1. ¿Jas xubʼij ri Pedro are chiʼ xekun che uchapik kʼi kar rumal ri utobʼanik ri Jesús?

 RI PEDRO jun aqʼabʼ tajin keʼutzukuj kar y kʼo ta nijun uriqom are kʼu, ri Jesús xubʼij che: «Chaqebʼisaj ri jukubʼ pa ri uchoʼil cho, chiqasaj ri i kʼat che kichapik kar (Luc. 5:4). Paneʼ ri Pedro xuchomaj che kʼo ta jun kar kuchapo, are kʼu xubʼan ri xubʼij ri Jesús che. E kʼi kar xekun che kichapik che xtʼoqopin ri kʼat. Are chiʼ ri Pedro y ri e rachiʼl xkil wariʼ «sibʼalaj xkimayo». Pedro xubʼij: «Tasaʼ ibʼ la chwe, Wajaw, in kʼu ajmak» (Luc. 5:6-9). Xunaʼo che taqal ta che kʼo rukʼ ri Jesús.

2. ¿Jas kojutoʼ wi ri ukʼutbʼal ri Pedro?

² Qastzij ri xubʼij ri Pedro: ri areʼ «are jun ajmakalaj winaq». Ri Biblia kubʼij che ri Pedro xubʼij y xubʼan jastaq che tekʼuriʼ xuchomaj che utz ta ri xubʼano. ¿La kanaʼo che je tajin kakʼulmaj junam rukʼ ri xukʼulmaj ri Pedro? ¿La tajin kakoj achuqʼabʼ chuwach jun itzel bʼantajik o chuwach jun chi kʼax? We je waʼ tajin kakʼulmaj mubʼan kebʼ akʼuʼx. Ri ukʼutbʼal ri Pedro katutoʼo. Chojchoman chrij wariʼ: Ri Dios xkun ta riʼ xubʼano che mat xtzʼibʼax kan pa ri Biblia ronojel ri xsach wi ri apóstol Pedro, are kʼu xtzʼibʼaxik rech kʼo kqetaʼmaj chrij (2 Tim. 3:16, 17). Are chiʼ kqetaʼmaj chrij ri Pedro che kʼi xsach wi, kqilo che ri Dios kreyeʼj taj che mat kʼo kojsach wi. Ri kraj are che kqakoj qachuqʼabʼ che upatanexik.

3. ¿Jasche rajawaxik che kqaya ta kan ukojik qachuqʼabʼ?

³ ¿Jasche rajawaxik amaqʼel kqakoj qachuqʼabʼ? Kʼo jun refrán kubʼij pa español, «La práctica hace al maestro».  Chojchoman chrij wariʼ. Are chiʼ jun winaq kretaʼmaj chrij música weneʼ kukʼam bʼi kʼi junabʼ rech qas knaw che ubʼanik. Weneʼ are chiʼ kumajij qas ta utz kubʼan che, are kʼu chiʼ kqʼax ri tiempo más kretaʼmaj. Paneʼ kux ajtij re música, wariʼ kraj taj kubʼij che mat ksach chik. Are kʼu wariʼ kubʼan ta che che kubʼan kebʼ ukʼuʼx. Kuya ta kan ri música. Je kkʼulmataj qukʼ. Paneʼ kqachomaj che xojkunik xqaya kan jun itzel jastaq are kʼu weneʼ jujun mul kojqaj chi chupam. Kqakoj qachuqʼabʼ rech are kqabʼan ri kqaj chuwach ri Jehová. Qonojel kqabʼij tzij o kqabʼan jastaq che kqachomaj ta na tekʼuriʼ kubʼan kʼax chqe. We kqakoj qachuqʼabʼ ri Jehová kojutoʼ na (1 Ped. 5:10). Chqanikʼoj ri utz ukʼutbʼal ri Pedro. Ri xubʼan ri Jesús che rilik ri Pedro paneʼ kʼi xsach wi kukubʼsaj qakʼuʼx, kubʼano che kqaya ta kan upatanexik ri Jehová.

4. ¿Jasche ri Pedro xubʼij che ajmak y jas xubʼan ri Jesús che ukubʼsaxik ukʼuʼx? (Lucas 5:5-10).

⁴ Ri Biblia kubʼij taj jasche ri Pedro xubʼij che «ajmak» o jas chrij makaj xchoman wi (chasikʼij Lucas 5:5-10). Weneʼ ri Pedro xubʼan jujun taq makaj. Ri Jesús xrilo che ri Pedro kuxiʼj ribʼ, weneʼ xuchomaj che kkun taj kux rachiʼl ri Jesús. Are kʼu ri Jesús retaʼm che ri Pedro kkunik kux sukʼ che ri Dios. Rumal laʼ xubʼij che: «Maxeʼj awibʼ». Are chiʼ ri Pedro xrilo che ri Jesús kukubʼsaj ukʼuʼx chrij, wariʼ kʼo xubʼan pa ri ukʼaslemal. Are chiʼ xqʼax ri tiempo, ri Pedro y ri rachalal ubʼiʼ Andrés xkiya kan uchapik kar rech xkiterneʼj ri Jesús. Rukʼ ri xkichaʼ ubʼanik, xkiriq kʼi tewchibʼal (Mar. 1:16-18).

5. ¿Jas tewchibʼal xuriq ri Pedro rumal che xuya ta kan ukojik uchuqʼabʼ y xukʼam ri sikʼinik che xyaʼ che rumal ri Jesús?

⁵ Ri Pedro xril ri kʼi taq mayibʼal che xubʼan ri Jesús. Xrilo che are chiʼ ri Jesús xeʼukunaj yawabʼibʼ, xresaj itzel taq uxlabʼal chke ri e winaq y xeʼukʼastajisaj jujun taq kaminaqibʼ (Mat. 8:14-17; Mar. 5:37, 41, 42). b Xuqujeʼ xril pa jun visión che ri Jesús kux na nim uqʼij pa ri uQʼatbʼal tzij ri Dios. Y wariʼ kʼo xubʼan pa ri ukʼaslemal (Mar. 9:1-8; 2 Ped. 1:16-18). Ri Pedro xril mayibʼalalaj taq jastaq che uchomam taj. ¡Qastzij che sibʼalaj xkikot riʼ rumal che are xuchaʼ utereneʼxik ri Jesús! Y che xuya taj che ri itzel taq chomanik xtaqan puwiʼ y rumal wariʼ xtewchixik.

6. ¿La aninaq xkun ri Pedro che uyaʼik kan ri itzel chomanik?

 ⁶ Wet mat xutereneʼj ri Jesús mat xril ri ronojel ri milagros che xubʼano, are kʼu xuya ta kan ukojik uchuqʼabʼ chrij ri itzel taq uchomanik rech kchʼakan puwiʼ. Chqilampeʼ. Are chiʼ ri Jesús xubʼij che kuriq na kʼax y che kkamisax na rech ketzʼaqat ri profecías re ri biblia, are kʼu ri Pedro xuyajo (Mar. 8:31-33). Xa ta jumul che ri Pedro y ri nikʼaj chi tijoxelabʼ xechʼojinik rech kketaʼmaj jachin ri más nim uqʼij chke (Mar. 9:33, 34). Are chiʼ xa jubʼiqʼ chi kraj che kkamisax ri Jesús, ri Pedro petinaq royowal y xresaj ri uxikin jun achiʼ (Juan 18:10). Pa wajun chaqʼabʼ riʼ sibʼalaj xuxiʼj ribʼ, rumal laʼ oxibʼ mul xubʼij che kuchʼobʼ ta uwach ri Jesús (Mar. 14:66-72). Rumal ri xubʼano xoqʼ rukʼ kʼayil (Mat. 26:75).

7. Are chiʼ kʼastajinaq chi ri Jesús, ¿jas xubʼij che ri Pedro?

⁷ Ri Jesús xuchomaj taj che ri Pedro kʼo ta chi kkun che ubʼanik. Are chiʼ ri Jesús kʼastajinaq chik, xubʼij che ri Pedro che kloqʼoqʼex rumal. Xubʼij che che keʼuchajij ri alaj taq uchij (Juan 21:15-17). Ri Pedro sibʼalaj xkikotik. Rumal laʼ kʼo pa Jerusalén pa ri Pentecostés y are jun chke ri nabʼe che xchaʼ rukʼ ri uxlabʼixel rech kbʼe pa ri kaj.

8. ¿Jas ri utz taj che xubʼan ri Pedro pa Antioquía?

⁸ Paneʼ ri Pedro chaʼom chik rech kbʼe pa ri kaj, are kʼu jujun taq mul xukoj na uchuqʼabʼ chuwach jujun taq chomanik che kresaj uchuqʼabʼ ri ukojonik. Pa ri junabʼ 36 xrilo are chiʼ ri Cornelio xchaʼ rumal ri uxlabʼixel rech kbʼe pa ri kaj. Je wariʼ xilitajik che «ri Dios man jalan ta keril wi taq ri winaq» y ri e re jun chi tinamit kekunik kkipatanij ri Dios (Hech. 10:34, 44, 45). Pa wajun qʼij riʼ ri Pedro xuxiʼj ta chi ribʼ xwaʼ kukʼ ri gentiles, che kʼo ta ni jumul ubʼanom nabʼe kanoq (Gál. 2:12). Jujun cristianos kkichomaj che ri judíos y ri gentiles kekun taj kewaʼ junam. Jujun cristianos che je kichomanik waʼ xeʼopan pa Antioquía, are chiʼ ri Pedro xerilo xwaʼ ta chi kukʼ ri rachalal gentiles, weneʼ rumal che xuxiʼj ribʼ chkiwach. Are chiʼ ri Pablo xril ri xubʼan ri Pedro, xuyaj chkiwach konojel (Gál. 2:13, 14). Paneʼ je waʼ xkʼulmatajik, ri Pedro xubʼan ta kebʼ ukʼuʼx; xaneʼ xukoj uchuqʼabʼ. ¿Jas xtoʼwik?

9. Junam rukʼ ri kubʼij pa Juan 6:68, 69, ¿jas xubʼan ri Pedro che ukʼutik che sukʼ?

⁹ Ri Pedro amaqʼel xukʼut sukʼilal. Kʼo ta jun jastaq xqʼaten che utereneʼxik ri Jesús. Xukʼut ri usukʼilal are chiʼ ri Jesús xubʼij jun tzij che xkichʼobʼ ta ri utijoxelabʼ (chasikʼij Juan 6:68, 69). Ri tijoxelabʼ xkeyej ta na che xqʼalajisax chkiwach ri xubʼij ri Jesús, xaneʼ xetzalij cho taq kachoch. Are kʼu ri Pedro je ta xubʼano. Xaneʼ xubʼij wariʼ che ri Jesús «ukʼ la kʼo wi ri tzij re junalik kʼaslemal».

10. ¿Jas xubʼan ri Jesús che ukʼutik che kukubʼsaj ukʼuʼx chrij ri Pedro? (Xuqujeʼ chawilaʼ ri wachbʼal).

¹⁰ Ri Jesús ni jumul xuya kan ri Pedro utukel. Pa ri kʼisbʼal chaqʼabʼ che kʼasal ri Jesús cho ri uwach Ulew, ri Jesús retaʼm che ri Pedro y nikʼaj chi utijoxelabʼ kkiya kan utukel. Paneʼ je xkibʼano, are kʼu ri Jesús retaʼm che ri Pedro kux na sukʼ che (Luc. 22:31, 32). Ri Jesús retaʼm ri xkikʼulmaj ri utijoxelabʼ rumal laʼ xubʼij: «Ri iwanimaʼ kraj, are kʼu ri icuerpo man kʼo ta uchuqʼabʼ» (Mar. 14:38). Xuqujeʼ  are chiʼ ri Pedro xubʼij che kuchʼobʼ ta uwach ri Jesús, rumal ta wariʼ xyaʼ kan rumal. Are chiʼ xaq utukel ri Pedro ri Jesús xukʼut ribʼ chuwach are chiʼ xkʼastajik (Mar. 16:7; Luc. 24:34; 1 Cor. 15:5). Qastzij riʼ che wariʼ xtobʼan che ri Pedro rech xubʼan ta kebʼ ukʼuʼx.

11. ¿Jas xubʼan ri Jesús che utoʼik ri Pedro rech kretaʼmaj che ktoʼ rumal ri Jehová?

¹¹ Ri Jesús xubʼij che ri Pedro che kchajix rumal ri Jehová. Are chiʼ kʼastajinaq chi ri Jesús xutoʼ ri Pedro y nikʼaj chi apóstoles rech xekichap kar (Juan 21:4-6). Wajun milagro che xubʼan ri Jesús xukʼut chuwach ri Pedro che ri Jehová kkunik kuya ronojel ri kajwataj che. Qastzij riʼ che wariʼ kunaʼtajisaj che ri Pedro che ri Jehová keʼuchajij na ri kkikoj kichuqʼabʼ «che uriqik ri rajawbʼal ri Dios» (Mat. 6:33). Ri Pedro are más xutas utiempo che utzijoxik ri utzij ri Dios y are ta ri kichapik kar (Hech. 2:14, 37-41). Pa ri Pentecostés re ri junabʼ 33 ri Pedro xuxiʼj ta ribʼ rech xutzijoj ri utzij ri Dios chke e kʼi winaq tekʼuriʼ xeʼutoʼ e kʼi samaritanos y gentiles rech xeʼux utijoxel ri Jesús (Hech. 8:14-17; 10:44-48). Qastzij che ri Jehová xukoj ri Pedro rech e kʼi winaq xekojonik.

12. ¿Jas kubʼan ri ukʼutbʼal ri Pedro che qatoʼik we naj tiempo tajin kqakoj qachuqʼabʼ chuwach jun kʼax?

¹² Ri Jehová xuqujeʼ kojutoʼ kimik rech kqaya ta kan ukojik qachuqʼabʼ. Jujun taq mul kʼax kqabʼan che ubʼanik wariʼ, más na we tajin kqakoj qachuqʼabʼ chuwach jun itzel jastaq. Y weneʼ jujun taq mul kqanaʼo che más nim na ri kʼax tajin kqariqo chuwach ri xuriq ri Pedro. Are kʼu ri Jehová kojutoʼo rech kqaya ta kan ukojik qachuqʼabʼ (Sal. 94:17-19). Chqilampeʼ ri ukʼutbʼal jun qachalal, che are chiʼ majaʼ kretaʼmaj ri qastzij, xux homosexual pa kʼi taq junabʼ. Paneʼ xkunik xuya kan wajun itzel bʼantajik, are kʼu jujun taq mul xpe na ri itzel taq chomanik pa ujolom. ¿Jas xtoʼwik rech kuya ta kan ukojik uchuqʼabʼ chuwach wariʼ? Ri areʼ kubʼij. «Ri Jehová kuya qachuqʼabʼ» y kubʼij chik: «Rukʼ ri utobʼanik ri ruxlabʼal ri Jehová [...], wetaʼmam che kinkunik kinbʼin pa ri bʼe re ri qastzij». Y chukʼisbʼal kubʼij: «Ri Jehová inutoʼm rech tajin kinpatanij [...], y paneʼ  kʼo jastaq che tajin kinkoj na nuchuqʼabʼ chuwach, are kʼu tajin kinutoʼo».

13. ¿Jas kqabʼan che resaxik uwach ri Pedro? (Hechos 4:13, 29, 31; Xuqujeʼ chawilaʼ ri wachbʼal).

¹³ Junam rukʼ ri qilom chik, ri Pedro jujun taq mul xuxibʼij ribʼ chkiwach ri winaq. Are kʼu xutaʼ ri utobʼanik ri Jehová y ri xibʼin ibʼ xchʼakan ta puwiʼ (chasikʼij uwach Hechos 4:13, 29, 31). Oj xuqujeʼ kojkunik kojchʼakan puwiʼ wariʼ. Chqilampeʼ ri xukʼulmaj ri a Horst, jun ala che Testigo che xkʼojiʼ pa ri Alemania nazi. Kʼi mul xtaqchiʼx pa ri escuela rech xubʼij: «¡Heil, Hitler!». Ri utat unan xkiyaj taj, xaneʼ xkibʼan kichʼawem rukʼ y xkitaʼ che ri Jehová che kuya uchuqʼabʼ. Rumal ri tobʼanik che xkiya ri utat unan che y ri utobʼanik ri Jehová ri a Horst xkunik xubʼij chke ri rachiʼl pa ri escuela ri rumal che kubʼij ta wariʼ. Y are chiʼ qʼaxinaq chi ri tiempo xubʼij wariʼ: «Ri Jehová inuyaʼom ta kan nutukel». c

14. ¿Jas kkibʼan ri kʼamal taq bʼe rech rukʼ loqʼoqʼebʼal kekitoʼ ri ubʼanom kebʼ kikʼuʼx?

¹⁴ Ri Jehová y ri Jesús man kojkiya ta kanoq. Sibʼalaj kʼax xuriq ri Pedro rumal che xubʼij che kuchʼobʼ ta uwach ri Jesús. ¿La kukoj uchuqʼabʼ che uterenexik ri Jesús? Ri Jesús utoʼm che ri Jehová rech kuya uchuqʼabʼ ri ukojonik ri Pedro. Tekʼuriʼ ri Jesús xubʼij che ri Pedro che ubʼanom uchʼawem puwiʼ y retaʼm che are chiʼ kqʼax ri tiempo, kkun na che kitoʼik ri cristianos rech kʼo jun ko kikojonik (Luc. 22:31, 32). ¡Qastzij riʼ che xuya uchuqʼabʼ ri Pedro are chiʼ xchoman chrij ri e tzij che xubʼij ri Jesús! Ri oj xuqujeʼ jujun taq  mul rajawaxik kqachaʼ ubʼanik jun jastaq pa ri qakʼaslemal. Are chiʼ kqabʼan wariʼ, qastzij riʼ che ri Jehová keʼukoj ri kʼamal taq bʼe y rukʼ loqʼoqʼebʼal kkiya qachuqʼabʼ (Efes. 4:8, 11). Ri a Paul che kʼi junabʼ chik kʼamal bʼe, kukoj uchuqʼabʼ rech keʼutoʼ ri qachalal. Are chiʼ krilo che jun qachalal kbʼisonik, kuya uchuqʼabʼ y kunaʼtajisaj che ri xubʼan ri Jehová che ukʼamik lo pa ri utinamit. Xuqujeʼ kubʼij che che kloqʼoqʼex rumal ri Jehová, kyaʼ ta kan rumal y kril ri chuqʼabʼ che tajin kukojo rech kukʼut sukʼilal. Ri kʼamal bʼe riʼ rilom che ri e qachalal kiyaʼom ta kan ukʼutik sukʼilal rukʼ ri utobʼanik ri Jehová.

15. ¿Jas kubʼan ri kikʼutbʼal ri Pedro y ri a Horst che ukʼutik che qas ktzʼaqat ri kubʼij Mateo 6:33?

¹⁵ Xqilo che ri Jehová xuya ri kajwataj che ri Pedro y ri e nikʼaj chik apóstoles. Jeʼ kubʼan oj che qatoʼik kimik we are kqaya nabʼe pa qakʼaslemal ri upatanixik (Mat. 6:33). Are chiʼ xqʼax ri Segunda Guerra Mundial, ri a Horst che xojchʼaw kan chrij xumajij ri precursorado. Are kʼu sibʼalaj mebʼaʼ y xuchomaj che kkun ta riʼ kupatanij ri Jehová pa tiempo completo. ¿Jas xubʼano? Ri xubʼano are che xutzijoj ri utzij ri Dios ronojel ri jun semana che xkʼojiʼ ri solinel. Are chiʼ xkʼis ri semana rech ri solinik, sibʼalaj xumayo rumal che ri solinel re circuito xuya jun sobre che che kʼo pwaq chupam y kʼo ta ri ubʼiʼ ri winaq che xyaʼowik. Rukʼ wariʼ kkunik kubʼan ri precursorado pa kʼi ikʼ. Rukʼ ri pwaq che xyaʼ che, ri a Horst xrilo che kchajix rumal ri Jehová. Rumal laʼ are xuchaʼ upatanixik ri Jehová pa ronojel ri ukʼaslemal (Mal. 3:10).

16. ¿Jasche nim ubʼanik che kqanikʼoj ri ukʼutbʼal ri Pedro y ri carta che xutzʼibʼaj?

¹⁶ ¡Sibʼalaj xkikot riʼ ri Pedro che xyaʼ ta kan rumal ri Jesús paneʼ xubʼij ri e tzij riʼ: «Tasaʼ ibʼ la chwe, Wajaw»! Ri Jesús amaqʼel xutoʼ ri Pedro rech kux jun sukʼ apóstol y jun utz kʼutbʼal chke ri cristianos. Kʼo kʼi kqetaʼmaj chrij ri tobʼanik che xyaʼ che ri Pedro rumal ri Jesús. Ri Pedro kʼi xretaʼmaj chrij ri xkʼut chuwach rumal ri Jesús y xutzʼibʼaj jujun chke pa ri cartas che xutaq bʼi chke ri cristianos re ri nabʼe siglo. Pa ri jun chi kʼutunem, kqil na jujun bʼantajik che nim kibʼanik che xutzʼibʼaj kan ri Pedro pa ri cartas y jas tobʼanik kuya chqe kimik.