Chumajtajik ri junabʼ cuarenta ri nutat nunan xkimaj retaʼmaxik chrij ri Biblia kukʼ ri testigos rech Jehová. Paneʼ xkiya kan ri etaʼmanik, are kʼu amaqʼel kyaʼ kan ri wuj La Atalaya y ¡Despertad! che ri nunan. Pa ri 1950, xbʼan jun nim riqbʼal ibʼ internacional pa ri tinamit Nueva York, y ri nufamilia xebʼek.

Tekʼuriʼ, ri qachalal Lawrence Jeffries xumaj qasolixik y xukoj uchuqʼabʼ che uyaʼik ri etaʼmanik chwe. Nabʼe, utz ta kwilo che ri testigos rech Jehová ketobʼan ta pa ri política ni kkibʼan ri servicio militar. Xinbʼij che wet konojel ri winaq re estados unidos kkaj taj kebʼe pa ri chʼoj, kepe riʼ ri kikʼulel che uchʼakik ri tinamit. Are kʼu ri qachalal Jeffries rukʼ paciencia xubʼan preguntas chwe rech xinchʼobʼo che utz ta ri nuchomanik. Xubʼij chwe: «Chachomajampeʼ wet konojel ri winaq rech Estados Unidos kkipatanij ri Jehová tekʼuriʼ kepe ri kikʼulel chkij, ¿jas kubʼan riʼ ri Jehová che kitoʼik?». Rukʼ ri xubʼij ri qachalal chwe xinutoʼ che uchʼobʼik che ri kinchomaj in are ta ri utz y rumal laʼ xwaj xwetaʼmaj más.

Xinkʼojiʼ kʼi horas che usikʼixik ri wuj La Atalaya y ¡Despertad! che ri numamá ukʼolom kan pa ri sótano. Y Are chiʼ xqʼax ri tiempo xwilo che tajin kwetaʼmaj ri qastzij, rumal laʼ xinkʼam ri etaʼmanik che xutzujuj ri qachalal Jeffries chwe. Xuqujeʼ xinmajij bʼenam pa konojel ri e riqbʼal ibʼ. Ri qastzij che tajin kwetaʼmaj xopan pa wanimaʼ, rumal laʼ xwaj xinux publicador rech xinya ubʼixik ri utzalaj taq tzij. Ri kwaj kinbʼan pa ri nukʼaslemal xkʼextajik are chiʼ xinchʼobʼo che «¡naqaj chik kʼo wi ri nimalaj uqʼij ri Ajawaxel!» (Sof. 1:14). Xwaj ta chik xinbʼe  pa ri universidad, are xwaj kitoʼik ri winaq rech kketaʼmaj ri qastzij che kʼo pa ri Biblia.

Xinel kan pa ri tijobʼal pa ri 13 re junio 1956, y are chiʼ qʼaxinaq chi oxibʼ qʼij xinbʼan nuqasanjaʼ pa jun nim riqbʼal ibʼ re circuito. Xinchomaj taj che kinriq kʼi tewchibʼal rumal che xwetaʼmaj uwach ri Jehová y kinkʼut chkiwach nikʼaj chik ri tajin kwetaʼmaj.

Are chiʼ qʼaxinaq chi seis ikʼ che nubʼanom chi nuqasanjaʼ, xinux precursor regular. Ri wuj Ministerio del Reino re diciembre 1956 pa inglés rukʼam lo jun kʼutunem che kuya kichuqʼabʼ ri e qachalal rech kkiya tobʼanik jawiʼ kajwataj wi más publicadores. Xinnaʼo che wajun kʼutunem tajin kchʼaw chwij; rumal che kwaj kinya tobʼanik che utzijoxik ri utzij ri Dios pa lugar che kajwataj wi tobʼanik (Mat. 24:14).

Xinbʼe pa Edgefield (Carolina del Sur), pa jun congregación che xa e kajibʼ publicadores e kʼolik. Y chiʼ xinopan in oj cinco chik. Kqabʼan ri qariqbʼal ibʼ pa rachoch jun qachalal. Y ronojel ikʼ 100 horas kinwesaj che utzijoxik ri utzij ri Dios. Sibʼalaj latzʼ nuwach rumal che kinwesaj ri grupo re utzijoxik utzij ri Dios, kintijoj wibʼ che ri wasignaciones y che ri chʼabʼal che kinya pa taq ri riqbʼal ibʼ. Sibʼalaj mayibʼal, rumal che are chiʼ más kinpatanij ri Jehová más kwetaʼmaj uwach.

Jun ixoq che kinya tijonik che chrij ri Biblia are ajchaqʼe jun funeraria che kʼo pa Johnston, jun tinamit che kʼo naqaj jawiʼ kinel wi. Xuya bʼe chwe che kinchakun rukʼ nikʼaj taq qʼij y xuya ri rachoch rech kqabʼan ri qariqbʼal ibʼ chupam.

Ri qachalal Jolly Jeffries, che are ukʼojol ri qachalal che xyaʼow ri tijonik re ri Biblia chwe, xel bʼi pa Brooklyn (Nueva York) xopan pa ri lugar che in kʼo wi y xux wachiʼl pa ri precursorado. Xojkʼojiʼ pa jun remolque che xqaqaj che jun qachalal.

Pa ri sur re Estados Unidos nim ta ketoj ri ajchakibʼ. Rumal laʼ xa kebʼ o oxibʼ dólares kinchʼak pa jun qʼij chi kinchakunik. Jumul, xkʼis kan ronojel ri nurajil che uloqʼik ri nuwa, are chiʼ xinel lo pa ri tienda, jun achi xqebʼ wukʼ y xubʼij chwe: «¿La kawaj achak? A dólar kintoj wi jun hora chawe». Rumal laʼ oxibʼ qʼij xinchakun rukʼ rech kinchʼajchʼobʼisaj ri rulew jawiʼ tajin kyak wi ja. Qas xwilo che are ri Jehová tajin kintowik rech kinkʼojiʼ más tiempo pa Edgefield. Xuqujeʼ xinkunik xinbʼe pa ri nim riqbʼal ibʼ internacional che xbʼan pa ri tinamit Nueva York pa ri 1958.

Ri ukabʼ qʼij re ri nim riqbʼal ibʼ xkʼulmataj jun jastaq nim ubʼanik. Xwetaʼmaj uwach ri al Ruby Wadlington, che are jun precursora regular pa ri tinamit Gallatin (Tennessee). Ri oj kebʼ kqaj kojux misioneros, rumal laʼ xojbʼe pa ri riqbʼal ibʼ che kbʼan chke ri kkaj kebʼe pa Galaad. Tekʼuriʼ, xqamaj uchʼabʼexik qibʼ. Jumul xinsikʼix che uyaʼik jun chʼabʼal pa Gallatin, y chilaʼ xintaʼ kʼulanem che ri al Ruby. Xinqʼax pa ri ucongregación, y xojkʼuliʼ pa ri 1959.

23 nujunabʼ are chiʼ xinux siervo de congregación (che kimik are ri jachal kichak ri e kʼamal bʼe) pa Gallatin. Oj ri nabʼe congregación che xsolix rumal jun solinel re circuito Charles Thompson ubʼiʼ. Are jun qachalal che kʼo nim retaʼmabʼal. Paneʼ je wariʼ, ri qachalal xutaʼ chwe jas kajwataj chke ri e qachalal pa ri congregación y jas kibʼanom ri e nikʼaj chi solinelabʼ che kitoʼik. Rukʼ wariʼ xwetaʼmaj che utz kqabʼan preguntas, rech are chiʼ kqachaʼ ubʼanik jun jastaq utz kelik.

Pa mayo re 1964, xinbʼan invitar pa ri Escuela del Ministerio del Reino, che xuchʼij jun ikʼ y xbʼan pa ri tinamit South Lansing (Nueva York). Ri xeyaʼow ri tijonik chqe xinkitoʼo rech kwaj kwetaʼmaj más chrij ri Jehová y kinkʼiy más pa ri nukojonik.

Pa ri enero 1965, xinux solinel re circuito. Xojtaq bʼi pa jun circuito che sibʼalaj nim, kumajij pa Knoxville (Tennessee) kopan kʼa pa Richmond (Virginia). E kʼo congregaciones chupam re Carolina del Norte, Kentucky y Virginia Occidental. Xaq xiw xeʼensolij congregaciones kech qachalal che qʼeq kitzʼumal, rumal che pa ri tiempo riʼ kʼo chʼoj chkixoʼl ri winaq saq kitzʼumal kukʼ ri qʼeq kitzʼumal pa ri sur re Estados Unidos, rumal laʼ kojkun taj kqamulij qibʼ kukʼ ri saq kitzʼumal. Ri e qachalal chilaʼ e mebʼaʼ, rumal laʼ xqaya ke ri kʼo qukʼ. Jun solinel re circuito che kʼo nim retaʼmabʼal xuya jun pixabʼ chwe nim ubʼanik. Xubʼij: «Chakʼutuʼ machʼachʼem. Are chiʼ katbʼe pa jun congregación kabʼan ta jastaq che ri qachalal jetaneʼ katkilo junam rukʼ jun jefe. Katkunik keʼatoʼo we kakʼut utz taq bʼantajik».

Jumul, are chiʼ xojbʼe che usolixik jun alaj congregación, ri al Ruby xumajij uyaʼik etaʼmanik re ri Biblia che jun ixoq che kʼo jun alaj ral che kʼateʼ jun ujunabʼ. Rumal che kʼo ta jun qachalal che kyaʼow ri tijonik che, ri al Ruby xuya tijonik che pa carta. Y are chiʼ xojopan chi jumul pa ri congregación, ri ixoq xopan pa ronojel ri riqbʼal ibʼ. Tekʼuriʼ, xeʼopan e kebʼ precursores especiales chilaʼ y are xeyaʼow chi ri etaʼmanik che ri ixoq kʼa chiʼ xubʼan uqasanjaʼ. Are chiʼ qʼaxinaq chi 30 junabʼ, pa ri 1995, are chiʼ oj kʼo pa ri Betel re Patterson, jun ali xqebʼ rukʼ ri al Ruby che uyaʼik rutzil uwach. Are ri ral ri ixoq che ri al Ruby xuya etaʼmanik re ri Biblia che. Y kimik ri ali riʼ y ri rachajil e kʼo pa ri tijobʼal re ri clase 100 re Galaad.

Ri ukabʼ circuito che xqasolij are ri centro re ri estado re Florida. Pa ri tiempo riʼ, kajwataj jun qachʼichʼ. Rumal laʼ xqaloqʼ jun qe che paqal ta rajil. Are kʼu are chiʼ kʼateʼ jun semana qaloqʼom xubʼan kʼax ri ubomba re joron, y kʼo ta qarajil che usukʼumaxik. Xnaʼtaj jun qachalal chwe che kkunik kojutoʼo, rumal laʼ xinchʼabʼej. Y ri areʼ xeʼutaq e jujun rajchakibʼ rech kkisukʼumaj ri nuchʼichʼ y xraj taj che xqatoj che. Xaq xiw xubʼij chqe: «Kʼo ta kitoj chwe». Xaneʼ xusipaj lo jubʼiqʼ qarajil. Are jun utzalaj kʼutbʼal xubʼan ri Jehová che ukʼutik chqawach che keʼuchajij ri upatanelabʼ xuqujeʼ xukʼut chqawach che rajawaxik kojsipanik.

Are chiʼ kojbʼe che kisolixik ri congregaciones amaqʼel kojkʼojiʼ kan cho kachoch ri e qachalal, rumal laʼ xeqariq e utz taq qachiʼl. Jumul, xinkʼis ta kan utzʼibʼaxik ri informe re ri congregación xaq xinya kan pa ri máquina de escribir. Y are chiʼ xintzalij lo bʼenaqʼij, xwilo che ri kalkʼwal ri e qachalal che xojkʼojiʼ wi y che kʼo oxibʼ ujunabʼ «xukʼis» utzʼibʼaxik ri informe. Y amaqʼel kojtzeʼnik are chiʼ knaʼtaj wariʼ chqe.

Pa ri 1971, xtaq lo jun carta chwe jawiʼ kubʼij wi che kinux solinel re distrito pa ri tinamit re Nueva York. Sibʼalaj xqamay wariʼ. Rumal che kʼateʼ 34 nujunabʼ are chiʼ xojqʼax chilaʼ. Xinux ri nabʼe kisolinel re distrito che qʼeq utzʼumal, are kʼu ri e qachalal utz qakʼulaxik xkibʼano.

Ri kinbʼano are che kinya chʼabʼal pa ronojel fin de semana pa nimaʼq taq riqbʼal ibʼ re circuito y sibʼalaj utz kwil ubʼanik wariʼ. E kʼi chke ri solinelabʼ re circuito kʼo más ketaʼmabʼal chnuwach in. Jun chke are ri xyaʼow ri chʼabʼal are chiʼ xinbʼan nuqasanjaʼ. Jun chik, Theodore Jaracz, xux ri jun chke ri Jupuq Ajkʼamal bʼe cho ronojel uwach Ulew. Xuqujeʼ e kʼo kʼi qachalal che e kʼo pa Betel re Brooklyn che kʼo nim ketaʼmabʼal. Sibʼalaj nim xwilo  che ri solinelabʼ re circuito y ri betelitas utz qakʼulaxik xkibʼano. Qas xwilo che ri e loqʼalaj taq qachalal qas kkikubʼsaj kikʼuʼx chrij ri uTzij ri Dios y kkiya ri kitobʼanik rukʼ ronojel kanimaʼ che ri utinamit ri Jehová. Rumal ri kimachʼachʼem, xinutoʼo rech utz kinbʼan che ri nuchak.

Pa ri 1974, ri Jupuq Ajkʼamal bʼe cho ronojel uwach Ulew xeʼuchaʼ jun jupuq solinelabʼ re circuito pa ri obra re distrito, rumal laʼ xinux chi jumul solinel re circuito, pa Carolina del Sur. Pa ri tiempo riʼ, ri congregaciones y ri circuitos kitasom ta chi kibʼ, rumal laʼ ri e qachalal sibʼalaj kekikotik.

Chukʼisbʼalil ri junabʼ 1976, xintaq bʼi pa ri estado re Georgia, jun circuito che kʼo pa ri tinamit Atlanta y Columbus. Ksach ta chwe ri chʼabʼal che xinyaʼo are chiʼ xekam e cinco akʼalabʼ che qʼeq kitzʼumal rumal che xkʼat ri kachoch. Ri kinan ri akʼalabʼ xkʼam bʼi pa hospital rumal che xkʼatik. Y e kʼi qachalal che saq kitzʼumal y qʼeq kitzʼumal xeʼopan che uyaʼik kubʼsal kʼuʼx chke ri e tat nan. Chilaʼ xinwil wi ri nimalaj loqʼoqʼebʼal che kʼo chkixoʼl ri e qachalal. Ukʼutik loqʼoqʼebʼal sibʼalaj keʼutoʼ ri e upatanelabʼ ri Dios rech kkichʼij ri kʼax.

Pa ri 1977, xojchʼabʼex pa Betel re Brooklyn rech kojtobʼan che ubʼanik jun chak pa jujun taq ikʼ. Are chiʼ xa jubʼiqʼ kqaj che kqakʼis ri chak, e kebʼ chke ri e Jupuqʼ Ajkʼamal bʼe cho ronojel uwach Ulew xkitaʼ chqe we kqaj kojkʼojiʼ kan pa Betel, y xqakʼam wajun sikʼinik che xyaʼ chqe.

24 junabʼ xinchakun pa ri Departamento re Servicio, jawiʼ kil wi ri preguntas nim ubʼanik y kʼax uchʼobʼik che kkitaq lo ri e qachalal. Pa taq ri junabʼ che qʼaxinaq ri Jupuq Ajkʼamal bʼe cho ronojel uwach Ulew uyaʼom tijonik che esam pa ri Biblia. Ri tijonik riʼ che kiyaʼom kkojik rech ktzelex uwach ri preguntas che ktaq loq, xuqujeʼ rech ketijox ri solinelabʼ re circuito, kʼamal taq bʼe y precursores. Wariʼ e utoʼm e kʼi qachalal rech kekʼiy pa ri kikojonik xuqujeʼ uyaʼom uchuqʼabʼ ri utinamit ri Jehová.

Pa ri 1995 kopan 2018 xinsolij kʼi sucursales rumal che in representante re ri central mundial, che ojer kbʼix superintendente de zona che. Keʼinsolij ri comités de sucursales, ri betelitas y ri misioneros rech kinya kichuqʼabʼ y keʼintoʼ chuwach ri kkibʼisoj. Oj kebʼ rukʼ ri al Ruby, amaqʼel kqariq lo qachuqʼabʼ kukʼ ri e qachalal rumal ri experiencias che kkibʼij chqe. Jun kʼutbʼal, are chiʼ xojopan pa Ruanda pa ri junabʼ 2000. Sibʼalaj xopan pa qanimaʼ are chiʼ ri e qachalal y ri Betelitas xkibʼij chqe ri kʼax che xkiriq pa ri 1994 rumal che keʼajawax ta ri qʼeq kitzʼumal. Y e kʼi xkamisax kifamilias o kachiʼl. Paneʼ je wariʼ xkikʼulmaj, amaqʼel xkʼojiʼ kikojonik, keyebʼal y amaqʼel xekikotik.

Kimik, kʼo chi más che 80 qajunabʼ. Y 20 junabʼ chik in kʼolinaq pa ri Comité re Sucursal re Estados Unidos. Xinbʼe ta pa ri universidad, are kʼu ri Jehová y ri utinamit, uyaʼom ri tijonik chwe che más utz. Wariʼ nukojom che ukʼutik ri qastzij re ri Biblia chke nikʼaj chik y che kuya utzilal chke pa ronojel ri kikʼaslemal (2 Cor. 3:5; 2 Tim. 2:2). Wilom ri ubʼanom ri uTzij ri Dios che kitoʼik ri e winaq rech kkikʼex ri kikʼaslemal y keʼux rachiʼl ri Jehová (Sant. 4:8). Are chiʼ ri al Ruby y ri in kojkunik amaqʼel kqaya kichuqʼabʼ ri e nikʼaj chik rech nim kkilo che xketaʼmaj chrij ri Jehová y ukʼutik ri qastzij che kʼo pa ri Biblia... are ri eqeleʼn che más nim ubʼanik kubʼan jun upatanel ri Jehová.