1. ¿Jas kubʼan na ri Jesús?

 KAMIK oj kʼo pa taq ri e qʼij che nim ubʼanik. Xa jubʼiqʼ chi kraj ri Jesús kuqʼat na tzij pa kiwiʼ konojel ri e kʼo pa ri uwach Ulew. ¿Jasche qetaʼm che naqaj chi kʼo wi wajun qʼij riʼ? Rumal che ri Jesús xchʼaw chkij jujun kʼutbʼal kukʼ ri utijoxelabʼ che are jun «retal» re ri upetibʼal y re «ri ukʼisbʼalil ri uwach Ulew» (Mat. 24:3). Kqariq wariʼ pa ri capítulos 24 y 25 re Mateo ri capítulo 13 re Marcos y ri capítulo 21 re Lucas.

2. ¿Jas kqil na pa wajun kʼutunem riʼ y jasche?

² Ri Jesús xtzijon chrij oxibʼ kʼutbʼal che kojutoʼo rech kojkʼaskʼatik: ri kʼutbʼal ke ri e chij y ri e kʼisikʼ, ri 10 qʼapoj taq alitomabʼ y ri talentos. Chkijujunal ri e kʼutbʼal riʼ kukʼut na chqawach che ri Jesús kuqʼat na tzij pa kiwiʼ ri winaq rukʼ ri xkibʼano. Are chiʼ keqanikʼoj na ri e kʼutbʼal riʼ, kqil na ri ubʼanik ri jun rukʼ ri jun chik y ri kukʼut chqawach. Chqamajij rilik ri kʼutbʼal ke ri e chij y ri e kʼisikʼ.

RI E CHIJ Y RI E KʼISIKʼ

3. ¿Jampaʼ kuqʼat tzij ri Jesús pa kiwiʼ ri winaq?

³ Ri Jesús xukʼutu che are chiʼ kuqʼat na tzij pa kiwiʼ ri winaq, are kril na we ri winaq qas xkojon chrij ri xtzijox che y we xuya ri utobʼanik chke ri kebʼe pa ri kaj (Mat. 25:31-46). ¿Jampaʼ kril na ri Jesús we ri winaq e chij o e kʼisikʼ? Pa ri «nimalaj kʼaxkʼolil», are chiʼ majaʼ kumajij ri Armagedón (Mat. 24:21). Junam rukʼ ri kubʼan jun ajyuqʼ che kijachik ri e chij kukʼ ri e kʼisikʼ, je kubʼan na ri Jesús che kijachik ri winaq che xetobʼan kukʼ ri kebʼe pa ri kaj kukʼ ri xetobʼan taj.

4. Junam rukʼ ri kubʼij Isaías 11:3, 4, ¿jasche qas qetaʼm che ri Jesús utz kubʼan che uqʼatik tzij pa kiwiʼ ri winaq? (Xuqujeʼ chawilaʼ ri e wachbʼal).

 ⁴ Ri Jehová xuchaʼ ri Jesús rech kok che juez, y ri Biblia kubʼij che kuqʼat na tzij rukʼ sukʼilal (chasikʼij Isaías 11:3, 4). Ri areʼ are kril na ri kuchomaj ri winaq, ri kubʼano y ri kubʼij xuqujeʼ kril na ri xkibʼan che kilik ri kebʼe pa ri kaj (Mat. 12:36, 37; 25:40). Retaʼm jachin taq ri xetobʼan kukʼ ri e chaʼom rech kebʼe pa ri kaj y ri chak che yaʼom chke. a Ri uyaʼik ri tobʼanik are ri utzijoxik ri utzij ri Dios. Ri ketobʼan che ubʼanik wajun chak riʼ kbʼix na «sukʼ» chke y kkiriq na ri kʼaslemal kʼo ta ukʼisik (Mat. 25:46; Apoc. 7:16, 17). ¡Are jun nimalaj tewchibʼal! We amaqʼel kkikʼut sukʼilal are chiʼ kʼo chi ri nimalaj kʼaxkʼolil y are chiʼ kkʼisik, qas kkʼojiʼ na riʼ ri kibʼiʼ «pa ri wuj re ri kʼaslemal» (Apoc. 20:15).

5. ¿Jas kqetaʼmaj chrij ri kʼutbʼal rech ri e chij y ri e kʼisikʼ y jachin kkiriq utzilal rukʼ wariʼ?

⁵ Chakʼutuʼ che at sukʼ. Ri kʼutbʼal rech ri e chij y ri e kʼisikʼ are ktzijon chkij ri winaq che kekanaj kan cho ri uwach Ulew. Ri e areʼ xaq xiw ta kkikʼutunisaj ri kisukʼilal are chiʼ kkitzijoj ri utzij ri Dios, xaneʼ xuqujeʼ keniman chke ri e chaʼom che kebʼe pa ri kaj (Mat. 24:45). Are kʼu, ri kebʼe pa ri kaj xuqujeʼ rajawaxik kechoman chrij ri kuya ubʼixik wajun kʼutbʼal riʼ. ¿Jasche? Rumal che ri Jesús xuqujeʼ tajin kril ri kkibʼano, ri kkichomaj y ri kkibʼij. Rumal laʼ rajawaxik kkikʼut ri kisukʼilal. Rukʼ wariʼ kojkunik kqil ri kebʼ chi kʼutbʼal che xubʼij kan ri Jesús pa ri capítulo 25 re Mateo y kubʼij chke ri kebʼe pa ri kaj ri rajawaxik kkibʼano. Chqilaʼ chi ri kʼutbʼal rech ri 10 qʼapoj alitomabʼ.

RI 10 QʼAPOJ ALITOMABʼ

6. ¿Jas xkibʼan ri cinco qʼapoj alitomabʼ che kʼo kinojibʼal? (Mateo 25:6-10).

⁶ Pa wajun kʼutbʼal riʼ, ri Jesús xchʼaw chkij 10 qʼapoj alitomabʼ che xebʼe che uriqik ri novio (Mat. 25:1-4). E juntir ri alitomabʼ riʼ kkaj keʼok rukʼ ri novio pa ri waʼim rech kʼulanem. Ri Jesús xubʼij che cinco chke «utz kichomanik» y cinco ri «utz ta kichomanik». Ri cinco che utz kichomanik qas kisukʼumam kan ronojel y keyem ri novio; paneʼ kbʼeytajik y chaqʼabʼ chik kopanik. Rumal laʼ, xkikʼam bʼi ri kikʼolbʼal qʼaqʼ o cantil re aceite rech kekunik kkil ri kibʼe pa ri qʼequʼm. Y xkikʼam bʼi más aceite rumal che weneʼ kbʼeyetaj ri novio. Rukʼ wariʼ ri kiqʼaqʼ man kchup taj (chasikʼij Mateo 25:6-10). Are chiʼ xopan ri novio, ri qʼapoj alitomabʼ che utz kichomanik xekunik xeʼok rukʼ pa ri waʼim rech kʼulanem. Junam kkʼulmataj na kukʼ ri e chaʼom rech kebʼe pa ri kaj. Ri kkikʼut sukʼilal y kekʼaskʼatik kʼa kopan na ri novio, che are ri Jesús, kekunik keʼok rukʼ pa ri Qʼatbʼal tzij che kʼo pa ri kaj (Apoc. 7:1-3). b ¿E kʼu ri nikʼaj chi cinco qʼapoj alitomabʼ che utz ta kichomanik?

7. ¿Jas xkikʼulmaj ri cinco qʼapoj alitomabʼ che utz ta kichomanik y jasche?

⁷ Ri cinco qʼapoj alitomabʼ che utz ta kichomanik e lista taj are chiʼ xopan ri  novio. Junam rukʼ ri kubʼij ri kʼutbʼal, are chiʼ xkito che naqaj chi kʼo wi ri novio, xkilo che ri kiqʼaqʼ ya kchupik. Rumal che kʼo ta aceite kukʼam bʼik, xebʼe che uloqʼik más. Are chiʼ xopan ri novio, majaʼ ketzalij lo che uloqʼik ri kaceite. «Are kʼu ri kisukʼumam kibʼ xeʼok rukʼ pa ri kʼulanem. Xtzʼapix kʼu ri uchiʼja» (Mat. 25:10). Are chiʼ ri qʼapoj alitomabʼ che utz ta kichomanik xetzalij lo che uloqʼik ri kaceite y xkaj xeʼok pa ri waʼim re kʼulanem, pero ri novio xubʼij chke: «Qastzij kinbʼij chiwe chi man wetaʼm ta iwach» (Mat. 25:11, 12). Xekʼaskʼat ta che reyexik ri novio. ¿Jas kketaʼmaj ri kebʼe pa ri kaj chrij wajun kʼutbʼal riʼ?

8, 9. ¿Jas kketaʼmaj ri kebʼe pa ri kaj chrij ri kʼutbʼal rech ri 10 qʼapoj alitomabʼ? (Xuqujeʼ chawilaʼ ri e wachbʼal).

⁸ Chakʼutuʼ che qas katkʼaskʼatik. Ri Jesús xubʼij taj che kebʼ jupuq ri qachalal che kebʼe pa ri kaj: che jun kkʼaskʼatik y ri jun chik kkʼaskʼat taj. Xaneʼ ri xraj xubʼij chke che we kekʼaskʼat taj are chiʼ kopan ri kʼisbʼal, kyaʼ ta riʼ ri tewchibʼal chke (Juan 14:3, 4). ¡Rajawaxik che kekʼaskʼatik! Rumal laʼ, we cho ri uwach Ulew kojkanaj wi o pa ri kaj kojbʼe wi, rajawaxik oj juntir kqatatabʼej ri kuya ubʼixik wajun kʼutbʼal riʼ ke ri 10 qʼapoj alitomabʼ: rajawaxik kojkʼaskʼatik y kqeyej kʼa pa ri kʼisbʼal (Mat. 24:13).

⁹ Junam rukʼ ri qilom chik, ri Jesús xukoj ri kʼutbʼal rech ri 10 qʼapoj alitomabʼ rech qas kojkʼaskʼatik. Are chiʼ xtotaj che ubʼixik wajun kʼutbʼal riʼ, xchʼaw chrij ri kʼutbʼal re ri talentos, che kubʼij chqe che rajawaxik kojchakunik.

RI TALENTOS

10. ¿Jas xkibʼan ri kebʼ ajchakibʼ che ukʼutik che e sukʼ? (Mateo 25:19-23).

¹⁰ Pa wajun kʼutbʼal riʼ, ri Jesús xchʼaw chkij kebʼ ajchakibʼ che xkikʼutu che e sukʼ che ri kajaw y jun che xukʼut ta sukʼilal  (Mat. 25:14-18). Are chiʼ ri kajaw xbʼe pa jun chi tinamit, xuya kan jujun talentos chke, kraj kubʼij che xuya kan jun nimalaj pwaq chke. Ri kebʼ ajchakibʼ xkikʼutu che qas kechakunik rumal che xkichʼak ral ri pwaq che xyaʼ kan chke. Xkinimarisaj ri pwaq che xyaʼ kan chke. Y are chiʼ xul ri kajaw xubʼij wariʼ chke chkijujunal: «Chatokoq chatkikot kʼu wukʼ» (chasikʼij Mateo 25:19-23). ¿Y jas xubʼan ri urox ajchak rukʼ ri pwaq che xyaʼ kan che?

11. ¿Jas xuriq ri saqʼoralaj ajchak y jasche?

¹¹ Ri ajaw xuya kan jun talento che ri urox ajchak rech kunimarisaj ri pwaq. Rumal che wajun ajchak riʼ are saqʼor, xukʼot jun jul pa ri ulew xukʼuʼ o xrowaj ri pwaq chilaʼ. Are chiʼ xtzalij lo ri rajaw, wajun ajchak riʼ xaq xiw xutzalij ri pwaq che xyaʼ kan che. Xutaʼ ta kuybʼal umak rumal che xuchʼak ta ral ri pwaq che xyaʼ kan che, xukʼutu che kʼo ta unojibʼal y xubʼij che ri rajaw are jun «kʼanalaj achi». Rumal wariʼ xyajik, xtoqix ri talento che y xoqotax bʼi rumal ri rajaw (Mat. 25:24, 26-30).

12. ¿E jachin kekikʼutunisaj ri kebʼ utz taq ajchakibʼ kamik?

¹² Ri kebʼ utz taq ajchakibʼ are kekikʼutunisaj ri kebʼe pa ri kaj. Ri Jesús, che are ri ajaw, kubʼij na chke chkijujunal: «Chatokoq chatkikot kʼu wukʼ». Kraj kubʼij che ri Jesús kuya na chke che kebʼe pa ri kaj (Mat. 25:21, 23; Apoc. 20:5a). Y ri saqʼoralaj ajchak xuqujeʼ are jun kʼutbʼal chke ri kebʼe pa ri kaj. Chqilampeʼ jasche kqabʼij wariʼ.

13, 14. ¿Jas kketaʼmaj ri qachalal che kebʼe pa ri kaj chrij ri kʼutbʼal re ri talentos? (Xuqujeʼ chawilaʼ ri e wachbʼal).

¹³ Chakʼutuʼ che at jun utzalaj ajchak. Pa ri kʼutbʼal re ri talentos, ri Jesús xubʼij taj che ri upatanelabʼ keʼux saqʼoribʼ. Xaneʼ, junam rukʼ ri xqil kan pa ri kʼutbʼal rech ri 10 qʼapoj alitomabʼ, tajin kubʼij chke che we kekikot ta chi che upatanexik ri Dios: kekun ta riʼ che ukʼutik  pa ri kikʼaslemal chi qastzij e sikʼim xuqujeʼ e chaʼtal rumal ri Dios, y kekun ta riʼ kkiqʼat tzij rukʼ ri Jesús pa ri kaj (2 Ped. 1:10).

¹⁴ Rukʼ ri kʼutbʼal re ri 10 qʼapoj alitomabʼ y ri talentos, ri Jesús xukʼut chkiwach ri qachalal che kebʼe pa ri kaj che rajawaxik kekʼaskʼatik y kkibʼan ri chak che yaʼom chke. Pero xaq xiw ta wariʼ xubʼij chke. Kqariq jun chik che xubʼij chke pa Mateo 24:40, 41. Chqilampeʼ wajun texto riʼ.

¿JACHIN RI KKʼAM NA BʼIK?

15, 16. Junam rukʼ ri kubʼij Mateo 24:40, 41, ¿jasche rajawaxik kekʼaskʼat ri qachalal che kebʼe pa ri kaj?

¹⁵ Are chiʼ ri Jesús majaʼ ktzijon chrij ri oxibʼ kʼutbʼal riʼ, are xtzijon chkij kebʼ achijabʼ che tajin kechakun pa ri kulew y kebʼ ixoqibʼ che tajin kekeʼn cho kaʼ. Pa ri kebʼ kʼutbʼal riʼ, weneʼ junam ri tajin kkibʼano. Are kʼu ri Jesús xubʼij: «Ri jun kkʼam na bʼik, ri jun chik kyaʼ kanoq» (chasikʼij Mateo 24:40, 41). Y pa ri jun chi versículo ri Jesús xubʼij chke ri utijoxelabʼ: «Chixkʼaskʼat bʼaʼ, rumal rech chi man iwetaʼm taj jachike qʼij ri kpe na ri Iwajaw» (Mat. 24:42). Ri xubʼij kjunamataj rukʼ ri kʼutbʼal re ri 10 qʼapoj alitomabʼ (Mat. 25:13). Ri kebʼ kʼutbʼal riʼ xa junam ri kkaj kkibʼij. Ri Jesús tajin kuya ubʼixiq che kopan ri tiempo rech kilitajik jachin ri qas kkunik kbʼe pa ri kaj. Xaq xiw ri kkikʼut ri kisukʼilal kekʼam na bʼik rech kkiqʼat tzij rukʼ ri Jesús pa ri kaj (Juan 14:3).

¹⁶ Chakʼutuʼ che katkʼaskʼatik. We jun chke ri kebʼe pa ri kaj kkʼaskʼat ta pa ri ukojonik, kkun ta riʼ kbʼek y kuqʼat tzij rukʼ ri Jesús (Mat. 24:31). Xuqujeʼ konojel ri kekʼojiʼ na cho ri uwach Ulew rajawaxik kkibʼan ri xubʼij ri Jesús che kekʼaskʼatik.

17. ¿Jasche kqamay taj che ri Jehová uchaʼom jujun chke ri upatanelabʼ pa we kʼisbʼal taq qʼij riʼ rech kebʼe pa ri kaj?

¹⁷ Ri oj qas kqakubʼsaj qakʼuʼx chrij ri Jehová, rumal laʼ qas kqakubʼsaj qakʼuʼx chrij ri kuchomaj ubʼanik. Rumal wariʼ, kojbʼison taj che ri Jehová uchaʼom jujun chke ri upatanelabʼ che kebʼe pa ri kaj pa taq ri qʼij riʼ. c Chnaʼtaj chqe ri kʼutbʼal rech ri viña che xubʼij ri Jesús che ktzijon chkij ri ajchakibʼ che xeʼopan chukʼisbʼal rech ri qʼij (Mat. 20:1-16). Ri kʼateʼ xkimajij ri kichak junam xetoj kukʼ ri aqʼabʼil xkimajij chak. Rukʼ wariʼ kqachʼobʼo che konojel ri qachalal che kebʼe pa ri kaj junam kbʼan che kilik paneʼ kʼa pa ri kʼisbʼal qʼij xechaʼik.

QAS CHQATATABʼEJ RI TAJIN KBʼIX CHQE

18, 19. ¿Jas xqetaʼmaj chkij ri taq kʼutbʼal riʼ?

¹⁸ ¿Jas qilom chupam wajun kʼutunem riʼ? Ri kʼutbʼal kech ri e chij y ri e kʼisikʼ kukʼutu che ri kekʼojiʼ kan waral cho ri uwach Ulew rajawaxik kkikʼutu che e sukʼ, kkibʼan wariʼ kamik y pa ri nimalaj kʼaxkʼolil. Are chiʼ kopan we qʼij riʼ, ri Jesús kril na jachin ri e sukʼ, tekʼuriʼ kkiriq na «ri junalik kʼaslemal» (Mat. 25:46).

¹⁹ Xuqujeʼ xqil kebʼ kʼutbʼal che kchʼaw chrij ri rajawaxik kkibʼan ri kebʼe pa ri  kaj. Pa ri kʼutbʼal kech ri 10 qʼapoj alitomabʼ, cinco chke xekʼaskʼatik y xkisukʼumaj ronojel. Xkikʼutu che kʼo kinojibʼal rumal che xkʼistaj ta kikʼuʼx che reyexik ri novio. Rumal che ri nikʼaj chi cinco xekʼaskʼat taj y xkisukʼumaj ta ronojel, xyaʼ ta bʼe chke rumal ri novio che xeʼok pa ri waʼim re kʼulanem. ¿Jas kqetaʼmaj chrij? Che rajawaxik kojkʼaskʼat che reyexik ri Jesús are chiʼ kpe pa ri kʼisbʼalil. Pa ri kʼutbʼal re ri talentos xqilo che e kebʼ ri ajchakibʼ che qas xechakunik. Rumal che xkikʼutu che e sukʼ y xkibʼan ri chak che xbʼix chke, ri kajaw qas utz xril ri xkibʼano. Pero ri saqʼoralaj ajchak xoqotax bʼi rumal ri rajaw. ¿Jas kqetaʼmaj chrij? Che rajawaxik kqaya ta kan ubʼanik ri chak che kubʼij ri Jehová che kqabʼano. Y ri kʼisbʼal che xqilo, are che ri qachalal che kebʼe pa ri kaj rajawaxik kekʼaskʼatik rech jeriʼ kekunik kkiqʼat tzij rukʼ ri Jesús pa ri kaj. Ri e qachalal riʼ qas kkaj che kopan ri qʼij rech kekʼojiʼ rukʼ ri Jesús pa ri kaj. Are chiʼ qʼaxinaq chi ri Armagedón, ri e areʼ keʼux na ri novia che kkʼuliʼ rukʼ ri Jesús pa «ri ukʼulanem ri Alaj Chij» (2 Tes. 2:1; Apoc. 19:9).

20. ¿Jas kubʼan na ri Jehová we kqatatabʼej ri kubʼij chqe?

²⁰ Naj ta chi kraj che ri Jesús kuqʼat na tzij pa kiwiʼ ri winaq, pero utz taj che kqaxiʼj qibʼ chuwach wariʼ. We amaqʼel oj sukʼ, ri loqʼalaj Qatat Jehová kuya na ri kuʼinem che xaq xiw rukʼ ri areʼ kpe wi rech je wariʼ kojkunik kojtakʼiʼ «chuwach ri Rijaʼl Winaq» (2 Cor. 4:7; Luc. 21:36). Rumal laʼ, paneʼ pa ri kaj kojbʼe wi o pa ri uwach Ulew kojkanaj wi kanoq, rajawaxik qas kqatatabʼej ri kuya ubʼixik ri Jesús rukʼ ri e kʼutbʼal riʼ. We kqabʼano, ri Jehová qas kojutewchij na riʼ y je wariʼ ri qabʼiʼ ktzʼibʼax na «chupam ri wuj» re kʼaslemal (Dan. 12:1; Apoc. 3:5).