1. ¿Jasche kqamay taj che ri e winaq kkikubʼsaj ta kikʼuʼx chkij ri nikʼaj chik?

 PA WAJUN uwach Ulew riʼ che kʼo pa uqʼabʼ ri Satanás, e kʼi winaq kkikubʼsaj ta kikʼuʼx chkij nikʼaj chik. Kʼi taq mul bʼanom kʼax chke rumal ri kkichaʼ ubʼanik ri kʼo nimaʼq taq kikʼay, ri qʼatal taq tzij y ri e kʼamal taq bʼe ke ri e kojonem. Xuqujeʼ kbʼan wariʼ chke kumal ri e kachiʼl, ri e kikʼulja y ri e kachalaxik. Qetaʼm che kkʼulmataj wariʼ. Rumal che ri Biblia kubʼij che «pa ri kʼisbʼal taq qʼijol» ri e winaq kuya taj kkubʼsax kʼuʼx chkij, kkimol tzij chkij ri kajil kitzʼaqat y kekijach ri e kachiʼl pa kiqʼabʼ ri kikʼulel. Kkibʼan ke jas ri kubʼan ri Satanás, rumal che areʼ taqal ta che kkubʼsax kʼuʼx chrij (2 Tim. 3:1-4; 2 Cor. 4:4).

2. a) ¿Jachin chrij kqakubʼsaj wi ronojel qakʼuʼx? b) ¿Jas weneʼ kkichomaj e jujun?

² Are kʼu ri oj qastzij cristianos qetaʼm che kojkunik kqakubʼsaj ronojel qakʼuʼx chrij ri Jehová (Jer. 17:7, 8). Qas qetaʼm che ri areʼ qas kojuloqʼoqʼej y kʼo ta jumul keʼuya kan ri e rachiʼl (Sal. 9:10). Xuqujeʼ kojkunik kqakubʼsaj qakʼuʼx chrij ri Jesucristo rumal che xuya ri ukʼaslemal rumal qech (1 Ped. 3:18). Qas qilom che kojkunik kqakubʼsaj qakʼuʼx chrij ri Biblia (2 Tim. 3:16, 17). Qas qetaʼm che kojkunik kqakubʼsaj qakʼuʼx chrij ri Jehová, ri Jesús y ri Biblia. Are kʼu weneʼ e jujun kkichomaj we amaqʼel kekunik kkikubʼsaj kikʼuʼx chkij ri e qachalal. Chqilampeʼ jasche kqabʼij che kojkunik kqakubʼsaj qakʼuʼx chkij.

3. Junam rukʼ ri kubʼij Marcos 10:29, 30, ¿jas uyaʼom ri Jehová chqe?

³ Ri Jehová uyaʼom chqe che kojkʼojiʼ pa ri utinamit. Y rumal wariʼ, kqariq kʼi taq tewchibʼal (chasikʼij uwach Marcos 10:29, 30). Pa ronojel ri uwach Ulew e kʼo qachalal che  xuqujeʼ kkikoj kichuqʼabʼ che uloqʼoqʼexik ri Jehová y keniman che. Paneʼ junam ta ri qachʼabʼal, ri qanaqʼatisabʼal y ri qatzʼyaq, are kʼu keqaloqʼoqʼej are chiʼ kqachʼobʼ kiwach. Xuqujeʼ utz kqilo che junam kqaqʼijilaj ri Jehová kukʼ (Sal. 133:1).

4. ¿Jasche keʼajwataj ri qachalal chqe?

⁴ Kimik, más rajawaxik che kʼo utz achilanik chqaxoʼl. Jujun taq mul, ri e qachalal kojkitoʼ chuwach ri kʼax che kqariqo (Rom. 15:1; Gál. 6:2). Xuqujeʼ kojkitoʼo rech kqaya ta kan upatanexik ri Jehová y rech oj ko pa ri qakojonik (1 Tes. 5:11; Heb. 10:23-25). Sibʼalaj bʼisobʼal riʼ wet mat e kʼo ri e qachalal che qatoʼik chkiwach ri e qakʼulel: ri Satanás y ri itzel taq winaq che e kʼo pa uqʼabʼ. Naj ta chi kraj, ri Satanás y ri e kʼo pa uqʼabʼ kkibʼan na kʼax chke ri upatanelabʼ ri Dios. Chiʼ kopan ri tiempo riʼ sibʼalaj kojkikot riʼ rumal che kʼo ri kitobʼanik ri e qachalal qukʼ.

5. ¿Jasche kʼax kqabʼan che ukubʼsaxik qakʼuʼx chkij ri qachalal?

⁵ Weneʼ e jujun qachalal kʼax kkibʼan che ukubʼsaxik kikʼuʼx chkij nikʼaj chik. ¿Jasche? Rumal che weneʼ jun qachalal xubʼij che jun chik ri tajin kukʼulmaj, are kʼu wajun qachalal riʼ xutzijoj chke nikʼaj chik. O weneʼ kʼo jun xutzujuj jun jastaq che, are kʼu xubʼan taj. O weneʼ jun qachalal xubʼij jun tzij che xubʼan kʼax che jun chik. Rumal laʼ, ¿jas kojtoʼwik rech kqakubʼsaj qakʼuʼx chkij ri qachalal?

6. Junam rukʼ ri kubʼij 1 Corintios 13:4-8, ¿jas kubʼan ri loqʼoqʼebʼal che qatoʼik rech kqakubʼsaj más qakʼuʼx chkij ri qachalal?

⁶ Kqakubʼsaj qakʼuʼx chkij ri nikʼaj chik we keqaloqʼoqʼej. Pa ri capítulo 13 re 1 Corintios kchʼaw chrij ri jalajoj taq ubʼantajik  ri loqʼoqʼebʼal che kojutoʼo rech kqakubʼsaj chi jumul qakʼuʼx chkij ri qachalal (chasikʼij uwach 1 Corintios 13:4-8). Jun kʼutbʼal, pa ri versículo 4 kubʼij che «ri kʼo loqʼoqʼebʼal ukʼuʼx are riʼ kuqʼiʼ ri kʼax, chʼuchʼuj». Ri Jehová kʼo upaciencia qukʼ paneʼ kʼi taq mul kojmakun chuwach. Rumal laʼ utz che oj xuqujeʼ kkʼojiʼ qapaciencia kukʼ ri e qachalal are chiʼ kkibʼij o kkibʼan jun jastaq che kʼax kbʼe chqe. Y pa ri versículo 5 kubʼij che ri loqʼoqʼebʼal «man kape ta royowal» y che «man kukʼol ta oyowal pa ranimaʼ». Kqaj taj che kqakʼol «oyowal pa [q]animaʼ», o kqajilaj jampaʼ mul kibʼanom kʼax ri e qachalal chqe. Pa Eclesiastés 7:9 kubʼij che utz taj aninaq kpe qoyowal. Are más utz na che are kqabʼan ri kubʼij pa Efesios 4:26, che kubʼij: «Mabʼeytaj jun qʼij ri iwoyowal».

7. ¿Jas kojkitoʼ wi ri e pixabʼ che keriqitaj pa Mateo 7:1-5 rech kqakubʼsaj más qakʼuʼx chkij ri qachalal?

⁷ Jun chi jastaq che kojutoʼo rech kqakubʼsaj qakʼuʼx chkij ri qachalal are che keqilo junam rukʼ ri kubʼan ri Jehová che kilik. Ri areʼ keraj y utzʼibʼam ta ronojel ri kimak. Rumal laʼ rajawaxik che je kqabʼan oj (Sal. 130:3). Are ta kqil ri utz ta kkibʼano, xaneʼ are kqil ri utz taq kibʼantajik y ri kekun che ubʼanik (chasikʼij uwach Mateo 7:1-5). Kqakubʼsaj qakʼuʼx chkij ri qachalal rumal che ri loqʼoqʼebʼal «ronojel kukojo» (1 Cor. 13:7). Wariʼ kraj ta kubʼij che ri Jehová kraj che kqakubʼsaj qakʼuʼx chkij apachike winaq. Xaneʼ kraj che kqakubʼsaj qakʼuʼx chkij ri qachalal rumal che yaʼtal chke. *

8. ¿Jas rajawaxik kabʼano rech kakubʼsaj más akʼuʼx chkij nikʼaj chik?

⁸ Kajwataj tiempo rech kkubʼsax kʼuʼx chrij jun winaq. ¿Jas katkunik kabʼano rech kakubʼsaj más akʼuʼx chkij ri e qachalal? Chawetaʼmaj más kiwach. Chattzijon kukʼ pa ri e riqbʼal ibʼ. Junam chitzijoj ri utzij ri Dios. Chkʼol apaciencia kukʼ y chayaʼ bʼe chke rech kkikʼutu che kuyaʼ kkubʼsax kʼuʼx chkij. We qas ta awetaʼm uwach jun qachalal aninaq ta kabʼij che ri akʼulmam pa ri akʼaslemal. Are kʼu, are chiʼ más kawetaʼmaj uwach ri qachalal riʼ, weneʼ wariʼ kubʼano che katzijoj che ri akʼulmam pa ri akʼaslemal (Luc. 16:10). Y ¿jas kabʼano we jun qachalal xutzijoj chke nikʼaj chik ri xabʼij che? Kachomaj taj che katkun ta chik kakubʼsaj akʼuʼx chrij, xaneʼ chayaʼ tiempo che. Y kaya ta bʼe che ri xubʼan wajun qachalal riʼ kubʼano che kakubʼsaj ta chi akʼuʼx chkij ri nikʼaj chik. Jun jastaq che kojtoʼwik are unikʼoxik ri kikʼutbʼal ri upatanelabʼ ri Jehová re ojer che xkikubʼsaj kikʼuʼx chkij nikʼaj chik paneʼ xbʼan kʼax chke.

9. a) ¿Jas xubʼan ri Ana paneʼ ri e kojol tabʼal toqʼobʼ tajin kemakunik? b) ¿Jas kawetaʼmaj chrij ri ukʼutbʼal ri Ana? (Chawilaʼ ri wachbʼal).

⁹ ¿La kʼo jumul akʼulmam che jun qachalal che kʼo reqeleʼn xubʼij chke nikʼaj chik ri xabʼij che? We jeʼ, katutoʼ riʼ ri ukʼutbʼal ri Ana. Pa taq ri uqʼij ri Ana, ri Elí are ri kinimal ri kojol tabʼal toqʼobʼ pa Israel. Are kʼu ri ufamilia xkibʼan itzel taq jastaq. Ri e ukʼojol e kojol tabʼal toqʼobʼ, are kʼu xemakun kukʼ taq ixoqibʼ, ri Elí xaq xuya bʼe chke che xkibʼan wariʼ. Ri Jehová, aninaq taj xresaj ri reqeleʼn ri Elí. ¿Jas xubʼan ri Ana? Paneʼ ri Elí kʼa kʼo na che kojol tabʼal toqʼobʼ, are kʼu ri Ana xuya ta  kan uqʼijilaxik ri Jehová pa ri tabernáculo. Are chiʼ ri Ana rukʼ oqʼej tajin kubʼan uchʼawem che ri Dios, ri Elí aninaq xpe royowal y xuchomaj che xa qʼabʼarel, xuqujeʼ ko xuchʼabʼej (1 Sam. 1:12-16). Ri Ana xutzujuj che ri Jehová che we kkʼojiʼ jun ral kukʼam bʼi pa ri tabernáculo rech kupatanij. Are chiʼ kʼo chi ri alaj ral, xubʼan ri xutzujuj paneʼ are ri Elí kchajin ri akʼal (1 Sam. 1:11). ¿La rajawaxik kesax ri eqeleʼn chke ri ralkʼwal ri Elí? Rajawaxik, rumal laʼ are chiʼ xopan ri tiempo ri Jehová xuqʼat tzij pa kiwiʼ (1 Sam. 4:17). Are kʼu, xutewchiʼj ri Ana rukʼ jun ral, Samuel ubʼiʼ (1 Sam. 1:17-20).

10. ¿Jas xubʼan ri David che ukʼutik che xuya ta kan ukubʼsaxik ukʼuʼx chkij ri nikʼaj chik paneʼ xbʼan kʼax che?

¹⁰ ¿La kʼo jun awachiʼl che kakubʼsaj ta chi akʼuʼx chrij? We kʼolik, chatchoman chrij ri ukʼutbʼal ri qʼatal tzij David. Are chiʼ ri Absalón xraj xresaj ri qʼatbʼal tzij che ri David, ri Ahitofel, che are rachiʼl ri David, xutoʼ ri Absalón. Rumal laʼ xkun ta chik xukubʼsaj ukʼuʼx chrij ri ukʼojol y chrij ri rachiʼl Ahitofel. Are kʼu wariʼ xubʼan taj che ri David mat xukubʼsaj chi ukʼuʼx chkij ri nikʼaj chik. Ri areʼ xuya ta kan ukubʼsaxik ukʼuʼx chrij ri Husái, jun sukʼalaj rachiʼl che xubʼan ta re ri xkibʼan ri Absalón y ri Ahitofel. Y utz ri xubʼano che xukubʼsaj ukʼuʼx chrij ri Husái, rumal che wajun achi riʼ xuya ri ukʼaslemal pa kʼax che utoʼik (2 Sam. 17:1-16).

11. ¿Jas xubʼan jun upatanel ri Nabal che ukʼutik che kukubʼsaj ukʼuʼx chkij nikʼaj chik?

¹¹ Chojchoman chrij ri ukʼutbʼal jun chke ri upatanelabʼ ri Nabal, jun qʼinom achi. Ri David y ri rajchʼojabʼ amaqʼel xekichajij ri upatanelabʼ ri Nabal. Are chiʼ xqʼax ri tiempo, ri David xutaʼ che ri Nabal che kusipaj kiwa. Rumal che xuya taj, ri David sibʼalaj xpe royowal y xubʼij che kraj keʼukamisaj konojel ri e kʼo pa ri rachoch ri Nabal. Jun chke ri upatanelabʼ ri Nabal xubʼij che ri Abigaíl, ri rixoqil, ri tajin kkʼulmatajik. Paneʼ kʼo pa kʼax ri ukʼaslemal, xanimaj taj xaneʼ aninaq xubʼij che ri Abigaíl rumal che retaʼm che are jun utz ixoq. Y xuriq utzilal rumal che xukubʼsaj ukʼuʼx chrij ri Abigaíl. Rukʼ kowil ukʼuʼx ri Abigaíl xbʼek y  xubʼij che ri David che kubʼan ta ri uchomam ubʼanik (1 Sam. 25:2-35). Y ri areʼ retaʼm che ri David are jun achi che qas kchomanik.

12. ¿Jas xubʼan ri Jesús che ukʼutik che xukubʼsaj ukʼuʼx chkij ri rapóstoles paneʼ kʼi xesach wi?

¹² Ri Jesús xukubʼsaj ukʼuʼx chkij ri utijoxelabʼ paneʼ kʼi mul xesachik (Juan 15:15, 16). Are chiʼ ri Santiago y ri Juan xkibʼij che ri Jesús che kkaj kekʼojiʼ pa uxukut are chiʼ kuqʼat tzij, ri Jesús xuchomaj taj che utz ta tajin kkibʼan che upatanexik ri Jehová y xubʼij ta chke che kraj ta chik keʼux rapóstoles (Mar. 10:35-40). Y, pa ri chaqʼabʼ che xchap kumal ri ukʼulel, konojel ri rajtijoxelabʼ xkiya kan utukel (Mat. 26:56). Are kʼu ri Jesús xuya ta kan ukubʼsaxik ukʼuʼx chkij. Paneʼ kʼi xesach wi, «xeʼuloqʼoqʼej kʼa pa ri kʼistajik» (Juan 13:1). Y, are chiʼ xkʼastajisax rumal ri Dios, xubʼij chke ri 11 rapóstoles che kkitzijoj ri utzij ri Dios y che kekichajij ri utijoxelabʼ (Mat. 28:19, 20; Juan 21:15-17). Y utz xubʼano che xukubʼsaj ukʼuʼx chkij ri achijabʼ riʼ paneʼ kʼi xesach wi. Konojel xkinimaj ri Dios pa ronojel ri kikʼaslemal pa ri uwach Ulew. Junam rukʼ ri xqilo, ri Ana, ri David, ri upatanel ri Nabal, ri Abigaíl y ri Jesús xkikubʼsaj kikʼuʼx chkij winaq che e ajmakibʼ. Ri kikʼutbʼal kojutoʼo rech ri oj xuqujeʼ kqakubʼsaj qakʼuʼx chkij ri nikʼaj chik.

13. ¿Jas kbʼanowik che kqakubʼsaj ta chi qakʼuʼx chkij ri nikʼaj chik?

¹³ ¿La kʼo jumul qabʼim che jun qachalal jun jastaq che xqakʼulmaj pa ri qakʼaslemal tekʼuriʼ xqatoʼ che xubʼij chke nikʼaj chik? Qastzij che sibʼalaj kʼax are chiʼ jun winaq je kubʼan wariʼ. Jumul, jun qachalal ixoq xubʼij che jun kʼamal bʼe ri ukʼulmam pa ri ukʼaslemal. Are kʼu chukabʼ qʼij ri rixoqil ri kʼamal bʼe riʼ xuchʼabʼej ri qachalal rech xukubʼsaj ukʼuʼx, wariʼ kukʼutu che ri kʼamal bʼe xutzijoj che ri rixoqil ri xbʼix che. Wariʼ xubʼano che ri qachalal xukubʼsaj ta chi ukʼuʼx chrij wajun kʼamal bʼe riʼ. Are kʼu ri qachalal ixoq riʼ xubʼan jun utz jastaq rumal che xutaʼ tobʼanik. Xtzijon rukʼ jun chi kʼamal bʼe, y ri kʼamal bʼe riʼ xutoʼo rech kukubʼsaj chi jumul ukʼuʼx chkij ri kʼamal taq bʼe.

14. ¿Jas xtoʼw jun qachalal rech xukubʼsaj chi jumul ukʼuʼx chkij ri e kebʼ kʼamal bʼe?

¹⁴ Pa jun tiempo, jun qachalal achi sibʼalaj royowal chke e kebʼ kʼamal bʼe rumal che kuchomaj che taqal ta chke kkubʼsax kʼuʼx chkij. Are kʼu, xnaʼtaj che ri xubʼij jun qachalal che nim krilo: «Ri qakʼulel are ri Satanás, are ta ri e qachalal». Ri qachalal riʼ xchoman chrij wariʼ, xuqujeʼ xubʼan uchʼawem. Are chiʼ xqʼax ri tiempo, xukubʼsaj chi jumul ukʼuʼx chkij ri e kebʼ kʼamal bʼe.

15. ¿Jasche kajwataj tiempo rech kqakubʼsaj chi jumul qakʼuʼx chkij ri nikʼaj chik? Chabʼij ri xukʼulmaj ri al Grete.

¹⁵ ¿La kʼo jumul xesax jun eqeleʼn chawe? Sibʼalaj kʼax wariʼ. Chqilaʼ ri xukʼulmaj jun qachalal ubʼiʼ Grete y ri unan, ri e kebʼ qachalal ixoqibʼ riʼ xeʼux sukʼ che ri Jehová pa taq ri junabʼ treinta. Keʼel pa ri tinamit Alemania, y pa ri tiempo riʼ ri qʼatal tzij nazi xuqʼatej uwach ri qachak. Xbʼix che ri qachalal riʼ che ktobʼan che resaxik copias re ri wuj Ri Chajinel rech kyaʼ chke ri qachalal. Tekʼuriʼ ri e qachalal xketaʼmaj che ri utat ri al Grete itzel keril ri Testigos. Xkichomaj che weneʼ ri utat kuya ubʼixik chke ri qʼatal taq tzij ri tajin kubʼano rumal laʼ xkesaj ri eqeleʼn che. Are kʼu ri al Grete xuriq nikʼaj chi kʼax. Pa ri Segunda Guerra Mundial, rumal che ri e qachalal kkikubʼsaj  ta kikʼuʼx chkij, xyaʼ ta kech ri wuj Ri Chajinel y kechʼabʼex ta pa kan pa ri bʼe. ¡Sibʼalaj bʼisobʼal! Wariʼ xubʼan kʼax che ri qachalal Grete, rumal che pa kʼi tiempo xraj taj xukuy kimak ri e qachalal riʼ y xukubʼsaj ta ukʼuʼx chkij. Are chiʼ xqʼax ri tiempo, xuchʼobʼo che ri Jehová ukuyum chi ri kimak ri qachalal riʼ, rumal laʼ rajawaxik che ri areʼ xuqujeʼ kukuy kimak. *

16. ¿Jasche rajawaxik kqakoj qachuqʼabʼ rech kqakubʼsaj qakʼuʼx chkij ri nikʼaj chik?

¹⁶ We at akʼulmam wariʼ, chakojoʼ achuqʼabʼ rech kakubʼsaj chi jumul akʼuʼx chkij ri e qachalal. Paneʼ kukʼam bʼi tiempo che kabʼano, are kʼu utz we kabʼano. Chojchoman chrij wariʼ: we jun rikil kubʼan kʼax chqe, qas kqil na riʼ jas ri kqatijo, are kʼu kraj ta kubʼij che mat kojwaʼ chik. Xa junam rukʼ, kqaya taj che ri xqakʼulmaj rukʼ jun qachalal kubʼano che kqakubʼsaj ta chi qakʼuʼx chkij ri nikʼaj chik, rumal che oj ajmakibʼ. We kqakubʼsaj chi jumul qakʼuʼx chkij, más kojkikot riʼ y are kojchoman riʼ chrij ri kojkun oj che ubʼanik rech kʼo utzilal pa ri congregación.

17. a) ¿Jasche nim ubʼanik che kqakubʼsaj qakʼuʼx chkij nikʼaj chik? b) ¿Jas kqil na pa ri jun chi kʼutunem?

¹⁷ Pa wajun uwach Ulew riʼ che kʼo pa uqʼabʼ ri Satanás, ri winaq kkikubʼsaj ta kikʼuʼx chkij ri nikʼaj chik. Are kʼu pa ri utinamit ri Dios kqakubʼsaj qakʼuʼx chkij ri qachalal rumal che kqaloqʼoqʼej qibʼ. Rumal laʼ, sibʼalaj kojkikotik y kʼo utz achilanik chqaxoʼl kukʼ ri qachalal. Y, wariʼ ktobʼan chqe are chiʼ kpe ri kʼaxkʼolil. Are kʼu, ¿jas kqabʼano we kqakubʼsaj ta chi qakʼuʼx chrij jun qachalal? Kojkunik kqakubʼsaj chi jumul qakʼuʼx chrij we kqilo junam rukʼ ri kubʼan ri Jehová che rilik, y kqabʼan ri kubʼij ri Biblia, kqakoj qachuqʼabʼ rech keqaloqʼoqʼej ri qachalal y kqanikʼoj jujun taq kʼutbʼal re ojer. We kqabʼano, keqariq na e kʼi qachiʼl riʼ che «e jik na chuwach jun qachalal» (Prov. 18:24). Are kʼu xaq xiw ta kqakubʼsaj qakʼuʼx chkij ri nikʼaj chik; ri e qachalal xuqujeʼ kkaj kketaʼmaj we kekunik kkikubʼsaj kikʼuʼx chqij. Pa ri jun chi kʼutunem kqil na jas ri kqabʼano rech ri e nikʼaj chik kkikubʼsaj kikʼuʼx chqij.