1. Junam rukʼ ri kubʼij Proverbios 4:7, ¿jasche kajwataj más qanojibʼal?

 ¿LA KʼO jumul achaʼom ubʼanik jun jastaq nim ubʼanik? We je riʼ, qastzij riʼ che atom anojibʼal che ri Jehová rumal che awetaʼm che kajwataj ri utobʼanik chawe (Sant. 1:5). Ri qʼatal tzij Salomón xutzʼibʼaj wariʼ: «Chuwach apachike jun jasach chik chariqaʼ ri noʼj» (chasikʼij uwach Proverbios 4:7). Are kʼu ri areʼ tajin ta kchʼaw chrij apachike nojibʼal, xaneʼ are ri nojibʼal che petinaq rukʼ ri Jehová (Prov. 2:6). Are kʼu, ¿la kkun ri unojibʼal ri Dios kojutoʼ chuwach ri jastaq che kqariq pa qakʼaslemal? Kkunik. Are waʼ ri kqil na pa wajun kʼutunem riʼ.

2. ¿Jas kqabʼan oj rech kqariq ri qastzij nojibʼal?

² Rech kqariq ri qastzij nojibʼal rajawaxik kqetaʼmaj xuqujeʼ kqabʼan ri xkikʼut kan e kebʼ achijabʼ che sibʼalaj xkʼojiʼ kinojibʼal. Nabʼe, kojchʼaw na chrij ri Salomón. Ri Biblia kubʼij che «ri Dios xuya nimalaj noʼj che ri Salomón xuqujeʼ etaʼmabʼal» (1 Rey. 4:29). Y, ukabʼ, kojchʼaw na chrij ri ukʼutbʼal ri Jesús, ri achi che xkʼojiʼ más unojibʼal cho ri uwach Ulew (Mat. 12:42). Jun profecía xubʼij wariʼ chrij ri Jesús: «Ri ruxlabʼal ri Ajawaxel kjeqiʼ na amaqʼel puwiʼ, kuya kʼu na unoʼj, kʼoxomanik» (Is. 11:2).

3. ¿Jas kqil na pa wajun kʼutunem riʼ?

 ³ Rukʼ ri nojibʼal che xuya ri Jehová chke, ri Jesús y ri Salomón xkiya pixabʼ chqe rech kqetaʼmaj ri kqabʼan chuwach ri jastaq che kqariq pa ri qakʼaslemal. Pa wajun kʼutunem, kojchʼaw na chrij oxibʼ jastaq: ri kqabʼan che rilik ri pwaq, ri chak xuqujeʼ ri kqabʼan che qilik qibʼ oj.

4. ¿La xkʼojiʼ kirajil ri Salomón y ri Jesús?

⁴ Ri Salomón sibʼalaj qʼinom xuqujeʼ sibʼalaj kʼi jastaq re (1 Rey. 10:7, 14, 15). Are kʼu ri Jesús xkʼojiʼ ta nim pwaq rukʼ y kʼo ta rachoch (Mat. 8:20). Paneʼ je wariʼ, ri Salomón y ri Jesús utz xkibʼan che rilik ri pwaq rumal che ri kinojibʼal petinaq rukʼ ri Jehová.

5. ¿Jas utz chomanik chrij ri pwaq xkʼojiʼ rukʼ ri Salomón?

⁵ Ri Salomón xubʼij che ri qʼinomal «are jun toʼbʼal ibʼ» (Ecl. 7:12). Xubʼij che ri rajil rajawaxik rech kqaya ri kajwataj che ri qafamilia y jujun taq mul weneʼ kqaloqʼ jujun jastaq qe che utz kqilo. Are kʼu xubʼij che kʼo jastaq más nim na ubʼanik chuwach ri pwaq. Xubʼij: «Are kʼo kechbʼex na we kʼo utzalaj tzijol, [...] chuwach ri kʼiʼalaj qʼan pwaq» (Prov. 22:1). Y xubʼij che ri winaq che nim kkil wi ri rajil man kekikot ta rukʼ ri kʼo kukʼ (Ecl. 5:10, 12). Xubʼij che man kqakubʼa ta qakʼuʼx chrij ri pwaq, rumal che kimik kʼolik y chweʼq maj chik (Prov. 23:4, 5).

6. Junam rukʼ ri kubʼij Mateo 6:31-33, ¿jas kuchomaj ri Jesús chrij ri pwaq?

⁶ Ri Jesús utz xubʼan che rilik ri pwaq. Kʼo jujun mul xubʼan waʼim xuqujeʼ xukʼiʼanik (Luc. 19:2, 6, 7). Jumul xubʼan utzalaj vino che joron, are waʼ ri nabʼe milagro xubʼano (Juan 2:10, 11). Pa ri qʼij che xkamik rukʼaʼm bʼi jun atzʼyaq che sibʼalaj paqal rajil (Juan 19:23, 24). Are kʼu xubʼij chke ri utijoxelabʼ: «Man kʼo ta jachin jun kkunik keʼupatanij kebʼ ajawibʼ [...]. Man kixkun taj kipatanij  ri Dios xuqujeʼ ri qʼinomal» (Mat. 6:24). Xubʼij che we kojok il che upatanixik ri Dios ri areʼ kuya na ri kajwataj chqe (chasikʼij uwach Mateo 6:31-33).

7. ¿Jas taq tewchibʼal uriqom jun qachalal rumal che utz ri uchomanik chrij ri pwaq?

⁷ E kʼi qachalal kiriqom kʼi tewchibʼal are chiʼ kkinimaj ri pixabʼ che xuya ri Jehová chrij ri pwaq. Jun kʼutbʼal, jun qachalal che kʼulan taj Daniel ubʼiʼ. Kubʼij: «Are chiʼ in ala na xinbʼij che upatanixik ri Jehová are ri más nim ubʼanik pa ri nukʼaslemal». Rumal che xutzukuj ta qʼinomal. Xukoj ri utiempo xuqujeʼ ri kkun che ubʼanik che upatanixik ri Jehová, xchakun pa taq ri labores de socorro y pa Betel. Ri areʼ kubʼij: «Man kinchomaj taj che mat utz ri xinbʼano. Wet are xintzukuj más qʼinomal, man xinriq ta kʼi tewchibʼal riʼ xuqujeʼ ri e kʼi taq wachiʼl. Are kʼu rumal che xinya pa nabʼe ri upatanixik ri Jehová sibʼalaj kinkikotik. Qas qʼalaj che man kʼo ta jun jastaq kjunamataj rukʼ ri tewchibʼal che uyaʼom ri upatanixik ri Jehová chwe». Are chiʼ kqatzukuj ri jastaq re ri qakojonik, utz kojelik.

8. Junam rukʼ ri kubʼij Eclesiastés 5:18, 19, ¿jasche qetaʼm che ri Salomón utz ri uchomanik chrij ri chak?

⁸ Ri Salomón xubʼij che ri kikotemal che kuya ri chak chqe «kpe rukʼ ri Dios» (chasikʼij uwach Eclesiastés 5:18, 19). Xuqujeʼ xubʼij: «Ronojel tijoj chuqʼabʼ kʼo kechbʼex che» (Prov. 14:23). Are kʼu man xaq xiw ta xubʼij. Xaneʼ qas xchakunik, xubʼan kʼi taq ja, xutik ri ulew, xutik kotzʼiʼj xuqujeʼ xuyak nimaʼq taq tinamit (1 Rey. 9:19; Ecl. 2:4-6). Sibʼalaj xok il che ubʼanik ri uchak. Y xkikot rumal wariʼ, are kʼu retaʼm che xaq xiw ta ri chak kuya kikotemal, rumal laʼ xupatanij ri Jehová. Jun kʼutbʼal, xuyak jun templo jawiʼ kqʼijilax wi ri Jehová y wajun chak riʼ siete junabʼ xuchʼijo (1 Rey. 6:38; 9:1). Paneʼ xubʼan kʼi taq chak pa ri ukʼaslemal, areʼ xrilo che ri kojonik are más nim na ubʼanik. Rumal laʼ xutzʼibʼaj: «Ronojel bʼitajinaq chik. Nim bʼaʼ chawilaʼ wi ri Dios cheʼatzʼaqatisaj taq kibʼanik ri e utaqomal» (Ecl. 12:13).

9. ¿Jas xubʼan ri Jesús che ukʼutik che utz ri uchomanik chrij ri chak?

⁹ Ri Jesús xuqujeʼ sibʼalaj xchakunik. Are chiʼ kʼa ala na, xux ajanel (Mar. 6:3). Qastzij riʼ che ri utat unan sibʼalaj xekikotik rumal che xtobʼan che uyaʼik ri kajwataj che ri ufamilia. Rumal che are jun tzʼaqatalaj achi qas utz xel ri uchak, y qastzij riʼ che qas e kʼi xeloqʼow ri jastaq che xubʼano. Ri Jesús sibʼalaj kkikot rumal ri uchak. Are kʼu xuya taj che ri chak kresaj ri tiempo che kukoj che unimarisaxik ri ukojonik (Juan 7:15). Are chiʼ xupatanij ri Jehová pa tiempo completo xubʼij wariʼ: «Mixok il che uriqik ri wa ri ksach uwach, xaneʼ che uriqik ri wa ri kjeqiʼk ri kuya junalik kʼaslemal» (Juan 6:27). Y pa ri Sermón del Monte xubʼij: «Chimulij iqʼinomal pa ri kaj» (Mat. 6:20).

10. ¿Jas kʼax weneʼ kqariqo we utz kqabʼan che ri qachak?

¹⁰ Ri nojibʼal che kuya ri Jehová chqe kojutoʼo rech utz kqabʼan che rilik ri chak. Paneʼ ri oj cristianos sibʼalaj kojchakunik y kqabʼan «utzalaj taq chak» (Efes. 4:28). Weneʼ ri qapatrón  utz kril ri chak che kqabʼano xuqujeʼ che kojelaqʼ taj, rumal wariʼ kqaj kojchakun más horas rech utz kchoman chkij ri testigos rech Jehová. Are kʼu, rumal wariʼ weneʼ kqilij ta chi ri qafamilia xuqujeʼ ri qakojonik. We je wariʼ, rajawaxik kqakʼex ri qachomanik chrij ri chak.

11. ¿Jas xretaʼmaj ri a William chrij ri ukʼutbʼal jun kʼamal bʼe?

¹¹ Jun qachalal ala William ubʼiʼ, xretaʼmaj jun jastaq chrij ri chak. Ri areʼ, xchakun rukʼ jun qachalal che kʼamal bʼe. Ri a William kubʼij: «Ri qachalal utz ri uchomanik chrij ri chak. Sibʼalaj kok il pa ri uchak xuqujeʼ sibʼalaj utz kelik, ri winaq kekikot rukʼ ri chak che kubʼano. Are kʼu chiʼ kkʼis ri qʼij kuya kan ri chak y xaq xiw chi krilij ri ufamilia y ri kajwataj pa ri ukojonik. Man wetaʼm ta uwach jun winaq che sibʼalaj kkikotik junam rukʼ wajun qachalal riʼ». b

12. ¿Jas xubʼan ri Salomón che ukʼutik che kʼo jun utz uchomanik chbʼil ribʼ, y jas xubʼano rech xkʼextaj ri uchomanik?

¹² Are chiʼ ri Salomón xux jun utzalaj pataninel re ri Jehová, xkʼojiʼ utz uchomanik chbʼil ribʼ. Are chiʼ kʼa ala na y kʼateʼ xumajij uqʼatik tzij, xuchʼobʼo che kʼo jastaq man kkun ta che ubʼanik, rumal laʼ amaqʼel xutaʼ ri utobʼanik ri Jehová (1 Rey. 3:7-9). Xuqujeʼ retaʼm che we kuchajij ta ribʼ kubʼan nim che ribʼ. Rumal laʼ xubʼij: «Chrij ri nimal, kpe ri tzaqmajik; chrij ri nimarisan ibʼ, ri tzaqik» (Prov. 16:18). Are chiʼ xqʼax ri tiempo xsachan waʼ taq tzij riʼ che. Are chiʼ kʼi chi junabʼ tajin kuqʼat tzij, xunimarisaj ribʼ y xunimaj ta ri taqanik che yaʼom chke ri e qʼatal taq tzij. Che kubʼij: «Mebʼuchuw ri rixoqil, rech man kretzelaj ta ribʼ» xuqujeʼ ri ranimaʼ (Deut. 17:17). Ri Salomón xkʼojiʼ 700 rixoqil y 300 e qas ta rixoqil, ¡e kʼi chke kkiqʼijilaj  nikʼaj chi diosibʼ! (1 Rey. 11:1-3). Weneʼ xuchomaj che kkunik kuqʼil ribʼ. Paneʼ je wariʼ xuchomaj, xuriq kʼi kʼax rumal che xunimaj ta ri Jehová (1 Rey. 11:9-13).

13. ¿Jas kqetaʼmaj chrij ri utzalaj ukʼutbʼal ri Jesús?

¹³ Ri Jesús xkʼojiʼ jun utz uchomanik chbʼil ribʼ. Are chiʼ majaʼ kpe cho ri uwach Ulew, xubʼan utzalaj taq chak pa ri kaj. Colosenses 1:16 kubʼij: «Rumal kʼut areʼ xebʼan konojel ri jastaq ri e kʼo pa ri kaj xuqujeʼ ri e kʼo cho ri uwach ulew». Are chiʼ xubʼan uqasanjaʼ xnaʼtaj che ronojel ri xubʼan pa ri kaj rukʼ ri uTat (Mat. 3:16; Juan 17:5). Are kʼu xubʼan ta nim che ribʼ. Rumal laʼ xuchomaj taj che más nim ubʼanik chkiwach ri e nikʼaj chik. Xaneʼ xubʼij che «man xpe taj rech kpatanixik, xaneʼ rech keʼupatanij nikʼaj chik. Xpetik rech kuya ri ukʼaslemal che kitorik kʼiʼalaj winaq» (Mat. 20:28). Xubʼij che man kʼo ta jun jastaq xaq pa re wi kubʼano (Juan 5:19). ¡Qas xumachʼ ribʼ ri Jesús! ¿La mat qastzij che kqaj kqesaj uwach ri utzalaj ukʼutbʼal?

14. ¿Jas kojutoʼ wi ri xubʼij ri Jesús rech kkʼojiʼ jun utz qachomanik chbʼil qibʼ?

¹⁴ Ri Jesús xukʼut chkiwach ri rajtijoxelabʼ che rajawaxik kkʼojiʼ jun utzalaj kichomanik chbʼil kibʼ. Ri areʼ xubʼij: «Konojel ri iwiʼ e ajilatalik» (Mat. 10:30). Sibʼalaj kukubʼsaj qakʼuʼx waʼ taq tzij riʼ, rumal che weneʼ jujun taq mul utz ta ri qachomanik chbʼil qibʼ. Wariʼ kunaʼtaj chqe che ri Jehová sibʼalaj nim kojril wi. We ri Jehová kraj che kojkʼojiʼ pa ri kʼakʼ uwach Ulew, ¿jasche kqabʼij oj che taqal ta chqe?

15. a) Junam rukʼ ri xubʼij ri wuj La Atalaya ojer kanoq, ¿jas jun utz chomanik rajawaxik kkʼojiʼ qukʼ? b) Junam rukʼ ri kqil pa ri e wachbʼal re ri uxaq 24, ¿jas jastaq kqariq taj we xaq xiw kojchoman chbʼil qibʼ?

¹⁵ Quince junabʼ kanoq, ri wuj La Atalaya xubʼij che rajawaxik kkʼojiʼ jun utz qachomanik chbʼil qibʼ. Xubʼij: «Man kqachomaj taj che sibʼalaj nim qabʼanik; xuqujeʼ man utz taj kqachomaj che man  kʼo ta qapatan. Rajawaxik kojchoman chrij ri qas qabʼantajik rech kʼo jun utz qachomanik chbʼil qibʼ, y kqachomaj che kʼo jastaq kojkun che ubʼanik y kʼo jastaq kojkun ta che ubʼanik. Junam rukʼ xubʼij jun qachalal ixoq: ‹Man in jun itzel winaq taj xuqujeʼ kinchomaj taj che in jun utzalaj winaq che kʼo pa ri uwach Ulew. Wetaʼm che kʼo jastaq kinkun che ubʼanik xuqujeʼ wetaʼm che kʼo jastaq kinkun ta che ubʼanik, junam kukʼ ri nikʼaj chi winaq›». c ¿La kqilo? Are más utz che kkʼojiʼ jun utz qachomanik chbʼil qibʼ.

16. ¿Jasche ri Jehová kuya utz taq pixabʼ chqe?

¹⁶ Pa ri Biblia, ri Jehová kuya utzalaj taq pixabʼ chqe. Kubʼano rumal che kraj che kqariq kikotemal y kqariq utzilal (Is. 48:17, 18). Ri más utz jastaq che kojkunik kqabʼano are che kojok il che upatanixik ri Jehová pa ri qakʼaslemal. Wariʼ qastzij kuya kikotemal chqe. Y man kqariq ta ri kʼax che kkiriq ri winaq che sibʼalaj nim kkil ri pwaq, ri chak y ri kkichomaj chbʼil kibʼ. Rumal laʼ, ¡amaqʼel chojux ajnojabʼ y chqakikotisaj ri ranimaʼ ri Jehová! (Prov. 23:15).