1. ¿Jas rajawaxik kqaya ta kan ubʼanik ri cristianos che qabʼanom chi qaqasanjaʼ?

WE QABʼANOM chi qaqasanjaʼ, kraj kubʼij che qakʼutum chi chkiwach konojel che kʼo qakojonik chrij ri Jehová y che qas kqaj kqapatanij kukʼ ri e kʼo pa ri utinamit. * Qastzij che rajawaxik kqaya ta kan ukowirisaxik ri qakojonik y kubʼsal qakʼuʼx che Jehová tajin kukoj ri utinamit kimik rech kbʼan ri urayibʼal.

2, 3. ¿Jas ubʼantajik ri Jehová kqʼalajinik are chiʼ kukʼam ubʼe ri utinamit?

² Ri kubʼan ri Jehová che ukʼamik ubʼe ri utinamit kimik kukʼut ri ubʼantajik, ri urayibʼal y ri e utaqomal. Chqilaʼ oxibʼ bʼantajik che kukʼut ri Jehová pa ri utinamit.

³ Nabʼe, «ri Dios man jalan ta keril wi taq ri winaq» (Hech. 10:34). Rumal ri uloqʼoqʼenik ri Jehová xuya ri uKʼojol rech kutoj ri qamak (Juan 3:16; 1 Tim. 2:6). Rech e kʼi winaq kkiriq utzilal rumal ri tojbʼal mak, Jehová kukoj ri upatanelabʼ rech kkitzijoj ri utzalaj taq tzij chke ri kkaj kkitatabʼej. Ukabʼ, Jehová are jun Dios re cholajil y re jamaril (1 Cor. 14:33, 40). Rumal laʼ kraj che ri utinamit kkipatanij rukʼ cholajil y rukʼ jamaril. Urox, Jehová are «ri awajtij» (Is. 30:20, 21). Rumal laʼ, ri utinamit, kukoj uchuqʼabʼ che utzijoxik ri uTzij pa ri congregación y chuchiʼ taq ja. ¿Jas xubʼan Jehová che ukʼutik ri oxibʼ bʼantajik riʼ pa ri congregación cristiana re ri nabʼe siglo? ¿Jas kubʼan ri utinamit  che ukʼutik kimik? ¿Y jas kubʼan ri ruxlabʼixel ri Jehová che qatoʼik kimik ri kojpatanin rukʼ ri utinamit?

4. Junam rukʼ ri kubʼij Hechos 1:8, ¿jas taqanik xuya kan ri Jesús chke ri utijoxelabʼ, y jas tobʼanik xutzujuj chke?

⁴ Pa ri nabʼe siglo. Ri xuya ubʼixik ri Jesús xuya keyebʼal ri e winaq (Luc. 4:43). Xubʼij chke ri utijoxelabʼ che kkitzijoj ri uTzij ri Dios che areʼ xumaj kan ubʼanik y kkiya ubʼixik kʼa «pa taq ri tinamit ri sibʼalaj naj e kʼo wi cho ronojel ri uwach Ulew» (chasikʼij uwach Hechos 1:8). Qastzij che kekun taj kkibʼan wajun chak riʼ xaq kitukel. Kajwataj ri utobʼanik «ri ruxlabʼal ri Dios» che xutzujuj kan ri Jesús chke (Juan 14:26; Zac. 4:6).

5, 6. ¿Jas xubʼan ri uxlabʼixel che kitoʼik ri utijoxelabʼ ri Jesús?

⁵ Pa ri Pentecostés re ri junabʼ 33 xyaʼ ri uxlabʼixel pa kiwiʼ ri utijoxelabʼ ri Jesús. Rukʼ ri utobʼanik ri uxlabʼixel, chanim xkimaj utzijoxik ri utzalaj taq tzij y xa pa jubʼiqʼ tiempo miles winaq utz xkita ri utzalaj taq tzij (Hech. 2:41; 4:4). Y, are chiʼ xpe ri kʼax, xkixibʼij ta kibʼ. Xaneʼ xkitaʼ utobʼanik ri Dios y xkibʼan kichʼawem che: «Yaʼ la chke ri e pataninel taq ech la chi kkikoj kichuqʼabʼ che ubʼixik ri tzij la, ma ta kkʼixeʼj kibʼ». Rumal laʼ, ri Dios xuya ri ruxlabʼixel pa kiwiʼ y e areʼ «xkikoj kʼu kichuqʼabʼ che utzijoxik ri utzij ri Dios» (Hech. 4:18-20, 29, 31).

⁶ Are kʼu ri tijoxelabʼ riʼ xuqujeʼ xkiriq chi nikʼaj kʼax. Jun kʼutbʼal, e kʼo ta kʼi wuj re ri uTzij ri Dios kukʼ y kʼo ta tobʼanik rech kkichʼobʼ ri kubʼij junam rukʼ ri kʼo kimik. Y kkitzijoj ri utzij ri Dios chke winaq che kechʼaw chi pa nikʼaj chʼabʼal. Paneʼ kʼo ri kʼax riʼ ri tijoxelabʼ xekunik xkitzijoj ri utzij ri Dios: are chiʼ qʼaxinaq chi jujun décadas, xbʼan kunik xtzijox ri utzalaj taq tzij «pa taq ronojel kʼolbʼal cho ri uwach Ulew» (Col. 1:6, 23).

7. ¿Jas xkibʼan ri cristianos re ri nabʼe siglo che retaʼmaxik ri kraj ri Jehová kkibʼano y jas xkichomaj chrij?

⁷ Kimik. Jehová tajin kukʼam ubʼe y tajin kuya uchuqʼabʼ ri utinamit. Wariʼ kriqitaj pa ri uTzij ri Dios. Chilaʼ kuya wi ubʼixik ri xubʼan ri Jesús che utzijoxik ri utzalaj taq tzij y ri taqanik che xuya kan chke ri utijoxelabʼ chrij wariʼ (Mat. 28:19, 20). Ri wuj re julio 1881, kubʼij: «Xojsikʼix taj y xojchaʼ taj rech kyaʼ nim qaqʼij o kqariq qʼinomal, xaneʼ rech kqakoj qachuqʼabʼ che utzijoxik ri utzalaj taq tzij». Ri wuj To Whom the Work Is Entrusted (Ri winaq che kekunik kkibʼan ri chak), xel lo pa 1919, xubʼij: «Kqʼalajin che sibʼalaj kʼax ubʼanik ri chak, are kʼu rech ri qaTat y, rukʼ ri utobʼanik kojkun che ubʼanik». Junam rukʼ ri cristianos re ri nabʼe siglo, ri e qachalal riʼ rukʼ kowil kʼuxaj xkibʼan ri chak, qastzij che rukʼ ri utobʼanik ri ruxlabʼixel ri Dios xkitzijoj ri utzalaj taq tzij chke konojel ri winaq. Oj xuqujeʼ qetaʼm che ri uxlabʼixel kojutoʼ.

8, 9. ¿Jas ukojom ri utinamit ri Jehová rech ktzijox ri utzalaj taq tzij?

⁸ Rech ktzijox ri utzalaj taq tzij, ri utinamit ri Jehová ukojom y tajin kukoj ri chakubʼal che kʼolik. Chke ri chakubʼal riʼ e kʼo ri e bʼanom rukʼ wuj, ri «Foto-Drama de la Creación», ri gramófonos, ri chʼichʼ rukʼ bocinas, ri programas pa ri radio y ri tecnología digital che kʼateʼ xel loq. Xuqujeʼ kʼo ta jun organización kjunamataj rukʼ ri utinamit ri Jehová che uqʼaxem wuj pa kʼi chʼabʼal. ¿Y jasche kubʼano? Rech konojel ri e winaq kkita ri utzalaj taq tzij  pa ri kichʼabʼal. Jehová nim keril konojel ri winaq rumal laʼ xubʼij che ri utzalaj taq tzij kyaʼ ubʼixik «chke konojel ri nimaʼq taq tinamit, xuqujeʼ konojel amaqʼ, konojel chʼabʼal, xuqujeʼ konojel winaq» (Apoc. 14:6, 7). Are kraj che konojel winaq kketaʼmaj chrij ri kubʼan na ri uQʼatbʼal tzij.

⁹ ¿Y jas kbʼan che utzijoxik ri utzij ri Dios chke ri winaq che kuya taj kojopan cho kachoch rumal che kʼo chajinel chuchiʼ o tzʼapital pa tapya? Rech ktzijox chke ri winaq riʼ, Jehová xutoʼ ri utinamit rech jalajoj kbʼan che utzijoxik ri uTzij. Jun kʼutbʼal, pa ri 2001 ri Jupuq Ajkʼamal bʼe cho ronojel uwach Ulew xuyaʼo che kkoj ri carritos y nikʼaj chi exhibidores pa Francia, y tekʼuriʼ xkoj chi pa nikʼaj lugares. Utz xelik ri xbʼanik. Pa ri 2011, xmaj ubʼanik wariʼ pa jun lugar re Nueva York (Estados Unidos) jachiʼ keqʼax wi e kʼi winaq. Pa ri nabʼe junabʼ che xbʼanik, xjach 102.129 libros y 68.911 revistas, y 4.701 xkitaʼ jun etaʼmanik re ri Biblia. Qas kqʼalajinik che ri ruxlabʼixel ri Dios tajin kuya ri utobʼanik che wajun chak riʼ. Rumal laʼ, ri Jupuq Ajkʼamal bʼe xuya bʼe che kkoj ri exhibidores pa ronojel ri uwach Ulew.

10. ¿Jas kqabʼano rech más utz kqabʼan che utzijoxik ri utzij ri Dios?

¹⁰ Ri kojkunik kqabʼano. Nim chqilaʼ wi ri tijonik kuya ri Jehová chqe pa ri riqbʼal ibʼ. Amaqʼel chojel rukʼ ri qagrupo che utzijoxik ri utzij ri Dios. We kʼo jun jastaq che rajawaxik kqasukʼumaj, ri e qachalal che e kʼo pa ri grupo kekunik kojkitoʼ y kkiya qachuqʼabʼ rukʼ ri kikʼutbʼal. Kqaya ta kan utzijoxik ri utzalaj taq tzij paneʼ kʼo kʼax. Junam che kubʼij ri texto re wajun kʼutunem riʼ, kojkunik kqabʼan ri urayibʼal ri Dios rukʼ ri utobʼanik ri uxlabʼixel, are ta rukʼ ri qachuqʼabʼ (Zac. 4:6). Rumal che wajun chak riʼ rech ri Dios.

11. ¿Jas xkibʼan ri jupuq ajkʼamal bʼe re ri nabʼe siglo rech xkʼojiʼ cholajil pa ri utinamit ri Dios?

¹¹ Pa ri nabʼe siglo. Ri jupuq ajkʼamal bʼe, reJerusalén ojer, xechakun pa junamil rech kʼo cholajil y jamaril pa ri utinamit  ri Dios (Hech. 2:42). Jun kʼutbʼal, pa taq ri junabʼ 49 xkʼulmataj jun jastaq rumal ri circuncisión, are kʼu ri jupuq ajkʼamal bʼe xkinikʼoj wariʼ rukʼ ri utobʼanik ri uxlabʼixel. We ta ri congregación xkitos kibʼ, xkʼulmataj ta kʼax riʼ che utzijoxik ri utzij ri Dios. Paneʼ ri apóstoles y ri e kʼamal bʼe e judíos, are ta xkibʼan ri kʼutum chkiwach o ri kinaqʼatisabʼal. Xaneʼ are xkitzukuj ri kubʼij ri Biblia y ri utobʼanik ri ruxlabʼal ri Dios (Hech. 15:1, 2, 5-20, 28). Ri xkʼulmatajik are che Jehová xutewchij ri xkichaʼ ubʼanik, rumal laʼ xkʼojiʼ jamaril y junamil pa ri congregación y xyaʼ ta kan utzijoxik ri utzij ri Dios (Hech. 15:30, 31; 16:4, 5).

12. ¿Jasche kqabʼij che pa ri utinamit ri Jehová kimik kʼo jamaril y cholajil?

¹² Kimik. Ri upatanelabʼ ri Jehová kikojom kichuqʼabʼ rech kʼo cholajil y jamaril pa ri utinamit ri Dios. Ri Atalaya pa inglés 15 re noviembre 1895, kuya ubʼixik jun kʼutunem che esam pa 1 Corintios 14:40 ubʼiʼ «Decentemente y con orden». Kubʼij: «Ri apóstoles xkiya kʼi pixabʼ che ri nabʼe Iglesia chrij ri cholajil [...]. Rajawaxik qas kojchoman chrij ri jastaq che xtzʼibʼax kan ojer rumal che kojutoʼ kimik» (Rom. 15:4). Ri cholajil y jamaril che xkikʼut ri cristianos re ri nabʼe siglo qas kqʼalajin kimik pa ri utinamit ri Jehová. Jun kʼutbʼal, we kojbʼe pa jun riqbʼal ibʼ pa jun chi congregación, o pa jun chi tinamit, qetaʼm riʼ ri kbʼan che unikʼoxik Ri Chajinel y ri kʼutunem che kilik. Kqanaʼ riʼ che oj kʼo pa ri qacongregación. Kriqitaj wajun junamil riʼ xaq xiw rumal ri utobʼanik ri ruxlabʼixel ri Dios (Sof. 3:9).

13. Junam rukʼ ri kubʼij Santiago 3:17, ¿jas preguntas rajawaxik kqabʼano?

¹³ Ri kojkunik kqabʼano. Jehová kraj che «rumal ri utobʼanik ri Uxlabʼaxel xuqujeʼ rumal ri jamaril ri kubʼan xa jun» chqe (Efes. 4:1-3). Rumal laʼ, chqachomaj wariʼ: «¿La kintobʼanik rech kʼo jamaril y junamil pa ri congregación? ¿La kinniman chke ri qachalal che kkikʼam bʼe pa ri congregación? ¿La kkikubʼsaj kikʼuʼx ri e nikʼaj chik chwij, más na we kʼo weqelen pa ri congregación? ¿La qas in puntual,  kinpatanin y qas kwaj kintobʼanik?» (chasikʼij uwach Santiago 3:17). We kqilo che rajawaxik kojchakun chrij ri bʼantajik riʼ, chqataʼ ri ruxlabʼixel ri Jehová. Are chiʼ kqayaʼo che ri uxlabʼixel kukʼex ri qabʼantajik y ri kqabʼano, ri e qachalal más kojkiloqʼoqʼej y nim kojkilo.

14. Junam rukʼ ri kubʼij Colosenses 1:9, 10, ¿jas xubʼan ri Jehová che kitoʼik ri upatanelabʼ re ri nabʼe siglo che retaʼmaxik «rukʼ tzʼaqatil» ri urayibʼal?

¹⁴ Pa ri nabʼe siglo. Ri Jehová sibʼalaj utz krilo kuya tijonik che ri utinamit (Sal. 32:8). Kraj che ri loqʼalaj taq ralkʼwal kketaʼmaj uwach, kkiloqʼoqʼej y kekʼasiʼ chbʼe qʼij saq. Kqariq wariʼ rumal ri tijonik che kuya chqe (Juan 17:3). Pa ri nabʼe siglo, xukoj ri congregación cristiana che uyaʼik tijonik che ri tinamit (chasikʼij uwach Colosenses 1:9, 10). Y kʼi chke ri tobʼanik che xuya chke rumal ri uxlabʼixel, ri kyaʼow «kuʼbʼisal kʼuxaj» che xutzujuj kan ri Jesús (Juan 14:16). Ri uxlabʼixel riʼ xeʼutoʼ ri tijoxelabʼ rech xkichʼobʼ ri uTzij ri Dios y xunaʼtasaj chke ri xubʼij y ri xubʼan ri Jesús, tekʼuriʼ xkitzʼibʼaj kan pa ri Evangelios. Ri etaʼmabʼal riʼ xuya uchuqʼabʼ ri kikojonik ri cristianos, junam rukʼ ri kiloqʼoqʼebʼal che ri Dios, che ri uKʼojol y chke ri e kachalal pa ri kikojonik.

15. ¿La awilom jas bʼanom che ubʼanik ri uprofecía ri Jehová che kʼo pa Isaías 2:2, 3?

¹⁵ Kimik. Jehová xubʼij che «pa ri kʼisbʼal taq qʼij junabʼ», ri e winaq re ronojel uwach Ulew kkaj che ri Jehová kuya tijonik chke (chasikʼij uwach Isaías 2:2, 3). Kimik kqilo che tajin kbʼan wajun profecía riʼ. Ri qastzij qʼijilanik más nim na ubʼanik chuwach ri qastzij taj. ¿La mat qastzij che Jehová uyaʼom kʼi jastaq chqe pa ri qakojonik? (Is. 25:6). Rumal ri «jikalaj pataninel, utz uchomanik», kuya ronojel ri kajwataj chqe, are kʼu jalajoj uwach, e  kʼutunem, chʼabʼal, dibujos animados y videos (Mat. 24:45). Ri qachomanik kjunamataj rukʼ ri Elihú, ri rachiʼl Job, che xubʼij wariʼ chrij ri Dios: «Man kʼo ta jun ajtij ri chuyaʼtaj chajunamataj ta rukʼ» (Job 36:22).

16. ¿Jas rajawaxik kqabʼano rech kojkʼiy pa ri qakojonik?

¹⁶ Ri kojkunik kqabʼano. Ri ruxlabʼixel ri Jehová kojutoʼ rech kqabʼan pa ri qakʼaslemal ri kqetaʼmaj y ri kqasikʼij pa ri uTzij. Chqataʼ che ri Jehová junam rukʼ ri salmista: «Ajawaxel, chkʼutuʼ la ri bʼe la chinuwach, rech kintaqej rukʼ kolomal. Chbʼanaʼ la chi ri wanimaʼ nim kril wi ri bʼiʼ la» (Sal. 86:11). Rumal laʼ, nim chqilaʼ wi ri kuya ri Jehová chqe pa ri uTzij y rumal ri utinamit. Xaq xiw ta kqanimarisaj ri qetaʼmabʼal, xaneʼ chqakʼoloʼ ri qastzij pa ri qanimaʼ y chakojoʼ pa ri qakʼaslemal. Ri ruxlabʼixel ri Jehová kojutoʼ che ubʼanik. Chqayaʼ kichuqʼabʼ ri e qachalal, rumal che e qafamilia espiritual (Heb. 10:24, 25). Chqataʼ ri ruxlabʼixel ri Dios rech kojkunik kqaya comentarios pa ri e riqbʼal ibʼ che qas kel pa qanimaʼ y rech utz kqabʼan che uyaʼik jun chʼabʼal. We kqabʼan ronojel wariʼ, kqakʼut chuwach ri Jehová y ri uKʼojol che keqaloqʼoqʼej ri e kʼo pa ri utinamit (Juan 21:15-17).

17. ¿Jas kqabʼan che ukʼutik che qas kqaj kqatoʼ ri utinamit ri Jehová rukʼ sukʼilal?

¹⁷ Xa pa jubʼiqʼ chi tiempo, ri tinamit che kkanaj kan cho ri uwach Ulew are ri kʼamom ubʼe rumal ri ruxlabʼal ri Dios. Rumal laʼ, chojchakun pa ri utinamit ri Dios rukʼ kikotemal. Are chiʼ kqatzijoj ri utzalaj taq tzij chke konojel ri winaq kqakʼut ri uloqʼoqʼebʼal ri Dios y che jalan ta keril ri winaq. Kqesaj uwach ri uloqʼoqʼebʼal ri Dios are chiʼ kqatzukuj ri jamaril y ri cholajil rech kʼo junamil pa ri congregación. Are chiʼ nim kqil ri kuya chqe pa ri qakojonik kqakʼutu che qas kqaj kqatatabʼej ri kubʼij ri nimalaj qajTij. Jeriʼ are chiʼ ksachisax uwach ri uqʼatbʼal tzij ri Satanás kqaxibʼij ta qibʼ. Xaneʼ, rukʼ kowil kʼuxaj kojkʼojiʼ chkixoʼl ri kkipatanij ri Jehová rukʼ sukʼilal pa ri utinamit.