1, 2. ¿Jasche utz che kqetaʼmaj ri xukʼulmaj ri Sansón pa ri ukʼaslemal?

 ¿JAS chrij katchoman wi are chiʼ kata chrij ri Sansón? Weneʼ are katchoman chrij ri uchuqʼabʼ che xkʼojik. Qastzij che ri Sansón xkʼojiʼ nimalaj uchuqʼabʼ. Are kʼu, kʼo jun xsach wi rumal laʼ xuriq kʼax. Paneʼ je wariʼ, are kʼu ri Jehová xril ri nimalaj ukojonik che xkʼojik y xuyaʼo che xtzʼibʼax kan ri ubʼiʼ pa ri Biblia rech kʼo kqetaʼmaj chrij.

² Ri Jehová xukoj ri Sansón rech kutoʼ ri utinamit Israel. Are chiʼ kʼi junabʼ chik kaminaq ri Sansón, ri Jehová xukoj ri apóstol Pablo rech xutzʼibʼaj kan ri ubʼiʼ ri Sansón chkixoʼl ri kibʼiʼ ri winaq che xkʼojiʼ kikojonik (Heb. 11:32-34). Ri Sansón xukubʼsaj ukʼuʼx chrij ri Jehová are chiʼ xuriq nimaʼq taq kʼax. Pa wajun kʼutunem riʼ kqetaʼmaj na che ri ukʼutbʼal nim kojutoʼ wi y kʼi kqetaʼmaj chrij.

3. ¿Jas chak xyaʼ che ri Sansón?

³ Are chiʼ xalax ri Sansón, ri filisteos tajin kkibʼan kʼax che ri tinamit Israel (Juec. 13:1). Rumal che ri filisteos sibʼalaj itzel, sibʼalaj xkiriq kʼax ri israelitas pa kiqʼabʼ. Rumal laʼ, ri Jehová xuchaʼ ri Sansón «rech areʼ ri kachaplen ri kitoʼtajisaxik ri israelitas pa kiqʼabʼ ri filisteos» (Juec. 13:5). ¡Jun kʼaxalaj eqeleʼn ri xyaʼ che ri Sansón! Rajawaxik che qas kukubʼsaj ukʼuʼx chrij ri Jehová.

4. ¿Jas xubʼan ri Jehová che utoʼik ri Sansón? (Jueces 15:14-16).

⁴ Chqilampeʼ are chiʼ ri Sansón xukubʼsaj ukʼuʼx chrij ri Jehová. Jumul e kʼi filisteos xebʼe che uchapik ri Sansón pa Lehí, che weneʼ re Judá. Ri winaq che e kʼo pa Judá sibʼalaj  xkixiʼj kibʼ. Rumal laʼ xkijach ri Sansón pa kiqʼabʼ ri filisteos. Are ri israelitas xeximow ri Sansón rukʼ kebʼ kʼakʼ taq kolobʼ y xkijach pa kiqʼabʼ ri filisteos (Juec. 15:9-13). «Xqaj kʼu ri ruxlabʼal ri Ajawaxel rukʼ kuʼinem, puwiʼ ri Sansón ri xeʼutʼoqopij kʼut ri kolobʼ ri e ximowinaq ri e uqʼabʼ» y ri Sansón xkunik xanimaj bʼi chkiwach ri filisteos. Tekʼuriʼ, xuriq «apan jun ukakateʼ bʼur ri kʼa ko na ri kʼo apan jelaʼ», xukʼamo... ¡y rukʼ wariʼ xeʼukamisaj 1,000 filisteos! (Chasikʼij uwach Jueces 15:14-16).

5. ¿Jas xubʼan ri Sansón che ukʼutik che xukubʼsaj ukʼuʼx chrij ri Jehová?

⁵ ¡¿Jun ukakateʼ bʼur?! ¿Jasche are wariʼ xukoj ri Sansón che kikamisaxik ri ukʼulel? Rumal che retaʼm che ri nim ubʼanik are ta ri kukoj che kikamisaxik ri ukʼulel, xaneʼ are ukubʼsaxik ukʼuʼx chrij ri Jehová. Wajun achi riʼ are xukoj ri xuriq apanoq rech xubʼan ri xtaqan wi ri Jehová. Y rumal che xukubʼsaj ukʼuʼx chrij ri Jehová, xchʼakan pa kiwiʼ ri ukʼulel.

6. ¿Jas kqetaʼmaj chrij ri xukʼulmaj ri Sansón pa ri ukʼaslemal?

⁶ Ri Jehová xuqujeʼ kojutoʼo rech kqabʼan apachike chak che kyaʼ chqe pa ri utinamit, paneʼ kqachomaj che kojkun ta che ubʼanik. Sibʼalaj mayibʼal ri kubʼan ri Jehová che qatoʼik. We katzukuj ri utobʼanik ri Jehová, ri areʼ kuya achuqʼabʼ y katutoʼo rech katkunik kapatanij junam rukʼ ri xubʼan che utoʼik ri Sansón (Prov. 16:3).

7. ¿Jas kʼutbʼal kukʼut chqawach che rajawaxik kqatzukuj ri utobʼanik ri Jehová?

⁷ E kʼi qachalal achijabʼ e ixoqibʼ che tajin ketobʼan che uwokik taq Ja rech Ajawbʼal kikʼutum che kkikubʼsaj kikʼuʼx chrij ri Jehová. Ojer kanoq, ri utinamit ri Jehová are kbʼinik jas kbʼan che kiwokik ri Ja rech Ajawbʼal y nikʼaj chik. Are kʼu, rumal che xkʼiyar ri utinamit ri Jehová, xkʼex jujun taq jastaq. Ri e qachalal ri keʼilow ri chak xkitaʼ ri utobʼanik ri Jehová y xekiloqʼ ja che e bʼanom chik, rech xaq xiw kekisukʼumaj chi jubʼiqʼ. Ri  a Robert, che tobʼanaq che kibʼanik kʼi taq Ja rech Ajawbʼal pa ronojel ri uwach Ulew, kubʼij: «Nabʼe utz ta más xqil ri xkʼextajik. Junam ta rukʼ ri qabʼanom pa kʼi taq junabʼ. Are kʼu ri e qachalal riʼ xenimanik, xkibʼan ri xbʼix chke y xkilo che are ri Jehová tajin kkʼamow kibʼe che wajun chak riʼ». Wariʼ kukʼutu che ri Jehová tajin kukʼam ubʼe ri utinamit rech kbʼantaj ri urayibʼal. Utz che jujun taq mul kojchoman chrij pregunta junam rukʼ wariʼ: «¿La amaqʼel kintzukuj ri utobʼanik ri Jehová y la kinniman che ri kubʼij?».

8. ¿Jas xubʼan ri Sansón are chiʼ xpe chaqijchiʼ che?

⁸ Weneʼ knaʼtaj chawe jujun chke ri xubʼan ri Sansón. Ri areʼ xukoj uchuqʼabʼ rukʼ jun koj y xukamisaj, tekʼuriʼ xeʼukamisaj 30 achijabʼ pa ri tinamit filistea re Asquelón (Juec. 14:5, 6, 19). Ri Sansón retaʼm che xkun che ubʼanik wariʼ rukʼ ri utobʼanik ri Jehová. Qas xqʼalajinik che ri Sansón qas xukubʼsaj ukʼuʼx chrij ri Dios, rumal laʼ xkun che kikamisaxik 1,000 filisteos y wariʼ xuya chaqijchiʼ che. Utukel taj xutzukuj ujoron, xaneʼ xutaʼ ri utobʼanik ri Jehová (Juec. 15:18).

9. ¿Jas xubʼan ri Jehová che utzalixik ri uchʼawem ri Sansón? (Jueces 15:19).

⁹ ¿Jas xubʼan ri Jehová che utzalixik uwach ri uchʼawem ri Sansón? Ri Jehová xubʼano che ri Sansón xuriq jaʼ. Are chiʼ ri Sansón xutij ujoron, «xunaʼ kʼut chi kʼo chik uchuqʼabʼ» (chasikʼij uwach Jueces 15:19). Wajun jaʼ riʼ xkʼojiʼ pa kʼi taq junabʼ y ri Jehová xukoj ri ruxlabʼixel rech ri profeta Samuel xutzʼibʼaj kan pa ri wuj re Jueces. Weneʼ ri israelitas are chiʼ kkil wajun jaʼ riʼ knaʼtaj chke, che we kkikubʼsaj kikʼuʼx chrij ri Jehová, ri areʼ keʼutoʼ na are chiʼ kkiriq kʼax.

10. ¿Jas rajawaxik kqabʼano rech ri Jehová kojutoʼo? (Xuqujeʼ chawilaʼ ri e wachbʼal).

¹⁰ Qonojel rajawaxik kqatzukuj ri utobʼanik ri Jehová, junam rukʼ ri xubʼan ri Sansón. Apastaneʼ ri kojnaw che ubʼanik o ri oj kunaq chi che ubʼanik, amaqʼel kajwataj ri utobʼanik ri Jehová chqe. Rajawaxik kqachʼobʼo che kojkun ta che ubʼanik ronojel we man kʼo ri utobʼanik ri Jehová qukʼ. Ri Sansón xkʼojiʼ chi jumul uchuqʼabʼ are chiʼ xutij ri jaʼ che xyaʼ che rumal ri Jehová. Xa junam rukʼ, rajawaxik kqakʼam ri tobʼanik che kuya ri Jehová chqe rech amaqʼel oj sukʼ che (Mat. 11:28).

11. ¿Jas rajawaxik kqabʼano rech kqakʼam ronojel ri tobʼanik che kuya ri Jehová chqe y jas kqetaʼmaj chrij ri xukʼulmaj jun kʼulaj?

¹¹ Chojchoman chrij ri xukʼulmaj ri qachalal Alexéi, che tajin kuriq kʼax pa Rusia rumal ri ukojonik. ¿Jas toʼwinaq rech uchʼijom ri kʼax? E kebʼ rukʼ ri rixoqil kikojom kichuqʼabʼ rech amaqʼel kkisikʼij ri Biblia. Ri qachalal Alexéi kubʼij: «Xinbʼan jun programa rech ronojel taq qʼij kqasikʼij ri Biblia rukʼ ri wixoqil. Kqasikʼij ri texto re ri qʼij y kqabʼan qachʼawem». ¿Jas kqetaʼmaj chrij wariʼ? Che rajawaxik kqatzukuj ri utobʼanik ri Jehová. Rech kojkun che ubʼanik, rajawaxik kqakowirisaj ri qakojonik are chiʼ kqasikʼij ri Biblia, kqabʼan qachʼawem, kojbʼe pa ri e riqbʼal ibʼ y kqatzijoj ri utzij ri Dios. We kqabʼan wariʼ ri Jehová kojutewchij na y kojutoʼo rech kqaya ta kan upatanixik. Y kuya qachuqʼabʼ junam rukʼ ri xubʼan rukʼ ri Sansón.

12. ¿Jas xuchaʼ ubʼanik ri Sansón y che junam ta rukʼ ri xubʼan nabʼe kanoq?

¹² Ri Sansón xa ajmak junam qukʼ oj, rumal laʼ jujun taq mul utz ta ri xuchaʼ ubʼanik. Jun chke ri xuchaʼ ubʼanik sibʼalaj xuriq kʼax rumal, xchoman ta chrij ri eqeleʼn che uyaʼom ri Jehová che. Are chiʼ kʼi chi junabʼ tajin kuqʼat tzij, «xbʼe kʼu ranimaʼ ri Sansón che jun ixoq Dalila ubʼiʼ, ri kʼo rachoch pa ri bʼeyaʼ ri kʼo pa Sorec» (Juec. 16:4). Are chiʼ majaʼ kuchʼobʼ uwach ri Dalila, xraj xkʼuliʼ rukʼ jun ixoq filistea. Are kʼu ri Biblia kubʼij che wariʼ «uchomanik ri Ajawaxel waʼ, chi je kkʼulmataj na, katajin kʼu kutzukuj jas kubʼan che kichʼakik ri filisteos». Y are chiʼ ri Sansón xbʼe pa ri tinamit filistea re Gaza xkanaj kan pa ri rachoch jun prostituta. Je wariʼ ri Jehová xuya uchuqʼabʼ ri Sansón rech xkunik xujaqʼapuj bʼi ri uchiʼ ri tinamit rech kʼax ta xkibʼan ri kikʼulel xeʼok bʼik (Juec. 14:1-4; 16:1-3). Ri Jehová xeʼukoj ri ixoqibʼ riʼ rech ri Sansón xchʼakan pa kiwiʼ ri ukʼulel. Are kʼu junam ta xkʼulmataj rukʼ ri Dalila rumal che israelita y ktobʼan ta che ri Sansón rech kchʼakan pa kiwiʼ ri ukʼulel.

13. ¿Jas xubʼan ri Dalila che usubʼik ri Sansón?

¹³ Ri filisteos xkiya kʼi pwaq che ri Dalila rech kusubʼ ri Sansón y ri areʼ xubʼan ri xbʼix che. ¿Jasche ri Sansón xril taj che xa tajin ksubʼ rumal ri Dalila? Weneʼ rumal che bʼenaq ranimaʼ rukʼ. Ri Dalila kʼi mul xutaʼ che ri Sansón che kubʼij che jawchiʼ kpe wi ri uchuqʼabʼ y ri Sansón xubʼij che. Rumal wariʼ xesax ri uchuqʼabʼ rumal ri Jehová y xtoʼ ta chi rumal (Juec. 16:16-20).

14. ¿Jas kʼax xuriq ri Sansón rumal che are xukubʼsaj ukʼuʼx chrij ri Dalila?

 ¹⁴ Ri Sansón are más xukubʼsaj ukʼuʼx chrij ri Dalila y chrij ta ri Jehová, rumal laʼ xuriq kʼi kʼax. Xchap kumal ri filisteos y xekesaj ri ubʼaqʼwach. Tekʼuriʼ xkikʼam bʼi pa cárcel pa Gaza, ri tinamit che xchʼojin wi kan nabʼe y chilaʼ xkoj che esclavo. Tekʼuriʼ ri filisteos xkibʼan jun nimaqʼij che ri kidios Dagón, rumal che xkichomaj che are xjachow ri Sansón pa kiqʼabʼ. Tekʼuriʼ xkesaj lo ri «Sansón chkiwach rech kketzʼabʼej uwach» (Juec. 16:21-25).

15. ¿Jas xubʼan ri Sansón che ukʼutik che xukubʼsaj chi jumul ukʼuʼx chrij ri Jehová? (Jueces 16:28-30; chawilaʼ ri wachbʼal re ri uwach ri wuj).

¹⁵ Ri Sansón utz ta ri xubʼano, are kʼu xubʼan ta kebʼ ukʼuʼx. Rumal che xuya ta kan ubʼanik ri chak che xyaʼ che rumal ri Jehová, che keʼukamisaj ri filisteos (chasikʼij uwach Jueces 16:28-30). Rumal laʼ xutaʼ ri utobʼanik ri Jehová y xubʼij: «Chyaʼ kʼu la nuchuqʼabʼ rech kkitoj ri aj pilisteyib ri kebʼ nubʼaqʼwach». Ri Jehová xuta ri uchʼawem rumal laʼ xuya chi jumul ri uchuqʼabʼ. Y más e kʼi na ri filisteos xeʼukamisaj pa wajun nimaqʼij riʼ chuwach ri e ukamisam kan nabʼe.

16. ¿Jas kqetaʼmaj chrij ri Sansón?

¹⁶ Paneʼ ri Sansón xuriq kʼax rumal ri xuchaʼ ubʼanik, are kʼu xuya ta kan ubʼanik ri xtaq wi rumal ri Jehová. Rumal laʼ, ri oj kubʼan ta kebʼ qakʼuʼx are chiʼ utz ta ri kqachaʼ ubʼanik, xaneʼ rajawaxik kqakoj qachuqʼabʼ rech kesax ta jun eqeleʼn chqe pa ri congregación. Chnaʼtaj chqe che ri Jehová kuchomaj taj che kʼo ta chi qapatan (Sal. 103:8-10). Paneʼ kʼo kʼi kojsach wi ri Jehová kojukoj che ubʼanik jalajoj taq chak junam rukʼ ri xubʼan rukʼ ri Sansón.

17, 18. ¿Jasche kukubʼsaj akʼuʼx ri ukʼutbʼal ri a Michael? (Xuqujeʼ chawilaʼ ri e wachbʼal).

¹⁷ Chqilampeʼ ri xkʼulmataj rukʼ jun qachalal Michael ubʼiʼ. Ri areʼ siervo ministerial y precursor regular, y kʼo kʼi tajin kubʼan che upatanixik ri Jehová. Are kʼu xubʼan jun jastaq che utz taj, wariʼ xubʼano che xesax ri eqeleʼn che pa ri congregación. Ri areʼ kubʼij: «Pa wajun tiempo riʼ sibʼalaj tajin kinkoj nuchuqʼabʼ che upatanixik ri Jehová y tajin kinbʼan ronojel ri kinkun che ubʼanik. Are kʼu xaq kʼateʼ  xinnaʼo che jetaneʼ xinpotzʼij wibʼ chuwach jun pared. Wetaʼm che ri Jehová kinuya ta kan nutukel, are kʼu xinchoman chrij we ri wachilanik rukʼ kʼuʼx chi na jumul junam rukʼ ri nabʼe kanoq, o we kinya chi na ri nutobʼanik pa ri congregación junam rukʼ ri xinbʼan nabʼe kanoq».

¹⁸ Utz ri xubʼan ri a Michael rumal che xubʼan ta kebʼ ukʼuʼx. Ri areʼ kubʼij: «Ri xintoʼwik are che amaqʼel kinbʼan nuchʼawem che ri Jehová rukʼ ronojel wanimaʼ, kinsikʼij ri Biblia y kinchoman chrij». Are chiʼ xqʼax ri tiempo ri a Michael xyaʼ chi jumul ri eqeleʼn che y kimik kʼamal bʼe chik y precursor regular. Ri areʼ kubʼij: «Ri tobʼanik che xkiya ri kʼamal taq bʼe chwe kukʼut chnuwach che ri Jehová uyaʼom ta kan nuloqʼoqʼexik. Kimik tajin kinpatanij rukʼ chʼajchʼojalaj retaʼmabʼal nukʼuʼx. Y rukʼ ri xinkʼulmaj kukʼut chnuwach che ri Jehová kukuy kimak ri kkiya kan ubʼanik ri utz taj». Ri ukʼutbʼal ri a Michael kukʼut chqawach che paneʼ xqabʼan jun makaj, are kʼu kraj ta kubʼij che kʼo ta chi qapatan chuwach ri Jehová, xaneʼ kojutewchij na are chiʼ kqaya kan ri qamak y amaqʼel kqatzukuj ri utobʼanik (Sal. 86:5; Prov. 28:13).

19. ¿Jas kubʼan ri ukʼutbʼal ri Sansón che ukubʼsaxik akʼuʼx?

¹⁹ Pa wajun kʼutunem riʼ xqil xa jujun chke ri xukʼulmaj ri Sansón pa ri ukʼaslemal. Paneʼ ri Sansón jujun taq mul utz ta ri xuchaʼ ubʼanik, junam rukʼ are chiʼ xubʼij che ri Dalila jawchiʼ kpe wi ri uchuqʼabʼ y che rumal wariʼ xuriq kʼax, are kʼu xubʼan ta kebʼ ukʼuʼx. Ri Jehová xuya ta kanoq xaneʼ xukojo rech xtzʼaqat ri uchomam ubʼanik. Ri Jehová xrilo che ri Sansón kʼo nim ukojonik, rumal laʼ xuyaʼo che xtzʼibʼax ri ubʼiʼ chkixoʼl ri sukʼalaj taq upatanelabʼ che kʼo pa ri capítulo 11 re Hebreos. Kukubʼsaj qakʼuʼx retaʼmaxik che ri Jehová kojraj y che kraj kuyaʼ qachuqʼabʼ are chiʼ kqariq kʼax pa ri qakʼaslemal. Rumal laʼ chqesaj uwach ri Sansón y chqabʼij che ri Jehová: «Kintzʼonoj toqʼobʼ che la Ajawaxel, chi chinnataj che la xuwi ta chi ne jumul, chyaʼ kʼu la nuchuqʼabʼ» (Juec. 16:28).