1, 2. ¿Jasche (o suche) ri oj upatanelabʼ ri Jehová qas kojkikotik? (Santiago 1:22-25).

 RI Jehová y ri Ukʼojol kkaj che qas kojkikotik. Ri xtzʼibʼan ri Salmo 119:2 xubʼij: «Sibʼalaj utz kech ri keʼok il chke taq ri e utaqanik kakitzukuj kʼut rukʼ ronojel kanimaʼ». Y ri Jesús xubʼij wariʼ: «Are kikotemal chke ri kkitatabʼej ri Utzij ri Dios, kkinimaj kʼut» (Luc. 11:28).

² Ri kojpatanin che ri Jehová qas kojkikotik. ¿Jasche? Rumal che kqasikʼij ri Utzij ri Dios ronojel taq qʼij xuqujeʼ kqakoj qachuqʼabʼ rech kqabʼan pa ri qakʼaslemal ri xqetaʼmaj chupam (chasikʼij Santiago 1:22-25).

3. ¿Jas tewchibʼal kqariqo rumal che kqabʼan pa qakʼaslemal ri kubʼij ri Utzij ri Dios?

³ ¿Jas utzilal kqariqo rumal che kqabʼan ri kubʼij ri Utzij ri Dios? Are taq chiʼ kqakoj qachuqʼabʼ kqakikotemaj ri Jehová, wariʼ kubʼano che qas kqanaʼ kikotemal (Ecl. 12:13). Are kʼu chiʼ kqabʼan ri kubʼij ri Utzij ri Dios ktobʼanik rech kqariq utzilal kukʼ ri qa familia y kqabʼan más utz amigos kukʼ ri qachalal pa ri congregación. Weneʼ ri at awilom chi wariʼ. Xuqujeʼ kqariq ta kʼax pa ri qakʼaslemal jachaʼ ri kkiriq ri kkinimaj ta ri Jehová. Junam rukʼ ri xubʼixoj ri David, che ri e utaqanik ri Jehová, ri kraj xuqujeʼ ri qʼatoj tzij che  kubʼano, ri winaq che kunimaj «kʼo karechbʼej che ri kinimaxik» (Sal. 19:7-11).

4. ¿Jasche jujun mul kʼax ubʼanik ri kubʼij ri Biblia?

⁴ Qastzij che kqachʼobʼo, che jujun taq mul kʼax ubʼanik ri kubʼij ri Biblia. Paneʼ kʼi kqabʼano, pero rajawaxik che kqesaj tiempo rech kqasikʼij uwach ri Utzij ri Jehová, rech qas kqachʼobʼo ri kraj kqabʼano. Rumal laʼ, pa wajun kʼutunem riʼ kqil na jujun taq tobʼanik che kojutoʼo rech kqasikʼij ri Biblia ronojel taq qʼij. Xuqujeʼ kqil na ri taq tobʼanik che kʼolik rech qas kqachʼobʼ ri xqasikʼij uwach y kqabʼan pa ri qakʼaslemal.

CHATASAʼ A TIEMPO RECH KASIKʼIJ RI BIBLIA

5. ¿Jas kbʼanowik che kʼo ta más qa tiempo?

⁵ Qonojel ri oj upatanelabʼ ri Jehová kʼo kʼi kqabʼano. Kqakoj kʼi tiempo che ubʼanik jujun taq jastaq che ri Biblia kubʼij che nim kibʼanik. Oj juntir kqakoj qachuqʼabʼ rech kqatzukuj ri kajwataj chqe y chke ri qa familia (1 Tim. 5:8). Nikʼaj chi qachalal kekichajij ri ki familiares che weneʼ e yawabʼ o nim chi kijunabʼ. Y kajwatajik che kqesaj qa tiempo rech kqariq ta kʼax o kqariq ta yabʼil. Xuqujeʼ kʼo jujun taq eqeleʼn che rajawaxik kqil pa ri congregación. Y jun chke che nim ubʼanik are ri utzijoxik ri utzij ri Dios. Rumal che sibʼalaj kʼi ri kqabʼano, weneʼ kachomaj: ¿Jas rajawaxik kinbʼano rech kinwesaj tiempo rech kinsikʼij ri Biblia, kinchoman chrij y kinbʼan pa ri nukʼaslemal?

6. ¿Jas rajawaxik kinbʼano rech amaqʼel kinsikʼij ri Biblia? (Xuqujeʼ chawilaʼ ri wachbʼal).

⁶ Usikʼixik uwach ri Biblia are jun chke ri más nim ubʼanik che kubʼan jun cristiano, rumal laʼ rajawaxik kqasikʼij ri qa Biblia (Filip. 1:10). Ri Salmos kubʼij che ri achi kuriq ri kikotemal we «kuloqʼoqʼej ri upixabʼ ri Ajawaxel are kʼu kchoman che chi pa qʼij chi  chaqʼabʼ» (Sal. 1:1, 2). Qastzij che rajawaxik kqatas tiempo rech kqasikʼij uwach ri Biblia. Pero, ¿jachike hora re ri qʼij are más utz che ksikʼix uwach ri Biblia? Chqajujunal kojkunik kqilo jachike hora are ri más utz. Ri más nim upatan are che amaqʼel kqasikʼij uwach. Jun qachalal ubʼiʼ Víctor kubʼij: «Sibʼalaj utz kinnaʼo kinsikʼij uwach ri Biblia aqʼabʼil (bʼajchiʼ). Kinbʼij taj che xa utz kinnaʼo che aqʼabʼil kinwalijik, pero are más utz rumal che kinchomaj ta nikʼaj chi jastaq». ¿La junam kachomaj at rukʼ ri a Víctor? Chachomaj: «¿Jas hora re ri qʼij más utz rech kinsikʼij ri Biblia?».

CHATCHOMAN CHRIJ RI XASIKʼIJ UWACH

7, 8. Chayaʼ jun kʼutbʼal ri utz taj kabʼano are chiʼ kasikʼij ri Biblia.

⁷ Are chiʼ achomam chik jas hora kasikʼij ri Biblia, rajawaxik kachajij awibʼ rech xaq xiw ta kasikʼij uwach. ¿La kʼo jumul abʼanom che knaʼtaj ta chi chawe ri xasikʼij uwach? Oj juntir je kqabʼano. Y weneʼ je kkʼulmatajik are chiʼ kasikʼij uwach ri Biblia. Weneʼ kachomaj usikʼixik jujun capítulos re ri Biblia ronojel taq qʼij, utz che kakoj achuqʼabʼ che ubʼanik (1 Cor. 9:26). Are kʼu xaq xiw ta kasikʼix uwach ri Biblia xaneʼ rajawaxik kabʼan más rech katkunik kachʼobʼ ri kubʼij.

⁸ Chqachomaj wariʼ. Ri jabʼ kajwatajik rech ri tikoʼn kkʼiyik, pero we más kqaj ri jabʼ xa kubʼan chi kʼax riʼ che ri tikoʼn. Are más utz riʼ we más ta nim ri jabʼ kubʼano rech kuriq ta kʼax ri tikoʼn. Junam rukʼ wariʼ, utz che nojimal kqasikʼij uwach ri Biblia rech kqachʼobʼ ri kubʼij y kqabʼan pa ri qakʼaslemal (Sant. 1:24).

9. ¿Jas rajawaxik kqabʼano we amaqʼel aninaq kqasikʼij uwach ri Biblia?

⁹ Chachomaj che tajin kasikʼij uwach ri Biblia y kawilo che aninaq tajin kabʼano.  ¿Jas rajawaxik kabʼano? Utz che nojimal kasikʼij rech katkunik katchoman chrij. We kawilo che kʼax ubʼanik wariʼ, kaxiʼj ta awibʼ. Ri rajawaxik kabʼano are che katchoman chrij ri xasikʼij uwach. Utz che 1) kaya más a tiempo rech katchoman chrij ri xasikʼij uwach o 2) kʼi ta versículos kasikʼij rech katkunik katchoman chrij. Víctor che xojtzijon chrij pa ri párrafo 6 kubʼij: «Kinkoj nuchuqʼabʼ rech kʼi ta versículos kinsikʼij uwach, weneʼ xaq jun capítulo. Rumal che aqʼabʼil kinsikʼij, kinkunik kinchoman chrij ronojel ri qʼij». Ri más nim upatan are che kachʼobʼ ri kubʼij are taj che kʼi versículos kasikʼij uwach (Sal. 119:97; chawilaʼ ri recuadro « Preguntas che katutoʼo rech katchoman chrij ri xasikʼij uwach»).

10. Chayaʼ ubʼixik rukʼ jun kʼutbʼal jas kabʼan che ukojik pa akʼaslemal ri xasikʼij uwach pa ri Biblia (1 Tesalonicenses 5:17, 18).

¹⁰ Are chiʼ achomam chik jas hora re ri qʼij kasikʼij ri Biblia y jampaʼ versículos kasikʼij qas chakojoʼ achuqʼabʼ che ubʼanik. Are chiʼ tajin kasikʼij uwach ri Biblia chachomaj wariʼ: «¿Jas kinbʼan che ukojik kamik o pa ri petinaq ri xinsikʼij uwach?». Jun kʼutbʼal, chqachomaj che xasikʼij uwach 1 Tesalonicenses 5:17, 18 (chasikʼij) y chatchoman chrij ri tajin kabʼan che ubʼanik orar. ¿La qas rukʼ ronojel awanimaʼ kabʼano? ¿Jampaʼ mul kabʼano? ¿Jas ri kamaltyoxij? Weneʼ rukʼ wariʼ katchoman chrij oxibʼ jastaq che kawaj kamaltyoxij che ri Jehová. We kawesaj a tiempo rech katchoman chrij ri xasikʼij uwach —paneʼ xa jujun minutos— wariʼ katutoʼo rech xaq xiw ta kasikʼij ri Biblia xaneʼ kakoj achuqʼabʼ che ubʼanik pa ri akʼaslemal. We ronojel qʼij je waʼ kabʼan che usikʼixik ri Biblia, wariʼ katutoʼ rech katux jun utz cristiano. Are kʼu, ¿we kawilo che kʼi ri rajawaxik kakʼexo?

CHAKOJOʼ METAS CHE QAS KATKUNIK KABʼANO

11. ¿Jasche jujun mul weneʼ katbʼisonik chiʼ kasikʼij ri Biblia? Chayaʼ jun kʼutbʼal.

¹¹ Are chiʼ kasikʼij uwach ri Biblia weneʼ jujun taq mul katbʼisonik rumal che kawilo che kʼi ri rajawaxik kakʼexo. Chachomaj wariʼ. Pa ri Biblia xasikʼij che utz taj we junam ta kqabʼan che kilik ri winaq (Sant. 2:1-8). Rumal laʼ kakoj achuqʼabʼ rech junam kabʼan che kilik ri winaq. Are kʼu pa ri ukabʼ qʼij chik  are chiʼ tajin kasikʼij ri Biblia, xawilo che nim ubʼanik che kqachajij ri kqabʼij (Sant. 3:1-12). Rukʼ wariʼ xawilo che jujun taq mul qas ta utz ri tzij che kabʼij, rumal laʼ xachomaj che utz we kakʼex ri tzij kakojo. Y churox qʼij chik chiʼ tajin kasikʼij ri Biblia xawilo che utz taj kabʼan awamigos chke ri winaq che kkiqʼijilaj ta ri Jehová (Sant. 4:4-12). Rukʼ wariʼ xawetaʼmaj che rajawaxik kachajij awibʼ che ri películas y ri música che kato, y pa ri ukaj qʼij weneʼ katbʼisonik rumal che kʼi ri rajawaxik kakʼexo.

12. ¿Jasche utz taj katbʼisonik we kawilo che kʼo rajawaxik kakʼex pa ri akʼaslemal? (Xuqujeʼ chawilaʼ ri nota).

¹² Katbʼison taj we kawilo che kʼo rajawaxik kakʼex pa ri akʼaslemal. Xaneʼ rukʼ wariʼ tajin kakʼutu che rukʼ machʼachʼem tajin kasikʼij ri Biblia y che kawaj kabʼan ri utz. a Y chnaʼtaj chawe che ukojik ri kʼakʼ kʼaslemal ronojel qʼij kbʼanik (Col. 3:10). ¿Jas katutoʼo rech kaya ta kan ubʼanik ri kubʼij ri Biblia?

13. ¿Jas rajawaxik kabʼano? (Xuqujeʼ chawilaʼ ri e wachbʼal).

¹³ Chkijujunal chabʼanaʼ ri rajawaxik kakʼexo che xawetaʼmaj pa ri Biblia (Prov. 11:2). Chabʼanaʼ wariʼ: chabʼanaʼ jun lista che ri rajawaxik kakʼexo, chachaʼ jun o kebʼ che kawaj kabʼan nabʼe y kʼateʼ kabʼan ri nikʼaj chik. ¿Jachin chke kawaj kabʼan nabʼe?

14. ¿Jas ri kawaj kabʼan nabʼe?

¹⁴ Nabʼe are chabʼanaʼ ri metas che kʼax ta ubʼanik o ri kajwataj chawe. Are chiʼ achʼobʼom chik ri kawaj kabʼano,  utz che katzukuj ri kuya ubʼixik ri e qawuj chrij wariʼ pa ri índice de las publicaciones Watch Tower o ri Tobʼanik chike ri testigos rech Jehová rech kketaʼmaj más. Chataʼ che ri Jehová «ri urayixik ubʼanik ri kqaj chuwach» (Filip. 2:13). Tekʼuriʼ chabʼanaʼ pa ri akʼaslemal ri xawetaʼmaj. Are chiʼ kawilo che xatkun che ubʼanik, wariʼ ktobʼanik rech kabʼan chi ri nikʼaj che kʼo pa ri a lista.

CHAYAʼ CHE RI BIBLIA KUKʼEX RI AKʼASLEMAL

15. ¿Jas kojjunamataj ta wi ri oj testigos rech Jehová kukʼ ri winaq che kkisikʼij ri Biblia? (1 Tesalonicenses 2:13).

¹⁵ Jujun winaq kkibʼij che kʼi mul kisikʼim uwach ri Biblia. Pero ¿la kekojon chrij ri kubʼij? ¿La kiyaʼom che ri Biblia kukʼex ri kikʼaslemal? Kʼi chke kiyaʼom taj che kukʼex ri kikʼaslemal. ¡Ri testigos rech Jehová oj junam ta kukʼ ri winaq riʼ! Junam kukʼ ri cristianos re ri nabʼe siglo che xkikʼam «ri utzij ri Dios» ri oj xuqujeʼ je kqabʼano. Rumal wariʼ kqakʼutu che ri Biblia ukʼexom ri qakʼaslemal (chasikʼij 1 Tesalonicenses 2:13).

16. ¿Jas kojtoʼwik rech kqabʼan pa qakʼaslemal ri kukʼut ri Biblia?

¹⁶ Kajwataj chuqʼabʼ rech kqasikʼij ri Biblia y kqabʼan pa ri qakʼaslemal ri kqetaʼmaj. Weneʼ aninaq kqasikʼij uwach y kʼo ta kqetaʼmaj chrij. Weneʼ kojbʼisonik rumal che kqilo che kʼi kqakʼexo, ri Jehová kojutoʼ rukʼ ri rajawaxik kqakʼex pa ri qakʼaslemal. Chqakʼamaʼ ri tobʼanik, xaq xiw ta kqasikʼij uwach ri Biblia y ksach pa qajolom ri xqetaʼmaj, xaneʼ rajawaxik kqabʼan pa ri qakʼaslemal. Are chiʼ más kqasikʼij ri Biblia y kqabʼan pa qakʼaslemal ri xqetaʼmaj más kojkikot riʼ (Sant. 1:25).