KʼUTUNEM 40
Kekʼam bʼi e «kʼi winaq pa ri kolomalaj bʼe»
«Ri xekikʼam kibʼe kʼi winaq pa ri kolomalaj bʼe, kejuluw na jachaʼ ri raxalaj kaj; ¡kejuluw na chbʼe qʼij saq, e junam kukʼ taq ri chʼumil!» (DAN. 12:3).
BʼIXONEM 151 Jehová keʼusikʼij na
RI KQETAʼMAJ NA *
1. ¿Jas jastaq kkʼulmataj na are chiʼ kuqʼat tzij ri Cristo pa Mil Junabʼ?
¿LA KQACHʼOBʼ ri kikotemal kuya ri kʼastajibʼal are chiʼ kuqʼat tzij ri Cristo pa Mil Junabʼ? Qonojel kqaj kqil kiwach ri e qachalal o ri e qachiʼl che e kaminaq. Ri Jehová xuqujeʼ kraj che kopan ri qʼij riʼ (Job 14:15). Chojchoman chkij ri kʼiʼalaj winaq che kekʼastaj na lo pa ronojel ri uwach Ulew. Junam che xqetaʼmaj kan pa ri jun kʼutunem, «ri winaq ri xkibʼan ri utz» che kʼo ri kibʼiʼ pa ri wuj re kʼaslemal, «kekʼastaj na rech kkʼojiʼ na kikʼaslemal» (Hech. 24:15; Juan 5:29). Weneʼ are ri e qachalaxik ri nabʼe kekʼastaj loq. * Xuqujeʼ, «ri xkibʼan etzelal», ri xekun taj xketaʼmaj uwach ri Jehová y xkipatanij taj, «kekʼastaj na che kʼoqotajem [qʼatoj tzij]».
2, 3. a) Junam rukʼ ri kubʼij Isaías 11:9, 10, ¿jas kbʼan che uyaʼik ri tijonik che kbʼan na pa ronojel ri uwach Ulew? b) ¿Jas kqil na pa wajun kʼutunem?
2 Konojel ri kekʼastaj na loq kʼo kʼi kketaʼmaj na (Is. 26:9; 61:11). Rumal laʼ rajawaxik kyaʼ na jun nimalaj tijonik (chasikʼij uwach Isaías 11:9, 10). Ri winaq che xkibʼan ta ri utz, rajawaxik kketaʼmaj na jasche xaq xiw ri Jehová taqal che kuqʼat tzij, kketaʼmaj na chrij ri Jesucristo, ri uQʼatbʼal tzij ri Dios y ri tojbʼal mak. Xuqujeʼ ri xkibʼan ri utz, ronojel taq qʼij kketaʼmaj na kʼakʼ taq jastaq chrij ri kubʼan ri Jehová. E jujun chke ri upatanelabʼ ri Jehová riʼ xekamik are chiʼ majaʼ ktzʼaqat utzʼibʼaxik ri Biblia. Rumal laʼ, ri xkibʼan ri utz y ri xkibʼan ri utz taj kʼo kʼi kketaʼmaj na.
3 Pa wajun kʼutunem kqil na ri kirespuestas ri preguntas riʼ: ¿jas kbʼan che kitijoxik ri winaq? ¿jas kkikʼulmaj na ri kkikʼam ri tijonik che kyaʼ chke? y ¿jas kkikʼulmaj ri kkaj taj? Rajawaxik kqetaʼmaj ri kirespuestas ri preguntas riʼ. Rumal laʼ, kqil na e jujun profecías re ri wuj re Daniel y Apocalipsis che kojkitoʼ che uchʼobʼik ri kkʼulmatajik are chiʼ kekʼastaj lo ri winaq. Nabʼe, chqilaʼ ri kubʼij ri profecía re Daniel 12:1, 2.
«RI KATAJIN KEWAR CHUPAM TAQ RI MUQBʼAL KEKʼASTAJ NA»
4, 5. ¿Jas kuya ubʼixik Daniel 12:1 che kkʼulmataj pa ri kʼisbʼal taq qʼij?
4 (Chasikʼij uwach Daniel 12:1). Pa ri wuj re Daniel kuya ubʼixik ri kkʼulmataj pa ri kʼisbʼal taq qʼij. Jun kʼutbʼal, Daniel 12:1 kubʼij che ri Miguel, ri Jesucristo, «kutoʼ na ri» utinamit ri Dios. Jun uchʼaqapil wajun profecía riʼ xtzʼaqat pa ri 1914, are chiʼ ri Jesús xux qʼatal tzij re ri uQʼatbʼal tzij ri Dios.
5 Xuqujeʼ, xbʼix che ri Daniel che ri Jesús kkʼastaj pa ri tiempo «re kʼaxkʼol, jun joqʼotaj ri man kʼo ta chi jun ri junam ta rukʼ tza are taq e kʼolinaq uloq». Ri tiempo riʼ are ri «nimalaj kʼaxkʼolil» che kuya ubʼixik pa Mateo 24:21. Ri Jesús kwalij che utoʼik uwiʼ ri utinamit ri Dios chukʼisbʼal ri tiempo re kʼaxkʼolil, kraj kubʼij, are chiʼ kumaj ri Armagedón. Ri wuj re Apocalipsis kubʼij «kʼiʼalaj winaq» chke ri kekʼasiʼ kan «pa ri nimalaj kʼaxkʼolil» (Apoc. 7:9, 14).
6. ¿Jas kkʼulmatajik are chiʼ ri kʼiʼalaj winaq kekʼasiʼ kan pa ri nimalaj kʼaxkʼolil? (Xuqujeʼ chawilaʼ pa wajun wuj riʼ ri kʼutunem re ri «Kipreguntas ri sikʼinelabʼ» che kchʼaw chkij ri winaq che kewalajisax cho ri uwach Ulew).
6 (Chasikʼij uwach Daniel 12:2). ¿Jas kkʼulmatajik are chiʼ ri kʼiʼalaj winaq kekʼasiʼ kan pa ri tiempo re kʼaxkʼolil? Ri profecía kchʼaw chrij jun kʼastajibʼal. Nabʼe kanoq xqachomaj che Daniel 12:2 kchʼaw chrij ri kʼastajibʼal pa ri kaj o ri xbʼan che utzijoxik ri utzij ri Dios are chiʼ xa jubʼiqʼ xraj che xqʼatex uwach pa ri 1918. * Are kʼu, kimik kqachʼobʼ chik che ri e tzij riʼ are kchʼaw chrij ri kikʼastajibʼal ri kaminaqibʼ pa ri kʼakʼ uwach Ulew. Che kkʼulmatajik are chiʼ kkʼis ri kʼisbʼal taq qʼij y are chiʼ qʼaxinaq chi kan ri chʼoj Armagedón.
7. a) ¿Jas kraj kubʼij che e jujun kekʼastaj loq rech «kekʼasiʼ na [...] chbʼe qʼij saq»? b) ¿Jasche are ri «kʼastajibʼal ri sibʼalaj utz na»?
7 ¿Jas kraj kubʼij Daniel 12:2 are chiʼ kubʼij che e jujun kekʼastaj loq rech «kekʼasiʼ na [...] chbʼe qʼij saq»? Kraj kubʼij che ri e winaq kekʼastajik y kketaʼmaj kiwach ri Jehová y ri Jesús, o kkiya ta kan retaʼmaxik chkij, y keniman chke pa ri 1,000 junabʼ, kkiriq na ri kʼaslemal che kʼo ta ukʼisik (Juan 17:3). Wariʼ are ri «kʼastajibʼal ri sibʼalaj utz na» chuwach ri xkil e jujun winaq ojer (Heb. 11:35). ¿Jasche? Rumal che ri winaq che xekʼastaj ojer xekam chi jumul.
8. ¿Jas kraj kubʼij che e jujun kekʼastaj loq rech «esbʼal kʼixbʼal xuqujeʼ che ri xibʼibʼal ri e junalik»?
8 Are kʼu konojel ta ri winaq che kekʼastaj loq kkikʼam ri tijonik che kuya ri Jehová chke. Ri profecía re Daniel kubʼij che e jujun kekʼastaj loq rech «esbʼal kʼixbʼal xuqujeʼ che ri xibʼibʼal ri e junalik». Rumal che kkinimaj ta ri Jehová, ktzʼibʼax ta ri kibʼiʼ pa ri wuj re kʼaslemal y kkiriq ta ri kʼaslemal che kʼo ta ukʼisik. Kkiriq na «ri xibʼibʼal ri e junalik» o ksachisax na kiwach. Rumal laʼ, ri kyaʼ ubʼixik pa Daniel 12:2 are tajin kchʼaw chrij ri kkikʼulmaj na ri kekʼastaj loq, are chiʼ kil ri kkibʼan na * (Apoc. 20:12). E jujun kkiriq na ri kʼaslemal kʼo ta ukʼisik e nikʼaj chik kkiriq taj.
KEKʼAM BʼI E «KʼI WINAQ PA RI KOLOMALAJ BʼE»
9, 10. a) Junam rukʼ kubʼij Daniel 12:3, ¿jas más kkʼulmatajik are chiʼ qʼaxinaq chi ri nimalaj kʼaxkʼolil? b) ¿E jachin «kejuluw na jachaʼ ri raxalaj kaj»?
9 (Chasikʼij uwach Daniel 12:3). ¿Jas más kkʼulmataj pa ri tiempo «re kʼaxkʼol», che naqaj chi kʼo wi? Pa ri versículo 3 re Daniel 12 kuya chi ubʼixik jun jastaq che kkʼulmatajik are chiʼ qʼaxinaq chi ri nimalaj kʼaxkʼolil.
10 ¿E jachin ri «kejuluw na jachaʼ ri raxalaj kaj»? Ri xuya ubʼixik ri Jesús pa Mateo 13:43 kojutoʼ che uchʼobʼik. Ri areʼ xubʼij: «Are kʼu ri winaq ri e sukʼ kejuluw na je jas ri qʼij pa ri rajawibʼal ri kiTat». Are chiʼ xubʼij wariʼ ri Jesús, tajin kchʼaw chkij «ri e ralkʼwal ri rajawibʼal ri Dios», kraj kubʼij, ri e rachalal che e chaʼom rech kkiqʼat tzij rukʼ pa ri uQʼatbʼal tzij ri Dios (Mat. 13:38). Rumal laʼ Daniel 12:3 tajin kchʼaw chkij ri e chaʼom y ri chak che kkibʼano are chiʼ kkiqʼat tzij pa ri Mil Junabʼ.
Ri e 144,000 kechakun rukʼ ri Jesucristo rech kkikʼam ubʼe ri tijonik che kyaʼ chke ri winaq pa ri 1,000 junabʼ. (Chawilaʼ ri párrafo 11).
11, 12. ¿Jas chak kkibʼan ri 144,000 pa ri 1,000 junabʼ?
11 Ri e chaʼom kkikʼam «kibʼe kʼi winaq pa ri kolomalaj bʼe». ¿Jas kkibʼan che ubʼanik wariʼ? Kechakun rukʼ ri Jesucristo rech kyaʼ ri tijonik chke ri winaq waral pa ri uwach Ulew pa 1,000 junabʼ. Ri e 144,000 xaq xiw ta keʼux qʼatal taq tzij, xaneʼ xuqujeʼ keʼux e kojol tabʼal toqʼobʼ (Apoc. 1:6; 5:10; 20:6). Rumal laʼ, ketobʼanik rech kekunax «ri nimaʼq taq tinamit» rech ri winaq kkiriq ri tzʼaqatalaj kʼaslemal (Apoc. 22:1, 2; Ezeq. 47:12). ¡Qastzij riʼ che wariʼ kuya jun nimalaj kikotemal chke ri e chaʼom are chiʼ ketobʼanik!
12 ¿E jachin ri e kʼo chkixoʼl ri e «kʼi» che kekʼam bʼi «pa ri kolomalaj bʼe»? Are ri kekʼastaj loq, ri kekʼasiʼ kan pa ri Armagedón y ri akʼalabʼ che keʼalax na pa ri kʼakʼ uwach Ulew. Chukʼisbʼalil ri 1,000 junabʼ, konojel ri winaq keʼux tzʼaqat. Tekʼuriʼ, ¿jampaʼ ktzʼibʼax ri kibʼiʼ rukʼ tinta pa ri wuj re kʼaslemal?
RI UKʼISBʼAL QʼATOJ TZIJ
13, 14. ¿Jas rajawaxik kkikʼut konojel ri e tzʼaqatalaj taq winaq are chiʼ majaʼ kkiriq ri kʼaslemal che kʼo ta ukʼisik?
13 Chnaʼtaj chqe che ri winaq tzʼaqat kraj ta kubʼij che xas kuriq wiʼ ri kʼaslemal che kʼo ta ukʼisik. Chenaʼtaj ri Adán y Eva chqe. Ri e areʼ e tzʼaqat, are kʼu rajawaxik xkikʼutu we qastzij kkaj kkinimaj ri Jehová rech kkiriq ri kʼaslemal kʼo ta ukʼisik. Are kʼu sibʼalaj bʼisobʼal rumal che xeniman ta che (Rom. 5:12).
14 Junam rukʼ ri qilom chik, konojel ri winaq e tzʼaqat chik are chiʼ kkʼis ri 1,000 junabʼ. ¿La konojel ri e tzʼaqatalaj taq winaq riʼ amaqʼel kkitoʼ uwiʼ ri uQʼatbʼal tzij ri Jehová? ¿O e kʼo jujun che kejunamataj kukʼ ri Adán y ri Eva, che paneʼ e tzʼaqat, xeʼux ta sukʼ? ¿Jas kbʼanik we e kʼo winaq je kkibʼan wariʼ?
15, 16. a) ¿Jampaʼ kkikʼut ri kisukʼilal konojel ri e winaq che ri Jehová? b) ¿Jas kkiriq na ri winaq che kekunik kkiqʼaxej ri kʼisbʼal qʼatoj tzij?
15 Ri Satanás ktzʼapix pa 1,000 junabʼ. Rumal laʼ kkun ta chik keʼusubʼ ri winaq. Are kʼu chiʼ kkʼis ri 1,000 junabʼ ktzoqopix chi na jubʼiqʼ tiempo rech keʼusubʼ konojel ri e tzʼaqatalaj taq winaq. Are chiʼ kkʼulmataj wariʼ, konojel rajawaxik kkikʼut na jachin kkitoʼ uwiʼ we are ri Dios y ri uQʼatbʼal tzij (Apoc. 20:7-10). Rukʼ ri kkichaʼ ubʼanik ktzʼibʼax na ri kibʼiʼ pa ri wuj re kʼaslemal o ktzʼibʼax taj.
16 E jujun —qetaʼm taj e jampaʼ— keʼux junam kukʼ ri Adán y ri Eva, che kkixutuj ri uQʼatbʼal tzij ri Jehová. ¿Jas kkʼulmataj kukʼ? Apocalipsis 20:15 kubʼij: «Ri man e tzʼibʼatal ta kibʼiʼ pa ri wuj re ri kʼaslemal, xekʼiʼaq pa ri cho re qʼaqʼ». Are waʼ ri kkʼulmataj kukʼ, ksachisax kan kiwach chbʼe qʼij saq. Are kʼu más na e kʼi ri kekunik kkiqʼaxej ri ukʼisbʼal qʼatoj tzij. Ktzʼibʼax ri kibʼiʼ rukʼ tinta pa ri wuj re kʼaslemal.
PA «RI KʼISBʼAL JOQʼOTAJ»
17. Junam rukʼ ri kubʼij Daniel 12:4, 8-10, ¿jas xbʼix che ri Daniel che kkʼulmataj na pa ri kʼisbʼal taq qʼij?
17 ¡Sibʼalaj kuya kikotemal chqe are chiʼ kojchoman chrij ri kqariq na pa ri petinaq! Are kʼu jun ángel xuqujeʼ xubʼij jun jastaq nim ubʼanik che ri Daniel chrij ri kkʼulmataj pa ri kʼisbʼal taq qʼij, «ri kʼisbʼal joqʼotaj» (chasikʼij uwach Daniel 12:4, 8-10; 2 Tim. 3:1-5). Xubʼij che kkʼiyar na ri qastzij etaʼmanik. Rumal laʼ ri upatanelabʼ ri Dios más kkichʼobʼ chik ri kubʼij ri profecías re ri wuj re Daniel. Ri ángel xuya chi ubʼixik jun jastaq chrij ri kʼisbʼal taq qʼij. Xubʼij: «Ri itzel taq winaq kkitaqej na kibʼanik taq etzelal, man kkichʼobʼ ta kʼut ri kkʼulmatajik».
18. ¿Jas kkiriq na ri itzel taq winaq?
18 Kimik, jetaneʼ ri itzel taq winaq kkiriq ta kʼax rumal ri kkibʼano (Mal. 3:14, 15). Are kʼu naj ta chi kraj ri Jesús kuqʼat tzij pa kiwiʼ ri winaq che kejunamataj kukʼ kʼisikʼ y ketas chkij ri winaq che kejunamataj kukʼ chij (Mat. 25:31-33). Ri e itzel taq winaq kekʼasiʼ ta kan pa ri nimalaj kʼaxkʼolil y kekʼastaj ta lo pa ri kʼakʼ uwach Ulew. Ri kibʼiʼ kriqitaj ta pa ri «wuj [...] ri kenaʼtax wi», che kyaʼ ubʼixik pa Malaquías 3:16.
19. Junam rukʼ ri kubʼij Malaquías 3:16-18, ¿jas rajawaxik kqabʼan kimik y jasche?
19 Kimik are ri tiempo che kqakʼutu che oj kʼo ta chkixoʼl ri itzel taq winaq (chasikʼij uwach Malaquías 3:16-18). Ri Jehová tajin keʼumulij ri keʼux na utinamit o ri e rech areʼ. ¿La mat qastzij che kqaj kojkʼojiʼ chkixoʼl ri e winaq riʼ?
¡Sibʼalaj kojkikot riʼ are chiʼ kqil kiwach ri Daniel, ri e qachalal y e nikʼaj chik che kekʼastaj lo pa ri kʼakʼ uwach Ulew! (Chawilaʼ ri párrafo 20).
20. ¿Jas kʼisbʼal tzujunik xubʼan ri Jehová che ri Daniel, y jasche kawaj at che qas kbʼantajik?
20 Kimik oj kʼo pa ri tiempo che tajin kkʼulmataj jastaq nim ubʼanik. Y naj ta chi kraj kkʼulmataj chi na nikʼaj che más mayibʼal rilik. Tajin knaqajin ri qʼij che ksachisax uwach ronojel ri itzelal. Are chiʼ kbʼantaj wariʼ, kqil na ri kubʼan ri Jehová che ubʼanik ri xutzujuj che ri Daniel, kubʼij: Pa «ri kʼisbʼal taq qʼij katwalij na che ukʼamik ri tojbʼal awech» (Dan. 12:13). ¿La tajin karayij chik che kopan ri tiempo che ri Daniel, y ri e awachalaxik, kekʼastaj lo pa ri kʼakʼ uwach Ulew? We jeʼ, chakojoʼ achuqʼabʼ rech kaya ta kan upatanexik ri Jehová y rech je riʼ ri abʼiʼ ktzʼibʼax rukʼ tinta pa ri wuj re kʼaslemal.
BʼIXONEM 80 Chanaʼ ri rutzilal ri Jehová
^ Wajun kʼutunem kojutoʼ che uchʼobʼik ri nimalaj tijonik che kyaʼ na pa ri petinaq y che kriqitaj pa Daniel 12:2, 3. Kqil na jampaʼ kkʼulmataj wariʼ y jachin ketijox na. Xuqujeʼ kqil na ri keʼutoʼ ri tijonik ri kekʼojiʼ kan pa ri uwach Ulew chiʼ kkʼis ri Mil Junabʼ re ri uqʼatbʼal tzij ri Cristo.
^ Weneʼ ri e nabʼe kekʼastaj loq are ri xekam pa ri kʼisbʼal taq qʼij, tekʼuriʼ ri nikʼaj chik che e teren chkij y ri e kaminaq más ojer. We je riʼ kbʼantajik, konojel riʼ ri winaq kketaʼmaj kiwach ri xekʼojiʼ pa ri kitiempo are chiʼ xekʼasiʼk. Ri Biblia kubʼij che ri kʼastajibʼal pa ri kaj kbʼan na «pa ri kicholajil», rumal laʼ kqachʼobʼo che ri kʼastajibʼal chuwach ri Ulew xuqujeʼ kbʼan pa cholajil (1 Cor. 14:33; 15:23).
^ Wajun kʼutunik riʼ kusukʼumaj ri xyaʼ ubʼixik pa ri capítulo 17 re ri wuj Prestemos atención a las profecías de Daniel y pa ri wuj La Atalaya 1 re julio 1987, uxaq 21 kopan 25.
^ Are kʼu, ri e tzij ri «e utz» y ri «e lawalo» che kubʼij pa Hechos 24:15 y «ri xkibʼan ri utz» y «ri xkibʼan etzelal» pa Juan 5:29 kchʼaw chrij ri xkibʼan kan ri e winaq are chiʼ majaʼ kekamik.
