1. ¿Jas kraj kubʼij ri e tzij «kajwataj ri Dios» chqe, y jas ubʼanik rukʼ ri qakikotemal?

 RI QASTZIJ kikotemal xa ta jun tiempo kqanaʼo, xaneʼ kqanaʼ pa ronojel ri qakʼaslemal. Are chiʼ ri Jesús xuya jun chʼabʼal pa jun juyubʼ, xukʼutu jas kbʼan che uriqik. Xubʼij: «Utz ke ri kkichʼobʼo chi kajwataj ri Dios chke» (Mat. 5:3). Ri areʼ retaʼm che ri Dios xojubʼano rech kqaj kqetaʼmaj uwach y kqaqʼijilaj. Chrij wariʼ kchʼaw wi ri Biblia are chiʼ kubʼij chi «kajwataj ri Dios» chqe. Y rumal che ri Jehová are jun Dios kkikotik, ri kojpatanin che xuqujeʼ kojkunik kojkikotik (1 Tim. 1:11).

2, 3. a) ¿E jachin xuqujeʼ xubʼij ri Jesús che kekunik kekikotik? b) ¿Jas kqanikʼoj na pa wajun kʼutunem, y jasche rajawaxik kojchʼaw chrij wariʼ?

² ¿La kʼateʼ kojkikotik are chiʼ utz kojriqitaj wi? Kʼateʼ taj. Are chiʼ ri Jesús xuya ri chʼabʼal pa ri juyubʼ, xuya ubʼixik jun jastaq nim ubʼanik. Xubʼij che «ri keʼoqʼik» o ri kebʼisonik kekunik kekikotik, paneʼ kebʼison rumal ri mak che kibʼanom o rumal ri kʼax che kkiriq pa ri kikʼaslemal. Y xubʼij che ri kbʼan kʼax chke «rumal ubʼanik ri utaqanik ri Dios» xuqujeʼ kekunik kekikotik (Mat. 5:4, 10, 11). Are kʼu ¿jasche kkunik kkikot jun winaq we tajin kuriq kʼax?

³ Ri Jesús xubʼij che kqariq ta ri kikotemal xa rumal we utz ri kojriqitaj wi, xaneʼ are rumal che we kqilij ri kajwataj chqe pa ri qakojonik y kojqebʼ rukʼ ri Dios (Sant. 4:8). ¿Jas kqabʼan che ubʼanik wariʼ? Pa wajun kʼutunem riʼ kqanikʼoj  na oxibʼ jastaq nim kibʼanik che kojkitoʼ rech kqariq ri qastzij kikotemal.

4. Junam rukʼ ri kubʼij Salmo 1:1-3, ¿jas ri nabʼe jastaq rajawaxik kqabʼano rech qas kojkikotik?

⁴ NABʼE JASTAQ: Rech qas kojkikotik rajawaxik kqatzuq qibʼ pa ri qakojonik. Rech ri winaq y ri e chikop kekam taj rajawaxik kkitzuq kibʼ. Are kʼu xaq xiw ri oj winaq kojkunik kqatzuq qibʼ pa ri qakojonik, rumal che kajwataj chqe. Rumal laʼ, ri Jesús xubʼij: «Man xuwi ta rumal ri wa kkʼasiʼ ri winaq, xaneʼ rumal ronojel tzij ri keʼel uloq chuchiʼ ri Dios» (Mat. 4:4). Rumal laʼ, ronojel qʼij chqasikʼij ri uTzij ri Dios, ri Biblia. Ri salmista xubʼij: «Utz rech ri winaq ri […] kuloqʼoqʼej ri upixabʼ ri Ajawaxel; are kʼu kchoman che chi pa qʼij chi chaqʼabʼ» (chasikʼij uwach Salmo 1:1-3).

5, 6. a) ¿Jas kqetaʼmaj pa ri Biblia? b) ¿Jas kojutoʼ wi usikʼixik ri Biblia?

⁵ Rumal che ri Jehová kojraj, kubʼij chqe pa ri Biblia jas rajawaxik kqabʼano rech kqariq ri qastzij kikotemal. Jun kʼutbʼal, kukʼut chqawach jasche xuya ri qakʼaslemal, jas kqabʼano rech kojux rachiʼl y jas kqabʼano rech kusach ri qamak. Xuqujeʼ kuya ubʼixik chqe ri utzalaj kʼaslemal che kuya na chqe (Jer. 29:11). Are chiʼ kqetaʼmaj wariʼ pa ri Biblia kukikotisaj ri qanimaʼ.

⁶ Ri Biblia xuqujeʼ kuya pixabʼ chqe che kojutoʼ pa ri qakʼaslemal, y kojkikotik are chiʼ kqanimaj. Rumal laʼ, we sibʼalaj kojbʼison rumal ri kʼax che kqariqo, chqasikʼij ri uTzij ri Jehová y chojchoman chrij.  Ri Jesús xubʼij: «Are kikotemal chke ri kkitatabʼej ri utzij ri Dios, kkinimaj kʼut» (Luc. 11:28).

7. ¿Jas kqabʼano rech utz kqabʼan che ukojik ri tiempo are chiʼ kqasikʼij uwach ri uTzij ri Dios?

⁷ Are chiʼ kqasikʼij ri uTzij ri Dios, chqatasaʼ qatiempo rech «utz kqanaʼ» usikʼixik uwach. ¿Jas kqabʼan che ubʼanik? Chqilampeʼ jun kʼutbʼal. Chqachomajampeʼ che xbʼan jun qarikil che are ri más utz kqanaʼo. Are kʼu rumal che aninaq qij o kʼo kʼi kqachomaj xaq kqabʼiqʼilaʼ bʼi ri qawa y kqanaʼ ta ri ukiʼal. Are chiʼ kqakʼiso, kqilo che aninaq xojwaʼik, tekʼuriʼ kqachomaj che nojim taneʼ xqatijo rech qas kqanaʼ ri ukiʼal. Xaq junam, we aninaq kqasikʼij ri uTzij ri Dios kojkun ta riʼ kqariq ri utzilal kuya chqe. Rumal laʼ, chqayaʼ qatiempo rech kojchoman chrij ri tajin kqasikʼij, chojchoman chrij ri tajin kkʼulmatajik, ri tajin kechʼawik y nikʼaj chi jastaq. Más kojkikot riʼ we kqabʼan ronojel wariʼ.

8. ¿Jas tajin kubʼan «ri jikalaj pataninel, utz uchomanik» che ubʼanik ri chak che taqom che ubʼanik? (Xuqujeʼ chawilaʼ ri nota).

⁸ Ri Jesús uyaʼom ri chak pa uqʼabʼ «ri jikalaj pataninel, utz uchomanik» rech kojutzuq pa ri qakojonik pa ri qʼij che qas kajwatajik, y qas oj tzuqum rumal (Mat. 24:45). * Ri kunel más nim ubʼanik re ri tzuqbʼal qe che kuya ri jikalaj pataninel are ri uTzij ri Dios (1 Tes. 2:13). Ri tzuqbʼal qe kuyaʼo kojutoʼ rech kqetaʼmaj ri kuchomaj ri Jehová che kʼo pa ri Biblia. Rumal laʼ, kqasikʼij uwach ri e wuj Ri Chajinel y ¡Despertad!, y ri e kʼutunem che e kʼo pa jw.org. Xuqujeʼ kqatijoj qibʼ che ri kʼutunem che keʼil pa ri e riqbʼal ibʼ che kbʼan chuxoʼl semana y ri kbʼan pa ri fin de semana, y kqil ri programas che kel lo ronojel taq ikʼ re JW Broadcasting^® we kʼo pa ri qachʼabʼal. We utz kqabʼan che ukojik ronojel wariʼ, kojutoʼ rech kojkunik kqabʼan ri ukabʼ jastaq che kuya qastzij kikotemal chqe.

9. ¿Jas ri ukabʼ jastaq che rajawaxik kqabʼano rech qas kojkikotik?

⁹ UKABʼ JASTAQ: Rech qas kojkikotik rajawaxik kqanimaj ri e utaqanik ri Jehová. Ri xtzʼibʼan re jun salmo xubʼij: «Utz awech at, ri nim kawil wi ri Ajawaxel, xuqujeʼ katniman che» (Sal. 128:1). Nim kqil wi ri Jehová are chiʼ kqabʼan ta jun jastaq che kuya bʼis che (Prov. 16:6). Rumal laʼ, kqakoj qachuqʼabʼ che unimaxik ri utaqanik chrij ri utz o ri utz taj, y wariʼ kriqitaj pa ri Biblia (2 Cor. 7:1). We kqabʼan ri jastaq che utz kril ri Jehová y kqaxutuj ri utz ta krilo, sibʼalaj kojkikotik (Sal. 37:27; 97:10; Rom. 12:9).

10. Junam rukʼ ri kubʼij Romanos 12:2, we qetaʼm jas ktaqan wi ri Dios, ¿jas rajawaxik kqabʼano?

¹⁰ (Chasikʼij uwach Romanos 12:2). Weneʼ jun winaq retaʼm che ri Jehová kʼo taqanik pa uqʼabʼ che ubʼixik jas ri utz y ri utz taj, are kʼu rajawaxik che xuqujeʼ kunimaj. Chojchoman chrij jun kʼutbʼal. Jun winaq retaʼm che ri qʼatbʼal tzij yaʼtal che kubʼij che utz taj aninaq kbʼinisax ri chʼichʼ pa taq ri bʼe, are kʼu weneʼ kraj taj kunimaj ri taqanik. Rumal laʼ, sibʼalaj kujumumej ri uchʼichʼ. Junam rukʼ, we oj kqachʼobʼo che más utz unimaxik ri e utaqanik ri Jehová, kqakʼut riʼ rukʼ ri kqabʼan pa ri qakʼaslemal (Prov. 12:28). Ri David qas xuchʼobʼo che nim ubʼanik knimax  ri utaqanik ri Jehová, rumal laʼ xubʼij: «Kkʼut la ri bʼe re kʼaslemal chnuwach. Kʼo nimalaj kikotemal ukʼ la; kʼo junalik utzil chnaqaj la» (Sal. 16:11).

11, 12. a) ¿Jas chuwach rajawaxik kqachajij wi qibʼ are chiʼ kʼo tajin kqachomaj o kojbʼisonik? b) ¿Jas kojutoʼ wi ri e tzij che kʼo pa Filipenses 4:8 are chiʼ kqachaʼ ubʼanik jun etzʼanem?

¹¹ Are chiʼ kʼo kqachomaj o kojbʼisonik, weneʼ kojchoman chrij jun jastaq che kojutoʼo rech ksach pa qajolom ri bʼis, y utz ri kqabʼano. Are kʼu rajawaxik kqachajij qibʼ rech kqabʼan ta jun jastaq che itzel kril ri Jehová (Efes. 5:10-12, 15-17).

¹² Pa ri carta che xutaq bʼi ri apóstol Pablo chke ri cristianos re Filipos, xubʼij bʼi chke che amaqʼel kechoman chrij jastaq e sukʼ, e chʼajchʼoj, ri yaʼtal kiloqʼoqʼexik y ri e utz kitzijol (chasikʼij uwach Filipenses 4:8). Paneʼ chrij ta etzʼanem xchʼaw wi, rajawaxik riʼ che ri utzij kukʼam qabʼe are chiʼ kqachaʼ ubʼanik jun etzʼanem. Utz riʼ we kqabʼan wariʼ: pa ri tzij «jastaq» che kriqitaj pa ri versículo, chqakojoʼ bʼi ri e tzij «e bʼix», «películas», «e wuj» o «videojuegos». Wariʼ kojutoʼ rech kqetaʼmaj jas ri utz y ri utz ta kril ri Dios. Rumal che kqaj kqanimaj ronojel ri utaqanik ri Jehová (Sal. 119:1-3). Jeriʼ rukʼ jun chʼajchʼoj retaʼmabʼal qakʼuʼx kqabʼan ri jun chi jastaq che kuya ri qastzij kikotemal chqe (Hech. 23:1).

13. Junam rukʼ ri kubʼij Juan 4:23, 24, ¿jas ri urox jastaq che rajawaxik kqabʼano rech qas kojkikotik?

¹³ UROX JASTAQ: Rajawaxik qas kqilo che ri uqʼijilaxik ri Jehová are ri kʼo pa nabʼe lugar pa ri qakʼaslemal. Rumal che are ri Jehová ri Bʼanol qe, taqal che kqaqʼijilaj (Apoc. 4:11; 14:6, 7). Rumal laʼ, ri más nim ubʼanik pa ri qakʼaslemal are che kqaqʼijilaj junam rukʼ ri kraj areʼ, «pa uxlabʼal xuqujeʼ pa qastzij» (chasikʼij uwach Juan 4:23, 24). Kqaj che kojutoʼ ri ruxlabʼixel ri Dios pa ri qaqʼijilanik rech kqabʼan ri e jastaq che e kʼo pa ri Biblia. Rajawaxik che ri más nim ubʼanik pa ri qakʼaslemal are ri uqʼijilaxik areʼ, paneʼ qʼatem uwach ri qaqʼijilanik pa ri tinamit oj kʼo wi. Kimik, más che e 100 qachalal achijabʼ ixoqibʼ e tzʼapim pa cárcel xa rumal che e testigos rech Jehová. * Paneʼ jeriʼ kiriqom, kekikotik rumal che kkikoj kichuqʼabʼ che ubʼanik kichʼawem, kkinikʼoj uwach ri Biblia y kechʼaw chrij ri Dios y ri uQʼatbʼal tzij. Paneʼ ktzeʼx qawach o kbʼan kʼax chqe, sibʼalaj kojkikotik rumal che qetaʼm che ri Jehová kʼo qukʼ y kojutewchij na (Sant. 1:12; 1 Ped. 4:14).

14. ¿Jas xukʼulmaj jun qachalal ala re Tayikistán, y jasche?

¹⁴ Kʼo kʼutbʼal kech qachalal pa taq ri qaqʼij che kukʼutu che ri oxibʼ jastaq che qanikʼom chik kuya kikotemal chqe apastaneʼ ri kojriqitaj wi. Chqilampeʼ ri xukʼulmaj jun qachalal ala Yovidón Boboyónov ubʼiʼ, che kel Tayikistán y che kʼo 19 ujunabʼ. Rumal che xraj taj xbʼe pa ri ejército, pa ri 4 re octubre 2019 xelesax lo pa ri rachoch y xkʼam bʼik. Kʼi ikʼ xtzʼapixik y xbʼan kʼax che junam rukʼ ri kbʼan che jun elaqʼom. Ri e yaʼol taq noticias re jalajoj taq tinamit xkiqʼalajisaj ri xbʼan che. Xbʼixik che sibʼalaj xchʼayayexik rumal che kraj taj kuya utzij che utoʼik uwiʼ ri utinamit y kraj taj  kukoj ri atzʼyaq re ri ejército. Are chiʼ xqʼax ri tiempo xqʼat tzij pa uwiʼ y xtaq bʼi pa jun lugar jawiʼ kbʼan wi kʼaxalaj chak. Y chukʼisbʼal, ri presidente re ri tinamit xubʼij che kelesax bʼi pa cárcel. Pa ronojel ri tiempo che xbʼan kʼax che ri qachalal Yovidón xuya ta kan upatanexik ri Jehová y amaqʼel xkikotik. ¿Jasche xkikotik? Rumal che amaqʼel xrilij ri kajwataj che pa ri ukojonik.

15. ¿Jas xubʼan ri qachalal Yovidón che utzuqik ribʼ pa ri ukojonik are chiʼ xkʼojiʼ pa cárcel?

¹⁵ Are chiʼ ri qachalal Yovidón kʼo pa cárcel amaqʼel xutzuq ribʼ pa ri ukojonik paneʼ kʼo ta ri Biblia rukʼ y nijun chke ri e qawuj. Are kʼu ¿jas xubʼano? Are chiʼ ri e qachalal keʼopan che uyaʼik uwa kkitzʼibʼaj bʼi ri texto re ri qʼij pa ri bolsas. Rumal laʼ kkunik kusikʼij ri Biblia ronojel taq qʼij y kchoman chrij. Are chiʼ xel lo pa cárcel xuya wajun pixabʼ chke ri kʼa majaʼ keqʼax pa jun kʼax: «Kimik che ix tzʼapim ta pa cárcel, utz chibʼanaʼ che ukojik ri itiempo rech kixqebʼ más rukʼ ri Jehová. Chisikʼij uwach ri Biblia y ri e qawuj».

16. ¿Jas chrij xchoman wi ri qachalal Yovidón?

¹⁶ Ri qachalal Yovidón xeʼunimaj ri utaqanik  ri Jehová. Rech are ta xubʼan ri itzel taq urayibʼal y ri jastaq che utz taj, más xchoman chrij ri kuchomaj ri Jehová y ri más nim ubʼanik chuwach. Xukoj utiempo che uchomaxik rij ri jastaq ubʼanom ri Dios. Ronojel aqʼabʼil kutatabʼej ri alaj taq chikop kebʼixonik y chaqʼabʼ kril ri Ikʼ y ri e chʼumil. Xubʼij: «Waʼ taq jastaq che usipam ri Jehová kubʼano che kintzeʼnik y kkiya utzil chwe». Are chiʼ nim kqil ri jastaq re ri qakojonik y ri jastaq che ubʼanom ri Jehová, kuya kikotemal chqe y kuya qachuqʼabʼ rech kqachʼij ri kʼax.

17. ¿Jas tobʼanik kuya 1 Pedro 1:6, 7 che jun winaq che tajin kukʼulmaj ri xukʼulmaj ri qachalal Yovidón?

¹⁷ Ri qachalal Yovidón xuqujeʼ are xuya pa nabʼe lugar ri uqʼijilaxik ri Jehová. Xuchʼobʼo che nim ubʼanik kubʼan ri kqaj chuwach ri Dios. Wariʼ kjunamataj rukʼ ri xubʼij ri Jesús: «Are kaqʼijilaj na ri Ajawaxel aDios. Xuwi kapatanij ri areʼ» (Luc. 4:8). Konojel ri ajchʼojabʼ xkaj taneʼ che ri qachalal Yovidón kuya kan ri ukojonik. Are kʼu ri areʼ chi pa qʼij chi chaqʼabʼ xubʼan uchʼawem che ri Jehová y xutaʼ che che kuya uchuqʼabʼ rech kuchʼij ri kʼax y kuya ta kan upatanixik. Paneʼ kʼo ta rumal che xbʼananex kʼax che, are kʼu xuya ta kan upatanexik ri Jehová. ¿Jas utzilal xuriqo? Ri areʼ sibʼalaj kkikotik rumal che ri ukojonik más ko chik chuwach are chiʼ majaʼ kchʼayik y ktzʼapix pa cárcel (chasikʼij uwach 1 Pedro 1:6, 7).

18. ¿Jas kqabʼano rech amaqʼel kojkikotik?

¹⁸ Ri Jehová retaʼm jas ri kajwataj chqe ri oj winaq rech qas kojkikotik. We kqabʼan ri oxibʼ jastaq che xqetaʼmaj pa wajun kʼutunem, amaqʼel riʼ kojkikotik paneʼ kqariq kʼax. Xuqujeʼ kojkun riʼ kqabʼij wariʼ: «¡Utz rech ri tinamit ri are uDios ri Ajawaxel!» (Sal. 144:15).