1, 2. a) ¿Jas kibʼanom jujun qʼatal taq tzij chke ri upataninelabʼ ri Jehová y jas kibʼanom ri qachalal? b) ¿Jasche kojkunik kojkikotik paneʼ kbʼan kʼax chqe? (Xuqujeʼ chatchʼaw chrij ri e wachbʼal re ri nabʼe uxaq ri wuj).

 KIMIK, qʼatem uwach ri qachak che ri Dios pa más che 30 tinamit cho ronojel ri uwach Ulew. Pa jujun chke riʼ ri tinamit, ri qʼatal taq tzij e kitzʼapim pa cárcel ri qachalal achijabʼ ixoqibʼ. ¿Jasche e tzʼapim we kʼo ta jun itzel jastaq kibʼanom chuwach ri Jehová? Ri kimak are che kkinikʼoj y kkisikʼij uwach ri Biblia, kkitzijoj ri utzij ri Dios y kkibʼan kiriqbʼal ibʼ kukʼ ri e kachiʼl. Xuqujeʼ kkaj taj kkinim kibʼ pa política. Are kʼu, paneʼ kbʼan kʼax chke, waʼ taq upataninelabʼ ri Dios kʼo ta makaj pa ri kikʼaslemal chuwach ri Jehová * y xaq xiw ri Jehová kkiqʼijilaj, rumal laʼ sibʼalaj kekikotik.

² Weneʼ awilom fotos kech waʼ taq Testigos che kʼo jun koʼalaj kikojonik, rumal laʼ e tzeʼnaq. Kekikotik rumal che ketaʼm che kkikot ri Jehová kukʼ rumal che paneʼ kkiriq kʼax are kʼu kemakun ta chuwach (1 Crón. 29:17a). Ri Jesús xubʼij wariʼ: «Utz ke ri kkikochʼ ri kʼaxkʼolil ri kbʼan amaqʼel chke rumal ubʼanik ri utaqanik ri Dios [...]. Chixkikot rukʼ nimalaj kikotemal, chi kikʼam kʼu na jun nimalaj tojbʼal iwech» (Mat. 5:10-12).

3. Junam rukʼ ri kubʼij Hechos 4:19, 20, ¿jas xkibʼan ri apóstoles are chiʼ xbʼan kʼax chke, y jasche?

³ Ri e qachalal tajin kkiriq kʼax junam rukʼ ri xkiriq ri apóstoles pa ri nabʼe siglo are chiʼ xechʼaw chrij ri Jesús. Kʼi  mul, ri e qʼatal taq tzij kech ri judíos «xkibʼij chke chi man ketzijon ta chik pa ri ubʼiʼ ri Jesús» (Hech. 4:18; 5:27, 28, 40). ¿Jas kʼu xkibʼan ri apóstoles? (Chasikʼij uwach Hechos 4:19, 20). Ketaʼm che más kʼo na taqanik pa uqʼabʼ ri e taqowinaq rech kkitzijoj ri utzij ri Dios y kechʼaw chrij ri Cristo (Hech. 10:42). Rumal laʼ, ri Pedro y ri Juan xechʼaw pa kibʼiʼ konojel ri apóstoles, rukʼ ukowil kikʼuʼx xkibʼij chke che are ta kekinimaj e areʼ, xaneʼ are ri Dios, y xkijikibʼaʼ kan ubʼixik che kkitanabʼaʼ ta utzijoxik ri jastaq che xukʼut kan ri Jesús. Jetaneʼ xkibʼij wariʼ chke ri e qʼatal taq tzij judíos: «¿Jasche kibʼan wariʼ? ¿La kichomaj ix che más kʼo itaqanik chuwach ri Dios?».

4. Junam rukʼ ri kukʼut Hechos 5:27-29, ¿jas kʼutbʼal xkiya kan ri apóstoles chkiwach ri qastzij cristianos, y jas kqabʼano rech kqesaj kiwach?

⁴ Ri apóstoles xkiya kan jun utzalaj kʼutbʼal chkiwach konojel ri qastzij cristianos: «Chi are nabʼe kqanimaj ri kubʼij ri Dios chqe man are ta kʼut ri kkibʼij ri winaq» (chasikʼij uwach Hechos 5:27-29). Are chiʼ e chʼayayem chik rumal che xaq xiw kkinimaj ri kubʼij ri Dios, xeʼel lo chkiwach ri jupuq qʼatal taq tzij judíos «kekikotik rumal rech chi ri Dios xuya chke chi ketzelax kiwach rumal rech ri ubʼiʼ ri Jesús», y xkitaqej utzijoxik ri utzij ri Dios (Hech. 5:40-42).

5. ¿Jas preguntas rajawaxik kqatzalij kiwach?

⁵ Ri kʼutbʼal che xkiya kan ri apóstoles chqawach kojutoʼo rech kojchoman chrij jujun preguntas. Jun kʼutbʼal, ¿jas xkibʼan riʼ che kinimaxik ri e «qʼatal taq tzij» are kʼu xuqujeʼ xeniman che ri Dios? (Rom. 13:1). Y, ¿jas kqabʼan oj rech kqaya qibʼ «pa taqik chke ri qʼatal taq tzij», junam rukʼ ri xubʼij ri apóstol Pablo, are kʼu kojmakun ta chuwach ri Dios, ri qʼatal tzij aj chikaj (Supremo)? (Tito 3:1).

6. a) ¿Jachin riʼ «ri qʼatal taq tzij» kyaʼ ubʼixik pa Romanos 13:1, y jas rajawaxik kqabʼan oj kukʼ? b) ¿La kʼo ronojel taqanik pa kiqʼabʼ ri e qʼatal taq tzij?

⁶ (Chasikʼij uwach Romanos 13:1). Pa wajun versículo, ri e tzij «qʼatal taq tzij»  kchʼaw chkij ri winaq che kʼo taqanik pa kiqʼabʼ pa kiwiʼ nikʼaj chi winaq. Ri cristianos rajawaxik kqaya qibʼ pa taqik pa kiqʼabʼ ri e qʼatal taq tzij riʼ. E areʼ kkilo che ronojel utz pa taq ri e tinamit, kkiya taqanik chqe qonojel y jujun taq mul kkitoʼ uwiʼ ri utinamit ri Jehová (Apoc. 12:16). Rumal laʼ, kbʼix chqe che rajawaxik kqatoj ri alkabʼal (impuestos) che kkitaʼ chqe, nim keqil wi y kojniman chke (Rom. 13:7). Are kʼu, ri e qʼatal taq tzij riʼ kʼo kitaqanik xa rumal che are ri Jehová yaʼowinaq bʼe chke. Ri Jesús qas xuqʼalajisaj wajun jastaq riʼ are chiʼ xtzijon rukʼ ri qʼatal tzij romano Poncio Pilato. Are chiʼ ri Pilato xubʼij che ri Jesús che kkunik ktaqanik rech kkamisaxik o kkamisax taj, Jesús xubʼij wariʼ: «Ma ta kʼo taqanik la riʼ pa nuwiʼ, we ta ma ta kyaʼtaj che la rumal ri Dios» (Juan 19:11). Junam rukʼ ri Pilato, konojel ri e qʼatal taq tzij re ri qaqʼij kʼo ta ronojel taqanik pa kiqʼabʼ.

7. ¿Pa jas jastaq rajawaxik keqanimaj ta ri qʼatal taq tzij y jas rajawaxik kketaʼmaj e areʼ?

⁷ Ri oj cristianos kqaya qibʼ pa taqik pa kiqʼabʼ ri qʼatal taq tzij are chiʼ ri taqanik kkiyaʼo kubʼan taj che xa kojok ukʼulel ri Jehová. Are kʼu, are taq ri e areʼ kkibʼij chqe che kqabʼan jun jastaq che utz ta kril ri Dios o kkiqʼatej qawach che ubʼanik ri utz krilo, kojniman ta chke. Jun kʼutbʼal, weneʼ kyaʼ taqanik che konojel ri kʼa e majaʼ na keʼok pa ri ejército rech kkitoʼ uwiʼ ri kitinamit. * O weneʼ kyaʼ ta chi bʼe chqe kqakoj ri qaBiblia, ri e qawuj, kqatzijoj ri utzij ri Dios y ri qariqbʼal ibʼ. Are chiʼ ri e qʼatal taq tzij kkikoj ri taqanik kʼo pa kiqʼabʼ che ubʼanik kʼax chke ri cristianos, kkiqʼalajisaj na chuwach ri Dios ri tajin kkibʼano. ¡Tajin keʼil rumal ri Jehová! (Ecl. 5:8).

8. ¿Jas kejunamataj ta wi ri e «qʼatal taq tzij» rukʼ ri «aj chikaj», y jasche nim ubʼanik wariʼ?

⁸ Ri qʼatal taq tzij kʼo taqanik pa kiqʼabʼ, kkibʼan utzilal y ketaqan pa kiwiʼ ri e nikʼaj chik. Are kʼu, wariʼ kraj taj kubʼij che e tzʼaqat y che sibʼalaj nim kibʼanik. Kʼo ri Jun ri qas tzʼaqat y más nim na ubʼanik chkiwach ri e nikʼaj chik, are ri Jehová Dios. Pa ri Biblia kajibʼ mul kbʼix «aj chikaj» che ri Jehová Dios (Dan. 7:18, 22, 25, 27).

9. ¿Jas xril ri qʼaxal tzij Daniel pa jujun taq visiones?

⁹ Ri qʼaxal tzij Daniel xril jujun visiones che qas xuqʼalajisaj chuwach che ri Jehová kʼo pa kiwiʼ ri nikʼaj chik qʼatal taq tzij. Nabʼe xeril kajibʼ xibʼibʼal taq awaj che keʼukʼut ri nimaʼq taq qʼatbʼal tzij re ojer y re kimik: Babilonia, Medopersia, Grecia y Roma, y ri nimalaj qʼatbʼal tzij re ri Reino Unido y Estados Unidos, che tajin kuqʼat tzij kimik (Dan. 7:1-3, 17). Tekʼuriʼ, ri Jehová tʼuyul pa uwiʼ jun tem re qʼatbʼal tzij pa ri kaj (Dan. 7:9, 10). Are chiʼ rilom chi wariʼ, kʼo chi jun jastaq xrilo y kʼo ubʼanik rukʼ ri kkiriq na ri qʼatal taq tzij re ri qaqʼij.

10. Junam rukʼ ri kubʼij Daniel 7:13, 14, 27, ¿jachin chke kuya wi ri Jehová ri taqanik pa uwiʼ ri uwach Ulew, y jas kukʼut wariʼ chrij areʼ?

¹⁰ (Chasikʼij uwach Daniel 7:13, 14, 27). Ri Daniel xrilo che ri Dios xresaj ri taqanik pa kiqʼabʼ ri e qʼatal taq tzij cho ri uwach Ulew y xuya chke ri más taqal chke y ri más kʼo kichuqʼabʼ. ¿E jachin kʼu riʼ? Che «ri jetaneʼ kpe jun rijaʼl winaq», ri Jesucristo, y che «ri utinimit [ri e tastalik re] ri Dios ri sibʼalaj aj chikaj», ri 144,000,  che kkiqʼat na tzij «chbʼe qʼij saq» (Dan. 7:18). Qas qʼalaj che ri Jehová are ri aj chikaj, rumal che xaq xiw ri areʼ kʼo taqanik pa uqʼabʼ che ubʼanik wariʼ.

11. ¿Jas más xutzʼibʼaj ri Daniel che kukʼutu che ri Jehová kʼo pa kiwiʼ konojel ri e qʼatal taq tzij?

¹¹ Ri xril ri Daniel pa riʼ ri visión qas kuqʼalajisaj ri ubʼim chi kan nabʼe. Ri qʼaxal tzij xubʼij che «ri Dios ri kʼo pa ri kaj [...] keresaj xuqujeʼ keʼukoj taq ajawinelabʼ». Xuqujeʼ xubʼij che «ri Dios ri sibʼalaj chikaj kʼo wi kʼo ukuʼinem pa kiwiʼ ri ajawinik aj winaq chi areʼ kuyaʼ ri ajawinik jachin che ri kraj kuyaʼ wi» (Dan. 2:19-21; 4:17). ¿La kʼo jumul ri Jehová e resam o e ukojom e qʼatal taq tzij? Kʼolik.

12. Chabʼij jun kʼutbʼal chrij ri xubʼan ri Jehová che kesaxik e qʼatal taq tzij ojer. (Chawilaʼ ri wachbʼal).

¹² Ri Jehová qas ukʼutum che kʼo pa kiwiʼ konojel ri «qʼatal taq tzij». Chqilaʼ oxibʼ kʼutbʼal. Ri faraón re Egipto xukoj ri utinamit ri Jehová che ubʼanik kʼaxalaj taq chak, y kʼi mul xraj taj xeʼutzoqopij. Are kʼu ri Dios xeʼeresaj loq y xujiqʼisaj kan ri faraón pa ri mar Rojo (Éx. 14:26-28; Sal. 136:15). Ri qʼatal tzij Belsasar, re Babilonia, xubʼan jun nimalaj waʼim y xukʼulelaʼj «ri Ajawaxel aj kaj» y xeʼuqʼijilaj «dioses ri e re qʼan pwaq, saq pwaq» chuwach ri Jehová (Dan. 5:22, 23). Are kʼu xelesax ukʼixbʼal rumal ri Dios. Ri Belsasar xekamisax kan chaqʼabʼ, y ri uqʼatbʼal tzij xyaʼ kan pa kiqʼabʼ ri medos y ri persas (Dan. 5:28, 30, 31). Ri qʼatal tzij Herodes Agripa I, re Palestina, xukamisaj ri apóstol Santiago tekʼuriʼ xutzʼapij ri apóstol Pedro pa cárcel rumal che kraj kukamisaj xuqujeʼ. Are kʼu xyaʼ ta bʼe che rumal ri Dios che kubʼan ri uchomam. «Xsok [xyawajik] rumal jun taqoʼn aj kaj rech ri Ajawaxel», y xkamik (Hech. 12:1-5, 21-23).

13. Chabʼij jas xubʼan ri Jehová che kichʼakik jupuq qʼatal taq tzij.

¹³ Ri Jehová xuqujeʼ ukʼutum che kʼo utaqanik pa kiwiʼ e jupuq qʼatal taq tzij. Xchʼojin pa kiwiʼ ri israelitas y xeʼutoʼo rech xekichʼak 31 qʼatal taq tzij cananeos y rech xkichʼak kan nimalaj ulew re ri Tzujum Ulew (Jos. 11:4-6, 20; 12:1, 7, 24). Xuqujeʼ xukamisaj ri qʼatal tzij Ben-Hadad y 32 qʼatal taq tzij sirios che xechʼojin kukʼ ri israelitas (1 Rey. 20:1, 26-29).

14, 15. a) ¿Jas xkibʼij ri qʼatal tzij Nabucodonosor y ri Darío chrij ri uqʼatbʼal tzij ri Jehová? b) ¿Jas xubʼij ri tzʼibʼanel re jun salmo chrij ri Jehová y ri utinamit?

 ¹⁴ Ri Jehová kʼi mul ukʼutum che are ri aj chikaj. Are chiʼ ri Nabucodonosor, qʼatal tzij re Babilonia, xubʼan nim che ribʼ rumal ri uchuqʼabʼ y ri unimal ri uqʼatbʼal tzij, xchʼujarisax rumal ri Dios. Are chiʼ xul pa saq ri uchomanik, ri Nabucodonosor xuya uqʼij ri Nimalaj qʼatal tzij y xuchʼobʼo che kkʼis ta ri taqanik kʼo pa uqʼabʼ ri Jehová. Xuqujeʼ xubʼij che kʼo ta jun kkunik kuqʼatej uwach ri kraj kubʼano (Dan. 4:30, 33-35). Are chiʼ kojom chi pa kʼax ri ukojonik ri Daniel y are chiʼ elesam chi lo rumal ri Jehová pa ri jul jawiʼ e kʼo wi ri koj, ri qʼatal tzij Darío xuya wajun taqanik riʼ: «Pa ronojel ri wajawibʼal, nim chil wi xuqujeʼ chyoʼq uqʼij ri uDios ri Daniel. Rumal rech chi areʼ Dios ri kʼaslik, jeqel kʼu amaqʼel. Ri rajawinik mawi jubʼiqʼ ksachisax ta uwach, mawi kʼo ukʼisbʼalil ri ukuʼinem» (Dan. 6:7-10, 19-22, 26, 27).

¹⁵ Ri tzʼibʼanel re jun salmo xubʼij: «Ri Ajawaxel kuyojij ronojel ri kichomanik ri winaq ri e qʼijilal taq dioses». Xuqujeʼ xubʼij: «Utz rech ri tinimit ri are uDios ri Ajawaxel, ri tinimit ri uchaʼom rech kux rech» (Sal. 33:10, 12). ¡Sibʼalaj utz che are ri Jehová kqaqʼijilaj oj!

16. ¿Jas qas qetaʼm, y jasche? (Chawilaʼ ri wachbʼal).

¹⁶ Qilom chi ri xubʼan ri Jehová ojer. Rumal laʼ, ¿jas kʼu kqeyeʼj che kkʼulmataj pa kebʼ oxibʼ qʼij? Qas qetaʼm che ri Jehová keʼukol na ri sukʼ taq upatanelabʼ pa ri «nimalaj kʼaxkʼolil» (Mat. 24:21; Dan. 12:1). Kubʼan wariʼ are chiʼ jun jupuq tinamit, kbʼix Gog re Magog che, kraj kubʼan kʼax chke ri sukʼ taq upataninelabʼ ri Jehová. Paneʼ are ri 193 tinamit che e kʼo pa ri Naciones Unidas, kʼo ta kipatan chuwach ri aj chikaj y chkiwach ri rajchʼojabʼ. Ri Jehová kubʼij che kubʼan wariʼ pa ri petinaq: «Je kʼu kinbʼan waʼ che ukʼutik ri nunimalil  xuqujeʼ ri nutastajik chkiwach ri tinimit winaq. In kinkʼutunisaj na wibʼ chkiwach we winaq riʼ, kkichʼobʼ kʼu na chi in riʼ ri Ajawaxel» (Ezeq. 38:14-16, 23; Sal. 46:10).

17. ¿Jas kkikʼulmaj na ri e qʼatal taq tzij re ri uwach Ulew, y ri kʼo ta kibʼachʼuyal?

¹⁷ Ri chʼoj che kubʼan Gog are ri kbʼanowik che kmajtaj ri kʼisbʼal chʼoj che kbʼix Armagedón che, pa wajun chʼoj ri Jehová kusach na kiwach «ri ajawinelabʼ [qʼatal taq tzij] re ronojel ri uwach ulew» (Apoc. 16:14, 16; 19:19-21). Are kʼu, «ri e kolom ri kikʼaslemal ri man kʼo ta kibʼachʼuyal [ri kʼo ta makaj pa ri kikʼaslemal] kejeqiʼ na amaqʼel cho ri ulew» (Prov. 2:21).

18. Junam rukʼ ri kubʼij Daniel 3:28, ¿jas kibʼanom e kʼi qastzij cristianos, y jasche?

¹⁸ Pa ronojel ri kʼulmatajinaq, e kʼi qastzij cristianos kiriqom kʼax pa ri kikʼaslemal rumal che kkiloqʼoqʼej ri Jehová, ri Nimalaj Qʼatal tzij. Qas kkaj kkipatanij ri Jehová rukʼ jun chʼajchʼoj kikʼaslemal junam kukʼ ri oxibʼ hebreos che xekam ta pa ri qʼaqʼ rumal che amaqʼel xeniman che ri aj chikaj (chasikʼij uwach Daniel 3:28).

19. ¿Jas kril ri Jehová are chiʼ kuqʼat tzij pa kiwiʼ ri upataninelabʼ, y jas rajawaxik kqabʼan kimik?

¹⁹ Ri salmista David xuchʼobʼo che nim ubʼanik kriqitaj ta makaj pa ri qakʼaslemal chuwach ri Dios. Xutzʼibʼaj: «Ajawaxel, lal kqʼat la tzij pa kiwiʼ ri nimaʼq taq tinimit: qʼataʼ la tzij pa nuwiʼ jachaʼ chi in tzʼaqat pa ronojel; qʼataʼ la tzij pa nuwiʼ jachaʼ chi man kʼo ta numak» (Sal. 7:8). Xuqujeʼ xubʼij: «Chinuchʼuqu ri nutzʼaqatikil pa ronojel xuqujeʼ chi man kʼo ta numak» (Sal. 25:21). Ri más kuya kikotemal chqe pa qakʼaslemal are che kojmakun ta chuwach ri Jehová, kqapatanij rukʼ ronojel qanimaʼ apastaneʼ ri kqakʼulmaj. We je kqabʼano, kqanaʼ ri xutzʼibʼaj ri salmista: «Utz kech ri man kʼo ta makaj pa ri kikʼaslemal, kiterenem kʼut ri utijonik ri Ajawaxel» (Sal. 119:1).