Chqilaʼ ri kuya ubʼixik ri Biblia.

Hechos 24:15 kubʼij: «Kekʼastaj na ri kaminaqibʼ, chi e utz chi e lawalo». Ri e utz are ri xeniman che ri Dios are chiʼ majaʼ kekamik, rumal laʼ ri kibʼiʼ tzʼibʼatal pa ri wuj re kʼaslemal (Mal. 3:16). Ri e lawalo are ri xkichʼobʼ ta uwach ri Jehová are chiʼ majaʼ kekamik, rumal laʼ ri kibʼiʼ tzʼibʼatal ta pa ri wuj re kʼaslemal.

Juan 5:28, 29 xuqujeʼ are kchʼaw chkij ri e kebʼ jupuq winaq che kubʼij pa Hechos 24:15. Ri Jesús xubʼij che «ri winaq ri xkibʼan ri utz kekʼastaj na rech kkʼojiʼ na kikʼaslemal; e are kʼut ri winaq ri xkibʼan etzelal, kekʼastaj na che kʼoqotajem [qʼatoj tzij]». Ri e utz xeniman che ri Dios are chiʼ majaʼ kekamik. Kekʼastajisax na rech kkʼojiʼ kikʼaslemal rumal che tzʼibʼatal ri kibʼiʼ pa ri wuj re kʼaslemal. Are kʼu ri e lawalo xkibʼan itzel taq jastaq are chiʼ majaʼ kekamik. Kekʼastajisax na che kʼoqotajem o qʼatoj tzij. Ri kibʼiʼ majaʼ kkoj pa ri wuj re kʼaslemal, y pa ri tiempo re qʼatoj tzij knikʼoxik y kilik jas kkibʼan pa ri kikʼaslemal. Kyaʼ bʼe chke rech kketaʼmaj uwach ri Jehová xuqujeʼ we kkaj ktzʼibʼax ri kibʼiʼ pa ri wuj re kʼaslemal.

Apocalipsis 20:12, 13 kubʼij che konojel ri kekʼastajisax na rajawaxik kkinimaj «jas ri e tzʼibʼatal pa taq ri wuj», kraj kubʼij, ri kʼakʼ taq taqanik che kuya na ri Dios pa ri kʼakʼ uwach Ulew. Jachin ri kkinimaj taj ksachisax na kiwach (Is. 65:20).

Daniel 12:2 kubʼij che ri e kaminaq «jujun kekʼasiʼ na re chbʼe qʼij saq, jujun chi kʼut che esbʼal kʼixbʼal xuqujeʼ che ri xibʼibʼal [usachik wachaj] ri e junalik». Wajun versículo riʼ kchʼaw chrij ri kkiriq na ri kekʼastajisaxik, chukʼisbʼal ri qʼatoj tzij che kbʼan pa kiwiʼ: «kekʼasiʼ na re chbʼe qʼij saq» o kkiriq na «ri xibʼibʼal ri [...] junalik». Rumal laʼ, are chiʼ kkʼis ri 1,000 junabʼ e jujun kkiriq na ri kʼaslemal che kʼo ta ukʼisik y e jujun chik ksachisax na kiwach (Apoc. 20:15; 21:3, 4).

Ri e kebʼ jupuq winaq che kekʼastajisaxik kejunamataj kukʼ winaq che kebʼe pa jun chi tinamit. Ri e utz kejunamataj kukʼ ri winaq che kyaʼ jun visa chke rech kechakun pa ri tinamit o rech kekanaj kanoq y kekunik kkibʼan jujun taq jastaq. Are kʼu ri e lawalo kejunamataj kukʼ ri e winaq che keʼopan pa ri tinamit che kyaʼ jun visa chke che naj ta kuchʼijo o rech turista. Rech kekunik kekanaj chilaʼ rajawaxik kkinimaj ri taqanik che yaʼom pa ri tinamit. Xaq junam rukʼ, rech ri e lawalo kekʼojiʼ kan pa ri kotzʼiʼjalaj uwach Ulew rajawaxik kkinimaj ri utaqanik ri Jehová y kkikʼutu che e utz. Y, apastaneʼ ri visa kyaʼ chke ri keʼopan pa ri tinamit, e jujun kekunik kekanaj kan chilaʼ y e jujun chik keʼesax bʼik. Rumal che are kilik we xkinimaj ri taqanik che xyaʼ chke pa ri tinamit. Junam rukʼ, ri kekʼastajisax na are kilik we amaqʼel kkipatanij ri Jehová y we kkinimaj ri taqanik che kyaʼ chke pa ri kʼakʼ uwach Ulew.

Ri Jehová xaq xiw ta kel ukʼuʼx chqe, xaneʼ xuqujeʼ are jun Dios sukʼ y kloqʼoqʼenik (Deut. 32:4; Sal. 33:5). Kukʼut ri uloqʼoqʼebʼal are chiʼ keʼukʼastajisaj ri e utz y ri e lawalo, are kʼu kraj che konojel kkinimaj ri taqanik che kuyaʼo. Xaq xiw ri keloqʼoqʼen che y ri kkinimaj ri utaqanik kekʼasiʼ kan pa ri kʼakʼ uwach Ulew.