¿Jasche kojbʼe ta pa chʼoj junam rukʼ ri xkibʼan ri israelitas ojer?
PA RI Segunda Guerra Mundial, jun oficial nazi xubʼij wariʼ che jun jupuq testigos rech Jehová: «We kʼo jun chiwe kraj taj kbʼe pa chʼoj chkij ri e winaq re Francia xuqujeʼ Inglaterra, ¡iwonojel kixkamik!». Paneʼ naqaj apanoq e kʼo kʼi ajchʼojabʼ re ri SS kukʼam nimaʼq taq kamisabʼal, nijun chke ri qachalal xraj xchʼojinik. ¡Ko xetakʼiʼ pa ri kikojonik! Wariʼ are jun utz kʼutbʼal chqawach ri oj testigos rech Jehová: kqaj taj kojbʼe pa taq ri chʼoj. Kqaj taj kqanim qibʼ pa taq ri chʼoj che kkibʼan ri jalajoj taq tinamit paneʼ kbʼix chqe che kojkamisaxik.
Are kʼu, konojel ta ri winaq che kkibʼij che e cristianos je kkichomaj. E kʼi kkichomaj che ri cristianos kekunik y rajawaxik kkitoʼ ri kitinamit. Weneʼ kkibʼij: «Ri israelitas ojer kanoq are ri utinamit ri Dios y xebʼe pa chʼoj. Rumal laʼ, rajawaxik che ri cristianos kimik jewaʼ kkibʼano». ¿Jas kqabʼij we kʼo jun winaq jeriʼ kubʼij chqe? Kojkunik kqaqʼalajisaj chuwach che ri israelitas e junam ta rukʼ ri utinamit ri Dios kimik. Chqilampeʼ jobʼ jastaq kkʼutuwik che e junam taj.
1. OJER KANOQ KONOJEL RI UPATANELABʼ RI DIOS XAQ E JUN TINAMIT
Ojer, ri Jehová xuchaʼ jun jupuq winaq rech kux utinamit: ri tinamit re Israel. Xubʼij chke ri israelitas: «Kixok na che nutinamit ri nim uqʼij chkixoʼl konojel taq ri tinamit» (Éx. 19:5). Xuqujeʼ xuya jun ulew chke rech kekʼojiʼ chuwach. Rumal riʼ, are chiʼ xeʼutaqo rech kechʼojin kukʼ nikʼaj chi tinamit, xubʼij chke che kekikamisaj taj y kkibʼan ta kʼax chke nikʼaj chi upatanelabʼ. *
Kimik, ri upatanelabʼ ri Jehová e rech «ronojel kiwach taq tinamit, amaqʼ, winaqil [y] chʼabʼal» (Apoc. 7:9). We kebʼe pa chʼoj kkibʼan kʼax riʼ chke ri kachalal y kekikamisaj riʼ.
2. ARE RI JEHOVÁ XETAQOW RI ISRAELITAS CHE XECHOJINIK
Ojer, are ri Jehová xbʼinik jampaʼ y jasche kebʼe ri israelitas pa chʼoj. Jun kʼutbʼal, xubʼij chke che kekisachisaj kiwach ri cananeos, rumal che kkiqʼijilaj ri itzel taq uxlabʼal, kemakun kukʼ achijabʼ ixoqibʼ y kekiporoj akʼalabʼ. Ri Jehová xubʼij chke ri israelitas che kkisachisaj kiwach riʼ ri winaq rech kkibʼan ta ke ri kkibʼano (Lev. 18:24, 25). Are chiʼ e kʼo chi ri israelitas chuwach ri ulew che xtzujux chke, jujun taq mul ri Dios xuya bʼe chke rech kkitoʼ kibʼ chkiwach ri kikʼulel (2 Sam. 5:17-25). Are kʼu, kʼo ta jumul xuya bʼe chke che e areʼ kechowik jampaʼ kebʼe pa chʼoj. Kqabʼij wariʼ rumal che jujun taq mul xebʼe pa chʼoj che are ta ri Jehová xetaqow bʼik, rumal laʼ xkiriq nimaʼq taq kʼax (Núm. 14:41-45; 2 Crón. 35:20-24).
Kimik, ri Dios e utaqom ta ri e winaq rech kebʼe pa chʼoj. Ri e tinamit kechʼojin ta chrij jastaq che kraj ri Dios xaneʼ chrij ri kkaj e areʼ. Weneʼ kkibʼan wariʼ rumal che kkaj kkinimarisaj ri kitinamit, kkichʼak más pwaq, rumal ri política o rumal che junam ta ri kkichomaj kukʼ ri nikʼaj chik. ¿E kʼu ri e winaq che kkibʼij che kechʼojin pa ubʼiʼ ri Dios rech kkitoʼ uwiʼ ri kikojonik o kkisachisaj kiwach ri ukʼulel ri Dios? Xuqujeʼ are ta ri Dios e taqowinaq. Ri Jehová kubʼij che keʼutoʼ na ri qastzij upatanelabʼ y kusachisaj na kiwach ri e ukʼulel pa jun chʼoj che kbʼan na pa ri petinaq: ri chʼoj re Armagedón (Apoc. 16:14, 16). Pa riʼ ri chʼoj xaq xiw kechʼojin na ri rajchʼojabʼ Dios che e kʼo pa ri kaj, are ta ri utinamit che e kʼo waral pa ri uwach Ulew (Apoc. 19:11-15).
3. RI ISRAELITAS XEKIKʼASBʼA KAN RI WINAQ CHE XEKOJON CHIRIJ RI JEHOVÁ
¿La kchʼojin ri Dios pa uwiʼ jun tinamit kimik junam rukʼ ri xubʼan pa uwiʼ ri tinamit Israel pa Jericó?
Ojer, ri ajchʼojabʼ israelitas kʼi mul xkitoqʼobʼisaj kiwach ri xekojon chrij ri Dios y xaq xiw xekikamisaj ri xubʼij ri Jehová che rajawaxik kekamisaxik. Chqilampeʼ kebʼ kʼutbʼal. Paneʼ ri Jehová xtaqanik che ksach uwach ri tinamit Jericó, ri israelitas xkikamisaj ta ri Rahab y ri ufamilia rumal che ri areʼ xkojon chrij ri Jehová (Jos. 2:9-16; 6:16, 17). Y are chiʼ xqʼax ri tiempo, xekikamisaj ta ri winaq re ri tinamit Gabaón rumal che xkikʼutu che nim kkil ri Dios (Jos. 9:3-9, 17-19).
Kimik, ri ajchʼojabʼ kekikamisaj winaq che kekojon chrij ri Dios, y jujun taq mul kekikamisaj ri kechʼojin taj.
4. RI ISRAELITAS XKINIMAJ RI UTAQANIK RI DIOS CHRIJ RI CHʼOJ
Ojer, ri Jehová xuya pixabʼ chke ri ajchʼojabʼ israelitas are chiʼ majaʼ kebʼe pa ri chʼoj. Jun kʼutbʼal, xubʼij chke: «Are taq kixnaqajin che uchʼakik jun tinamit, nabʼe kibʼij na che chi kiwaj jamaril» (Deut. 20:10). Ri Jehová xubʼij chke ri ajchʼojabʼ che rajawaxik e chʼajchʼoj pa ri kikʼaslemal, kkibʼan ta tzʼil taq mak y chʼajchʼoj ri lugar kekʼojiʼ wi (Deut. 23:9-14). Xuqujeʼ, ri Jehová xubʼij chke ri israelitas che kekibʼan ta violar ri ixoqibʼ rech taq ri tinamit che kekichʼako, rumal che ri itzel jastaq riʼ are ri qas kkibʼan ri ajchʼojabʼ re jun chi tinamit. Y we jun ajchʼoj israelita kraj kkʼuliʼ rukʼ jun ixoq che xkʼam lo pa jun tinamit che xchʼakik, rajawaxik kreyeʼj na jun ikʼ (Deut. 21:10-13).
Kimik, e kʼi chke ri e tinamit kibʼanom firmar acuerdos re taq ri chʼoj che kbʼanik, jeriʼ kbʼan ta kʼax chke ri winaq che kʼo ta kimak. Paneʼ ri acuerdos riʼ kebʼanik rumal che rajawaxik kechajix ri winaq che ajchʼojabʼ taj, are kʼu sibʼalaj bʼisobʼal rumal che kenimax ta ri taqanik riʼ.
5. ARE RI DIOS XCHʼOJIN PA UWIʼ RI UTINAMIT
Are chiʼ xechʼojin ri israelitas rukʼ ri tinamit Jericó, rumal ri ukojonik ri Rahab xkʼasbʼax kanoq xuqujeʼ ri ufamilia. ¿La je kkʼulmataj pa taq ri chʼoj kimik?
Ojer, are ri Jehová xchʼojin pa kiwiʼ ri israelitas, y kʼi mul xubʼan milagros rech xechʼakanik. Jun kʼutbʼal, xeʼutoʼ rech xkichʼak ri tinamit Jericó. Rumal che xkinimaj ri utaqanik ri Jehová ri israelitas xaq xiw «xkichaplej uraqik kichiʼ», y «xtzaq kʼut ri utapya ri tinamit». Jewaʼ riʼ xkichʼak ri tinamit (Jos. 6:20). Y are chiʼ xqʼax ri tiempo xekunik xekichʼak ri amorreos. ¿Jas xkibʼan che kichʼakik? Ri Jehová «xeʼutzoqopij uloq nimaʼq taq abʼaj re saqbʼach pa kiwiʼ e kʼi kʼu na ri amorreos ri xekikamisaj chuwach ri kichʼichʼ re chʼoj ri israelitas» (Jos. 10:6-11).
Kimik, ri Jehová kchʼojin ta chi pa uwiʼ nijun tinamit re ri uwach Ulew. Ri uQʼatbʼal tzij che kʼo pa uqʼabʼ ri Jesucristo, ri Qʼatal tzij, «man aj uwach ulew taj» (Juan 18:36). Are kʼu, ri Satanás are ri tajin kuqʼat tzij pa kiwiʼ konojel ri e qʼatal taq tzij re ri uwach Ulew. Ri e chʼoj e bʼanom pa ri uwach Ulew are jun kʼutbʼal re ri itzelalaj ubʼantajik (Luc. 4:5, 6; 1 Juan 5:19).
RI OJ QASTZIJ CRISTIANOS KQATZUKUJ RI JAMARIL
Junam rukʼ ri qilom, ri jastaq re ri qaqʼij junam ta rukʼ ri xkʼulmataj kukʼ ri israelitas ojer. Are kʼu, xaq xiw ta laʼ ri rumal che kojbʼe ta pa ri chʼoj; kʼo nikʼaj chik. Jun kʼutbʼal, ri Biblia ubʼim loq che pa ri kʼisbʼal taq qʼij ri kkiya kibʼ ketijox rumal ri Dios, «mawi k[e]tijox ta chi che ubʼanik chʼoj», y wariʼ kubʼano che kebʼe ta pa chʼoj (Is. 2:2-4). Xuqujeʼ, ri Cristo xubʼij kan wariʼ chke ri utijoxelabʼ: «Man ix ta kʼu aj uwach Ulew». Rumal laʼ kkinim ta kibʼ pa taq ri chʼoj re wajun uwach Ulew (Juan 15:19).
Ri Cristo xukʼut kan chkiwach ri utijoxelabʼ che xaq xiw ta rajawaxik kkinim ta kibʼ pa chʼoj, xaneʼ rajawaxik kkesaj ri oyowal y ri itzelal pa kanimaʼ (Mat. 5:21, 22). Xuqujeʼ xukʼut kan chkiwach che kkitzukuj ri jamaril y kekiloqʼoqʼej ri kikʼulel (Mat. 5:9, 44).
¿Jas kkʼut wariʼ chqawach oj? Kqaj taj kojbʼe pa chʼoj. Are kʼu, ¿la kʼo jun jastaq pa qanimaʼ che kutas kiwach ri e qachalal o kuyak chʼoj pa ri congregación? We kqanaʼo che kʼolik, chqakojoʼ qachuqʼabʼ rech kqesaj bʼi pa qanimaʼ (Sant. 4:1, 11).
Ri oj cristianos kqakoj qachuqʼabʼ rech kʼo loqʼoqʼebʼal y jamaril chqaxoʼl qonojel, y kqanim ta qibʼ pa chʼoj (Juan 13:34, 35). Amaqʼel kojux sukʼ chuwach ri Jehová rech kqeyej ri qʼij che kukʼis tzij pa uwiʼ ronojel uwach chʼoj (Sal. 46:9).
^ Qastzij che kʼo jujun mul xkʼojiʼ chʼoj chkixoʼl ri tribus re Israel, are kʼu ri Jehová utz ta xrilo (1 Rey. 12:24). Tekʼuriʼ, jujun taq mul ri chʼoj che xkʼulmataj chkixoʼl are rumal jujun taq tribus xeniman ta che ri Jehová o xa xkibʼan nimaʼq taq makaj (Juec. 20:3-35; 2 Crón. 13:3-18; 25:14-22; 28:1-8).
