1. ¿Jas (o su) kubʼan ri Jehová che kilik ri upatanelabʼ?

 RI Jehová kril ri tajin kqakʼulmaj. Krilo chiʼ kojkikotik y chiʼ kojbʼisonik (Sal. 37:18). Are chiʼ krilo che kqakoj qachuqʼabʼ che upatanexik paneʼ kojbʼisonik, ri areʼ nim kril wariʼ. Y kraj kukubʼsaj qakʼuʼx y kojutoʼo.

2. ¿Jas kubʼan ri Jehová che kitoʼik ri ubʼanom chʼaqataʼq o paxinaq ri kanimaʼ y jas kqabʼano rech kqariq ri tobʼanik che kuyaʼo?

² Are chiʼ ri Biblia kchʼaw chkij ri uriqom kʼax ri kanimaʼ, ri Salmo 147:3 kubʼij che ri Jehová «keʼubʼotzʼ kʼu ri sokotajinaq» ri kanimaʼ. Wajun texto riʼ kubʼij ri kubʼan ri Jehová che kitoʼik ri kebʼisonik. ¿Jas kqabʼano rech kojkunik kqariq ronojel ri tobʼanik che kuya chqe? Chojchoman chrij jun winaq che xsokotajik, are kutzukuj jun doctor. Rech kkunatajik rajawaxik kubʼan ronojel ri kubʼij ri doctor che. Pa wajun kʼutunem riʼ kqil na ri kubʼij ri Biblia chke ri kʼo bʼis pa kanimaʼ y jas kkibʼan che ubʼanik pa ri kikʼaslemal juntir ri pixabʼ che kuyaʼo.

RI JEHOVÁ KUBʼIJ CHQE CHE NIM QAPATAN

3. ¿Jasche jujun winaq kkinaʼo che ko ta kipatan?

³ Oj ko pa jun uwach Ulew che ri winaq kkikʼut ta loqʼoqʼebʼal y e kʼi kbʼan kʼax chke y kkinaʼo che kʼo ta kipatan. Jun qachalal ubʼiʼ Helen a kubʼij: «Xinkʼiy pa jun familia  jawiʼ kʼo ta loqʼoqʼebʼal. Ri nutat sibʼalaj kʼaʼn y amaqʼel kubʼij chqe che kʼo ta qapatan». ¿La kʼo akʼulmam junam rukʼ wariʼ? Weneʼ kbʼan kʼax chawe kbʼix itzel taq tzij chawij y nikʼaj chik kkibʼano che kanaʼo che kʼo ta apatan. We je tajin kakʼulmaj, weneʼ kachomaj che ko ta nijun katraj.

4. ¿Jas kubʼij ri Jehová chqe pa ri Salmo 34:18?

⁴ Paneʼ nikʼaj chik kibʼanom kʼax chawe, are kʼu qas chakojoʼ che ri Jehová katraj y nim katril wi. Ri areʼ «naqaj kʼo wi che kitoʼtajisaxik ri ubʼanom chʼaqataʼq ri kanimaʼ» (chasikʼij Salmo 34:18). We ubʼanom kebʼ akʼuʼx, chnaʼtaj chawe che ri Jehová are xril ri kʼo pa awanimaʼ rumal laʼ xraj che xabʼan u Testigo (Juan 6:44). Amaqʼel katutoʼo rumal che katraj.

5. ¿Jas kqetaʼmaj chrij ri xubʼan ri Jesús che kilik ri winaq che itzel xeʼil kumal nikʼaj chik?

⁵ Ri xubʼan ri Jesús che kilik ri winaq kojutoʼ che uchʼobʼik ri kunaʼ ri Jehová. Are chiʼ ri Jesús xkʼojiʼ cho ri uwach Ulew, xril ri kʼax che kbʼan chke ri winaq y xel ukʼuʼx chke (Mat. 9:9-12). Are chiʼ jun ixoq che uriqom jun nimalaj yabʼil xuchap ri ratzʼyaq ri Jesús, ri areʼ xpe ta royowal xaneʼ xukubʼsaj ukʼuʼx y xubʼij utz taq tzij che (Mar. 5:25-34). Ri Jesús qas xukʼut ri kubʼan ri Jehová che kilik ri winaq (Juan 14:9). Rumal laʼ qas chakojoʼ che ri Jehová nim katril wi y are kril ri akojonik y ri loqʼoqʼebʼal che kanaʼ che.

6. ¿Jas kojkunik kqabʼano we kqachomaj che kʼo ta qapatan?

⁶ ¿Jas katkunik kabʼano we amaqʼel kachomaj che kʼo ta apatan? Chasikʼij textos jawiʼ kubʼij wi che Jehová nim katril wi y chatchoman chrij (Sal. 94:19). b We xatkun ta che ubʼanik ri kawaj kabʼano  o katkun taj kabʼan ri kkibʼan ri nikʼaj chik, mubʼan kebʼ akʼuʼx y mape awoyowal. Ri Jehová retaʼm ri katkun che ubʼanik y kutaʼ ta chawe ri katkun ta che ubʼanik (Sal. 103:13, 14). We bʼanom kʼax chawe machomaj che amak at. Amak ta at y machomaj che xa kʼo utz taj xabʼano. Chnaʼtaj chawe che ri Jehová kuqʼat na tzij pa kiwiʼ ri winaq che xkibʼan kʼax chawe (1 Ped. 3:12). Sandra, che xbʼan kʼax che are chiʼ kʼa nitzʼ na, kubʼij: «Amaqʼel kintaʼ che ri Jehová che kinutoʼo rech kinwil ri utz taq nubʼantajik junam rukʼ ri kubʼan ri areʼ».

7. ¿Jas ktobʼan wi chqe ri qakʼulmam pa ri qakʼaslemal ojer kanoq rech kqapatanij ri Jehová kamik?

⁷ Paneʼ kʼax kabʼan che ukojik, are kʼu ri Jehová katukojo rech keʼatoʼ ri nikʼaj chik. Uyaʼom jun nimalaj eqeleʼn chawe che katzijoj ri utzij (1 Cor. 3:9). Weneʼ rukʼ ri akʼulmam ojer kanoq kubʼano che más kachʼobʼ ri kkinaʼ ri nikʼaj chik. Nim keʼatoʼ wi riʼ. Helen, che xojchʼaw kan chrij pa ri párrafo 3, xyaʼ tobʼanik che y kamik tajin keʼutoʼ nikʼaj chik. Ri areʼ kubʼij: «Nabʼe kanoq xinnaʼo che kʼo ta nijun kinraj y kʼo ta nupatan, pero ri Jehová xubʼano che kinnaʼo che kinloqʼoqʼexik y che nim nupatan». Kamik ri qachalal Helen are precursora y sibʼalaj kkikotik.

RI JEHOVÁ KRAJ CHE QAS KQAKOJO CHE UKUYUM CHI RI QAMAK

8. ¿Jas kubʼij ri Jehová chqe pa Isaías 1:18?

⁸ Jujun upatanelabʼ ri Jehová kebʼison na rumal jun makaj che xkibʼan ojer kanoq, weneʼ are chiʼ majaʼ kkibʼan ki bautismo o are chiʼ kibʼanom chik. Pero chnaʼtaj chqe ri Jehová xuya ri ukʼojol pa qawiʼ rumal ri loqʼoqʼebʼal che kunaʼ chqe. Rumal laʼ kqakubʼsaj qakʼuʼx che ukuyum chi ri qamak. Ri areʼ kubʼij: «Tisaj qachomaj we jasach riʼ». c Y kubʼij chqe che are chiʼ kqabʼan wariʼ ri areʼ kusachisaj uwach ri qamak (chasikʼij Isaías 1:18). Sibʼalaj kojkikotik y kqamaltyoxij che ri Jehová kusach juntir ri makaj che xqabʼan ojer kanoq. Pero ri areʼ ksach ta pa ujolom ri utz che tajin kqabʼan kamik (Sal. 103:9, 12; Heb. 6:10).

9. ¿Jasche utz che are kojchoman chrij ri tajin kqabʼan kamik, ri kqabʼan na y are ta ri qabʼanom ojer kanoq?

⁹ ¿Jas katkunik kabʼano we katbʼison rumal ri abʼanom ojer kanoq? Are chatchoman chrij ri tajin kabʼan kamik y ri kabʼan na. Chachomaj ri xukʼulmaj ri apóstol Pablo. Ri areʼ xbʼisonik rumal che xubʼan kʼax chke ri cristianos ojer kanoq, pero retaʼm che xkuy umak rumal ri Jehová (1 Tim. 1:12-15). Rumal laʼ xaq ta xchoman chrij ri xubʼan chke ri cristianos y xaq ta xchoman chrij ri xkun che ubʼanik, che xubʼano che nim xil wi kumal ri winaq (Filip. 3:4-8, 13-15). Xaneʼ rukʼ kikotemal xutzijoj ri utzij ri Dios y are xchoman chrij ri kuriq na pa ri petinaq. Junam rukʼ ri Pablo, katkun taj kakʼex ri xabʼan ojer kanoq. Pero katkunik kaya uqʼij ri Jehová rukʼ ri kabʼan kamik y katchoman chrij ri petinaq.

10. ¿Jas kojkunik kqabʼano we xqabʼan kʼax che jun winaq?

¹⁰ Weneʼ katbʼison rumal ri kʼax che xabʼan chke nikʼaj chik. ¿Jas katkunik kabʼano? Chataʼ kuybʼal amak y chatzukuj ri kabʼano rech más ta kebʼison rumal ri xabʼan  chke (2 Cor. 7:11). Chataʼ che ri Jehová che keʼutoʼ ri xkiriq kʼax rumal ri xabʼano. Ri Jehová keʼutoʼ na xuqujeʼ katutoʼ at rech kiriq jamaril.

11. ¿Jas kqetaʼmaj chrij ri Jonás? (Xuqujeʼ chawilaʼ ri wachbʼal).

¹¹ Kʼo chawetaʼmaj chrij ri utz ta xabʼano y chayaʼ che ri Jehová katukojo. Chnaʼtaj ri Jonás chawe. Ri Jonás xbʼe ta pa Nínive, xaneʼ xbʼe pa jun chi lugar. Xyaʼ pixabʼ che y xubʼan ri xubʼij ri Jehová che (Jon. 1:1-4, 15-17; 2:7-10). Ri Jehová amaqʼel xukoj ri Jonás, xuya chi jumul che xbʼe pa Nínive y pa wajun mul riʼ qas xunimaj ri xubʼij ri Jehová che. Paneʼ xbʼison rumal ri xubʼan nabʼe, are kʼu xubʼan ri xbʼix che (Jon. 3:1-3).

RI JEHOVÁ KUKOJ RI ESPÍRITU SANTO RECH KUKUBʼSAJ QAKʼUʼX

12. ¿Jas kubʼan ri Jehová che uyaʼik jamaril chqe are chiʼ tajin kqaqʼaxej jun nimalaj kʼax? (Filipenses 4:6, 7).

¹² Are chiʼ kqariq jun nimalaj kʼax, ri Jehová kukoj ri espíritu santo che ukubʼsaxik qakʼuʼx. Are laʼ xkikʼulmaj ri qachalal Ron y Carol are chiʼ xukamisaj ribʼ ri kalkʼwal. Ri areʼ kkibʼij: «Kʼateʼ ta nabʼe mul waʼ che kqariq jun kʼax pa ri qakʼaslemal, pero wariʼ are ri más kʼax xqakʼulmaj. Kʼi taq mul kojwar taj chik, kqabʼan orar che ri Jehová y kqanaʼ ri jamaril che kubʼij pa Filipenses 4:6, 7» (chasikʼij). We tajin kakʼulmaj jun kʼax pa ri akʼaslemal y kanaʼo che ubʼanom chʼaqataʼq ri awanimaʼ chabʼij che ri Jehová ri tajin kakʼulmaj (Sal. 86:3; 88:1). Katkunik kattzijon kʼi taq mul rukʼ ri Jehová, amaqʼel chataʼ ri espíritu santo che. Ri areʼ qas kutatabʼej are chiʼ kabʼan orar che (Luc. 11:9-13).

13. ¿Jas kubʼan ri espíritu santo che qatoʼik rech kqaya ta kan upatanexik ri Jehová rukʼ sukʼilal? (Efesios 3:16).

¹³ ¿La akʼulmam jun kʼax pa akʼaslemal y kanaʼo che kʼo ta chi achuqʼabʼ? Ri espíritu santo katutoʼo rech kaya ta kan upatanexik ri Jehová rukʼ kikotemal (chasikʼij Efesios 3:16). Chqilaʼ ri xukʼulmaj jun qachalal ubʼiʼ Flora. E kebʼ rukʼ ri rachajil e misioneros, pero ri rachajil xuchʼabʼej chi jun ixoq y xkijach kibʼ. Ri qachalal Flora kubʼij: «Ri xubʼano sibʼalaj xuya bʼis chwe y ronojel taq qʼij y chaqʼabʼ kinchoman chrij. Rumal laʼ xintaʼ che ri Jehová che kuya ri espíritu santo chwe rech kubʼan ta kebʼ nukʼuʼx. Ri Jehová xinutoʼ chuwach wajun kʼax riʼ che xinnaʼo che kinkʼut ta che uchʼijik». Ri qachalal Flora xrilo che ri Dios xutoʼo y ri areʼ xukubʼsaj más ukʼuʼx chrij, qas retaʼm che kyaʼ ta kan rumal ri Jehová apastaneʼ ri kukʼulmaj. Y kubʼij chik: «Ri Jehová xubʼan wukʼ ri kubʼij Salmo 119:32: ‹Kinkowij kitzʼaqatisaxik ri e taqomal la kanojisaj kʼu la riʼ wanimaʼ che kikotemal›».

14. ¿Jas kojkunik kqabʼano rech ri Dios kuya ri espíritu santo chqe?

¹⁴ Are chiʼ kabʼij che riʼ Jehová che kuya ri espíritu santo chawe, ¿jas rajawaxik kabʼano? Chatzijoj ri utzij ri Dios y amaqʼel jat pa ri e riqbʼal ibʼ rech kariq ri espíritu santo. Ronojel taq qʼij chasikʼij ri Biblia, rech je wariʼ xaq xiw katchoman chrij ri kubʼij ri Jehová (Filip. 4:8, 9). Are chiʼ tajin kasikʼij ri Biblia, chatchoman chkij ri winaq re ojer y ri kʼax che xkikʼulmaj, tekʼuriʼ chatchoman chrij ri xubʼan ri Jehová che kitoʼik rech xkichʼij ri kʼax. Sandra, che xojchʼaw kan chrij pa ri párrafo 6, kʼi kʼax xuriq pa  ri ukʼaslemal. Ri areʼ kubʼij: «Qas kopan pa wanimaʼ ri xukʼulmaj ri José. Ri areʼ xuya taj che ri e kʼax xukʼulmaj xubʼano che xuya kan upatanexik ri Jehová» (Gén. 39:21-23).

RI JEHOVÁ KEʼUKOJ RI QACHALAL CHE UKUBʼSAXIK QAKʼUʼX

15. ¿Jachin ri kekunik kkikubʼsaj qakʼuʼx y jas kkibʼan che ubʼanik? (Xuqujeʼ chawilaʼ ri wachbʼal).

¹⁵ Are chiʼ kqariq kʼax, ri e qachalal qastzij kkikubʼsaj qakʼuʼx (Col. 4:11). Ri Jehová keʼukoj ri qachalal che ukʼutik chqawach che sibʼalaj kojuloqʼoqʼej. Kkikubʼsaj qakʼuʼx are chiʼ kojkitatabʼej o paneʼ xaq xiw keʼopan qukʼ. Weneʼ kkisikʼij jun texto re ri Biblia chqawach o kkibʼan orar qukʼ (Rom. 15:4). d Weneʼ jun qachalal achi o ixoq kunaʼtasaj chqe ri kubʼan ri Jehová che rilik ri jastaq y wariʼ kubʼano che kojbʼison ta más y kqariq jamaril. Ri qachalal xuqujeʼ kekunik kojkitoʼo are chiʼ kkikʼam lo qawa.

16. ¿Jas weneʼ rajawaxik kqabʼano rech ri nikʼaj chik kojkitoʼo?

¹⁶ Rech kattoʼik, weneʼ rajawaxik kabʼij na ri tajin kakʼulmaj. Ri qachalal qas katkaj y rumal laʼ kkaj katkitoʼo (Prov. 17:17). Pero weneʼ ketaʼm taj jas ri kanaʼo y ri kajwataj chawe (Prov. 14:10). We katbʼisonik, cheʼatzukuj ri qachalal che kʼo jun  nim kikojonik y chabʼij chke ri tajin kakʼulmaj. Utz we kabʼij chke ri kawaj kkibʼan che atoʼik. Katkunik kattzijon rukʼ jun o kebʼ kʼamal bʼe che kakubʼsaj akʼuʼx chkij. Y jujun qachalal ixoqibʼ utz kkinaʼo are chiʼ ketzijon kukʼ qachalal ixoqibʼ che kʼo nim kikojonik.

17. ¿Jas kbʼanowik che kqariq ta kubʼsal kʼuʼx y jas kqabʼano rech kojchʼakan chuwach?

¹⁷ Chatzukuj ri kachilanik ri qachalal. We sibʼalaj katbʼisonik, weneʼ kawaj taj katkʼojiʼ kukʼ ri nikʼaj chik. Weneʼ ri qachalal kkichʼobʼ ta ri tajin kakʼulmaj y weneʼ kkibʼij tzij che qas ta utz y che kubʼan kʼax chawe (Sant. 3:2). Kaya taj che wariʼ kubʼano che mat katkʼojiʼ kukʼ rech kariq ri tobʼanik che kajwataj chawe. Jun kʼamal bʼe ubʼiʼ Gavin, che uriqom depresión, kubʼij: «Kʼi taq mul, kwaj taj kinkʼojiʼ kuk ri nikʼaj chik». Paneʼ je wariʼ ri areʼ kukoj uchuqʼabʼ rech kkʼojiʼ kukʼ nikʼaj chik y sibʼalaj nim ktobʼan wi che. Jun qachalal ixoq ubʼiʼ Amy kubʼij: «Juntir ri nukʼulmam pa ri nukʼaslemal kubʼano che kinkubʼsaj ta nukʼuʼx chkij ri nikʼaj chik. Pero tajin kwetaʼmaj kiloqʼoqʼexik y kinkubʼsaj nukʼuʼx chkij junam rukʼ ri kubʼan ri Jehová. Wariʼ kuya kikotemal che ri Jehová xuqujeʼ chwe in».

RI KUBʼAN NA RI JEHOVÁ PA RI PETINAQ KUKUBʼSAJ QAKʼUʼX

18. ¿Jas kʼaslemal kqariq na pa ri petinaq y jas rajawaxik kqabʼan kamik?

¹⁸ Sibʼalaj kojkikotik rumal che naj ta chi kraj ri Jehová kusachisaj na juntir ri kuya bʼis chqe (Apoc. 21:3, 4). Pa ri kʼakʼ uwach Ulew, ko ta chi jun jastaq che kubʼan kʼax chqe y knaʼtaj ta chi chqe (Is. 65:17). Junam rukʼ ri qilom chik, ri Jehová jetaneʼ kukunaj ri bʼis che kqanaʼ kamik. ¡Kʼi kubʼan che ukubʼsaxik qakʼuʼx! Rumal laʼ qas chakojoʼ che ri Jehová sibʼalaj katraj (1 Ped. 5:7).