi nojimal keʼux na tzʼaqat. Kkiriq ta chi yabʼil ni qʼoxowem ni oqʼej rumal bʼis (Apoc. 21:3-5).

17. Junam rukʼ ri kubʼij pa Apocalipsis 20:11-13, ¿e jachin ri kkiriq na ri tewchibʼal pa ri Mil Junabʼ are chiʼ kuqʼat tzij ri Jesús?

¹⁷ ¿E jachin taq kkiriq na ri tewchibʼal? Nabʼe, ri e kʼiʼalaj winaq che kekʼasiʼ kan pa ri Armagedón y ri akʼalabʼ che keʼalax pa ri kʼakʼ uwach Ulew. Are kʼu xaq xiw ta ri e areʼ. Rumal che pa ri capítulo 20 re Apocalipsis kuya ubʼixik che kekʼastaj na lo ri e kaminaqibʼ (chasikʼij uwach Apocalipsis 20:11-13). ¿E jachin ri kekʼastaj loq? Ri «e sukʼ», kraj kubʼij, ri sukʼalaj taq upatanelabʼ ri Jehová che xekam ojer, xuqujeʼ ri «e lawalo» o ri xkibʼan ta ri utz, kraj kubʼij ri winaq  che xketaʼmaj ta uwach ri Jehová (Hech. 24:15; Juan 5:28, 29). ¿La kraj kubʼij wariʼ che konojel ri e kaminaq kekʼastaj lo pa ri Mil Junabʼ? Je taj. Rumal che ri winaq che xkaj taj xkipatanij ri Jehová are chiʼ majaʼ kekamik kekʼastaj ta chi loq. Rumal che xyaʼ bʼe chke, are kʼu ri areʼ xkaj taj xkibʼano y rukʼ wariʼ xkikʼutu che kkaj taj kekʼasiʼ pa ri kotzʼiʼjalaj uwach Ulew (Mat. 25:46; 2 Tes. 1:9; Apoc. 17:8; 20:15).

18. ¿Jas chi ubʼanik ri kikʼaslemal ri e winaq are chiʼ kkʼis ri 1,000 junabʼ?

¹⁸ Konojel kiriqom chi ri tzʼaqatalaj kʼaslemal are chiʼ kkʼis ri 1,000 junabʼ. Rumal laʼ, kʼo ta chi jun chqe kuriq kʼax rumal ri makaj che xuya kan ri Adán (Rom. 5:12). ¡Sibʼalaj kojkikot riʼ rumal che xsach uwach ronojel ri kʼaxkʼolil che xqariq rumal ri Adán y kqariq jun tzʼaqatalaj kʼaslemal pa ri 1,000 junabʼ! (Apoc. 20:5).

19. ¿Jasche rajawaxik kil chi na jumul we ri winaq qas kkaj kkipatanij ri Jehová?

¹⁹ Qetaʼm che ri Jesús are jun tzʼaqatalaj achiʼ y xuya ta kan upatanixik ri Jehová paneʼ xbʼan kʼax che rumal ri Satanás. E kʼu ri winaq che tzʼaqat chi ri kikʼaslemal, ¿la kkiya kan upatanixik ri Jehová are chiʼ kbʼan na kʼax chke rumal ri Satanás? Wariʼ kqʼalajinik are chiʼ kkʼis ri 1,000 junabʼ y ktzoqopix na ri Satanás rech kubʼan kʼax chke (Apoc. 20:7). Ri winaq che keʼux sukʼ chuwach ri Jehová kkiriq na ri kʼaslemal che kʼo ta ukʼisik y ri qastzij tzoqopitajem (Rom. 8:21). Are kʼu ri keniman taj ksachisax kan kiwach chbʼe qʼij saq junam rukʼ ri Itzel y ri e itzel taq uxlabʼal (Apoc. 20:8-10).

20. ¿Jas kanaʼ rukʼ ri xawetaʼmaj chrij ri profecías che kubʼij pa ri wuj re Apocalipsis?

²⁰ ¿Jas kanaʼ rukʼ ri xawetaʼmaj chrij ri profecías che kubʼij ri wuj re Apocalipsis? ¿La mat qastzij che katkikotik che at jun pa ri profecías che kubʼij ri wuj re Apocalipsis? ¿La kawaj keʼatoʼ e nikʼaj chik rech kkiqʼijilaj ri qaDios? (Apoc. 22:17). Retaʼmaxik chrij ri kkʼulmataj na pa ri petinaq kuya kikotemal chqe y kqaj riʼ kqabʼij qe junam rukʼ ri Juan: «Jeʼ chbʼanoq. ¡Saj la, Ajaw Jesús!» (Apoc. 22:20).