1. ¿Jas ri kqamay taj ri oj cristianos, y jas qas qetaʼm?

 KQAMAY taj are chiʼ e jujun winaq kkibʼan kʼax chqe are chiʼ kqatzijoj ri utzij ri Dios, y weneʼ más knimataj we kʼax riʼ pa ri petinaq (Dan. 11:44; 2 Tim. 3:12; Apoc. 16:21). Are kʼu qas qetaʼm che ri Jehová kojutoʼ na. ¿Jasche kqabʼij wariʼ? Rumal che amaqʼel e utoʼm ri upatanelabʼ che ubʼanik ri chak che uyaʼom pa kiqʼabʼ paneʼ sibʼalaj kʼax ubʼanik. Jun kʼutbʼal, chqilaʼ jujun taq jastaq che xukʼulmaj ri qʼaxal tzij Ezequiel are chiʼ xutzijoj ri utzij ri Dios chke ri judíos pa Babilonia.

2. a) Junam rukʼ ri kubʼij Ezequiel 2:3-6, ¿jas kibʼantajik ri winaq che ri Ezequiel xutzijoj ri utzij ri Dios chke? b) ¿Jas kqil na pa wajun kʼutunem riʼ?

² ¿Jas kibʼantajik ri winaq che xtzijox ri utzij ri Dios chke rumal ri Ezequiel? Ri Jehová xubʼij che ri e winaq riʼ e «nimanel taj», «ko ri kijolom» y «ko ri kanimaʼ». Sibʼalaj e itzel taq winaq che kejunamataj kukʼ kʼix y e xibʼibʼal taq escorpiones. Rumal laʼ ri Jehová kʼi mul xubʼij wariʼ che ri Ezequiel: «Maxeʼj awibʼ» (chasikʼij uwach Ezequiel 2:3-6). Ri Ezequiel xkunik xutzijoj ri utzij ri Dios rumal che 1) are ri Jehová xtaqow che ubʼanik, 2) xyaʼ uchuqʼabʼ rumal ri uxlabʼixel y 3) xutzuq ribʼ rukʼ ri e utzij ri Dios. ¿Jas tobʼanik xuya we oxibʼ jastaq riʼ che, y jas kojutoʼ wi oj kimik?

3. ¿Jas tzij xuya uchuqʼabʼ ri Ezequiel, y jas xubʼan ri Jehová che ukʼutik che kutoʼo?

³ Ri Jehová xubʼij wariʼ che ri Ezequiel: «Katintaq bʼik» (Ezeq. 2:3, 4). Xuya uchuqʼabʼ riʼ ri e tzij. Xnaʼtaj riʼ che che are ri e tzij riʼ xubʼij ri Jehová che ri Moisés y che ri Isaías are chiʼ xeʼux qʼaxal utzij (Éx. 3:10; Is. 6:8). Ri Ezequiel xuqujeʼ retaʼm che ri Jehová xeʼutoʼ ri e qʼaxal taq tzij  riʼ che ubʼanik chak che kʼax ubʼanik. Rumal laʼ, are chiʼ ri Dios kamul xubʼij «katintaq bʼik» che ri Ezequiel, ri areʼ xretaʼmaj che ktoʼ rumal. Xuqujeʼ kʼi mul kriqitaj ri e tzij riʼ pa ri wuj re Ezequiel: «Xinuchʼabʼej kʼut ri Ajawaxel» (Ezeq. 14:2). Y kʼi mul kriqitaj ri e tzij: «Ri Ajawaxel xinuchʼabʼej» (Ezeq. 6:1). Rumal laʼ, ri Ezequiel qas retaʼm che are ri Jehová taqowinaq bʼik. Xuqujeʼ, rumal che kojol tabʼal toqʼobʼ ri utat, xukʼut riʼ chuwach che ri Jehová amaqʼel keʼutoʼ ri e qʼaxal taq utzij. Jun kʼutbʼal, ri Jehová xubʼij wariʼ chke ri Isaac, Jacob y Jeremías: «In in kʼo awukʼ» (Gén. 26:24; 28:15; Jer. 1:8).

4. ¿Jas e tzij xuya uchuqʼabʼ ri Ezequiel?

⁴ ¿La konojel ri israelitas xkitatabʼej ri utzij ri Dios? Ri Jehová xubʼij wariʼ che ri Ezequiel: «Ri tinamit Israel, man kunimaj ta na ri kabʼij che, rumal rech chi man kraj taj kniman chwe» (Ezeq. 3:7). Are chiʼ xkitatabʼej ta ri qʼaxal tzij, jetaneʼ are ri Jehová xkixutuj. Qastzij riʼ che wariʼ xuya uchuqʼabʼ ri Ezequiel rumal che paneʼ xxutux kumal ri winaq, kraj taj kubʼij che xa utz ta kubʼan che ri uchak. Xuqujeʼ, ri Jehová xubʼij che che are chiʼ ktzʼaqat ri xuya ubʼixik, ri judíos qas «kketaʼmaj kʼu na chi kʼo jun qʼaxal tzij chkixoʼl» (Ezeq. 2:5; 33:33). Qastzij riʼ che wariʼ xuya uchuqʼabʼ ri Ezequiel rech xuya ta kan utzijoxik ri utzij ri Dios.

5. ¿Jasche kuya qachuqʼabʼ ri kubʼij Isaías 44:8?

⁵ Oj xuqujeʼ kuya qachuqʼabʼ retaʼmaxik che are ri Jehová oj taqowinaq. Are jun nimalaj tewchibʼal che oj utestigos (Is. 43:10). Junam rukʼ ri xubʼij ri Jehová che  ri Ezequiel: «Maxeʼj awibʼ», chqe oj kubʼij wariʼ: «Chichajij bʼaʼ animaʼ». ¿Jasche rajawaxik kqaxeʼj ta qibʼ chkiwach ri e qakʼulel? Rumal che junam rukʼ ri Ezequiel, are ri Jehová oj taqowinaq oj y kuya ri utobʼanik chqe (chasikʼij uwach Isaías 44:8).

6. a) ¿Jas kubʼan ri Jehová che ukʼutik chqawach che kʼo che qatoʼik? b) ¿Jas kyaʼow kubʼsal qakʼuʼx y qachuqʼabʼ?

⁶ Ri Jehová kubʼij chqe che kʼo che qatoʼik. Jun kʼutbʼal, are chiʼ majaʼ kubʼij: «Ix ri ix qʼalajisanelabʼ chwij», xubʼij wariʼ: «We rajawaxik katqʼax pa ri jaʼ, ri in kinkʼojiʼ na awukʼ, we rajawaxik katqʼax pa taq ri nimaʼ man katjiqʼ ta na, we rajawaxik katokʼow pa ri qʼaqʼ, man katkʼat ta na, ri raqʼ ri qʼaqʼ man kenikow ta na chawij» (Is. 43:2). Jujun taq mul are chiʼ kqatzijoj ri utzij ri Dios, kqariq kʼax che e junam rukʼ nimaʼq taq jaʼ o qʼaqʼ. Are kʼu, rukʼ ri utobʼanik ri Jehová, kqaya ta kan utzijoxik ri utzij (Is. 41:13). Oj kqakʼulmaj kʼax junam rukʼ ri Ezequiel: más e kʼi ri winaq kkaj taj kkitatabʼej ri utzij ri Dios. Are kʼu qetaʼm che kraj taj kubʼij che xa utz ta kqabʼan che ri qachak. Kuya kubʼsal qakʼuʼx y qachuqʼabʼ retaʼmaxik che ri Jehová kkikot qukʼ we kqaya ta kan utzijoxik ri utzij. Ri apóstol Pablo xubʼij: «Chkijujunal kʼut kkikʼam na ri tojbʼal ke, jas ri chak ri kibʼanom» (1 Cor. 3:8; 4:1, 2). Jun qachalal che kʼi chi junabʼ precursora xubʼij: «Sibʼalaj kinkikotik che ri Jehová kuya rajil ukʼaxel ri chuqʼabʼ kqakoj che upatanexik».

7. ¿Jas xunaʼ riʼ ri Ezequiel are taq xchoman chrij ri xril pa ri visión? (Chawilaʼ ri wachbʼal re ri uwach ri wuj).

⁷ Ri Ezequiel xril ri nimalaj uchuqʼabʼ ri ruxlabʼixel ri Dios. Pa jun visión xril ri uxlabʼixel re ri Dios keʼusilabʼisaj uxlabʼal nim kichuqʼabʼ y e nimaʼq taq ketet re jun carro pa ri kaj (Ezeq. 1:20, 21). Ri Ezequiel kubʼij chqe ri xunaʼo: «Are taq xinwilo, xinmej wibʼ chuwach». Sibʼalaj xumay ri xrilo, rumal laʼ xroqiʼ pa ri ulew (Ezeq. 1:28). Weneʼ are taq xchoman chrij ri xril pa ri visión, xukubʼsaj más ukʼuʼx che kkunik kutzijoj ri utzij ri Dios rukʼ ri utobʼanik ri uxlabʼixel.

8, 9. a) ¿Jas taqanik xuya ri Jehová che ri Ezequiel? b) ¿Jas más xubʼan ri Jehová che uyaʼik uchuqʼabʼ ri Ezequiel?

⁸ Ri Jehová xubʼij wariʼ che ri Ezequiel: «At, winaq, chattakʼaloq, kintzijon kʼut awukʼ». Wajun taqanik y ri ruxlabʼixel ri Dios xuya uchuqʼabʼ rech xwalij chi jumul. Xubʼij: «Xok ri ukuʼinem ri Dios pa ri wanimaʼ xubʼan kʼu chwe chi xintakʼiʼk» (Ezeq. 2:1, 2). Pa ronojel ri tiempo che xutzijoj ri utzij ri Dios xkʼojiʼ «ri uqʼabʼ» ri Jehová pa uwiʼ, kraj kubʼij ri ruxlabʼixel (Ezeq. 3:22; 8:1; 33:22; 37:1; 40:1). Ri uxlabʼixel riʼ xuya uchuqʼabʼ ri Ezequiel rech xutzijoj ri utzij ri Dios chke ri judíos che ko ri kijolom, ko ri kanimaʼ (Ezeq. 3:7). Ri Jehová xubʼij: «Are kʼu ri in kebʼan na achʼiʼy xuqujeʼ tak chawe jachaʼ ri e areʼ. Kenbʼanaʼ ko chawe jachaʼ ri diamante, ko na chuwach ri abʼaj. Maxeʼj awibʼ chkiwach, mawi mape awanimaʼ chuwach ri kipalaj ri kkibʼano» (Ezeq. 3:8, 9). Jetaneʼ ri Jehová xubʼij wariʼ che: «Mubʼan kebʼ akʼuʼx rumal che ko kanimaʼ ri e winaq. In kinyaʼow achuqʼabʼ».

⁹ Pa riʼ ri tiempo, are ri uxlabʼixel xkʼutuw chuwach ri Ezequiel jawiʼ kutzijoj wi ri utzij ri Dios. Xubʼij: «Ko kʼu in uchapom bʼik ri uqʼabʼ ri Ajawaxel». Ri qʼaxal tzij jun semana xchoman chrij  che rajawaxik kubʼan ri xtaq wi y kukoj pa ranimaʼ ri e tzij che rajawaxik kutzijoj (Ezeq. 3:14, 15). Tekʼuriʼ, ri Jehová xubʼij che che kbʼe pa jun liʼanik, y chilaʼ xok ri ruxlabʼixel ri Dios pa ranimaʼ (Ezeq. 3:23, 24). Xbʼe kʼu ri Ezequiel che utzijoxik utzij ri Dios.

10. ¿Jas tobʼanik kajwataj chqe rech kojkunik kqatzijoj ri utzij ri Dios, y jasche?

¹⁰ ¿Jas kojtoʼwik rech kqatzijoj ri utzij ri Dios? Chojchoman chrij ri Ezequiel rech kqilo jas kojtoʼwik. Ri uxlabʼixel xuya uchuqʼabʼ ri Ezequiel are chiʼ majaʼ kel che utzijoxik ri utzij ri Dios. Junam rukʼ areʼ, ri oj kojkun taj kqatzijoj ri utzij ri Dios wet mat kojutoʼ ri uxlabʼixel. ¿Jasche kqabʼij wariʼ? Rumal che ri Satanás kukoj uchuqʼabʼ che uqʼatexik ri utzijoxik ri utzij ri Dios (Apoc. 12:17). Chqawach oj ri xa oj winaq weneʼ kqachomaj che ri Satanás sibʼalaj nim ri uchuqʼabʼ, are kʼu, are chiʼ kqatzijoj ri utzij ri Dios tajin kojchʼakan pa uwiʼ (Apoc. 12:9-11), xuqujeʼ kqakʼutu che kqaxibʼij ta qibʼ chuwach ri kubʼan che qaxibʼixik. Rumal laʼ, are chiʼ kqaya ta kan utzijoxik utzij ri Dios paneʼ kbʼan kʼax chqe, kukʼutu che are ri uxlabʼixel tajin kyaʼow qachuqʼabʼ y che kojqaj chuwach ri Jehová (Mat. 5:10-12; 1 Ped. 4:14).

11. ¿Jas kubʼan ri ruxlabʼixel ri Dios che qatoʼik, y jas rajawaxik kqabʼano rech kuya ta kan qatoʼik?

¹¹ Ri rumal che ri Jehová xubʼan achʼiʼy y ko che ri Ezequiel kukʼut chi jun jastaq chqawach: che ri uxlabʼixel kojutoʼ che uchʼijik apachike kʼax kqariq che utzijoxik ri utzij ri Dios (2 Cor. 4:7-9). Rumal laʼ, ¿jas rajawaxik kqabʼano rech amaqʼel kojutoʼ ri ruxlabʼixel ri Dios? Amaqʼel chqataʼ pa ri qachʼawem y chqakubʼsaj qakʼuʼx che ri Jehová kojutatabʼej. Ri Jesús xubʼij wariʼ chke ri utijoxelabʼ: «Chitaʼ, kyaʼtaj kʼu na chiwe. Chitzukuj, kiriq kʼu na. Chikʼorkʼaʼ ri uchiʼ ja, kjaqtaj kʼu na  chiwach». ¿Y jas kubʼan ri Jehová? Ri Biblia kubʼij che kuya na ri ruxlabʼal chke ri winaq ri kkitaʼ che (Luc. 11:9, 13; Hech. 1:14; 2:4).

12. Junam rukʼ ri kubʼij Ezequiel 2:9–3:3, ¿jawiʼ petinaq wi ri bʼotobʼik wuj, y jas tzʼibʼam chupam?

¹² Xaq xiw ta xyaʼ uchuqʼabʼ ri Ezequiel rumal ri ruxlabʼixel ri Dios, xaneʼ xuqujeʼ xutzuq ribʼ rukʼ ri e utzij. Pa jun visión xril jun qʼabʼaj che rukʼam jun bʼotobʼik wuj (chasikʼij uwach Ezequiel 2:9–3:3). ¿Jawiʼ xpe wi ri bʼotobʼik wuj? ¿Jas yaʼom ubʼixik chupam? Y, ¿jas xubʼan che utzuqik ri Ezequiel? Ri bʼotobʼik wuj riʼ petinaq pa ri tem re qʼatbʼal tzij re ri Jehová. Weneʼ ri Dios xukoj jun chke ri kajibʼ ángeles che xril ri Ezequiel rech xuya ri bʼotobʼik wuj che (Ezeq. 1:8; 10:7, 20). Pa ri bʼotobʼik wuj tzʼibʼatal ri e utzij ri Dios: kchʼaw chrij ri qʼatoj tzij che rajawaxik kubʼij ri Ezequiel chke ri itzel taq judíos (Ezeq. 2:7). Ri e tzij e tzʼibʼam chuwach y chrij ri bʼotobʼik wuj.

13. ¿Jas xubʼij ri Jehová che Ezequiel che kubʼan che ri bʼotobʼik wuj, y jasche ri wuj sibʼalaj kiʼ?

¹³ Ri Jehová xubʼij wariʼ che ri qʼaxal tzij: «Chabʼiqʼaʼ bʼik we tzʼibʼatalik riʼ […] chanojisaj ri apam che». Ri Ezequiel xunimaj ri taqanik y xutij bʼi ronojel ri wuj. ¿Jas kraj kubʼij wajun uchʼaqapil ri visión? Kraj kubʼij che ri Ezequiel rajawaxik kuchʼobʼ ronojel ri kuya ubʼixik. Rajawaxik che kopan pa ranimaʼ rech kʼo ubʼanik rukʼ ri ubʼantajik y rukʼ ri kunaʼo. Tekʼuriʼ xkʼulmataj jun jastaq che reyeʼm taj. Xunaʼ che ri bʼotobʼik wuj «sibʼalaj kiʼ jachaʼ ri juyubʼal rax kabʼ» (Ezeq. 3:3). ¿Jasche sibʼalaj kiʼ? Rumal che chuwach areʼ are jun nimalaj tewchibʼal che rukʼam bʼi ri utzij ri Jehová (Sal. 19:8-11). Sibʼalaj kmaltyoxinik rumal che xchaʼ che qʼaxal tzij rumal ri Jehová.

14. ¿Jas xtoʼw ri Ezequiel rech xkunik xubʼan ri chak che xtaq che ubʼanik?

¹⁴ Are chiʼ qʼaxinaq chi ri tiempo, ri Jehová xubʼij wariʼ che ri Ezequiel: «Qas chatok il che utatabʼexik ri kenbʼij na chawe, chakojoʼ kʼu pa ajolom» (Ezeq. 3:10). ¿Jas kraj kubʼij wariʼ? Che ri Jehová kraj che ri Ezequiel knaʼtaj che ri e tzij tzʼibʼam pa ri bʼotobʼik wuj y che kchoman chrij. Wariʼ xukowirisaj ri ukojonik ri Ezequiel y qas xuchʼobʼ ri rajawaxik kuya ubʼixik chke ri winaq (Ezeq. 3:11). Rumal che ri utzij ri Dios kʼo chi pa ri uchiʼ y pa ri ranimaʼ, ri qʼaxal tzij kkun chik kumajij uqʼalajisaxik (chajunamisaj rukʼ Salmo 19:14).

15. ¿Jas rajawaxik kqakoj pa ri qanimaʼ rech kqaya ta kan utzijoxik ri utzij ri Dios?

¹⁵ Rech kqaya ta kan utzijoxik ri utzij ri Dios, rajawaxik kqatzuq qibʼ rukʼ ri kubʼij ri Biblia, ri uTzij ri Dios. Rajawaxik kqakoj pa qanimaʼ ronojel ri kubʼij ri Jehová. Kimik ri Jehová kukoj ri Biblia rech kchʼaw qukʼ. ¿Jas kojkunik kqabʼano rech ri uTzij ri Dios kok pa ri qachomanik, pa ri qanimaʼ y kojutoʼ che rilik ri rumal kqabʼan jun jastaq?

16. ¿Jas rajawaxik kqabʼan rukʼ ri uTzij ri Dios, y jas kojtoʼw che ubʼanik?

¹⁶ Are chiʼ utz jastaq kqatijo kʼo uchuqʼabʼ ri qacuerpo. Junam rukʼ, ri qakojonik kkowirik are chiʼ kqanikʼoj ri uTzij ri Dios y kojchoman chrij. Are waʼ ri kraj kukʼut ri visión re ri bʼotobʼik wuj. Ri Jehová  kraj che kqabʼan ri xubʼij che ri Ezequiel: «We tzʼibʼatalik riʼ […] chanojisaj ri apam che». Kraj kubʼij kqanojisaj ri qanimaʼ che ri uTzij y kojchoman chrij. Kojkun che ubʼanik wariʼ are chiʼ kqabʼan qachʼawem, kqasikʼij ri Biblia y kojchoman chrij. Nabʼe, kqabʼan qachʼawem rech kok pa qanimaʼ ri uchomanik ri Dios. Tekʼuriʼ, kqasikʼij jun uchʼaqapil ri Biblia y kojchoman chrij ri xqasikʼij. ¿Jas utzilal kuyaʼo? Are chiʼ más kojchoman chrij ri kqasikʼij uwach, más kok pa qanimaʼ ri chomanik che kʼo pa ri uTzij ri Dios.

17. ¿Jasche nim ubʼanik kojchoman chrij ri kqasikʼij pa ri Biblia?

¹⁷ ¿Jasche nim ubʼanik kqasikʼij ri uTzij ri Dios y kojchoman chrij? Rumal che kuya qachuqʼabʼ che utzijoxik ri utzij ri Dios kimik y ri e tzij re qʼatoj tzij che weneʼ kqaya na ubʼixik pa ri petinaq. Xuqujeʼ, are chiʼ kojchoman más chrij ri utz taq ubʼantajik ri Jehová, kubʼan más ko ri qachilanik rukʼ. Y ri utzilal kqariqo are che kojkikotik y kqanaʼ jamaril pa ri qanimaʼ (Sal. 119:103).

18. ¿Jas kkichʼobʼ na ri winaq, y jasche?

¹⁸ Paneʼ oj qʼaxal tzij taj junam rukʼ ri Ezequiel, are kʼu ri Dios uyaʼom kan ri uTzij rech kqaya ubʼixik chke ri winaq. Kqaya ta kan ubʼanik wariʼ, kaʼ are chiʼ kubʼij ri Jehová chqe che kqatzijoj ta chik. Are chiʼ kopan ri tiempo re ri uqʼatoj tzij ri Jehová, ri winaq kekun taj kkibʼij che mat xbʼix chke o che xok ta il ri Dios chke (Ezeq. 3:19; 18:23). Xaneʼ, kkichʼobʼ na che ri tzij xqatzijoj, rukʼ ri Dios petinaq wi.

19. ¿Jas kyaʼow qachuqʼabʼ rech kqaya ta kan utzijoxik ri utzij ri Dios?

¹⁹ ¿Jas kyaʼow qachuqʼabʼ rech kqaya ta kan utzijoxik utzij ri Dios? Are ri oxibʼ jastaq che xtoʼw ri Ezequiel: kqaya ta kan utzijoxik ri utzij ri Jehová rumal che are oj taqowinaq che ubʼanik, rumal che ri uxlabʼixel kuya qachuqʼabʼ y rumal che kqatzuq qibʼ rukʼ ri uTzij ri Dios. Rukʼ ri utobʼanik ri Jehová kqaya ta kan utzijoxik ri utzij y kqachʼij ri kʼax «kʼa pa ri kʼisbʼalil» (Mat. 24:13).