1. ¿Jas kojutoʼ 2 Corintios 3:1-3 che ukʼutik chqawach che utoʼik jun winaq rech kubʼan uqasanjaʼ sibʼalaj nim ubʼanik? (Chawilaʼ ri wachbʼal re ri uwach ri wuj).

¿JAS kqanaʼo are chiʼ jun tijoxel re ri Biblia che kʼo pa ri uterritorio ri qacongregación kubʼan uqasanjaʼ? Qastzij riʼ che sibʼalaj kojkikotik (Mat. 28:19). We oj xqaya etaʼmanik re ri Biblia che más kojkikot riʼ (1 Tes. 2:19, 20). Ri tijoxelabʼ che kʼateʼ xkibʼan kiqasanjaʼ e junam rukʼ «wuj» che xaq xiw ta utz kchʼaw chrij ri xyaʼow etaʼmanik che xaneʼ xuqujeʼ chkij konojel ri e kʼo pa ri congregación (chasikʼij uwach 2 Corintios 3:1-3).

2. a) ¿Jas pregunta nim ubʼanik che rajawaxik kqabʼano y jasche? b) ¿Jas riʼ jun etaʼmanik re ri Biblia? (Chawilaʼ ri nota).

² Sibʼalaj kojkikotik che pa ri kajibʼ junabʼ kanoq ronojel ikʼ tajin kyaʼ etaʼmanik chrij ri Biblia chke 10.000.000 winaq * pa ronojel ri uwach Ulew. Y pa ri tiempo riʼ pa ronojel junabʼ kkibʼan kiqasanjaʼ más che 280.000 winaq. Junam che kqilo, e kʼo na kʼi millones tijoxelabʼ che kekunik kkibʼan kiqasanjaʼ. ¿Jas kqabʼan che kitoʼik? Jehová sibʼalaj kʼo upaciencia rumal laʼ uyaʼom na tiempo chke ri e winaq rech keʼux tijoxelabʼ re ri Cristo. Ri tiempo tajin kkʼisik, rumal laʼ rajawaxik kqakoj qachuqʼabʼ  che kitoʼik konojel rech aninaq kekʼiy pa ri kikojonik y kkibʼan kiqasanjaʼ (1 Cor. 7:29a; 1 Ped. 4:7).

3. ¿Jas chrij kchʼaw wi wajun kʼutunem riʼ?

³ Rumal che rajawaxik ketoʼ e kʼi winaq rech kkibʼan kiqasanjaʼ, ri Jupuq Ajkʼamal bʼe cho ronojel uwach Ulew xchʼaw kukʼ ri sucursales. Pa wajun kʼutunem riʼ y pa ri jun chik, kqil ri kqetaʼmaj chkij jujun solinelabʼ re circuito, misioneros y precursores che kʼo nim ketaʼmabʼal (Prov. 11:14; 15:22). * Ri kkiya ubʼixik kukʼut chkiwach ri ajtijabʼ y ri tijoxelabʼ ri rajawaxik kkibʼano rech utz kel ri kkibʼano. Wajun kʼutunem riʼ kukʼut jobʼ jastaq che rajawaxik kkibʼan ri tijoxelabʼ rech kkibʼan kiqasanjaʼ y ri kkibʼan ri ajtijabʼ che kitoʼik.

4. ¿Jas rajawaxik kqachʼobʼ chrij ri etaʼmanik che kyaʼ chuchiʼ ri ja?

⁴ E kʼi qachalal jeʼ kekʼojiʼ chuchiʼ ri rachoch ri winaq are chiʼ kkiya etaʼmanik. Paneʼ ubʼanik wariʼ utz rech ri winaq kretaʼmaj más are kʼu ri amaqʼel kkʼulmatajik are che xa jubʼiqʼ tiempo kyaʼ ri etaʼmanik y weneʼ ronojel ta ri semana kbʼanik. Y rech kretaʼmaj más ri winaq e jujun kkitaʼ ri unúmero re uteléfono rech kkichʼabʼej o kkitaq jun mensaje re jun chomanik re ri Biblia chke. * Wariʼ kubʼano che ri tijoxel kkʼiy ta chanim pa ri ukojonik. Xuqujeʼ we kuya ta nim utiempo y uchuqʼabʼ che ri etaʼmanik weneʼ kkun taj kujach ukʼaslemal y kubʼan uqasanjaʼ.

5. ¿Jas xukʼut ri Jesús pa Lucas 14:27-33 che kubʼano che kojkunik keqatoʼ ri tijoxelabʼ?

⁵ Jumul, Jesús xukoj kebʼ kʼutbʼal che kukʼut ri rajawaxik kubʼan jun rech kux utijoxel. Xchʼaw chrij jun winaq che kraj kuyak jun takʼatikalaj ja y jun qʼatal tzij che kchʼojin rukʼ jun qʼatal tzij chik. Ri kuyak ri takʼatikalaj ja xubʼij che nabʼe «ktʼuyiʼ na che rajilaxik joropaʼ ri kusach na» y ri qʼatal tzij nabʼe ktʼuyiʼ na rech krilo we ri rajchʼojabʼ kekunik kechʼakanik (chasikʼij uwach Lucas 14:27-33). Jesús retaʼm che ri winaq che kraj kux utijoxel rajawaxik kuchomaj na  rukʼ nojimal ri rajawaxik kubʼano. Rech ri winaq kkunik kubʼan ri xubʼij ri Jesús, rajawaxik kqaya uchuqʼabʼ rech ronojel taq semanas kutijoj ribʼ chrij ri Biblia. ¿Jas kqabʼan che utoʼik?

6. ¿Jas rajawaxik kqabʼano rech ri tijoxel kkʼiy pa ri ukojonik?

⁶ Ri nabʼe rajawaxik kbʼanik are uyaʼik más tiempo ri tijonik chuchiʼ ri ja. Jun kʼutbʼal, chiʼ kojopan rukʼ ri winaq xa ta jun versículo re ri Biblia kqanikʼoj rukʼ. Are chiʼ kkʼaman che ri winaq che kojtzijon más tiempo rukʼ, chqataʼ che we kʼo jun lugar jawiʼ kojtʼuyiʼ wi rech kqanikʼoj ri Biblia. Rukʼ ri kubʼij chqe kqilo we qas kraj kretaʼmaj chrij ri Biblia. Are chiʼ kqʼax ri tiempo kojkunik kqataʼ che we kraj che kqanikʼoj ri Biblia rukʼ kamul pa jun semana, rech aninaq kkʼiy pa ri ukojonik. Chqilaʼ chi jun jastaq che rajawaxik kubʼan ri tijoxel.

7. ¿Jas kubʼan ri ajtij rech kutijoj ribʼ che uyaʼik ri tijonik?

⁷ Rajawaxik che ri ajtij kutijoj ribʼ che uyaʼik ri etaʼmanik. Kojkunik kqamaj usikʼixik ri kʼutunem y kqatzukuj ri textos. Chqilaʼ jas qas chrij kchʼaw wi. Chojchoman chrij ri ubʼiʼ ri kʼutunem, ri subtítulos, ri preguntas, ri textos «chasikʼij uwach», ri e wachbʼal y ri video che kchʼaw chrij ri kʼutunem. Tekʼuriʼ chojchoman chrij ri kriqitaj wi ri tijoxel y ri kqabʼan che ukʼutik ri kʼutunem rech qas kuchʼobʼo y kukoj pa ri ukʼaslemal (Neh. 8:8; Prov. 15:28a).

8. Junam rukʼ ri xubʼij ri Pablo pa Colosenses 1:9, 10, ¿jas kqabʼano rech kqatoʼ ri tijoxel?

⁸ Are chiʼ kojchʼaw rukʼ ri Jehová chrij ri tijoxel y ri kajwataj che xuqujeʼ kʼo ubʼanik rukʼ utijoxik qibʼ. Chqabʼij che ri Jehová che kojutoʼ rech utz kqabʼan che ukojik ri Biblia rech kopan pa ranimaʼ ri winaq (chasikʼij uwach Colosenses 1:9, 10). Chojchoman chrij we kʼo jun jastaq che kʼax kubʼan che uchʼobʼik o ukojik. Ksach ta chqe che ri qameta are utoʼik rech kubʼan uqasanjaʼ.

9. ¿Jas kqabʼan che utoʼik ri tijoxel rech kutijoj ribʼ che ri kʼutunem?

⁹ Kqeyej che ri etaʼmanik che amaqʼel kqaya che ri tijoxel kutoʼ rech nim kril ri xubʼan ri Jehová y ri Jesús, y che kraj  kretaʼmaj más (Mat. 5:3, 6). Rech ri tijoxel qas kʼo kretaʼmaj, rajawaxik qas kchoman chrij ri tajin kretaʼmaj. Rech kubʼan wariʼ, chqabʼij che, che rajawaxik kutijoj ribʼ che ri e kʼutunem are chiʼ majaʼ kbʼan ri etaʼmanik y che rajawaxik kchoman chrij ri kubʼan che ukojik pa ri ukʼaslemal. Rech kqatoʼ utz che junam kqatijoj qibʼ che ri kʼutunem rech kqakʼut chuwach ri kbʼan che. * Chqakʼutuʼ chuwach ri kubʼan che uriqik ri respuesta re ri pregunta y rech ksach ta che chqabʼij che, che kujuchʼ jujun taq tzij. Tekʼuriʼ chqabʼij che, che are kubʼij ri kuchʼobʼ chrij. Rukʼ wariʼ kqilo we tajin kuchʼobʼ ri tajin kretaʼmaj. Chqilaʼ chi ri urox jastaq che rajawaxik kretaʼmaj ri tijoxel.

10. ¿Jasche rajawaxik che ri tijoxel kusikʼij ri Biblia ronojel taq qʼij y jas rajawaxik kubʼano rech kʼo kretaʼmaj chrij?

¹⁰ Xaq xiw ta rajawaxik che ri tijoxel kubʼan ri retaʼmanik chrij ri Biblia pa ronojel taq semanas, xaneʼ utz che kubʼan chi nikʼaj jastaq ronojel taq qʼij pa utukel. Rajawaxik kuta ri kubʼij ri Jehová y kchʼaw rukʼ. Kuta ri kubʼij ri Jehová are chiʼ kusikʼij ri Biblia ronojel taq qʼij (Jos. 1:8; Sal. 1:1-3). Chqakʼutuʼ ri kubʼan che ukojik ri programa re usikʼixik uwach ri Biblia che kʼo pa jw.org^® y che kkunik kubʼan imprimir. * Rech qas kʼo kretaʼmaj chrij ri kusikʼij pa ri Biblia, chqabʼij che, che kchoman chrij ri tajin kukʼut ri Jehová chuwach y ri kubʼan che ukojik pa ri ukʼaslemal (Hech. 17:11; Sant. 1:25).

11. ¿Jas ktoʼw jun tijoxel rech kretaʼmaj kubʼan uchʼawem y jasche rajawaxik amaqʼel kubʼano?

¹¹ Chqabʼij che ri tijoxel che kchʼaw rukʼ ri Jehová ronojel taq qʼij. Chqabʼanaʼ qachʼawem che ri Jehová rukʼ ronojel qanimaʼ are chiʼ kqamajij y chiʼ kkʼis ri etaʼmanik y chojchʼaw pa uwiʼ ri tijoxel. Jeriʼ kretaʼmaj kubʼan uchʼawem che ri Jehová rukʼ ronojel ranimaʼ y chiʼ kukʼiso kuqʼaxej pa ubʼiʼ ri Jesucristo (Mat. 6:9; Juan 15:16). We ri tijoxel ronojel taq qʼij kusikʼij uwach ri Biblia y kubʼan uchʼawem sibʼalaj kqebʼ  riʼ rukʼ (Sant. 4:8). We amaqʼel kubʼan wariʼ kʼo jun jastaq ktoʼwik rech kujach ri ukʼaslemal che ri Jehová y kubʼan uqasanjaʼ. Chqilaʼ jas riʼ.

12. ¿Jas kbʼan che utoʼik ri tijoxel rech kux rachiʼl ri Jehová?

¹² Rajawaxik che ri kretaʼmaj ri tijoxel pa ri etaʼmanik xaq xiw ta kok pa ri uchomanik xaneʼ kopan pa ranimaʼ. ¿Jasche? Rumal che ri animaʼ —che chupam kʼo ri qarayinik, ri kqanaʼo y ri kqachomaj— are ri kbʼanowik che kqabʼan ri e jastaq. Ri winaq qas xkichʼobʼ ri xukʼut ri Jesús rumal che utz xubʼan che ubʼixik. Are kʼu ri e winaq xkiterenej rumal che xopan pa kanimaʼ (Luc. 24:15, 27, 32). Rajawaxik che ri tijoxel kril ri Jehová junam rukʼ jun winaq che qas kʼolik, che kbʼan kunik kilik junam rukʼ jun Tat, Dios y Achiʼl (Sal. 25:4, 5). Are chiʼ kqaya ri etaʼmanik, chqakʼutuʼ ri utz taq ubʼantajik ri qaDios (Éx. 34:5, 6; 1 Ped. 5:6, 7). Apastaneʼ chrij ri tajin kojchʼaw wiʼ, chakʼutuʼ ri ubʼantajik ri Jehová chuwach. Chqatoʼ rech nim kril wi ri uloqʼoqʼenik, ri rutzilal y utoqʼobʼisal wachaj ri Jehová. Jesús xubʼij «ri nim na xuqujeʼ nabʼe chke ri taqomal» are «chaloqʼoqʼej ri awajaw aDios» (Mat. 22:37, 38). Chqakojoʼ qachuqʼabʼ rech knimar más ri uloqʼoqʼenik ri tijoxel che ri Dios.

13. Chabʼij rukʼ jun kʼutbʼal ri kqabʼan che utoʼik jun tijoxel rech kretaʼmaj ri utzalaj taq ubʼantajik ri Jehová.

¹³ Are chiʼ kojchʼaw rukʼ ri tijoxel chqabʼij che ri kqanaʼ che ri Jehová. Wariʼ weneʼ kutoʼ rech areʼ xuqujeʼ kkʼojiʼ rachilanik rukʼ ri Dios y kuloqʼoqʼej (Sal. 73:28). Jun kʼutbʼal, chqachomaj che tajin kqil jun wuj o jun texto che kopan pa qanimaʼ rumal che kchʼaw chrij ri uloqʼoqʼebʼal, unojibʼal, usukʼilal o ri uchuqʼabʼ ri Jehová. Rukʼ wariʼ, kojkunik kqabʼij che ri tijoxel che are jun chke ri rumal che kqaloqʼoqʼej ri qaTat kʼo pa ri kaj. Wachanim chqilaʼ ri uroʼ jastaq che rajawaxik kubʼan ri tijoxel rech kubʼan ri uqasanjaʼ.

14. Junam rukʼ ri Hebreos 10:24, 25, ¿jas ktoʼw ri tijoxel rech kkʼiy pa ri ukojonik?

¹⁴ Qonojel kqaj che ri tijoxelabʼ kkibʼan kiqasanjaʼ. Rech kekunik kkibʼano chqabʼij chke che utz keʼopan pa ri e  riqbʼal ibʼ. Ri ajtijabʼ che kʼo nim ketaʼmabʼal kkibʼij che ri tijoxelabʼ che keʼopan pa ri e riqbʼal ibʼ aninaq kekʼiy pa ri kikojonik (Sal. 111:1). E jujun kkibʼij chke ri winaq che tajin kkitoʼ che kketaʼmaj ta ronojel rukʼ ri etaʼmanik rumal laʼ rajawaxik kebʼe pa ri riqbʼal ibʼ. Chqasikʼij Hebreos 10:24, 25 rukʼ ri tijoxel y chqayaʼ ubʼixik che ri utzilal kuya ri e riqbʼal ibʼ (chasikʼij uwach). Xuqujeʼ chqakʼutuʼ ri video chuwach ¿Jas kbʼan pa jun Ja rech Ajawbʼal? * Chqatoʼ ri tijoxel rech kukoj umeta che kbʼe pa ri e riqbʼal ibʼ.

15. ¿Jas kqabʼano rech kqatoʼ jun tijoxel rech kbʼe pa ronojel ri e riqbʼal ibʼ?

¹⁵ ¿Jas rajawaxik kqabʼano we ri tijoxel majaʼ kbʼe pa jun riqbʼal ibʼ o xaq kuriqaʼ kbʼek? Rukʼ kikotemal chqabʼij che ri xqetaʼmaj pa jun riqbʼal ibʼ. Wariʼ más nim na ubʼanik chuwach ubʼixik che, che kbʼe pa ri e riqbʼal ibʼ. Chqayaʼ jun wuj che re Ri Chajinel o jun Wuj re chak che tajin kqil pa ri tiempo riʼ. Chqakʼutuʼ chuwach ri kqil pa ri jun chi semana y chqataʼ che jas ri más utz xrilo. Ri kril pa ri nabʼe riqbʼal ibʼ más nim na ubʼanik chuwach apachike jastaq che rilom o utoʼm pa jun chi kojonem (1 Cor. 14:24, 25). Kretaʼmaj kiwach winaq che e utz kʼutbʼal chuwach y che kekitoʼ rech kubʼan uqasanjaʼ.

16. a) ¿Jas kbʼan che utoʼik jun tijoxel rech kubʼan uqasanjaʼ? b) ¿Jas kqetaʼmaj pa ri jun chi kʼutunem?

¹⁶ Rukʼ kebʼ oxibʼ tzij, ¿jas kqabʼan che utoʼik jun tijoxel rech kubʼan uqasanjaʼ? Chqatoʼ rech nim kril ri tijonik, chqabʼij che, che rajawaxik ronojel taq semanas kubʼan ri etaʼmanik chrij ri Biblia y kutijoj ribʼ che ri kʼutunem. Chqakʼutuʼ chuwach che kchʼaw rukʼ ri Jehová ronojel taq qʼij rech kux rachiʼl. Y chqabʼij che, che rajawaxik kbʼe pa e riqbʼal ibʼ. (Chawilaʼ ri recuadro re ri uxaq 12 « Ri rajawaxik kubʼan ri tijoxel»). Pa ri jun chi kʼutunem kqil ri rajawaxik kkibʼan ri ajtijabʼ rech kkitoʼ ri tijoxelabʼ rech kkibʼan kiqasanjaʼ.