Xumaj lo pa ri tiempo riʼ Jehová xuya kichuqʼabʼ ri xkiya ubʼixik ri utzij. Pa ri junabʼ riʼ xekʼiyar ri colportores, o precursores, e 225 y xopan pa 350. Are ri nabʼe mul che más che 8.000 publicadores, xkitaq bʼi ri kinforme re ri kichak pa ri oficinas centrales. Jehová xutewchij ri tajin kkibʼano.

Pa ri 21 re marzo 1920, Joseph Rutherford, che are ri kkʼamow kibʼe ri Tijoxelabʼ re ri Biblia, xuya jun chʼabʼal ubʼiʼ «Millones chke ri e kʼo kimik kekam taj». Ri Tijoxelabʼ re ri Biblia sibʼalaj xkikoj kichuqʼabʼ che kisikʼixik ri e winaq rech kkitatabʼej ri chʼabʼal. Xkiqaj ri teatros más nim pa ri tinamit re Nueva York y xkijach 320.000 invitaciones.

Xeʼopan e kʼi winaq más na cho ri xkichomaj. Xeʼopan más che 5.000 winaq, sibʼalaj xnoj ri lugar, y 7.000 xaq jeʼ xekanaj kan chuwach ri teatro. Jun revista pa inglés xubʼij che «are ri más nim riqbʼal che xkibʼan ri Tijoxelabʼ re ri Biblia cho ri uwach Ulew».

Xetaʼmax kiwach ri Tijoxelabʼ re ri Biblia kumal kʼi winaq rumal che xkibʼij che «millones chke ri e kʼo kimik kekam taj». Pa ri tiempo riʼ xkichʼobʼ taj che kʼo na kʼi tiempo che utzijoxik ri utzalaj taq tzij. Paneʼ jeʼ wariʼ, sibʼalaj xekikot che utzijoxik. Ida Olmstead, che xumaj bʼenam pa ri e riqbʼal pa 1902, xubʼij: «Qetaʼm che ri e winaq kkiriq na nimaʼq taq tewchibʼal, rumal laʼ xqaya ta kan utzijoxik ri utzalaj taq tzij chke konojel ri e winaq».

Rech kyaʼ ri kajwataj chke ri qachalal pa ri kikojonik, ri e qachalal re Betel xkimaj ubʼanik imprimir jujun chke ri e wuj. Xkiloqʼ ri jastaq che kajwataj chke xkiya pa jun qajom ja re ri 35 avenida Myrtle, re Brooklyn (Nueva York), naqaj che Betel.

Pa enero 1920 Leo Pelle y Walter Kessler xepatanin pa Betel. Walter kubʼij: «Are chiʼ xojopanik, ri kilow ri imprenta xkaʼy chqe y xubʼij: ‹Kraj na hora y media che ri wa re paqʼij›. Rumal laʼ xubʼij chqe che kqatoʼ che ukʼamik ri wuj kʼo pa ri sótano».

Leo kubʼij ri xkibʼan pa ri ukabʼ qʼij: «Xqasuʼ ri tapya re ri nabʼe piso re ri ja. Kʼo ta jun ja wilom che sibʼalaj tzʼil. Are kʼu kinkikotik che xinbʼano, rumal che, are jun chak che ri qaTat».

 Xa kebʼ oxibʼ semanas qʼaxinaq, e jujun qachalal che xkiya ri kitobʼanik tajin chi kkibʼan imprimir The Watch Tower (pa español, La Torre del Vigía). Pa ri máquina che kʼo pa ri ukabʼ piso, xbʼan imprimir 60.000 copias re ri wuj 1 re febrero 1920. Y pa ri sótano ri e qachalal xkiya ri máquina rotativa che xkibʼij Acorazado che. Xuqujeʼ xkibʼan imprimir ri wuj The Golden Age, kimik are ri ¡Despertad! Ri nabʼe wuj che xkibʼan imprimir are ri ¡Despertad! 14 re abril 1920. Qas kqʼalajinik che Jehová xutewchiʼj ri chak xkibʼan ri upatanelabʼ.

Ri e sukʼ taq upatanelabʼ ri Jehová xkimaj chi jumul ri kichak y xkʼojiʼ utz kachilanik kukʼ ri e qachalal. Are kʼu jujun Tijoxelabʼ re Biblia xkiya kan ri utinamit ri Jehová pa taq ri junabʼ 1917 y 1919, are xux jun kʼaxalaj tiempo. ¿Jas xbʼan che kitoʼik?

Jun kʼutunem re ri The Watch Tower 1 re abril 1920 kubʼij «Chojkʼol pa jamaril», xuya wajun loqʼalaj sikʼinik riʼ: «Qas qetaʼm [...] che ri kʼo ri ruxlabʼixel ri qaTat pa kiwiʼ [...] qas kkaj kkisachisaj kan ri jastaq re ojer, [...] kekʼojiʼ pa junamil y kkibʼan ri e jastaq junam taneʼ che xa e jun winaq».

E kʼi utz xkita ri e tzij riʼ. Jun kʼulaj xkitzʼibʼaj: «Utz ta ri xqabʼano che más jun junabʼ xqaya kan upatanexik ri Jehová are chiʼ ri e nikʼaj chik tajin kkiya utzijoxik ri utzij ri Dios. [...] Kqaj taj che jumul chik kqaya kan ri Dios». Are chiʼ xetzalij chi lo jumul ri e patanelabʼ riʼ, sibʼalaj xechakunik.

Pa ri 21 re junio 1920, ri Tijoxelabʼ re ri Biblia xkimaj ujachik ri wuj «ZG», are jun utzalaj edición re ri wuj The Finished Mystery (El misterio terminado). * Pa 1918 are chiʼ xbʼixik che kuya taj kkoj ri wuj riʼ ri e qachalal ya kikʼolom chi kan kʼi che ri wuj.

 Xaq xiw ta xetobʼan ri precursores che ujachik ri wuj xaneʼ xuqujeʼ xesikʼix ri publicadores. Jun wuj xubʼij: «Pa ronojel ri congregaciones konojel ri e consagradas [o ri kibʼanom kiqasanjaʼ] kekunik ketobʼanik we kkaj. Are waʼ ri rajawaxik kkibʼan konojel: ‹Jun jastaq kinbʼano›: kinjach ri ZG». Edmund Hooper xubʼij che e kʼi chke are ri nabʼe mul che xeʼel che utzijoxik ri utzij ri Dios chuchiʼ taq ja. Y xubʼij: «Xqilo che ri utzijoxik ri utzij ri Dios ktzijox na pa kʼi taq lugares che qachomam taj».

Rumal ri Primera Guerra Mundial ri Tijoxelabʼ re ri Biblia re nikʼaj chi tinamit kekun ta chik kechʼaw kukʼ ri e nikʼaj chi qachalal re jun chi tinamit, rumal laʼ ri qachalal Rutherford xraj xuya kichuqʼabʼ y xubʼano che xmaj chi jumul ri utzijoxik utzij ri Dios pa ri e tinamit riʼ. Pa ri 12 re agosto 1920, areʼ y e kajibʼ chi qachalal xkimaj utzijoxik utzij ri Dios pa Gran Bretaña, Europa continental y Oriente Medio.

Ri Tijoxelabʼ re ri Biblia xkimaj ubʼanik oxibʼ nim riqbʼal ibʼ y 12 riqbʼal ibʼ pa Gran Bretaña. Weneʼ xeʼopan 50.000 winaq. Pa kebʼ oxibʼ tzij ri wuj xubʼij wariʼ: «Ri e qachalal xkiriq kichuqʼabʼ y xkinaʼ nim jororibʼal. Xkaj más xechakunik y xkʼiy ri kiloqʼoqʼebʼal. Y ri bʼis che e kʼi kkinaʼo xux kikotemal». Pa ri tinamit París, ri qachalal Rutherford xuya chi jumul ri chʼabʼal «Millones chke ri e kʼo kimik kekam taj». Sibʼalaj e kʼi winaq xeʼopanik. Are chiʼ xkʼis ri chʼabʼal 300 winaq xkaj xketaʼmaj más.

Pa ri nikʼaj chi semanas, e jujun qachalal xeʼopan pa Atenas, El Cairo y Jerusalén. Rech ketoʼ ri winaq che kkaj kketaʼmaj más chrij ri Dios pa ri lugares riʼ, ri qachalal Rutherford xukʼam bʼi kʼi wuj pa ri tinamit Ramala, naqaj che Jerusalén. Are chiʼ xtzalij lo pa Europa xubʼan ri Oficina de Europa Central, jachiʼ xuqujeʼ xebʼan wi imprimir ri e wuj.

Pa septiembre re 1920, xesax lo ri wuj número 27 re The Golden Age, nim ubʼanik rumal che xubʼan denuciar ri kʼax xbʼan chke ri Tijoxelabʼ re ri Biblia pa 1918. Ri Acorazado, che xojchʼaw chrij nabʼe, xchakun pa qʼij y chaqʼabʼ che ubʼanik imprimir más che cuatro millones re ri wuj número 27.

 Ri winaq xkisikʼij ri xukʼulmaj Emma Martin, jun colportora re San Bernardino (California, Estados Unidos). Pa ri 17 re marzo 1918, areʼ y e oxibʼ chi qachalal, Edward Hamm, Edward Sonnenburg y Ernest Stevens, xebʼe pa jun nitzʼ tijobʼal kech ri Tijoxelabʼ re ri Biblia.

Jun chke ri xopanik xa ta rumal che qas kraj kretaʼmaj chrij ri Biblia. Chiʼ xqʼax ri tiempo xubʼij: «Xinopanik rumal che xintaq bʼi kumal ri qʼatbʼal tzij rech kwil ri tajin kkibʼano». Y xuriq ri tajin kutzukuj: ri wuj ubʼiʼ El misterio terminado. Naj ta tiempo qʼaxinaq, xekʼam bʼi ri qachalal Martin y ri e oxibʼ qachalal. Xbʼixik che tajin ta kkinimaj ri Taqanik rumal che tajin kkijach wuj che yaʼom ta bʼe che kjachik.

Ri e kajibʼ xqʼat tzij pa kiwiʼ y xbʼix chke che oxibʼ junabʼ kekʼojiʼ pa cárcel. Pa 17 re mayo 1920 xkʼis ri kkikoj che utoʼik kibʼ rumal laʼ xkikoj ta chi kichuqʼabʼ rech keʼel loq. Are kʼu kʼo jun jastaq che xaq kʼateʼ xkʼulmatajik.

Pa jun nim riqbʼal ibʼ che xbʼan pa San Francisco pa ri 20 re junio 1920, ri qachalal Rutherford xchʼaw chrij ri ukʼulmam pa ri ukʼaslemal. Ri e kʼo pa ri nim riqbʼal ibʼ, sibʼalaj xpe koyowal rumal ri kʼax xbʼan chke ri e qachalal riʼ, rumal laʼ xkitaq bʼi jun telegrama che ri presidente re Estados Unidos. Kubʼij: «Kqachomaj che utz ta ri xbʼan [...] che ri chuchuʼ Martin [...] che xbʼixik che xunimaj ta ri taqanik. [...] Kqabʼan denunciar ri kʼax [...] che xkibʼan ri agentes federales rumal che utz ta xkibʼan che ukojik ri taqanik kʼo pa kiqʼabʼ [...] chiʼ xkibʼan jun trampa [...] che ri chuchuʼ Martin [...] tekʼuriʼ xkimol tzij chrij rech ktzʼapix pa cárcel».

Chukabʼ qʼij, ri qʼatal tzij Woodrow Wilson aninaq xeresaj bʼi pa ri cárcel ri qachalal Martin y ri e qachalal Hamm, Sonnenburg y Stevens. Jeriʼ xetzoqopix bʼik.

Chukʼisbʼalil ri junabʼ 1920, ri Tijoxelabʼ re ri Biblia kʼo kʼi rumal che xekikotik. Xkʼiyar ri chak che kbʼan pa ri oficinas centrales y ri qastzij cristianos sibʼalaj xkikoj kichuqʼabʼ che utzijoxik ri uQʼatbʼal tzij ri Dios che are ri kesan ri kʼax pa ri uwach Ulew (Mat. 24:14). Ri junabʼ 1921 kux na jun utzalaj junabʼ che ktzijox ri qastzij chrij ri uQʼatbʼal tzij ri Dios.