1. Junam rukʼ ri kubʼij ri wuj re Apocalipsis, ¿jas kubʼan ri Satanás chke ri upatanelabʼ ri Dios?

 RI WUJ re Apocalipsis kubʼij che ri uQʼatbʼal tzij ri Dios tajin kuqʼat chi tzij pa ri kaj y che xesax lo ri Itzel pa ri kaj y xkʼaq lo cho ri uwach Ulew (Apoc. 12:1-9). Rumal laʼ sibʼalaj kʼo kikotemal pa ri kaj, are kʼu pa ri uwach Ulew sibʼalaj kʼo kʼi kʼaxkʼolil. ¿Jasche? Rumal che ri Satanás petinaq royowal chkij ri e upatanelabʼ ri Dios che e kʼo cho ri uwach Ulew (Apoc. 12:12, 15, 17).

2. ¿Jas kojtoʼwik rech ko kojtakʼiʼ pa ri qakojonik?

² ¿Jas kqabʼano rech ko kojtakʼiʼ pa ri qakojonik chuwach ri Satanás? (Apoc. 13:10). Ri kojtoʼwik are retaʼmaxik ri kkʼulmataj pa ri petinaq. Jun kʼutbʼal, pa Apocalipsis ri apóstol Juan kchʼaw chrij jujun taq tewchibʼal che kqariq na pa kebʼ oxibʼ qʼij. Jun chke, are ri kbʼan na che usachisaxik kiwach ri e ukʼulel ri Dios. Chqilaʼ ri kubʼij pa Apocalipsis chkij y ri kkikʼulmaj na.

3. ¿Jas riʼ ri keqʼalajisaxik o etal che kkoj pa ri wuj re Apocalipsis?

³ Pa ri nabʼe versículo re ri wuj re Apocalipsis kubʼij che pa wajun wuj «[ke]qʼalajisaxik» o kekoj etal che kikʼutik ri e ukʼulel ri Dios (Apoc. 1:1). Kejunamax junam kukʼ e xibʼibʼalalaj taq chikop. Jun kʼutbʼal, kbʼixik che «jun xibʼibʼal awaj [...] xel uloq pa ri plo» y «kʼo lajuj rukʼaʼ xuqujeʼ wuqubʼ ujolom» (Apoc. 13:1). Tekʼuriʼ «jun xibʼibʼal awaj chik ri xpaqiʼ uloq xel uloq pa ri ulew». Kchʼaw junam rukʼ jun dragón «xubʼan kʼu ne chi xqaj uloq qʼaqʼ chikaj» (Apoc. 13:11-13).  Xuqujeʼ kbʼixik che kʼo «jun kaq rij itzel awaj» che tʼuyul bʼi jun ajmakalaj ixoq chrij. Ri e oxibʼ awaj riʼ e ukʼulel ri Jehová y ri uQʼatbʼal tzij. Rumal laʼ nim ubʼanik che kqetaʼmaj jachin chkij kchʼaw wi (Apoc. 17:1, 3).

4, 5. ¿Jas kojutoʼ wi ri Daniel 7:15-17 rech keqachʼobʼ ri taq etal che kʼo pa Apocalipsis?

⁴ Rech kqetaʼmaj e jachin riʼ ri ukʼulel ri Dios, rajawaxik kqetaʼmaj jachin chkij kchʼaw wi ri taq etal. Ri Biblia kubʼij che kʼi chke ri taq etal bʼim chi kan pa nikʼaj chi wuj re ri Biblia. Jun kʼutbʼal, ri qʼaxal tzij Daniel xrachikʼaj che «xeʼel uloq kajibʼ xibʼibʼalalaj taq awaj chupam ri plo» (Dan. 7:1-3). Xuqujeʼ xubʼij che ri xibʼibʼal taq awaj kchʼaw chkij kajibʼ qʼatbʼal tzij ri «ketaqan puwiʼ ri uwach ulew» (chasikʼij uwach Daniel 7:15-17). Wariʼ kojutoʼo rech kqachʼobʼo che ri e xibʼibʼalalaj taq awaj che e kʼo pa ri wuj re Apocalipsis xuqujeʼ kchʼaw chkij e qʼatbʼal taq tzij.

⁵ Chqilampeʼ jas kkikʼut ri taq etal re Apocalipsis. Pa wajun kʼutunem riʼ kqil na ri kukʼut ri Biblia chkij ri xibʼibʼal taq awaj. Kqamajij rilik jachin chkij kchʼaw wi. Tekʼuriʼ kqanikʼoj jas kkikʼulmaj na. Chukʼisbʼal kqilo jas kqetaʼmaj chrij.

6. ¿Jachin chrij kchʼaw wi ri xibʼibʼal awaj ri kʼo siete ujolom che kʼo pa Apocalipsis 13:1-4?

⁶ ¿Jachin chrij kchʼaw wi ri etal re ri xibʼibʼal awaj che kʼo siete ujolom? (Chasikʼij uwach Apocalipsis 13:1-4). Apocalipsis kubʼij che ri xibʼibʼal awaj kjunamataj rukʼ jun leopardo, are kʼu re jun oso ri e raqan y ri uchiʼ re jun koj y kʼo 10 rukʼaʼ. Paneʼ ri capítulo 7 re Daniel kchʼaw chkij kajibʼ xibʼibʼalalaj taq awaj: jun leopardo, jun oso, jun koj y jun awaj che kʼo 10 rukʼaʼ. Are kʼu pa Apocalipsis, ri kyaʼ ubʼixik are che xa jun xibʼibʼal awaj kel lo pa ri mar che je kpe leopardo, ri raqan junam rukʼ re jun oso, ri uchiʼ junam rukʼ re jun koj y kʼo 10 rukʼaʼ. Rumal laʼ, wajun xibʼibʼal awaj tajin ta kchʼaw chrij xa jun qʼatbʼal tzij pa ri uwach Ulew. ¿Jasche? Rumal che Apocalipsis kubʼij che «xyaʼ kʼu taqanik pa uqʼabʼ pa kiwiʼ konojel amaqʼ, xuqujeʼ winaq, xuqujeʼ chʼabʼal, xuqujeʼ nimaʼq taq tinamit». Wariʼ kukʼutu che más nim na uchuqʼabʼ chuwach jun qʼatbʼal tzij re jun tinamit (Apoc. 13:7). Rumal laʼ, kqabʼij che ri xibʼibʼal awaj are konojel ri e qʼatbʼal taq tzij che e taqanaq pa kiwiʼ ri e winaq pa ronojel uwach Ulew (Ecl. 8:9). b

7. ¿Jachin chkij kchʼaw wi ri siete jolomaj re ri xibʼibʼal awaj?

⁷ ¿Jachin chkij kchʼaw wi ri siete jolomaj? Kʼo jun jastaq pa ri capítulo 17 re Apocalipsis che kojutoʼ che uchʼobʼik, chilaʼ kriqitaj chi jumul ri xibʼibʼal awaj che kbʼix pa ri capítulo 13. Ri Apocalipsis 17:10 kubʼij: «Ri jobʼ [ajawinelabʼ o qʼatbʼal taq tzij] e tzaqinaq chik, ri jun chik kajawin kimik, ri jun chik kʼa majaʼ kpetik. Are taq kʼu kpetik, xa kʼu kebʼ oxibʼ qʼij kbʼeytajik». Chke ronojel ri e qʼatbʼal tzij che ukojom ri Satanás, e kʼo siete che kejunamataj rukʼ siete jolomaj rumal che nim ubʼanik ri kibʼanom. E nimaʼq taq qʼatbʼal tzij che kʼo kibʼanom che ri utinamit ri Dios. Pa taq ri uqʼij ri apóstol Juan e cinco chke waʼ ri nimaʼq taq qʼatbʼal tzij e kʼo ta chik: Egipto, Asiria, Babilonia, Medopersia y Grecia. Ri uwaq (sexto) are ri tinamit Roma, che tajin kuqʼat tzij are chiʼ ri Juan xril waʼ taq visiones. ¿Jachin kʼu riʼ ri uwuq (séptimo) y ri ukʼisbʼal nim qʼatbʼal tzij o jolomaj?

8. ¿Jachin chrij kchʼaw wi ri uwuq y ukʼisbʼal ujolom ri xibʼibʼal awaj?

 ⁸ Junam rukʼ ri kqil na, ri profecía re ri wuj re Daniel kojutoʼo rech kqetaʼmaj jachin riʼ ri ukʼisbʼal jolomaj re ri xibʼibʼal awaj. ¿Jachin ri nim qʼatbʼal tzij (potencia mundial) tajin kuqʼat tzij pa ri kʼisbʼal taq qʼij, «pa ri qʼij re ri Ajawaxel»? (Apoc. 1:10). Are ri nim qʼatbʼal tzij kech ri Reino Unido y Estados Unidos. Rumal laʼ, kqabʼij che are waʼ ri uwuq ujolom ri xibʼibʼal awaj re Apocalipsis 13:1-4.

9. ¿Jachin chkij kchʼaw wi ri xibʼibʼal awaj che «kʼo kebʼ rukʼaʼ junam kukʼ ri rukʼaʼ jun alaj chij»?

⁹ Chanim riʼ chqilampeʼ ri kubʼij ri capítulo 13 re Apocalipsis chrij ri kubʼan ri uwuq jolomaj, ri Reino Unido y Estados Unidos. Kujunamaj rukʼ jun chi xibʼibʼal awaj, je waʼ kubʼij chrij: «Kʼo kebʼ rukʼaʼ junam kukʼ ri rukʼaʼ jun alaj chij, xtzijon kʼut je jas jun awaj dragón». Wajun xibʼibʼal awaj «xeʼubʼan nimaʼq taq etal. Xubʼan kʼu ne chi xqaj uloq qʼaqʼ chikaj cho ri uwach ulew chkiwach ri winaq» (Apoc. 13:11-15). Y pa ri capítulos 16 y 19 re Apocalipsis kbʼix che che «ujalum ribʼ chi qʼaxal tzij» (Apoc. 16:13; 19:20). Ri Daniel xubʼij jun jastaq che kjunamataj rukʼ ri kubʼan ri nimalaj qʼatbʼal tzij kech ri Reino Unido y Estados Unidos. Xubʼij wariʼ: «Ri sachoj wachaj ri kubʼan na» (Dan. 8:19, 23, 24). Y are waʼ ri xkʼulmatajik are chiʼ xbʼan ri Segunda Guerra Mundial. Ri kebʼ bombas atómicas che xkoj pa ri kʼisbʼal re ri chʼoj are ri e científicos re ri Reino Unido y Estados Unidos xebʼanowik. Jeriʼ xqʼalajinik che ri qʼatbʼal tzij kech ri Reino Unido y Estados Unidos xkibʼano che «xqaj uloq qʼaqʼ chikaj cho ri uwach ulew».

10. ¿Jachin chrij kchʼaw wi ri «uwachbʼal ri [...] xibʼibʼal awaj»? (Apocalipsis 13:14, 15; 17:3, 8, 11).

¹⁰ Chanim chojchʼaw chi chrij jun chi xibʼibʼal awaj. Kjunamataj rukʼ ri xibʼibʼal awaj che kʼo siete ujolom, are kʼu wajun awaj kaq ri rij. Apocalipsis kubʼij che are «ri uwachbʼal ri [...] xibʼibʼal awaj», xuqujeʼ kubʼij che are jun «uwajxaq ajawinel» (chasikʼij uwach Apocalipsis 13:14, 15; 17:3, 8, 11). c Kbʼixik che wajun «ajawinel» xumaj uqʼatik tzij tekʼuriʼ xsach uwach, are chiʼ xqʼax ri tiempo xkʼiy chi jumul. Wariʼ qas kjunamataj rukʼ ri xkʼulmataj rukʼ ri Organización de las Naciones Unidas (ONU), che kechakun chrij uqʼatik tzij pa ronojel ri uwach Ulew. Are chiʼ qas xumaj loq xbʼix Sociedad de las Naciones che. Tekʼuriʼ xsach uwach are chiʼ xbʼan ri Segunda Guerra Mundial. Y are chiʼ xqʼax ri tiempo xwalij chi jumul, y are ri ONU che kʼo kimik.

11. ¿Jas kkibʼan ri e qʼatbʼal tzij che kejunamataj kukʼ xibʼibʼal taq awaj y jasche kqaxeʼj ta qibʼ chke?

¹¹ Rukʼ ri kkiya ubʼixik ri e qʼatal taq tzij che kejunamataj kukʼ e xibʼibʼal taq awaj, kekitaqchij ri e winaq rech kkibʼan kikʼulel che ri Jehová y ri utinamit. Pa nikʼaj chi tzij, tajin kekimulij «ri ajawinelabʼ re ronojel ri uwach ulew» pa ri Armagedón, «ri chʼoj re ri nimalaj uqʼij ri Dios ri kʼo ronojel ukunem» (Apoc. 16:13, 14, 16). Are kʼu kqaxeʼj ta qibʼ, rumal che ri qaDios Jehová, aninaq kojutoʼ qonojel ri kqaya qatobʼanik che ri uQʼatbʼal tzij (Ezeq. 38:21-23).

12. ¿Jas kkʼulmataj na kukʼ konojel ri xibʼibʼal taq awaj?

¹² ¿Jas kkʼulmataj na kukʼ konojel ri xibʼibʼal taq awaj? Apocalipsis 19:20 kuya ri urespuesta: «Xchap kʼu ri awaj, xuqujeʼ  xchap ri jun ri ujalum ribʼ chi qʼaxal tzij, ri e ubʼanom mayibʼal chuwach ri itzel awaj, ri xuqujeʼ rumal ri mayibʼal e usubʼum ri xekʼamow ri retal ri itzel awaj xuqujeʼ ri xeqʼijilan ri uwachbʼal. We kebʼ riʼ e kʼaskʼoj xekʼiʼaq bʼik pa ri cho re qʼaqʼ ri knikow rukʼ azufre». Wariʼ kraj kubʼij, che ksachisax na kiwach are chiʼ kʼa e kʼo na pa ri kiqʼatbʼal tzij.

13. ¿Jas kʼax kqariq ri oj cristianos kumal ri qʼatal taq tzij re ri uwach Ulew?

¹³ Ri kqetaʼmaj chrij. Ri cristianos rajawaxik che xaq xiw kqaya qatobʼanik che ri Dios y ri uQʼatbʼal tzij (Juan 18:36). Rajawaxik che kqanim ta qibʼ pa ri jastaq re ri política. Are kʼu wariʼ weneʼ kʼax ubʼanik, rumal che ri qʼatal taq tzij kkaj kqaya ri qatobʼanik chke rukʼ ri kqabʼij y ri kqabʼano. Are chiʼ ri e winaq kkiya ri kitobʼanik chke ri e qʼatal taq tzij re ri uwach Ulew jetaneʼ che tajin kkoj ri etal re ri xibʼibʼal awaj chke (Apoc. 13:16, 17). Y ri winaq che kʼo wajun etal chke keqaj ta chi chuwach ri Dios y kyaʼtaj ta ri kʼaslemal kʼo ta ukʼisik chke (Apoc. 14:9, 10; 20:4). Sibʼalaj nim ubʼanik che xaq xiw che ri uQʼatbʼal tzij ri Dios kqaya wi ri qatobʼanik, paneʼ kojtaqchiʼx kumal ri e qʼatal taq tzij re ri uwach Ulew rech keqatoʼo.

14. Junam rukʼ ri kubʼij Apocalipsis 17:3-5, ¿jas xbʼanow che ri apóstol Juan che sibʼalaj xmayinik?

¹⁴ Ri apóstol Juan kubʼij che kʼo jun chi jastaq xrilo che «sibʼalaj x[u]mayo». Xril jun ixoq che tʼuyul bʼi chrij jun chke ri e xibʼibʼal awaj (Apoc. 17:1, 2, 6). Kbʼixik che are jun «ajmakalaj ixoq», y «Nimalaj Babilonia» kbʼix che ri ubʼiʼ. Y «ri ajawinelabʼ aj uwach ulew xemakun rukʼ» (chasikʼij uwach Apocalipsis 17:3-5).

15, 16. ¿Jachin riʼ «ri Nimalaj Babilonia», y jasche qetaʼm?

¹⁵ ¿Jachin riʼ ri «Nimalaj Babilonia»? Wajun ixoq tajin ta kchʼaw chkij ri políticos rumal che Apocalipsis kubʼij che kmakun kukʼ ri e kʼamal taq bʼe re ri qʼatbʼal taq tzij re ri uwach Ulew (Apoc. 18:9). Kraj ktaqan pa kiwiʼ konojel ri e qʼatal taq tzij rumal che Apocalipsis kubʼij che tʼuyul bʼi pa uwiʼ ri xibʼibʼal awaj. Xuqujeʼ tajin ta kchʼaw chkij ri e nimaʼq taq kʼayij che kukoj ri Satanás pa ri uwach Ulew, rumal che are chiʼ Apocalipsis kchʼaw chrij wariʼ, kubʼij «ri ajkʼayibʼ re ri uwach Ulew» chke (Apoc. 18:11, 15, 16).

¹⁶ Kʼi mul are chiʼ ri Biblia kchʼaw chrij ri makunik kukʼ achijabʼ ixoqibʼ, kchʼaw chrij jun winaq che kubʼij che kuqʼijilaj ri Dios are kʼu kubʼan ri jastaq re ri uwach Ulew (1 Crón. 5:25; Sant. 4:4). Are kʼu, are chiʼ kchʼaw chrij jun winaq che kniman che ri Dios kukoj ri tzij chʼajchʼoj o makunaq taj (2 Cor. 11:2; Apoc. 14:4). Pa ri ojer tinamit Babilonia chilaʼ xekʼiy wi lo kʼi qastzij taj kojonem. Rumal laʼ kqabʼij che ri Nimalaj Babilonia kchʼaw chkij konojel ri e qastzij taj kojonem che e kʼo pa ronojel uwach Ulew (Apoc. 17:5, 18; chawilaʼ ri kʼutunem re jw.org «¿Qué es Babilonia la Grande?»).

17. ¿Jas kukʼulmaj na ri Nimalaj Babilonia?

¹⁷ ¿Jas kukʼulmaj na ri Nimalaj Babilonia? Apocalipsis 17:16, 17 kubʼij: «Ri lajuj rukʼaʼ ri awaj ri e awilom, kketzelaj na uwach ri ajmakalaj ixoq kech nim chʼutin, kkiya na kanoq xaq utukel chʼanal kʼut. Kkitij na ri utiʼjal, kkiporoj na rukʼ qʼaqʼ. Are kʼu ri Dios uyoʼm pa kanimaʼ chi kkibʼan ri uchomanik ri areʼ». Qastzij wi, ri Jehová kubʼan na che ri e tinamit kkikoj ri xibʼibʼal awaj che kaq rij, kraj kubʼij, ri Naciones Unidas, rech kechʼojin kukʼ  ri qastzij taj kojonem y kkisachisaj kiwach (Apoc. 18:21-24).

18. ¿Jas rajawaxik kqabʼano rech kqabʼan ta ri jastaq re ri Nimalaj Babilonia?

¹⁸ Ri kqetaʼmaj chrij. Nim ubʼanik che kqakoj qachuqʼabʼ kojkʼojiʼ pa ri «qʼijilanik» che chuwach ri Dios «qas chʼajchʼoj, ri man tzʼajtal ta[j]» (Sant. 1:27). Kqaya ta bʼe che ri Nimalaj Babilonia kubʼan kʼax che ri qakojonik rukʼ ri molom taq tzij kukʼutu, nimaqʼij che utz ta kril ri Jehová, tzʼil taq makaj y ubʼanik kichak itzel taq uxlabʼal. Y chqataqej ubʼixik chke ri e winaq waʼ taq tzij: «Chixel bʼik pa ri Babilonia». We keʼel bʼi pa ri qastzij taj kojonem, ri Dios krilo che e jun ta che ubʼanik ri mak che kubʼan ri Nimalaj Babilonia (Apoc. 18:4).

19. ¿Jachin riʼ ri jun «nimalaj dragón kaq rij»?

¹⁹ Ri wuj re Apocalipsis xuqujeʼ kchʼaw chrij jun «nimalaj dragón kaq rij» (Apoc. 12:3). Wajun dragón kchʼojin kukʼ ri Jesús y ri e ángeles che e teren chrij (Apoc. 12:7-9). Y xaq xiw ta wariʼ kubʼano, xaneʼ kubʼan kʼax che ri utinamit ri Dios y kuya taqanik pa kiqʼabʼ ri e qʼatbʼal taq tzij re ri uwach Ulew che kejunamataj kukʼ xibʼibʼal taq awaj (Apoc. 12:17; 13:4). ¿Jachin riʼ ri dragón? Are «ri ojer kumatz, are ri itzel ri Satanás» (Apoc. 12:9; 20:2). Are waʼ ri kʼamowinaq kibʼe ri e ukʼulel ri Jehová.

20. ¿Jas kukʼulmaj na ri dragón?

²⁰ ¿Jas kukʼulmaj na ri dragón? Apocalipsis 20:1-3 kubʼij che jun ángel kkʼaqow na bʼi ri Satanás pa jun qʼequʼmalaj jul y wariʼ kjunamataj rukʼ jun cárcel ri ktzʼapix wi. 1,000 junabʼ kkʼojiʼ na chilaʼ «rech man keʼusubʼ ta chik ri nimaʼq taq tinamit» kʼa kkʼis na ri tiempo re ri Mil Junabʼ. Y chukʼisbʼal, ri Satanás y ri e itzel taq uxlabʼal che e teren chrij kekʼaq bʼi «pa ri cho re qʼaqʼ xuqujeʼ azufre». Wariʼ kraj kubʼij che ksachisax kiwach chilaʼ (Apoc. 20:10). ¡Sibʼalaj kuya kikotemal riʼ are chiʼ kʼo ta chi ri Satanás y ri e itzel taq uxlabʼal!

21. ¿Jasche kuya kikotemal chqe ri xqasikʼij pa ri wuj re Apocalipsis?

²¹ ¿La mat qastzij che kuya qachuqʼabʼ uchʼobʼik ri kraj kubʼij ri e etal re ri wuj re Apocalipsis? Xaq xiw ta xqetaʼmaj e jachin riʼ ri ukʼulel ri Jehová, xaneʼ xuqujeʼ xqilo jas ri kkikʼulmaj na. Jeʼ, «utz re ri kusikʼij xuqujeʼ utz ke ri kkitatabʼej ri usikʼibʼalil [...] ri tzʼibʼatal cho we wuj riʼ» (Apoc. 1:3). Are kʼu, ¿jas tewchibʼal kkiriq na ri e sukʼ taq winaq are chiʼ sachisam chi kiwach ri e ukʼulel ri Dios? Wariʼ kqil na pa ri kʼisbʼal kʼutunem re wajun jupuq kʼutunem riʼ.