KʼUTUNEM 39
¿La kʼo ri abʼiʼ pa «ri wuj re ri kʼaslemal»?
«Chuwach kʼut [...] ri Ajawaxel xtzʼibʼax wi jun wuj, ri kenaʼtax wi ri nim kkil wi ri Ajawaxel» (MAL. 3:16).
BʼIXONEM 61 ¡Ko chixtakʼaloq, Testigos!
RI KQETAʼMAJ NA *
Pa kʼi taq junabʼ, ri Jehová umajim lo kitzʼibʼaxik ri kibʼiʼ ri e winaq pa «ri wuj re ri kʼaslemal». (Chawilaʼ ri párrafos 1 y 2).
1. Junam rukʼ ri kubʼij Malaquías 3:16, ¿jas wuj tajin kutzʼibʼaj ri Jehová, y jas kʼo chupam?
RI JEHOVÁ kʼi chi junabʼ utzʼibʼam ri kibʼiʼ ri e winaq pa jun wuj che sibʼalaj nim ubʼanik. Xumaj rukʼ ri Abel, ri nabʼe testigo (Luc. 11:50, 51). * Y chilaʼ, ri Jehová xumaj utzʼibʼaxik ri kibʼiʼ ri e winaq pa wajun wuj riʼ, sibʼalaj kʼi bʼiʼaj kʼo chi chupam. Kʼi bʼiʼaj kojom che wajun wuj riʼ pa ri Biblia: «Jun wuj, ri kenaʼtax wi», «ri wuj re ri kʼaslemal» y ri rollo re ri kʼaslemal. Pa wajun kʼutunem riʼ kqabʼij «ri wuj re ri kʼaslemal» che (chasikʼij uwach Malaquías 3:16; Apoc. 3:5; 17:8).
2. ¿E jachin taq tzʼibʼam kibʼiʼ pa ri wuj re kʼaslemal, y jas rajawaxik kqabʼano rech ktzʼibʼax ri qabʼiʼ chilaʼ?
2 Pa wajun wuj riʼ che sibʼalaj nim ubʼanik tzʼibʼam kibʼiʼ konojel ri winaq che nim kkil ri Jehová y kkiya uqʼij. Ri e winaq riʼ che tzʼibʼam kibʼiʼ pa ri wuj, kʼo keyebʼal che jun kʼaslemal che kʼo ta ukʼisik pa ri uwach Ulew o pa ri kaj. Ktzʼibʼax ri qabʼiʼ pa wajun wuj riʼ we kʼo jun utzalaj qachilanik rukʼ ri Jehová y kojkojon chrij ri ukamikal ri uKʼojol, Jesucristo (Juan 3:16, 36). ¿La mat qastzij che qonojel kqaj che ktzʼibʼax ri qabʼiʼ pa ri wuj riʼ?
3, 4. a) We tzʼibʼam chi ri qabʼiʼ pa ri wuj re kʼaslemal, ¿la kraj kubʼij waʼ che kyaʼ ri kʼaslemal che kʼo ta ukʼisik chqe? b) ¿Jas kqil na pa wajun kʼutunem riʼ y pa ri jun chik?
3 We tzʼibʼam chi ri qabʼiʼ pa ri wuj re kʼaslemal, ¿la kraj kubʼij waʼ che kyaʼ ri kʼaslemal che kʼo ta ukʼisik chqe? Chqilaʼ ri urespuesta wajun pregunta pa Éxodo 32:33, are chiʼ ri Jehová xubʼij che ri Moisés: «Xuwi ri kmakun chnuwach, are waʼ kinwesaj ri ubʼiʼ chupam ri nuwuj». Wariʼ kraj kubʼij che ri kibʼiʼ ri e winaq che tzʼibʼam pa ri wuj re kʼaslemal kbʼanik kchupik; jetaneʼ ri Jehová xaq xiw utzʼibʼam rukʼ lápiz (Apoc. 3:5). Rumal laʼ, rajawaxik kqakoj na qachuqʼabʼ rech kchup ta ri qabʼiʼ pa wajun wuj riʼ kʼa are chiʼ ri Jehová kutzʼibʼaj rukʼ tinta.
4 Weneʼ kojchoman chrij jujun taq preguntas. Junam rukʼ wariʼ, ¿jas kubʼij ri Biblia chkij ri winaq che tzʼibʼam kibʼiʼ pa ri wuj re kʼaslemal y ri tzʼibʼam taj? ¿Jampaʼ kyaʼ ri kʼaslemal che kʼo ta ukʼisik chke ri tzʼibʼam chi kibʼiʼ pa ri wuj? ¿Jas kkʼulmataj riʼ kukʼ ri e winaq che xketaʼmaj ta uwach ri Jehová? ¿La ktzʼibʼax na kibʼiʼ pa ri wuj re kʼaslemal? Kqatzalij uwach ri preguntas riʼ pa wajun kʼutunem y pa ri jun chik.
¿E JACHIN TAQ TZʼIBʼAM KIBʼIʼ PA RI WUJ?
5, 6. a) Junam rukʼ ri kubʼij Filipenses 4:3, ¿e jachin taq tzʼibʼam chi kibʼiʼ pa ri wuj re kʼaslemal? b) ¿Jampaʼ ktzʼibʼax ri kibʼiʼ rukʼ tinta rech kchup ta chik?
5 ¿E jachin taq tzʼibʼam chi kibʼiʼ pa ri wuj re kʼaslemal? Rech kqatzalij uwach wajun pregunta, kqil na e jobʼ jupuq winaq. E jujun chke ri jupuq riʼ tzʼibʼam chi ri kibʼiʼ pa ri wuj re kʼaslemal, y e nikʼaj chik tzʼibʼam taj.
6 Ri nabʼe jupuq are ri winaq che e chaʼom rech kkiqʼat tzij rukʼ ri Cristo pa ri kaj. ¿La tzʼibʼam chi ri kibʼiʼ ri e winaq riʼ pa ri wuj re kʼaslemal? Jeʼ, tzʼibʼam chik. Rumal che ri apóstol Pablo xubʼij chke ri e rachiʼl re Filipos, che ri kibʼiʼ ri e chaʼom —kraj kubʼij, ri kekiqʼata tzij rukʼ ri Cristo— tzʼibʼam chi ri kibʼiʼ pa ri wuj re kʼaslemal (chasikʼij uwach Filipenses 4:3). Are kʼu, rech kchup ta ri kibʼiʼ pa wajun wuj riʼ, rajawaxik kkiya ta kan ukʼutik ri kisukʼilal. Y, are chiʼ kkoj ri ukʼisbʼal etal chke, ktzʼibʼax ri kibʼiʼ rukʼ tinta pa ri wuj re kʼaslemal, wariʼ kkʼulmatajik are chiʼ majaʼ kekamik o are chiʼ majaʼ kumaj ri nimalaj kʼaxkʼolil (Apoc. 7:3).
7. ¿Jas kubʼan Apocalipsis 7:16, 17 che qatoʼik rech kqetaʼmaj jampaʼ ktzʼibʼax ri kibʼiʼ rukʼ tinta ri e nikʼaj chi chij pa ri wuj re kʼaslemal?
7 Ri ukabʼ jupuq are ri kʼiʼalaj winaq che xuqujeʼ kbʼix e nikʼaj chi chij chke. ¿La tzʼibʼam chi ri kibʼiʼ pa ri wuj re kʼaslemal? Jeʼ, tzʼibʼam chik. ¿La kʼa kʼo na ri kibʼiʼ riʼ pa ri wuj re kʼaslemal are chiʼ kekʼasiʼ kan pa ri Armagedón? Kʼolik (Apoc. 7:14). Ri Jesús xubʼij che ri e winaq riʼ «kebʼe na pa ri junalik kʼaslemal» (Mat. 25:46). Are kʼu ri kekʼasiʼ kan pa ri Armagedón aninaq taj kyaʼ ri kʼaslemal kʼo ta ukʼisik chke. Jetaneʼ ri kibʼiʼ xaq rukʼ lápiz tzʼibʼam wi. Pa ri Mil Junabʼ che kuqʼat tzij ri Jesús, «keʼuyuqʼuj na, kukʼam na kibʼe pa taq kikʼiyibʼal jaʼ re kʼaslemal». Ri keniman che ri Cristo y ri keʼux sukʼ che ri Jehová ktzʼibʼax ri kibʼiʼ rukʼ tinta rech kbʼan ta chi uchupik pa ri wuj re kʼaslemal (chasikʼij uwach Apocalipsis 7:16, 17).
8. ¿E jachin taq tzʼibʼam ta ri kibʼiʼ pa ri wuj re kʼaslemal, y jas kkikʼulmaj na?
8 Ri urox jupuq are ri kbʼix kʼisikʼ chke, che ksachisax kiwach pa ri Armagedón. Tzʼibʼam ta ri kibʼiʼ ri e winaq riʼ pa ri wuj re kʼaslemal. Ri Jesús xubʼij che «kebʼe kʼu na waʼ pa ri junalik kʼajisabʼal wach» (Mat. 25:46). Y rukʼ ri utobʼanik ri ruxlabʼal ri Dios ri Pablo xubʼij che ri e winaq riʼ «ksach na kiwach chbʼe qʼij saq» (2 Tes. 1:9; 2 Ped. 2:9). Xuqujeʼ je kkikʼulmaj ri e winaq che xa chubʼanik kkibʼano kkinimaj ta ri uTzij ri Dios. Ri e areʼ ksach kiwach, kyaʼ ta ri kʼaslemal chke che kʼo ta ukʼisik (Mat. 12:32; Mar. 3:28, 29; Heb. 6:4-6). Chanim riʼ, chqanikʼoj rij e kebʼ jupuq winaq che kewalajisax cho ri uwach Ulew.
RI E WINAQ CHE KEWALAJISAX NA
9. Junam rukʼ ri kubʼij Hechos 24:15, ¿e jachin riʼ ri kebʼ jupuq winaq che kewalajisax cho ri uwach Ulew, y jas ri kejunamataj ta wi?
9 Ri Biblia kchʼaw chkij e kebʼ jupuq winaq che kewalajisax na y che kyaʼ jun kikʼaslemal che kʼo ta ukʼisik cho ri uwach Ulew: ri «e utz» y ri «e lawalo» o ri e utz taj (chasikʼij uwach Hechos 24:15). Ri «e utz» winaq are ri xkipatanij ri Jehová pa ronojel ri kikʼaslemal are chiʼ majaʼ kekamik. Y ri «e lawalo» are ri e winaq che xkipatanij ta ri Jehová. Rumal che, e kʼi chke, xketaʼmaj taj ri kubʼij ri uTzij ri Dios o ri utaqanik. Ri e kebʼ jupuq riʼ kewalajisax na, ¿la kraj kubʼij riʼ che tzʼibʼam chi ri kibʼiʼ pa ri wuj re kʼaslemal? Rech kqatzalij uwach wajun pregunta, chqilaʼ más jas kibʼanik ri e kebʼ jupuq riʼ.
10. ¿Jasche kewalajisax na ri «e utz» taq winaq, y jas eqeleʼn kyaʼ chke e jujun? (Xuqujeʼ chawilaʼ pa wajun wuj riʼ ri kʼutunem re ri «Kipreguntas ri sikʼinelabʼ» che kchʼaw chkij ri winaq che kewalajisax cho ri uwach Ulew).
10 Ri ukaj jupuq are ri «e utz» winaq. Are chiʼ majaʼ kekamik, ri e winaq riʼ tzʼibʼam chi ri kibʼiʼ pa ri wuj re kʼaslemal. ¿La xchup ri kibʼiʼ pa ri wuj re kʼaslemal are chiʼ xekamik? Xchup taj, rumal che kʼa e kʼo na pa ri uchomanik ri Jehová. «Ri areʼ kʼut man are ta kiDios kaminaqibʼ, xaneʼ are kiDios ri e kʼaskʼoj. Konojel kʼut e kʼaskʼoj che areʼ» (Luc. 20:38). Wariʼ kraj kubʼij che are chiʼ ri e utz taq winaq kewalajisax cho ri uwach Ulew tzʼibʼam na ri kibʼiʼ pa ri wuj re kʼaslemal. Are kʼu xa che lápiz tzʼibʼam wi, chojchoʼq taneʼ che (Luc. 14:14). Qastzij riʼ che e jujun chke ri utz taq winaq riʼ keʼux ukʼojol «ajawinel, [...] keʼajawin pa ronojel ri ulew» (Sal. 45:16).
11. ¿Jas rajawaxik kkibʼan na ri «e lawalo» rech ktzʼibʼax ri kibʼiʼ pa ri wuj re kʼaslemal?
11 Chukʼisbʼal, chojchʼaw chrij ri uroʼ o quinto jupuq: ri «e lawalo». Weneʼ ri e winaq riʼ xketaʼmaj ta ri utaqanik ri Jehová rumal laʼ xkinimaj taj. Rumal laʼ tzʼibʼam ta ri kibʼiʼ pa ri wuj re kʼaslemal. Are kʼu are chiʼ ri Jehová keʼuwalajisaj na kuya bʼe chke che kkikʼutu we qas taqal chke ktzʼibʼax ri kibʼiʼ pa ri wuj re kʼaslemal. Sibʼalaj kajwataj tobʼanik riʼ chke ri e winaq che e utz taj. Rumal che are chiʼ majaʼ kekamik e jujun xkibʼan itzel taq jastaq, o xibʼibʼalalaj taq jastaq. Rumal laʼ, rajawaxik kketaʼmaj na ri kubʼij ri utaqanik ri Jehová. Rech ketoʼ ri e winaq riʼ, ri Dios kukoj na ri uQʼatbʼal tzij rech ketijox ri e winaq cho ronojel ri uwach Ulew.
12. a) ¿E jachin taq ketijon na ri e lawalo? b) ¿Jas kkikʼulmaj ri e winaq che kkaj taj kkibʼan pa ri kikʼaslemal ri utaqanik ri Jehová?
12 ¿E jachin taq ketobʼanik rech ketijox ri e lawalo? Ri e kʼiʼalaj winaq che kekʼasiʼ kan pa ri Armagedón y ri e utz taq winaq che kewalajisaxik. ¿Jas rajawaxik kkibʼan ri e lawalo we kkaj ktzʼibʼax ri kibʼiʼ pa ri wuj re kʼaslemal? Rajawaxik keʼux rachiʼl ri Jehová y kkijach ri kikʼaslemal che. Ri Jesús y ri e chaʼom che kebʼe pa ri kaj kkilo we ri e lawalo kkikʼex ri kikʼaslemal (Apoc. 20:4). We kʼo jun chke ri lawalo taq winaq riʼ kraj taj kunimaj ri Jehová, ksachisax uwach, paneʼ 100 ujunabʼ chik (Is. 65:20). Ri Jehová y ri Jesús kkil ri kʼo pa kanimaʼ ri winaq, rumal laʼ kkiya ta bʼe che jun winaq kubʼan kʼax pa ri kʼakʼ uwach Ulew (Is. 11:9; 60:18; 65:25; Juan 2:25).
RI KEWALAJISAX NA RECH KKʼOJIʼ KIKʼASLEMAL Y RI KEWALAJISAX CHE QʼATOJ TZIJ
13, 14. a) ¿Jas xqachomaj nabʼe chrij ri e tzij che xubʼij ri Jesús pa Juan 5:29? b) ¿Jas chrij rajawaxik kojchoman wi are chiʼ keqasikʼij ri e tzij riʼ?
13 Ri Jesús xuqujeʼ xchʼaw chkij ri e winaq che kewalajisax cho ri uwach Ulew. Jun kʼutbʼal, ri areʼ xubʼij: «Kpe kʼu na ri joqʼotaj, are taq konojel ri kaminaqibʼ kkitaʼ na ri uchʼabʼal, keʼel na uloq pa taq ri muqbʼal. Ri winaq ri xkibʼan ri utz kekʼastaj na rech kkʼojiʼ na kikʼaslemal; e are kʼut ri winaq ri xkibʼan etzelal, kekʼastaj na che kʼoqotajem» (Juan 5:28, 29). ¿Jas xraj xubʼij ri Jesús rukʼ ri e tzij riʼ?
14 Nabʼe kanoq xqachomaj che ri Jesús are xchʼaw chrij ri jastaq che kkibʼan na ri e winaq are chiʼ e walijisam chik. Kraj kubʼij che are chiʼ e kʼastajisam chik e jujun taq winaq kkibʼan na utz taq jastaq, are kʼu e nikʼaj chik kkibʼan na itzel taq jastaq. Are kʼu chojchoman chrij wariʼ: Ri Jesús xubʼij taj che ri keʼel lo pa taq ri muqbʼal kkibʼan na utz taq jastaq o kkibʼan na itzel taq jastaq. Xaneʼ ri areʼ xukoj e tzij rech xchʼaw pa pasado, rumal che xubʼij «ri xkibʼan ri utz» y «ri xkibʼan etzelal». Wariʼ kraj kubʼij che ri e winaq riʼ xkibʼan ri e jastaq riʼ are chiʼ majaʼ kekamik. ¿La mat qastzij che are más kchʼobʼotaj wariʼ? Rumal che pa ri kʼakʼ uwach Ulew kyaʼ ta chi bʼe che jun winaq kubʼan itzel taq jastaq. Rumal laʼ, ri e lawalo taq winaq xkibʼan ri itzel taq jastaq are chiʼ majaʼ kekamik. Are kʼu, ¿jas xraj xubʼij ri Jesús are chiʼ xubʼij: «Kekʼastaj na rech kkʼojiʼ na kikʼaslemal» y «kekʼastaj na che kʼoqotajem»?
15. ¿E jachin taq «kekʼastaj na rech kkʼojiʼ na kikʼaslemal», y jasche?
15 Ri e utz taq winaq, kraj kubʼij, ri xkibʼan utz taq jastaq are chiʼ majaʼ kekamik «kekʼastaj na rech kkʼojiʼ na kikʼaslemal», rumal che tzʼibʼam ri kibʼiʼ pa ri wuj re kʼaslemal. Wariʼ kraj kubʼij che «ri xkibʼan ri utz», che kyaʼ ubʼixik pa Juan 5:29, xaq junam kukʼ ri «e utz» che kyaʼ ubʼixik pa Hechos 24:15. Ri xqil chanim riʼ, kʼo ubʼanik rukʼ ri kubʼij Romanos 6:7: «Ri jun ri kaminaq chik, man kʼo ta chi utaqanik ri makaj puwiʼ». Are chiʼ kekam ri e utz taq winaq, ksach uwach ri kimak, are kʼu kʼa knaʼtaj na che ri Dios ri xkibʼan che upatanexik (Heb. 6:10). Are kʼu, are chiʼ kekʼastajisax ri e utz, rajawaxik kkiya ta kan ukʼutik ri kisukʼilal che ri Dios rech kchup ta ri kibʼiʼ pa ri wuj re kʼaslemal.
16. ¿Jas kraj kubʼij ri «kekʼastaj na che kʼoqotajem»?
16 ¿Jas kkikʼulmaj ri e winaq che xkibʼan itzel taq jastaq are chiʼ majaʼ kekamik? Paneʼ xsach uwach ri kimak are chiʼ xekamik, are kʼu rumal che xkipatanij ta ri Dios knaʼtax ta ri kisukʼilal. Tzʼibʼam ta ri kibʼiʼ pa ri wuj re kʼaslemal. Rumal laʼ, «ri xkibʼan etzelal» xaq junam kukʼ ri «e lawalo» che kyaʼ ubʼixik pa Hechos 24:15. Ri e areʼ «kekʼastaj na che kʼoqotajem». * Are chiʼ kbʼixik che kqʼat tzij pa kiwiʼ ri itzel taq winaq kraj kubʼij che kil na ri kkibʼano (Luc. 22:30). Y wariʼ kukʼam tiempo rech kilik we qas taqal chke ktzʼibʼax ri kibʼiʼ pa ri wuj re kʼaslemal. Xuqujeʼ rech ktzʼibʼax ri kibʼiʼ pa ri wuj, ri e winaq che xkibʼan itzel taq jastaq ojer rajawaxik kkikʼex ri kibʼantajik y kkijach ri kikʼaslemal che ri Jehová.
17, 18. ¿Jas rajawaxik kkibʼan na ri e winaq che kewalajisax cho ri uwach Ulew, y jas kraj kubʼij ri e tzij «ri jastaq ri kibʼanom» che kʼo pa Apocalipsis 20:12, 13?
17 Paneʼ xkibʼan utz taq jastaq o xkibʼan itzel taq jastaq ojer kanoq, ri e winaq che kewalajisaxik rajawaxik kkinimaj ri taqanik che kyaʼ ubʼixik pa ri kʼakʼ taq rollos, che kejaqtaj pa ri 1,000 junabʼ. Ri apóstol Juan xubʼij ri xril pa jun visión, kubʼij: «Xeʼenwil ri kaminaqibʼ chi nimaʼq chi chʼutiʼq, ri e takʼatoj chuwach ri tem re ajawibʼal. Xejaqtaj kʼu taq ri wuj. Xuqujeʼ jun wuj chik xjaqik, are waʼ ri wuj re ri kʼaslemal. Xqʼat tzij pa kiwiʼ ri kaminaqibʼ chkij ri jastaq ri kibʼanom, jas ri e tzʼibʼatal pa taq ri wuj» (Apoc. 20:12, 13).
18 ¿Jas «jastaq [...] kibʼanom» ri rumal che kqʼat na tzij pa kiwiʼ ri kewalajisax na? ¿La are ri xkibʼan kan ojer are chiʼ majaʼ kekamik? Are taj. Chnaʼtaj chqe che are chiʼ xekamik xsach uwach ri kimak. Rumal laʼ, are chiʼ kubʼij «ri jastaq ri kibʼanom» kraj ta kubʼij che are ri jastaq che xkibʼan kan ojer are chiʼ majaʼ kekamik. Xaneʼ are kchʼaw chrij we kkikʼam ri tijonik che kyaʼ chke pa ri kʼakʼ uwach Ulew. Chkixoʼl ri e winaq riʼ e kʼo ri Noé, ri Samuel, ri David y ri Daniel che rajawaxik kketaʼmaj na chrij ri Jesucristo y kekojon chrij ri ukamikal. ¡We ri utz taq winaq kkibʼan wariʼ e ta kʼu lo ri e lawalo!
19. ¿Jas kkikʼulmaj na ri e winaq che kkaj ta wi kkinimaj ri utaqanik ri Dios?
19 ¿Jas kkikʼulmaj na ri e winaq che kkaj ta wi kkinimaj ri utaqanik ri Dios? Apocalipsis 20:15 kubʼij: «Ri man e tzʼibʼatal ta kibʼiʼ pa ri wuj re ri kʼaslemal, xekʼaq pa ri cho re qʼaqʼ». Ksachisax kiwach ri e winaq riʼ chbʼe qʼij saq. ¡Rumal laʼ sibʼalaj nim ubʼanik che kqakoj qachuqʼabʼ rech ktzʼibʼax ri qabʼiʼ pa ri wuj re kʼaslemal y che kchup taj!
Jun qachalal tajin ktobʼan che uyaʼik ri nimalaj tijonik re ri Biblia che kbʼan pa ri Mil Junabʼ. (Chawilaʼ ri párrafo 20).
20. ¿Jas chak kbʼan na pa ri Mil Junabʼ chiʼ kuqʼat tzij ri Jesús? (Chawilaʼ ri wachbʼal re ri uwach ri wuj).
20 Sibʼalaj kʼi taq jastaq kbʼan pa ri Mil Junabʼ chiʼ kuqʼat tzij ri Jesús. Rumal che pa wajun tiempo riʼ kyaʼ na jun nimalaj tijonik che kʼo ta jumul bʼanom. Xuqujeʼ kil na ri kibʼantajik ri e utz y ri e lawalo taq winaq (Is. 26:9; Hech. 17:31). ¿Jas kbʼan che uyaʼik wajun tijonik riʼ chke ri e winaq? Kojchʼaw na chrij wariʼ pa ri jun chi kʼutunem y kojutoʼ na rech nim kqilo.
BʼIXONEM 147 Dios kutzujuj utz kʼaslemal chqe
^ Pa wajun kʼutunem riʼ, kqil na jas xraj xukʼut ri Jesús pa Juan 5:28, 29 are chiʼ xchʼaw chkij ri winaq che «kekʼastaj na rech kkʼojiʼ na kikʼaslemal» y ri «kekʼastaj na che kʼoqotajem [qʼatoj tzij]». Kqil na jas kraj kubʼij ri e kebʼ kʼastajibʼal riʼ y e jachin taq winaq kewalajisax pa ri e kebʼ jupuq riʼ.
^ Wajun wuj riʼ xmajix utzʼibʼaxik «pa ri utikiritajik ri uwach ulew». Ri tzij uwach ulew kraj kubʼij ri e winaq che kkuy kimak (Mat. 25:34; Apoc. 17:8). Rumal laʼ, kqʼalajinik che are ri sukʼalaj Abel ri nabʼe xtzʼibʼax ubʼiʼ pa ri wuj re kʼaslemal.
^ Nabʼe kanoq xqabʼij che ri tzij «kʼoqotajem [qʼatoj tzij]» kraj kubʼij uqʼatik tzij pa kiwiʼ ri e lawalo rech kkʼajisax kiwach. Y qastzij wi che ri tzij «qʼatoj tzij» je kraj kubʼij waʼ. Are kʼu weneʼ pa wajun contexto ri Jesús xukoj ri tzij qʼatoj tzij rech xchʼaw chrij ri kbʼan che unikʼoxik y rilik ri kikʼaslemal ri e winaq. Jun diccionario griego bíblico kubʼij che wajun tzij riʼ kraj kubʼij «kil ri kibʼantajik».
