1. ¿Jas taq kʼax xkiriq ri Jehoás, ri Uzías y ri Josías?

 CHACHOMAJ che katux qʼatal tzij y kaqʼat tzij pa uwiʼ ri utinamit ri Dios are chiʼ majaʼ na ajunabʼ. ¿Jas kabʼan riʼ che uqʼatik tzij? Ri Biblia kchʼaw chkij kʼi alabʼom che xeʼux qʼatal tzij pa Judá, jun chke are ri Jehoás che kʼateʼ 7 ujunabʼ, ri Uzías 16 ri ujunabʼ y ri Josías 8 ri ujunabʼ. Chachomaj ri kʼax che weneʼ xkiriqo are chiʼ xkimaj uqʼatik tzij. Apastaneʼ ri kʼax che xkiriqo, xkiriq ri tobʼanik che xajwataj chke y utz xeʼel pa ri kikʼaslemal.

2. ¿Jasche utz che kqetaʼmaj chrij ri kikʼaslemal ri Jehoás, ri Uzías y ri Josías?

² Paneʼ oj qʼatal tzij taj, are kʼu ri kikʼutbʼal ri e winaq riʼ kʼo kqetaʼmaj chkij. Nabʼe xeniman che ri Jehová, are kʼu are chiʼ xqʼax ri tiempo xeniman ta chik. Ri kikʼutbʼal kukʼut chqawach che rajawaxik utz kqabʼan che kitzukuxik ri qachiʼl, kojux machʼalik taq winaq y kojux sukʼ che ri Jehová.

3. ¿Jas xuchaʼ ubʼanik ri Jehoás rukʼ ri utobʼanik ri Jehoiadá?

³ Chawesaj uwach ri Jehoás. Are chiʼ ri Jehoás kʼa nitzʼ na xkam ri utat y are ri Jehoiadá ri kinimal ri kojol tabʼal toqʼobʼ xkʼiyisanik y xukʼut chuwach chrij ri Jehová. Ri Jehoás xunimaj ri xubʼij ri Jehoiadá che, rumal laʼ xupatanij ri Jehová y xutoʼ ri tinamit rech je xubʼano. Xuqujeʼ xtobʼanik rech xsukʼumax ri templo (2 Crón. 24:1, 2, 4, 13, 14).

4. ¿Jas utzilal kqariqo are chiʼ kojniman che ri Jehová? (Proverbios 2:1, 10-12).

⁴ Sibʼalaj utz we ri atat anan o e nikʼaj chik tajin katkitoʼ che retaʼmaxik chrij ri Jehová, are jun sipanik che tajin kyaʼ chawe (chasikʼij uwach Proverbios 2:1, 10-12). Jalajoj ri kkibʼan ri tat nan rech kekitoʼ ri kalkʼwal rech kketaʼmaj  chrij ri Jehová. Chojchoman chrij ri xubʼan ri upapá ri qachalal Katia che utoʼik rech utz ri kuchaʼ ubʼanik pa ri ukʼaslemal. Ronojel taq qʼij are chiʼ ri utat kukʼam bʼi pa ri escuela, ketzijon chrij ri texto re ri qʼij. Katia kubʼij: «Wariʼ xinutoʼo are chiʼ xinkʼulmaj jujun taq kʼax». Are kʼu, ¿jas kabʼano we ri atat anan kkiya jujun taqanik chawe che kʼo pa ri Biblia, are kʼu kanaʼo che katkun ta chik kabʼan ri kawaj? ¿Jas kattoʼwik rech are kabʼan ri kubʼij ri Jehová? Jun qachalal ubʼiʼ Anastasia kubʼij che ri utat unan xkiqʼalajisaj chuwach jasche kkiya jujun taq taqanik che. Ri areʼ kubʼij: «Kʼax ta xinbʼan che unimaxik are chiʼ kkibʼij chwe che kʼo jujun jastaq che kinkun taj kinbʼano, are kʼu xkibʼan wariʼ rumal che kinkichajij».

5. ¿Jas kubʼan che ri Jehová y chke ri atat anan ri kachaʼ ubʼanik pa ri akʼaslemal? (Proverbios 22:6; 23:15, 24, 25).

⁵ Are chiʼ kabʼan ri kubʼij ri Biblia, kekikot riʼ ri atat anan awukʼ. Y ri más utz na are che kkikot ri Jehová awumal y wariʼ kubʼano che kkʼojiʼ jun utz achilanik chixoʼl rukʼ (chasikʼij uwach Proverbios 22:6; 23:15, 24, 25). ¿La mat qastzij che rukʼ wariʼ kawaj kawesaj uwach ri Jehoás are chiʼ kʼa ala na?

6. ¿Jachin xeʼunimaj ri Jehoás, y jas xukʼulmaj rukʼ wariʼ? (2 Crónicas 24:17, 18).

⁶ Mabʼan awe ri xubʼan ri Jehoás. Are chiʼ xkam ri Jehoiadá, ri Jehoás xeʼutzukuj itzel taq achilanik (chasikʼij uwach 2 Crónicas 24:17, 18). Xniman ta chi che ri Jehová xaneʼ are xeʼunimaj ri winaq che kkipatanij ta ri Dios (Prov. 1:10). Qas utz riʼ we ta ri Jehoás xuxutuj ri xkibʼij ri winaq che. Y are chiʼ xbʼix che rumal ri Zacarías ri uprimo che utz ta ri tajin kubʼano, utz ta xuto rumal laʼ xutaq ukamisaxik (2 Crón. 24:20, 21; Mat. 23:35). ¡Sibʼalaj kʼax ri xubʼan ri Jehoás! Nabʼe xniman che ri Jehová, tekʼuriʼ xux jun apóstata y kamisanel. Y are chiʼ xqʼax ri tiempo, xkamisax kumal ri upatanelabʼ (2 Crón. 24:22-25). Mat xukʼulmaj wariʼ wet xniman che ri Jehová y wet mat are xuta ri xkibʼij ri itzel taq rachiʼl che. ¿Jas kqetaʼmaj chrij ri ukʼutbʼal ri Jehoás?

7. ¿Jas kibʼanik ri awachiʼl rajawaxik katzukuj? (Xuqujeʼ chawilaʼ ri wachbʼal).

⁷ Ri kqetaʼmaj chrij ri ukʼutbʼal ri Jehoás are che rajawaxik utz kqabʼan che kichaʼik ri qachiʼl, kachilaxik winaq che kkipatanij ri Jehová y che kojkitoʼo rech kqaya ta kan upatanexik. Xaq xiw ta keqatzukuj achilanik che junam kijunabʼ  qukʼ. Chnaʼtaj chqe che ri Jehoiadá más nim chi ujunabʼ chuwach ri Jehoás. Are chiʼ keʼachaʼ ri awachiʼl chataʼ wariʼ: «¿La kinkitoʼ ri wachiʼl che upatanexik más ri Jehová? ¿La kinkitoʼo rech are kinnimaj ri ktaqan wi ri Jehová? ¿La ketzijon chrij ri Jehová y chrij ri kketaʼmaj pa ri Biblia? ¿La nim kkil wi ri utaqanik ri Jehová? Are chiʼ kinbʼan jastaq che utz taj, ¿la xaq kkilo o kkibʼij chwe?» (Prov. 27:5, 6, 17). We ri e awachiʼl kkipatanij ta ri Jehová cheʼayaʼ kanoq, are kʼu we kkipatanij ri Jehová amaqʼel chatkʼol kukʼ rech kaya ta kan upatanexik ri Jehová (Prov. 13:20).

8. ¿Jas rajawaxik knaʼtaj chawe are chiʼ kakoj ri redes sociales?

⁸ Ri internet kojutoʼo rech kojtzijon kukʼ ri qafamilias y kukʼ ri e qachiʼl. Are kʼu e kʼo jujun kkiya fotos y videos pa internet re ri jastaq che kʼateʼ xkiloqʼo xa rumal che kkaj nim keʼil wi. We kakoj ri internet, chachomaj: «¿La xa kwaj che nim kinil wi? ¿La keʼutoʼ ri nikʼaj chik o xa kinnimarisaj wibʼ? ¿La kinya bʼe chke ri winaq che kkikʼex ri nuchomanik y kinbʼan jastaq che utz taj?». Ri qachalal Nathan Knorr, re ri Jupuq Ajkʼamal bʼe cho ronojel uwach Ulew xuya wajun pixabʼ riʼ: «Kibʼan ta ri jastaq xa rumal che kiwaj utz kixil kumal ri nikʼaj chik, rumal che kixkun ta riʼ kibʼan ri kkaj konojel. Are chinimaj ri Jehová je wariʼ utz kixkil ri nikʼaj chik che kepatanin che».

9. ¿Jas xkun ri Uzías che ubʼanik rukʼ ri utobʼanik ri Jehová? (2 Crónicas 26:1-5).

⁹ Chawesaj uwach ri Uzías. Are chiʼ ri Uzías kʼa ala na «nim [xril] wi ri Dios». Y xtewchix rumal pa ri 68 junabʼ che xkʼasiʼk (chasikʼij uwach 2 Crónicas 26:1-5). Ri Uzías xeʼukamisaj ri ukʼulel ri tinamit Jerusalén y je wariʼ xtobʼanik rech kkixeʼj ta kibʼ ri winaq (2 Crón. 26:6-15). Ri Uzías xkikotik rumal che xtoʼ rumal ri Jehová (Ecl. 3:12, 13).

10. ¿Jas kʼax xukʼulmaj ri Uzías rukʼ ri xuchaʼ ubʼanik?

¹⁰ Kabʼan ta awe ri xuchaʼ ubʼanik ri Uzías. Ri qʼatal tzij Uzías kʼamanaq che che knimax kumal ri nikʼaj chik. Wariʼ xubʼano che xuchomaj che kkunik kubʼan ri kraj. Jun qʼij ri Uzías xok pa ri templo y xraj xukoj ri incienso pa ri altar che ri qʼatal taq tzij yaʼtal ta chke kkibʼano (2 Crón. 26:16-18). Ri kinimal kojol tabʼal toqʼobʼ Azarías xubʼij che che utz ta ri tajin kubʼano, are kʼu ri Uzías sibʼalaj xpe royowal chrij. Rumal ri xubʼano, xxutux rumal ri Jehová y xel lo chʼaʼk chrij (2 Crón. 26:19-21). ¡Mat xukʼulmaj wariʼ wet xux machʼalik winaq y xniman che ri Jehová!

11. ¿Jas kubʼan jun winaq che kumachʼ ribʼ? (Xuqujeʼ chawilaʼ ri e wachbʼal).

¹¹ Are chiʼ ri Uzías xux nim uqʼij, xsach pa ujolom che are ri Jehová xyaʼow ronojel che. ¿Jas kqetaʼmaj chrij? Utz che knaʼtaj chqe che ronojel ri tewchibʼal o ri eqeleʼn che yaʼom chqe are ri Jehová yaʼowinaq. Utz che are kqaya uqʼij ri Jehová rumal ri kojkun che ubʼanik y xa ta kqabʼan nimal (1 Cor. 4:7). b Rajawaxik kojux machʼalik taq winaq y knaʼtaj chqe che kʼo jujun mul kajwatajik che kojpixbʼexik. Jun qachalal che más che 60 ujunabʼ kubʼij wariʼ: «Xwetaʼmaj che utz taj kinbʼan  nim che wibʼ. Kinkoj nuchuqʼabʼ rech kinbʼan ri pixabʼ are chiʼ kbʼix chwe che utz ta ri tajin kinbʼano». Are chiʼ kqapatanij ri Jehová y kqakoj qachuqʼabʼ rech oj machʼalik taq winaq utz kel ronojel chqawach (Prov. 22:4).

12. ¿Jas xubʼan ri Josías che utzukuxik ri Jehová are chiʼ kʼa ala na? (2 Crónicas 34:1-3).

¹² Chawesaj uwach ri Josías. Ri Josías kʼa nitzʼ na are chiʼ xumaj retaʼmaxik chrij ri Jehová. Xraj xretaʼmaj uwach y xniman che, are kʼu xuriq jujun taq kʼax rumal che kʼa nitzʼ na are chiʼ xux qʼatal tzij. Pa ri tiempo riʼ ri winaq are kekiqʼijilaj ri dioses, rumal laʼ ri Josías xukoj uchuqʼabʼ rech ri winaq kekiqʼijilaj ta chi ri dioses. Rumal laʼ ri Josías xusachisaj kiwach ri dioses y wariʼ xubʼano are chiʼ majaʼ 20 ujunabʼ (chasikʼij uwach 2 Crónicas 34:1-3).

13. ¿Jas kariq riʼ we kajach ri akʼaslemal che ri Jehová?

¹³ Paneʼ kʼa majaʼ ajunabʼ, katkunik kawesaj uwach ri Josías. ¿Jas kabʼan che ubʼanik? Kawetaʼmaj chrij ri Jehová y chrij ri jeʼlalaj taq ubʼantajik. Wariʼ kubʼano che kawaj kajach ri akʼaslemal che. ¿Jas kariq riʼ we kajach ri akʼaslemal che ri Jehová? Ri a Luke che kʼateʼ 14 ujunabʼ are chiʼ xubʼan uqasanjaʼ kubʼij wariʼ: «Kimik kinkoj nuchuqʼabʼ rech are nabʼe kinpatanij ri Jehová y rech kkikot wumal» (Mar. 12:30). Kariq kʼi tewchibʼal riʼ we kabʼan awe.

14. ¿Jas kkibʼan jujun alabʼom alitomabʼ che resaxik uwach ri Josías?

¹⁴ ¿Jas taq kʼax kkiriq ri alabʼom alitomabʼ che upatanexik ri Jehová? Johan che xubʼan uqasanjaʼ are chiʼ 12 ujunabʼ, ri areʼ kubʼij che ri e rachiʼl pa ri escuela kkitaqchij che utijik sikʼ (cigarrillo electrónico). Rech kutij ta ri sikʼ, ri a Johan xnaʼtaj che che we kutij sikʼ kuriq yabʼil y kuriq kʼax ri rachilanik rukʼ ri Jehová. Rachel che 14 ujunabʼ are chiʼ xubʼan uqasanjaʼ kubʼij ri kubʼano are chiʼ ri rachiʼl pa ri escuela kkitaqchij che ubʼanik jastaq che utz taj. Ri areʼ kubʼij: «Are chiʼ pa ri escuela kkʼut chqawach chrij jujun taq bʼantajik che kʼulmatajinaq, are  kinchoman chkij jujun taq winaq che kʼo pa ri Biblia. Y jujun taq mul ri tzijonem che kkibʼano, kubʼano che knaʼtaj jun texto chwe y che kwaj kinkʼut chkiwach». Paneʼ ri kʼax che kariqo kjunamataj ta rukʼ ri xukʼulmaj ri Josías, are kʼu katkunik kapatanij ri Jehová rukʼ sukʼilal junam rukʼ ri xubʼan ri areʼ. We katkun che uchʼijik ri kʼax che kariq kimik, katkun riʼ kachʼij ri nimaʼq taq kʼax che kariq na pa ri petinaq.

15. ¿Jas xtoʼw ri Josías rech xupatanij ri Jehová rukʼ sukʼilal? (2 Crónicas 34:14, 18-21).

¹⁵ 26 ri ujunabʼ ri Josías are chiʼ xusukʼumaj ri templo. Are chiʼ xmajix ubʼanik ri templo xriqitaj «ri uwujil ri upixabʼ ri Ajawaxel; ri xyaʼ rumal ri Moisés». Y are chiʼ ri Josías xuta ri kubʼij wajun wuj riʼ, aninaq xunimaj ri Taqanik che uyaʼom ri Jehová (chasikʼij uwach 2 Crónicas 34:14, 18-21). ¿La kawaj kasikʼij ri Biblia? ¿La tajin kasikʼij chik? ¿La utz kanaʼ usikʼixik? ¿La tajin kakoj achuqʼabʼ rech ksach ta pa ajolom ri versículos che ktobʼan chawe pa ri akʼaslemal? Ri a Luke che xojchʼaw kan chrij pa ri párrafo 13, kʼo jun ucuaderno y kutzʼibʼaj chupam ri kretaʼmaj. Utz we kabʼan awe rech ksach ta ri textos pa ajolom. Are chiʼ más kachʼobʼ ri kubʼij ri Biblia, más utz kawil usikʼixik y más kawaj kapatanij ri Jehová. Y ri uTzij ri Dios katutoʼo rech are kabʼan ri utzilal junam rukʼ ri xubʼan ri qʼatal tzij Josías.

16. ¿Jasche utz ta ri xuchaʼ ubʼanik ri Josías y jas kqetaʼmaj chrij?

¹⁶ Kabʼan ta awe ri xubʼan ri Josías rumal che utz ta ri xuchaʼ ubʼanik. Weneʼ 39 ujunabʼ ri Josías are chiʼ utz ta ri xuchaʼ ubʼanik y che rumal wariʼ xuriq kʼax pa ri ukʼaslemal. Ri areʼ xutzukuj ta ri utobʼanik ri Jehová (2 Crón. 35:20-25). ¿Jas kqetaʼmaj chrij? Che apastaneʼ ri qajunabʼ o ri tiempo che tajin kqetaʼmaj chrij ri Biblia, rajawaxik amaqʼel kqatzukuj ri  utobʼanik ri Jehová. Rech kqetaʼmaj chrij ri Jehová rajawaxik kqataʼ ri utobʼanik, kqasikʼij ri Biblia y kqakʼam ri pixabʼ che kkiya ri qachalal chqe che ko ri kikojonik. We kqabʼan wariʼ, más kojkikot riʼ pa ri qakʼaslemal y kqabʼan ta jastaq riʼ che utz ta kril ri Jehová (Sant. 1:25).

17. ¿Jas kqetaʼmaj chkij ri e oxibʼ qʼatal taq tzij re Judá?

¹⁷ Ri alabʼom alitomabʼ kekunik kkibʼan kʼi jastaq. Ri xkikʼulmaj ri Jehoás, ri Uzías y ri Josías kukʼutu che ri alabʼom alitomabʼ y ri akʼalabʼ kekunik kkichaʼ ubʼanik ri utz pa ri kikʼaslemal y kkikotemaj ri Jehová. Paneʼ jujun taq mul utz ta ri xkichaʼ ubʼanik y xkiriq kʼax rumal wariʼ, are kʼu we are kawesaj uwach ri utz che xkibʼano, kariq na utzilal pa ri akʼaslemal.

18. ¿Jas kʼutbʼal re ri Biblia kkʼutuwik che kojkunik kqariq kikotemal pa ri qakʼaslemal? (Xuqujeʼ chawilaʼ ri wachbʼal).

¹⁸ Ri Biblia xuqujeʼ kchʼaw chkij nikʼaj chi alabʼom alitomabʼ che xkikoj kichuqʼabʼ che upatanexik ri Jehová y xkiriq utzilal junam rukʼ ri David. Are chiʼ kʼa ala na, xuchaʼ upatanexik ri Jehová y are chiʼ xqʼax ri tiempo, xux qʼatal tzij. Paneʼ kʼi xsach wi, are kʼu ri Dios are xril ri usukʼilal (1 Rey. 3:6; 9:4, 5; 14:8). We kawetaʼmaj más chrij ri ukʼaslemal ri David, wariʼ katutoʼo rech kapatanij ri Jehová rukʼ sukʼilal. Jun chik che katkunik kabʼano, are che kanikʼoj ri kikʼaslemal ri Marcos y ri Timoteo rech kawetaʼmaj más chkij. E kebʼ xkipatanij ri Jehová rukʼ sukʼilal are chiʼ kʼa e alabʼom na y qas xetaʼmax kiwach rumal wariʼ. Rumal ri xkichaʼ ubʼanik xkikot ri Jehová kumal y xkiriq utzilal pa ri kikʼaslemal.

19. ¿Jas kariq na riʼ pa ri akʼaslemal?

¹⁹ Ri kachaʼ ubʼanik kimik pa ri akʼaslemal kʼo ubʼanik rukʼ ri kariq na pa ri petinaq. We kakubʼsaj akʼuʼx chrij ri Jehová, ri areʼ katutoʼo rech utz ri kachaʼ ubʼanik pa ri akʼaslemal (Prov. 20:24). Katkunik kariq utzilal y kikotemal pa ri akʼaslemal. Y masach pa ajolom che ri Jehová nim kril wi ri kabʼan che upatanexik. Qastzij che kqariq kikotemal pa ri qakʼaslemal are chiʼ are kqachaʼ upatanexik ri Jehová rumal che sibʼalaj kojuloqʼoqʼej.