RI ISRAELITAS utz xkil ri e bʼixonem. Pa ri Biblia kʼi taq mul kuya ubʼixik chkij winaq che kkibʼan música o che kebʼixonik. Kʼo 10% bʼixonem chupam ri Biblia. Junam rukʼ ri Salmos, El Cantar de los Cantares y Lamentaciones che xetzʼibʼaxik rech kebʼixoxik. Ri wuj Music in Biblical Life (La música en la vida bíblica) kuya ubʼixik che ri israelitas kkikoj ri música pa ri jalajoj taq chak che kkibʼano.

Ri música re ronojel taq qʼij. Ri israelitas kkikoj ri música rech kkiya ubʼixik ri kkinaʼo (Is. 30:29). Ri ixoqibʼ kebʼixon rukʼ kikotemal, kexojowik y kkibʼan música rukʼ ri pandereta are chiʼ kchaʼ jun qʼatal tzij, pa ri e nimaqʼij y are chiʼ kechʼakan pa kiwiʼ ri kikʼulel (Juec. 11:34; 1 Sam. 18:6, 7; 1 Rey. 1:39, 40). Are chiʼ kkam jun winaq ri israelitas kkibʼan bʼix, che kukʼut ri bʼis kkinaʼo (2 Crón. 35:25). Junam rukʼ ri kubʼij jun wuj, kukʼutu che «ri hebreos sibʼalaj utz kkil ri música» (Cyclopedia, de McClintock y Strong).

Ri qʼatal taq tzij re Israel sibʼalaj utz xkil ri música. Ri qʼatal tzij Saúl xutaq uchʼabʼexik ri David rech kubʼan música rukʼ ri arpa (1 Sam. 16:18, 23). Are chiʼ ri David xok che qʼatal tzij, xubʼan jujun instrumentos, xutzʼibʼaj jeʼlalaj taq bʼixonem y xeʼuchaʼ jujun winaq rech kkibʼan música pa ri u templo ri Jehová (2 Crón. 7:6; Amós 6:5). Y ri qʼatal tzij Salomón xeʼuchaʼ achijabʼ ixoqibʼ rech kebʼixon pa ri rachoch (Ecl. 2:8).

Ri israelitas xkikoj ri música che uqʼijilaxik ri Jehová. Pa ri templo re Jerusalén kʼo 4,000 winaq che kenaʼw che ubʼanik música, kkikoj instrumentos che pa español kbʼix címbalos, instrumentos de cuerda, arpas y trompetas che (1 Crón. 23:5; 2 Crón. 5:12). Pero xaq xiw ta ri e areʼ xkikoj ri música che uqʼijilaxik ri Jehová. E kʼi israelitas kebʼixon pa ri bʼe are chiʼ kebʼe pa Jerusalén rech kebʼe pa ri e nimaqʼij che kebʼan chilaʼ (Sal. 120-134). Y, junam rukʼ ri kubʼij jun wuj che xkitzʼibʼaj ri judíos, ri israelitas kkibʼixoj ri Hallel a pa ri waʼim rech ri Pascua.

Ri música nim na ubʼanik chuwach ri utinamit ri Dios kamik (Sant. 5:13). Kojbʼixonik are chiʼ kqaya uqʼij ri Jehová (Efes. 5:19). Ri música kubʼano che más naqaj oj kʼo wi chke ri qachalal y kojutoʼ che uchʼijik ri e kʼax che kqakʼulmaj pa ri qakʼaslemal (Hech. 16:25; Col. 3:16). Rukʼ ri música kqakʼutu che kojkojon chrij ri Jehová y che sibʼalaj loqʼ chqawach.