1. Junam rukʼ ri kubʼij Proverbios 1:20, 21, ¿la konojel ri winaq kkitatabʼej ri uchʼabʼal ri nojibʼal?

 PA KʼI taq tinamit kʼamanaq chqe keqil e kʼi qachalal che kkijach e wuj pa taq ri bʼe jawiʼ e kʼo wi kʼi winaq. ¿La at tobʼanaq at pa wajun chak riʼ? We at tobʼanaq, weneʼ at chomanaq chrij ri kʼutbʼal che kriqitaj pa ri wuj re Proverbios re ri nojibʼal che kuraq uchiʼ pa taq ri bʼe rech ri e winaq kkitatabʼej ri pixabʼ kuyaʼo (chasikʼij uwach Proverbios 1:20, 21). Pa ri Biblia y pa taq ri e qawuj kriqitaj ri qas nojibʼal: ri unojibʼal ri Jehová. Are waʼ ri kajwataj chke ri e winaq rech kkiriq ri kʼaslemal che kʼo ta ukʼisik. Sibʼalaj kojkikotik are chiʼ jun winaq kukʼam ri e qawuj. Are kʼu, konojel taj jeʼ kkibʼano. E jujun kkaj taj kketaʼmaj ri kubʼij ri Biblia. E nikʼaj chik ketzeʼn chqij; kkichomaj che kʼo ta chi upatan ri kukʼut ri Biblia. Xuqujeʼ e kʼo jujun keyoqʼon che ri taqanik kʼo pa ri uTzij ri Dios y kkibʼij che ri keniman che xa kkiya uwiʼ ri kkibʼano y qas ta kechomanik. Paneʼ je wariʼ, ri Jehová uyaʼom ta kan utzujuxik ri qastzij nojibʼal. ¿Jas kubʼan che utzujuxik?

2. ¿Jas kqabʼan che uriqik ri qastzij nojibʼal kimik, are kʼu jas kkichaʼ ubʼanik e kʼi winaq?

² Ri Jehová kukoj ri uTzij, ri Biblia, rech ri e winaq kkitatabʼej ri qastzij nojibʼal. Más e kʼi na ri winaq cho ri uwach Ulew kʼo jun kiBiblia chkijujunal. ¿E kʼu ri e qawuj che esam pa ri Biblia? Rumal ri utobʼanik ri Jehová, elesam lo pa más che 1,000 chʼabʼal. Ri winaq che kkitatabʼej, kraj kubʼij, ri kkisikʼij uwach ri Biblia y ri e qawuj, y kkibʼan pa kikʼaslemal ri kketaʼmaj, kkiriq utzilal. Are kʼu, e kʼi winaq kkaj taj kkitatabʼej ri uchʼabʼal ri qastzij nojibʼal. Are chiʼ kkichaʼ ubʼanik jujun jastaq pa kikʼaslemal, are kkibʼan ri kkaj o are kkibʼan ri kkibʼij nikʼaj chik chke. Weneʼ itzel  kojkilo are chiʼ kkilo che kqanimaj ri kubʼij ri Biblia. Pa wajun kʼutunem kqil na jasche jelaʼ kkibʼan ri winaq. Are kʼu nabʼe chqilaʼ jas rajawaxik kqabʼano rech kqariq ri nojibʼal che petinaq rukʼ ri Jehová.

3. ¿Jas rajawaxik kqabʼano rech qas kʼo qanojibʼal?

³ Ri nojibʼal kraj kubʼij kqakoj ri qetaʼmam rech kqachaʼ utz jastaq pa qakʼaslemal. Are kʼu, kʼo más kraj kubʼij ri qastzij nojibʼal. Ri Biblia kubʼij: «Ri noʼj kchapletajik rumal ri uyaʼik uqʼij ri Ajawaxel» (Prov. 9:10). Rumal laʼ, are chiʼ kqachaʼ ubʼanik jun jastaq che nim ubʼanik rajawaxik kqakoj ri retaʼmanik «ri sibʼalaj tastalik», kraj kubʼij, ri kuchomaj ri Jehová. Kojkun che ukojik are chiʼ kqanikʼoj uwach ri Biblia y ri e qawuj. We kqabʼan wariʼ, kqakʼutu che qas kʼo qanojibʼal (Prov. 2:5-7).

4. ¿Jasche xaq xiw rukʼ ri Jehová kriqitaj wi ri qastzij nojibʼal?

⁴ Xaq xiw rukʼ ri Jehová kpe wi ri qastzij nojibʼal (Rom. 16:27). ¿Jasche jewaʼ kqabʼij? Nabʼe, rumal che are ri Bʼanol qe y retaʼm chrij ronojel ri jastaq ubʼanom (Sal. 104:24). Ukabʼ, rumal che kukʼut ri unojibʼal rukʼ ri kubʼano (Rom. 11:33). Y urox, rumal che ri utz taq upixabʼ amaqʼel kuya utzilal chke ri kkibʼan pa ri kikʼaslemal (Prov. 2:10-12). We kqaj che kkʼojiʼ qanojibʼal, rajawaxik kqabʼan ri oxibʼ jastaq riʼ y kqaya bʼe che kkikʼam qabʼe pa ri qakʼaslemal.

5. ¿Jas kiriqom ri winaq che kkikoj taj che xaq xiw rukʼ ri Jehová kpe wi ri qastzij nojibʼal?

⁵ E kʼi winaq che kqatzijoj ri utzij ri Dios chke ketaʼm che sibʼalaj mayibʼal bʼanom che ri jastaq cho ri uwach Ulew, are kʼu kkikoj taj che kʼo jun Bʼanol re ronojel y kkibʼij che ri jastaq nojimal chi nojimal xukʼex ribʼ rech xux kʼaslemal. E nikʼaj chik kkibʼij che kekojon chrij ri Dios, are kʼu kkichomaj che kʼo ta chi upatan ri taqanik kʼo pa ri Biblia, rumal laʼ are kkibʼan ri kkaj e areʼ. ¿Jas kʼu kiriqom ri winaq riʼ? ¿La ubʼanom más utz ri uwach Ulew rumal che ri winaq are kkikoj ri kinojibʼal e areʼ y are ta ri unojibʼal ri Dios? ¿La qas kekikotik o kʼo jun keyebʼal pa ri petinaq? Je taj. Ronojel ri kqilo kuqʼalajisaj che qastzij wajun chomanik riʼ: «Chuwach ri Ajawaxel man kʼo ta noʼj ri nim ta na uqʼij, mawi e kʼoxomanik mawi e utzalaj taq chomanik» (Prov. 21:30). Wariʼ kojutoʼo rech amaqʼel kqataʼ qanojibʼal che ri Jehová. Sibʼalaj bʼisobʼal rumal che e kʼi winaq je ta kkibʼano. ¿Jasche?

6. Junam rukʼ ri kubʼij Proverbios 1:22-25, ¿e jachin ri e winaq che kkixutuj ri qastzij nojibʼal?

⁶ E kʼi kkibʼano che kkita taj are chiʼ ri qastzij nojibʼal kuraq uchiʼ «xoʼl taq ri ja». Ri Biblia kubʼij che kʼo oxibʼ kiwach winaq che kkixutuj ri qastzij nojibʼal: «ri man kʼo ta [k]etamanik», ri kkitzeʼj uwach ronojel o ri kketzʼabʼej uwach ronojel y «ri man kʼo ta [k]inoʼj» (chasikʼij uwach Proverbios 1:22-25). Chqilampeʼ jasche ri e winaq kkixutuj ri unojibʼal ri Dios y jas rajawaxik kqabʼano rech kqabʼan ta qe junam kukʼ e areʼ.

7. ¿Jasche jujun kʼo ta kkaj kketaʼmaj?

⁷ «Ri man kʼo ta [k]etamanik» are ri kkikoj ronojel ri kbʼix chke rech kesubʼik (Prov. 14:15). Kʼi mul keqariq winaq je kibʼanik wariʼ are chiʼ kqatzijoj ri utzij ri Dios. Qastzij che sibʼalaj e kʼi winaq e subʼum kumal ri kʼamal taq kibʼe pa ri kikojonem y kumal ri políticos. E jujun  sibʼalaj kebʼisonik are chiʼ kketaʼmaj che xa e subʼum. Are kʼu ri keya ubʼixik pa Proverbios 1:22 paneʼ kketaʼmaj che xa kesubʼik kkitaqej kʼolem chilaʼ (Jer. 5:31). Are utz kkil ubʼanik ri kichomanik e areʼ, kkaj taj kketaʼmaj chrij ri Biblia y kkibʼan ta ri taqanik che kʼo chupam. E kʼi junam kkichomaj rukʼ ri kuchomaj jun ixoq che kel pa Quebec (Canadá), xubʼij wariʼ che jun Testigo: «Qamak ta oj we oj subʼum rumal ri sacerdote, umak areʼ laʼ». Qastzij wi che kqaj taj kqesaj kiwach ri winaq che kʼo ta kkaj kketaʼmaj (Prov. 1:32; 27:12).

8. ¿Jas kojtoʼwik rech kkʼojiʼ qanojibʼal?

⁸ Rumal laʼ, ri Biblia kubʼij chqe che kqesaj ta kiwach ri winaq che kʼo ta kkaj kketaʼmaj. Xaneʼ kuya wajun pixabʼ chqe: «Chixux kʼu riʼjabʼ are taq kixchomanik» (1 Cor. 14:20). Kqariq nojibʼal are chiʼ kqabʼan pa qakʼaslemal ri pixabʼ re ri Biblia. Nojimal chi nojimal kqil na che ri pixabʼ kuya ri Biblia kojutoʼ rech utz kqabʼan che uchaʼik jun jastaq y kqariq ta kʼax. Utz we kqanikʼoj ri tajin kqabʼano rech kqilo we utz tajin kqabʼan che ri jastaq. Jun kʼutbʼal, we naj tiempo chik majim uyaʼik etaʼmanik re ri Biblia chawe y tajin katbʼe chi pa ri e riqbʼal ibʼ, are kʼu majaʼ kajach ri akʼaslemal che ri Jehová y majaʼ kabʼan aqasanjaʼ, utz che katchoman chrij jasche abʼanom taj. O we abʼanom chi aqasanjaʼ, ¿jas kkʼutuwik che más tajin chi katzijoj ri utzij ri Dios y keʼatijoj ri winaq? Are chiʼ kachaʼ ubʼanik jun jastaq, ¿la kakoj ri e pixabʼ re ri Biblia? ¿La nim keʼawil wi ri e winaq junam rukʼ ri xubʼan ri Jesús? We kqilo che kʼo rajawaxik kqasukʼumaj, chqatatabʼej ri kubʼij ri Jehová chqe, rumal che «kuya kʼu retaʼmanik ri man kʼo ta retaʼmanik» (Sal. 19:7).

9. ¿Jas kkibʼan ri kkitzeʼj uwach ronojel che uxutuxik uwach ri nojibʼal?

⁹ Ri ukabʼ jupuq winaq che kkaj taj kkitatabʼej ri unojibʼal ri Dios are ri kkitzeʼj uwach ronojel. Jujun taq mul keqariq winaq che je kibʼanik are chiʼ kqatzijoj ri utzij ri Dios. Utz kkil utzexik kiwach e nikʼaj chik (Sal. 123:4). Ri Biblia xubʼij che pa ri kʼisbʼal taq qʼij e kʼo winaq che xaq kkitzeʼj kiwach nikʼaj chik (2 Ped. 3:3, 4). Junam rukʼ ri ujiʼ ri Lot, kimik e jujun winaq kkitatabʼej ta ri kubʼij ri Dios chke (Gén. 19:14). E kʼi xa kkitzeʼj kiwach ri kkibʼan pa kikʼaslemal ri kubʼij ri Biblia. Ri e winaq riʼ «xuwi kkilij ubʼanik ri itzel taq kirayinik» (Jud. 7, 17, 18). ¿La mat qastzij che ri kubʼij ri Biblia chkij ri kkitzeʼj uwach ronojel kjunamataj ri kibʼantajik kukʼ ri apóstatas y e nikʼaj chi winaq che kkixutuj ri Jehová?

10. Junam rukʼ ri kubʼij Salmo 1:1, ¿jas rajawaxik kqabʼano rech kojux ta junam kukʼ ri xaq kkitzeʼj uwach ronojel?

¹⁰ ¿Jas rajawaxik kqabʼano rech kqabʼan ta qe ri kkibʼan ri winaq che kkitzeʼj uwach ronojel? Jun kʼutbʼal, kojkʼojiʼ ta kukʼ winaq che xaq kechʼachʼat chrij ronojel (chasikʼij uwach Salmo 1:1). Wariʼ kraj kubʼij che kqatatabʼej taj ni kqasikʼij uwach ri kkiya ubʼixik ri apóstatas. We kqachajij ta qibʼ, weneʼ xaq kojchʼachʼat chik y weneʼ kubʼan kebʼ qakʼuʼx chrij ri Jehová y chrij ri pixabʼ che kuya chqe rumal ri utinamit. Rumal laʼ, rech kojqaj ta chupam wariʼ, chqabʼanaʼ waʼ taq preguntas chbʼil qibʼ: «¿La amaqʼel kinchʼachʼatik are chiʼ kyaʼ kʼakʼ pixabʼ chqe? ¿La xaq kinchʼachʼat chkij ri e qachalal che kkikʼam qabʼe?». We aninaq kqasukʼumaj ri qachomanik sibʼalaj kkikot riʼ ri Jehová qukʼ (Prov. 3:34, 35).

11. ¿Jas kkichomaj «ri man kʼo ta [k]inoʼj» chrij ri utaqanik ri Jehová?

 ¹¹ Ri urox jupuq winaq che kkixutuj uwach ri nojibʼal are «ri man kʼo ta [k]inoʼj». Kbʼix wariʼ chke rumal che kkaj taj kkibʼan pa kikʼaslemal ri utaqanik ri Dios. Are kkibʼan ri kkichomaj e areʼ che utz (Prov. 12:15). Kkixutuj ri Jehová, ri kpe wi ri nojibʼal (Sal. 53:1). Are chiʼ kojbʼe che utzijoxik ri utzij ri Dios, kʼi mul keqariq winaq che sibʼalaj kojkiyoqʼo rumal che nim kqil wi ri kubʼij ri Biblia. Ri uTzij ri Dios kubʼij: «Ri man kʼo ta unoʼj man retaʼm taj jas kubʼij [...] ri noʼj naj kʼo wi che» (Prov. 24:7). Ri kʼo ta kinoʼj kʼo ta jun jastaq che utz kkibʼij. Rumal laʼ, ri Jehová kubʼij chqe: «Chanajtajisaj awibʼ che ri man kʼo ta unoʼj» (Prov. 14:7).

12. ¿Jas kojtowik rech kojjunamataj ta kukʼ ri kʼo ta kinojibʼal?

¹² Ri oj kojjunamataj ta kukʼ ri itzel kkil ri upixabʼ ri Dios, rumal che nim kqil wi ri kuchomaj y ronojel ri e utaqanik. Knimar más ri qaloqʼoqʼebʼal che ri Dios are chiʼ kojchoman chrij ri kkiriq ri kenimanik y ri keniman taj. Chojchoman chrij ronojel ri kʼax che kkiriq ri kʼo ta kinojibʼal rumal che kkixutuj ri utz taq upixabʼ ri Jehová. Y, chojchoman chrij ri utzilal qariqom pa ri qakʼaslemal rumal che kojniman che ri Dios (Sal. 32:8, 10).

13. ¿La kojutaqchiʼj ri Jehová che ukʼamik ri upixabʼ?

¹³ Ri Jehová kutzujuj ri nojibʼal chqe qonojel, tekʼuriʼ kʼo ta jun kutaqchiʼj che ukʼamik. Are kʼu, kubʼij ri kkikʼulmaj ri winaq che kkita ta ri unojibʼal (Prov. 1:29-32). Ri kkinimaj ta ri Jehová keqajbʼex na rumal ri ratzʼamil ri kikʼaslemal, kraj kubʼij, che are chiʼ kqʼax ri tiempo, ri kkichaʼ ubʼanik pa ri kikʼaslemal xa kuya bʼis y kʼaxkʼolil chke xuqujeʼ kkiriq ta ri kʼaslemal kʼo ta ukʼisik. Are kʼu ri kkikʼam ri upixabʼ ri Jehová y kkibʼan pa ri kikʼaslemal, ktzujux wariʼ chke: «Ri kutatabʼej ri kinbʼij che, kjeqiʼ na pa jamaril, man kuxeʼj ta ribʼ chi kʼo ta jun ukʼeyowal kutaqlebʼej» (Prov. 1:33).

14, 15. ¿Jas kqetaʼmaj pa Proverbios 4:23?

¹⁴ Ukʼamik ri unojibʼal ri Dios kuya utzilal chqe. Junam rukʼ ri qilom chik, ri Jehová kuya ri utz taq upixabʼ chqe qonojel. Jun kʼutbʼal, ri wuj re Proverbios kuya pixabʼ chqe che kʼo upatan pa ronojel tiempo y kuya utzilal chqe we kqabʼan pa ri qakʼaslemal. Chqilampeʼ kajibʼ chke ri utz taq pixabʼ riʼ.

¹⁵ Chqachajij ri qanimaʼ o ri qachomanik. Ri Biblia kubʼij: «Chachajij ri achomabʼal chuwach apachike jasach ri kʼo cho ri uwach ulew, che kʼut kkʼiy wi  ri kʼaslemal» (Prov. 4:23). Chojchoman chrij ri rajawaxik kqabʼano rech kqachajij ri qas qanimaʼ. Rajawaxik kqatij utz taq jastaq, kqabʼan ejercicio y kqabʼan ta jastaq che xa kuya yabʼil chqe. Rajawaxik je kqabʼan rukʼ ri qachomanik. Rajawaxik che ronojel taq qʼij kqasikʼij ri utzij ri Dios. Xuqujeʼ rajawaxik kqatijoj qibʼ che ri qariqbʼal ibʼ, kojbʼek y kqaya qacomentarios. Xuqujeʼ amaqʼel kqatzijoj ri utzij ri Dios. Y kqaxutuj jastaq che kutzʼilobʼisaj ri qachomanik, junam rukʼ ri videos o audios che kemakun achijabʼ ixoqibʼ chupam y ri itzel taq achilanik.

16. ¿Jasche kojutoʼ kimik ri kubʼij Proverbios 23:4, 5?

¹⁶ Chojkikot rukʼ ri kʼo qukʼ. Ri Biblia kuya wajun pixabʼ chqe: «Makoj achuqʼabʼ rech katux qʼinom. […] We qas utz rilik kabʼano kawil kʼu na chi man e kʼo ta qʼinomal; rukʼ aninaqil kerapanik kebʼek, e jachaʼ ri kot, jetaneʼ ri xa kekʼiy kixikʼ» (Prov. 23:4, 5). Ri qʼinomal aninaq ksach uwach. Are kʼu kimik, ri e qʼinomabʼ y ri e mebʼayibʼ sachinaq kikʼuʼx che utzukuxik más pwaq. Kʼi mul, rumal che are más bʼenaq kikʼuʼx che utzukuxik más jastaq kuriq kʼax ri kibʼantajik, ri kachilanik kukʼ ri e nikʼaj chik y keyawajik (Prov. 28:20; 1 Tim. 6:9, 10). Are kʼu, ri nojibʼal kojutoʼo rech kkʼojiʼ jun utz qachomanik chrij ri pwaq. Wariʼ kojutoʼo rech kqarayij ta kʼi jastaq y rech kojkikot rukʼ ri kʼo qukʼ (Ecl. 7:12).

17. ¿Jas kqabʼano rech rukʼ nojibʼal kojchʼawik junam rukʼ ri kubʼij Proverbios 12:18?

¹⁷ Chqachomaj na ri kqabʼij. We kqachomaj ta ri kqabʼij kqabʼan kʼax riʼ che jun chi winaq. Ri Biblia kubʼij: «E kʼo jachin taq kesokon kumal ri kitzij, kechʼaw kʼu ri kʼo kinoʼj kkiya kʼu utzil» (Prov. 12:18). We kqabʼan ta ajaltzijol o tzijtal kkʼojiʼ utz achilanik chqaxoʼl kukʼ e nikʼaj chik (Prov. 20:19). Rech ri kqabʼij kubʼan ta kʼax chke ri e nikʼaj chik, rajawaxik are kqanojisaj ri qachomanik che ri etaʼmanik che kʼo pa ri uTzij ri Dios (Luc. 6:45). Are chiʼ kojchoman  chrij ri pixabʼ che kʼo pa ri Biblia, kojutoʼ rech rukʼ nojibʼal kojchʼawik rech kqabʼan ta kʼax chke ri e nikʼaj chik (Prov. 18:4).

18. ¿Jas kojutoʼ wi Proverbios 24:6 rech utz kel ri utzijoxik ri utzij ri Dios chqawach?

¹⁸ Chqanimaj ri kubʼij ri utinamit ri Dios. Ri Biblia kuya wajun pixabʼ chqe: «Ri chʼoj utz uchomaxik kbʼanik are kʼu ri chʼakanik kumal ri e kʼi yaʼl taq noʼj» (Prov. 24:6). We kojchoman chrij ri kqabʼan che ukojik wajun pixabʼ kojutoʼ rech utz kqabʼan che utzijoxik ri utzij ri Dios y kitijoxik ri winaq y are ta kqabʼan ri kqachomaj oj. Kyaʼ utz taq pixabʼ chqe pa ri e riqbʼal ibʼ are chiʼ keya chʼabʼal y are chiʼ keqil ri kʼutbʼal re tzijonem che kkibʼan ri qachalal. Xuqujeʼ, ri utinamit ri Jehová uyaʼom e wuj y videos chqe rech keqatoʼ ri winaq che uchʼobʼik ri kubʼij ri Biblia. ¿La awetaʼmam kikojik ri e chakubʼal riʼ?

19. Junam rukʼ ri kubʼij Proverbios 3:13-18, ¿jas kachomaj at chrij ri unojibʼal ri Jehová?

¹⁹ (Chasikʼij uwach Proverbios 3:13-18). ¡Sibʼalaj kojkikotik che kqariq utz taq pixabʼ pa ri uTzij ri Dios! ¿Jas lo kqabʼan riʼ wet mat kʼo qukʼ? Pa wajun kʼutunem, xqil jujun taq kʼutbʼal re ri nojibʼal che kyaʼ ubʼixik pa ri wuj re Proverbios. Qastzij che ri Jehová uyaʼom más pixabʼ pa ri nikʼaj chi wuj re ri Biblia. Chqataqej ubʼanik ri kubʼij ri unojibʼal ri Dios. Kqamay taj che ri winaq jun wi ri kichomanik chrij wajun nojibʼal riʼ. ¡Oj qas qetaʼm che sibʼalaj utz kech ri winaq che kkikʼam ri unojibʼal ri Dios!