1. ¿Jas ubʼanik jun winaq che kkubʼsax kʼuʼx chrij?

 JUN winaq che kkubʼsax kʼuʼx chrij amaqʼel kubʼij ri qastzij y kubʼan ri kubʼij (Sal. 15:4). Y ri e nikʼaj chik kkikubʼsaj kikʼuʼx chrij. Ri oj xuqujeʼ kqaj che ri e qachalal je kkichomaj waʼ chqij. ¿Jas kojtoʼwik rech kkikubʼsaj kikʼuʼx e nikʼaj chik chqij?

2. ¿Jas kqabʼan che ukʼutik che kuyaʼ kkubʼsax kʼuxaj chqij?

² Rech kkubʼsax kʼuʼx chqij rajawaxik kqakʼut rukʼ ri kqabʼano. Kjunamataj rukʼ ri pwaq: kʼax uchʼakik are kʼu kʼax ta usachik. Kojkunik kqakubʼsaj qakʼuʼx chrij ri Jehová, rumal che «ri e uchak kkikʼut ri ujikomal» (Sal. 33:4). Y ri areʼ kraj che je kqabʼan oj (Efes. 5:1). Pa wajun kʼutunem kqil na ri kikʼutbʼal jujun taq upatanelabʼ ri Jehová che xkesaj uwach y xkikʼutu che kuyaʼ kkubʼsax kʼuʼx chkij. Xuqujeʼ kqil na jobʼ bʼantajik che kojutoʼo rech kkubʼsax kʼuʼx chqij.

3, 4. a) ¿Jas xubʼan ri qʼaxal tzij Daniel che ukʼutik che kuyaʼ kkubʼsax kʼuʼx chrij? b) ¿Jas preguntas rajawaxik kojchoman chrij?

³ Ri qʼaxal tzij Daniel xuya kan jun utz kʼutbʼal chqawach. Are chiʼ xkʼam bʼi pa Babilonia, aninaq xkubʼsax kʼuxaj chrij. Y más na xkubʼsax kʼuʼx chrij are chiʼ rumal ri utobʼanik ri Jehová xkunik xubʼij ri kraj kubʼij ri rachikʼ ri qʼatal tzij Nabucodonosor. Jumul xuya ubʼixik jun jastaq che kʼo ta jun qʼatal tzij utz kuto: che ri Jehová petinaq royowal chrij ri Nabucodonosor. Rukʼ kowil  ukʼuʼx xtzijon rukʼ ri qʼatal tzij rumal che wajun achi riʼ sibʼalaj kʼaʼn (Dan. 2:12; 4:20-22, 25). Are chiʼ qʼaxinaq chi kʼi junabʼ ri Daniel xubʼan chi jun jastaq che xukʼutu che kkubʼsax kʼuʼx chrij, rumal che ri areʼ rukʼ tzʼaqatil xubʼij ri kraj kubʼij ri e tzij che xeqʼalajin chuwach jun tapya o pared pa ri palacio re Babilonia (Dan. 5:5, 25-29). Y are chiʼ qʼaxinaq chi ri tiempo ri Darío ri medo y ri e rachiʼl pa ri qʼatbʼal tzij xkilo che ri Daniel «man junam ta kukʼ ri nikʼaj» chik. Xuqujeʼ «man xkiriq ta kʼu jun tzujubʼal rech ri Daniel rumal rech chi ronojel ri kubʼano sibʼalaj tzʼaqat» (Dan. 6:3, 4). Ri e qʼatal taq tzij che kkiya ta uqʼij ri Jehová xkilo che kekunik kkikubʼsaj kikʼuʼx chrij ri Daniel.

⁴ Rukʼ ri ukʼutbʼal ri Daniel, chojchoman chrij wariʼ: «¿Jas kkichomaj ri e winaq chwij? ¿La kkikubʼsaj kikʼuʼx chwij y la qas kkilo che kinbʼan ri chak che kyaʼ chwe?». Sibʼalaj nim ubʼanik che kojchoman chkij ri preguntas riʼ rumal che are chiʼ kqakʼutu che kuyaʼ kkubʼsax kʼuʼx chqij, kqaya uqʼij ri Jehová.

5. ¿Jasche xkubʼsax kʼuʼx chrij ri Hananías?

⁵ Pa ri junabʼ 455 nabʼe chuwach ri qaqʼij, are chiʼ bʼanom chi ri tapya re Jerusalén, ri taqanel Nehemías xeʼuchaʼ e jujun achijabʼ che kkubʼsax kʼuxaj chkij rech kkikʼam ubʼe ri tinamit. Jun chke ri achijabʼ riʼ are ri Hananías, ri taqanel pa ri tinamit. Ri Biblia kubʼij che ri Hananías are «jun achi waʼ ri yaʼtal che chi  kkubʼisax kʼuxaj chrij, ri areʼ nim kʼu na kril wi ri Dios» (Neh. 7:2). Rumal che ri Hananías sibʼalaj kuloqʼoqʼej ri Jehová y kraj taj kuya bʼis che xutoʼo rech nim xril wi ri eqeleʼn che xyaʼ kan pa uqʼabʼ. Ri e bʼantajik riʼ xuqujeʼ kojutoʼo rech kkubʼsax kʼuxaj chqij.

6. ¿Jas xubʼan ri Tíquico che ukʼutik chuwach Pablo che kuyaʼ kukubʼsaj ukʼuʼx chrij?

⁶ Chqilaʼ chi ri ukʼutbʼal ri Tíquico, jun utzalaj rachiʼl ri Pablo che xkubʼsax kʼuʼx chrij. Are chiʼ xtzʼapix ri Pablo pa jun ja, are ri Tíquico xtoʼwik y xubʼij che ri areʼ are jun «jikalaj pataninel pa ri uchak ri Ajawaxel» (Efes. 6:21, 22). Xaq xiw ta xukubʼsaj ukʼuʼx ri Pablo chrij ri Tíquico che kukʼam bʼi ri cartas chke ri cristianos re Éfeso y Colosas, xaneʼ xuqujeʼ xukubʼsaj ukʼuʼx chrij che kukubʼsaj kikʼuʼx y kuya kichuqʼabʼ. Ri Tíquico kjunamataj kukʼ ri achijabʼ che kkubʼsax kʼuxaj chkij che kkilij ri kikojonik ri e qachalal (Col. 4:7-9).

7. ¿Jas utz kʼutbʼal kkiya ri e kʼamal bʼe y ri tobʼanelabʼ chqe?

⁷ Kimik sibʼalaj nim kqil ri kichak ri kʼamal taq bʼe y ri e tobʼanelabʼ, che e are e qachalal che kkubʼsax kʼuʼx chkij. Rumal che kejunamataj kukʼ ri Daniel, ri Hananías y ri Tíquico che nim kkil ri keqeleʼn. Jun kʼutbʼal, are chiʼ kojbʼe pa ri riqbʼal ibʼ chuxoʼl taq semanas, qas qetaʼm che kʼo kebʼanow ri asignaciones pa ri riqbʼal ibʼ. Y ri kʼamal taq bʼe nim kkilo are chiʼ ri e qachalal achijabʼ ixoqibʼ qas kkitijoj kibʼ y kkiya ri kasignaciones. Rumal laʼ, are chiʼ kqakʼam bʼi jun tijoxel pa ri riqbʼal ibʼ kqachomaj taj we kʼo kyaʼow ri chʼabʼal. Xuqujeʼ kqakubʼsaj qakʼuʼx che kʼo ri wuj che kqakoj che utzijoxik ri utzij ri Dios. Qas kqilo che ri e qachalal riʼ kojkichajij, rumal laʼ qas kqamaltyoxij che ri Jehová. Are kʼu ¿jas rajawaxik kqabʼan oj rech kkubʼsax kʼuʼx chqij?

8. Junam rukʼ kubʼij Proverbios 11:13, ¿jas chuwach rajawaxik kqachajij wi qibʼ?

⁸ Keqaj ri e qachalal y kqaj keqatoʼo are chiʼ kkiriq kʼax. Are kʼu rajawaxik kqachajij qibʼ y kqanim ta qibʼ pa ri kikʼaslemal. Pa ri congregación cristiana re ri nabʼe siglo xekʼojiʼ e winaq che aninaq kkitzijoj chke nikʼaj chik ri xbʼix chke, kkinim kibʼ pa kikʼaslemal e nikʼaj chik y kechʼaw chrij jastaq che yaʼtal taj kbʼixik (1 Tim. 5:13). Qastzij riʼ che kqaj taj kqabʼan qe junam kukʼ. Chqachomajampeʼ che jun qachalal kuya ubʼixik jun jastaq chqe che kraj taj kketaʼmaj e nikʼaj chik. Jun kʼutbʼal, jun qachalal ixoq kubʼij chqe che xuriq jun yabʼil o tajin kuqʼaxej chi jun kʼax, are kʼu kubʼij chqe che xaq xiw chqe oj kubʼij wi. Rajawaxik kqabʼan ri kubʼij (chasikʼij uwach Proverbios 11:13). * ¿Pa jas chi nikʼaj jastaq rajawaxik kqatzijoj ta ri yaʼtal ta ubʼixik?

9. ¿Jas rajawaxik kkibʼan chkijujunal ri e kʼo pa ri familia rech kkikʼutu che kkubʼsax kʼuʼx chkij?

⁹ Pa ri familia. Rajawaxik che konojel ri e kʼo pa ri familia kkitzijoj ta jujun taq jastaq che kkʼulmataj pa ri kachoch. Jun kʼutbʼal, weneʼ jun ixoq kubʼan jun jastaq che xaq kutzeʼj uwach ri rachajil y tekʼuriʼ ri rachajil kubʼij chi chke nikʼaj  chik. ¿La mat qastzij che utz taj kbʼan wariʼ? Utz taj, rumal che kraj ri rixoqil kubʼan ta kʼax riʼ che ri kunaʼo y kresaj ta ukʼixbʼal riʼ (Efes. 5:33). Ri e tat nan rajawaxik knaʼtaj chke che ri e kalkʼwal alabʼom alitomabʼ kkaj che nim keʼilik. Rumal laʼ, kekiyoqʼ taj o kkibʼij ta chke e nikʼaj chik ri utz taj kkibʼano (Col. 3:21). Y ri akʼalabʼ xuqujeʼ rajawaxik kkiya ta ubʼixik jastaq che kresaj ukʼixbʼal ri familia (Deut. 5:16). We konojel kkikoj kichuqʼabʼ rech kkitzijoj ta ri kkʼulmataj pa ri familia, kkʼojiʼ utzilal riʼ chkixoʼl.

10. Junam rukʼ ri kubʼij Proverbios 17:17, ¿jas kubʼan jun qastzij qachiʼl?

¹⁰ Kukʼ ri e qachiʼl. Qonojel kajwataj jun qachiʼl chqe rech kojchʼaw rukʼ. Are kʼu, jujun taq mul kʼax ubʼanik, rumal che weneʼ kʼamanaq ta chqe kqabʼij ronojel ri kqanaʼo. Y, we kqabʼij ri kqanaʼo y kʼateʼ kqato che ri qachiʼl xubʼij chi chke nikʼaj chik, sibʼalaj kʼax kqanaʼo. Are kʼu, sibʼalaj nim kqilo are chiʼ ri qachiʼl kutzijoj ta ri kqabʼij che. ¡Are waʼ ri kubʼan jun qastzij qachiʼl! (Chasikʼij uwach Proverbios 17:17).

11. a) ¿Jas kkibʼan ri kʼamal taq bʼe y ri kixoqil rech kkikʼutu che kkubʼsax kʼuʼx chkij? b) ¿Jas kqetaʼmaj chrij jun kʼamal bʼe che kuya ta ubʼixik ri retaʼm are chiʼ kʼo rukʼ ri ufamilia? (Chawilaʼ ri wachbʼal).

¹¹ Pa ri congregación. Ri e kʼamal taq bʼe che ketaʼm kkikʼol tzij kejunamataj rukʼ «jun tobʼal ibʼ chuwach ri kaqiqʼ» chke ri e qachalal (Is. 32:2). Kqaxeʼj ta qibʼ kojtzijon kukʼ chrij apachike jastaq rumal che qetaʼm che kkibʼij ta chi chke nikʼaj chik. Utz taj kqakʼot kichiʼ rech kkibʼij jastaq chqe che yaʼtal taj kqetaʼmaj. Xuqujeʼ, sibʼalaj nim keqil ri e qachalal ixoqibʼ che kkikʼot ta kichiʼ ri e kachajil rech kbʼix chke ri tajin kkʼulmataj pa ri congregación. Rumal laʼ, are jun nimalaj tewchibʼal are chiʼ ri e kʼamal taq bʼe kkibʼij ta chke ri kixoqil ronojel ri kkikʼulmaj ri e qachalal. Jun rixoqil jun  kʼamal bʼe xubʼij: «Kinmaltyoxik che ri wachajil kubʼij ta chwe ri kkikʼulmaj ri e qachalal are chiʼ kebʼe che kisolixik o ri e qachalal che kajwataj tobʼanik chke pa ri kikojonik. Kubʼij ta chwe e jachin kekisolij. Nim kwilo che kubʼan wariʼ rech kinnim ta wibʼ pa ri kikʼaslemal ri e qachalal y rech junam kenwilo are chiʼ kintzijon kukʼ konojel. Y qas wetaʼm che are chiʼ kinbʼij jun kʼax che che tajin kinriqo o kinbʼij che ri kinnaʼo kubʼij ta chi che jun chik». Qonojel kqaj che kkubʼsax kʼuʼx chqij. Rumal laʼ, chqilampeʼ jobʼ bʼantajik che kojutoʼo.

12. Chayaʼ ubʼixik jasche are ri loqʼoqʼebʼal kojtoʼwik rech kkubʼsax kʼuʼx chqij.

¹² Ri loqʼoqʼebʼal are ri kojtoʼwik rech kkubʼsax kʼuʼx chqij. Ri Jesús xubʼij che ri e kebʼ taqanik más nim kibʼanik are uloqʼoqʼexik ri Jehová y kiloqʼoqʼexik ri e qajil qatzʼaqat (Mat. 22:37-39). Rumal che kqaloqʼoqʼej ri Jehová, kqaj che kojux junam rukʼ, rumal che kojkunik kqakubʼsaj qakʼuʼx chrij. Jun kʼutbʼal, ri loqʼoqʼebʼal chke ri e qachalal kojutoʼo rech kqabʼij ta chke e nikʼaj chik ri qetaʼm chkij. Maqaya ubʼixik jastaq chkij che kubʼan kʼax chke o kresaj kikʼixbʼal (Juan 15:12).

13. ¿Jas kojutoʼ wi ri machʼachʼem rech kkubʼsax kʼuʼx chqij?

¹³ Ri machʼachʼem kojutoʼo rech kkubʼsax kʼuʼx chqij. Ri cristiano che kmachʼachʼik aninaq ta kuya ubʼixik jun jastaq rech kukʼutu che are nabʼe xetaʼmanik (Filip. 2:3). Xuqujeʼ kubʼij taj che retaʼm jastaq che kkun taj kuya ubʼixik. Jun chi jastaq che kqabʼano rech kqakʼutu che kojmachʼachʼik, are che are ta kqabʼij ri kqachomaj oj chrij jun jastaq che kuya ta ubʼixik pa ri Biblia ni pa ri e qawuj.

14. ¿Jasche rajawaxik qas kojchomanik?

¹⁴ Ri utz chomanik are ktoʼw jun cristiano rech kuchʼobʼo che kʼo tiempo che utz kchʼawik y kʼo tiempo utz taj kchʼawik (Ecl. 3:7). Pa jujun taq tinamit kbʼixik che «ri plata are ubʼixik kʼi tzij y ri oro are utzʼapixik uchiʼ jun winaq». Ri kraj kubʼij are che jujun taq mul are utz kojchʼaw taj. Rumal laʼ, Proverbios 11:12 kubʼij: «Ri utz uchomabʼal man kʼo ta jas kubʼij». Chqilampeʼ ri ukʼutbʼal jun kʼamal bʼe che amaqʼel ktaʼ tobʼanik che rech kril jastaq pa taq ri congregaciones che kʼax ubʼanik. Jun chi kʼamal bʼe kubʼij wariʼ chrij: «Amaqʼel kuchajij ribʼ chrij ri kubʼij y kuya ta ubʼixik jastaq che tajin kkʼulmataj pa nikʼaj chi congregaciones». Rumal ri utz ubʼantajik ri qachalal riʼ, nim kil wi kumal ri nikʼaj chi kʼamal bʼe pa ri ucongregación, rumal che qas ketaʼm che kuya ta ubʼixik jastaq che yaʼtal taj kketaʼmaj ri nikʼaj chik.

15. Chayaʼ ubʼixik rukʼ jun kʼutbʼal jasche ubʼixik ri qastzij kojutoʼo rech kkubʼsax kʼuʼx chqij.

¹⁵ Ri ubʼixik ri qastzij kutoʼ jun cristiano rech kkubʼsax kʼuʼx chrij. Are chiʼ jun winaq amaqʼel kubʼij ri qastzij, más kkubʼsax kʼuʼx chrij (Efes. 4:25; Heb. 13:18). Jun kʼutbʼal, chqachomajampeʼ che jun qachalal kraj che más utz kubʼan che uyaʼik ri chʼabʼal. Rumal laʼ kutaʼ utobʼanik jun rachiʼl rech kutatabʼej y kubʼij che jas rajawaxik kusukʼumaj. ¿Jachin che riʼ kutaʼ wi tobʼanik? ¿La che jun winaq che kubʼij ta ri qastzij o che jun che kubʼij ri qastzij rukʼ utz taq tzij? Qas qʼalaj ri urespuesta. Ri Biblia kubʼij: «Are  utz na ri yajanik chisaqil chukʼexwach ri ajawinik chikʼuyal. Are kuyaʼ na kjikibʼax kʼuxaj chrij ri achiʼl ri kasokonik» (Prov. 27:5, 6). Are chiʼ jun qachiʼl kubʼij chqe ri rajawaxik kqakʼexo weneʼ nabʼe kʼax kqabʼan che ubʼanik, are kʼu kuya utzilal chqe.

16. Junam rukʼ ri kubʼij Proverbios 10:19, ¿jasche sibʼalaj nim ubʼanik che kqajikʼ qibʼ?

¹⁶ Ri ujikʼik ibʼ kojutoʼo rech kkubʼsax kʼuʼx chqij. Wajun bʼantajik riʼ kojutoʼ rech kqajikʼ ri qaqʼ y kqabʼij ta jastaq che yaʼtal ta chqe kqabʼij (chasikʼij uwach Proverbios 10:19). Xuqujeʼ kqakʼut wajun bʼantajik riʼ are chiʼ kqakoj ri redes sociales. We kqachajij ta qibʼ, weneʼ kqabʼij jastaq pa ri redes sociales che yaʼtal ta chqe kqaya ubʼixik. We kqabʼan wariʼ kojkun ta chik kqatzalij qibʼ y kqabʼan kʼax chke nikʼaj chik. Ri ujikʼik ibʼ xuqujeʼ kojutoʼo rech qas kqachomaj na ri kqabʼij chke ri qakʼulel are chiʼ kkitaʼ jastaq chqe chkij ri e qachalal. Weneʼ kkʼulmataj wariʼ pa ri tinamit che qʼatem wi uwach ri qachak are chiʼ ri policías kkikʼot qachiʼ. Ri kojtoʼwik are chiʼ kqakʼulmaj wariʼ are wajun pixabʼ: «Kinkoj jun jikʼabʼal upachiʼaj pa nuchiʼ» (Sal. 39:1). Kqaj che ri qafamiliares, ri e qachiʼl, ri e qachalal pa ri congregación o jun chi winaq kkikubʼsaj kikʼuʼx chqij. Rumal laʼ rech kojkunik kqabʼan wariʼ rajawaxik kqajikʼ qibʼ che ri qatzij.

17. ¿Jas rajawaxik kqabʼan qonojel rech kʼo utzilal pa ri congregación?

¹⁷ Sibʼalaj kojmaltyoxin che ri Jehová che oj kʼo pa jun familia che kkaj kibʼ y che kkubʼsax kʼuʼx chkij. Kajwataj chuqʼabʼ rech ri e qachalal kkikubʼsaj kikʼuʼx chqij. We pa qajujunal kqakoj qachuqʼabʼ rech kojloqʼoqʼenik, kojmachʼachʼik, utz kojchomanik, kqabʼij ri qastzij y kqajikʼ qibʼ kojtobʼan riʼ rech kʼo utzilal pa ri congregación. Rumal laʼ, chqesaj uwach ri qaDios, Jehová, y chqakojoʼ qachuqʼabʼ rech ri e qachalal kkikubʼsaj kikʼuʼx chqij.