1, 2. ¿Jasche sibʼalaj utz che ri Jehová xojubʼano rech kojkikotik are chiʼ kojsipanik?

 RI Jehová xojubʼano rech kojkikotik are chiʼ kojsipanik (Hech. 20:35). Qastzij che sibʼalaj kojkikotik are chiʼ jun winaq kuya jun sipanik chqe. Pero más kojkikotik are chiʼ oj kojyaʼow ri sipanik y keqatoʼ ri nikʼaj chik. Qastzij che kqariq utzilal rumal che ri Jehová je waʼ xubʼan che qabʼanik ¿Jasche?

² Rumal che ri Jehová xuyaʼo che oj kojchaʼowik we kqaj che más kojkikotik. We kqatzukuj ri kqabʼan che kitoʼik ri nikʼaj chik, más kqariq kikotemal riʼ. ¿La mat qastzij che sibʼalaj jeʼl che je waʼ xubʼan ri Jehová che qabʼanik? (Sal. 139:14).

3. ¿Jasche kubʼij ri Biblia che ri Jehová are ri Dios che sibʼalaj kkikotik?

³ Ri Biblia kubʼij che ri kesipanik sibʼalaj kekikotik, rumal laʼ kqamay taj che ri Jehová are ri Dios che sibʼalaj kkikotik (1 Tim. 1:11). Ri Jehová are ri nabʼe xsipanik y xaq xiw ri areʼ ri más ksipanik. Ri apóstol Pablo xubʼij: «Rumal kʼu ri Dios uj kʼaslik, kujslabʼik, uj kʼolik» (Hech. 17:28). Xuqujeʼ «ronojel utzalaj sipanik, ronojel tzʼaqatalaj sipanik» rukʼ ri Jehová kpe wi (Sant. 1:17).

4. ¿Jas kojtoʼwik rech más kojkikotik?

⁴ ¿Jas kojkunik kqabʼano rech más kqanaʼ kikotemal are chiʼ kojsipanik? Pa wajun kʼutunem riʼ kqil na ri kqabʼan che resaxik uwach ri Jehová che sibʼalaj ksipanik (Efes. 5:1). Xuqujeʼ kqetaʼmaj na ri rajawaxik kqabʼano  are chiʼ ri nikʼaj chik kkimaltyoxij ta ri kqabʼan che kitoʼik. Juntir wariʼ kojutoʼo rech kqaya ta kan uyaʼik sipanik y rech amaqʼel kojkikotik.

CHQESAJ UWACH RI JEHOVÁ CHE KSIPANIK

5. ¿Jas sipanik uyaʼom ri Jehová chqe?

⁵ Chqilampeʼ ri ubʼanom ri Jehová che kukʼutu che qas ksipanik. Kuya ri kajwataj chqe. Paneʼ kʼo ta jastaq qe che paqal rajil, are kʼu ri Jehová kuya ri qawa, ri qatzʼyaq y ri qachoch (Sal. 4:8; Mat. 6:31-33; 1 Tim. 6:6-8). Y kubʼan taj rumal che xa ktaqchiʼxik. ¿Jas kʼu che kubʼano?

6. ¿Jas kukʼut Mateo 6:25, 26 chqawach?

⁶ Ri Jehová kuya ri kajwataj chqe rumal che oj loqʼ chuwach. Chqilaʼ ri xubʼij ri Jesús pa Mateo 6:25, 26 (chasikʼij). Pa ri versículos riʼ, ri Jesús xeʼukoj ri alaj taq chikop che kerapanik che kʼutbʼal y xubʼij: «Ri e areʼ man ketikonij taj, man keqʼatow taj, man kemulin ta pa kʼuja». Y xubʼij chik: «Ri Itat kʼut ri kʼo chilaʼ chikaj ketzuquwik». Tekʼuriʼ xutaʼ wariʼ: «¿La ma ta are nim na iqʼij ix chkiwach ri e areʼ?». Ri xraj ri Jesús che kqetaʼmaj are che ri oj más nim qabʼanik chkiwach ri chikop. We ri Jehová keʼuchajij ri alaj taq chikop riʼ, qas qetaʼm che xuqujeʼ kojuchajij oj. Rumal che ri Jehová are xojbʼanowik kuya ri kajwataj chqe (Sal. 145:16; Mat. 6:32).

7. ¿Jas kqabʼan che resaxik uwach ri Jehová are chiʼ kojsipanik? (Xuqujeʼ chawilaʼ ri e wachbʼal).

⁷ Rumal che keqaloqʼoqʼej ri qachalal kqaya ri kajwataj chke. Jun kʼutbʼal, ¿la kachʼobʼ uwach jun qachalal che kʼo ta kutijo o kʼo ta ratzʼyaq? Ri Jehová katukojo rech kaya ri kajwataj chke ri qachalal riʼ. Ri oj testigos rech Jehová qas kchʼobʼotaj qawach rumal che kqaya ri qatobʼanik are chiʼ xaq kʼateʼ kkʼulmataj jun kʼax. Chojchoman chrij are chiʼ xmajtaj ri pandemia. E kʼo qachalal che xkiya ri ktijowik, atzʼyaq y nikʼaj chi jastaq che xyaʼ chke ri kʼo kirajawaxik y nikʼaj chik xkiya kuchuj pa ri obra mundial, rech ri labores de socorro xekunik xkiya tobʼanik chke ri qachalal cho ronojel uwach Ulew. E juntir ri qachalal riʼ xkibʼan ri kubʼij pa Hebreos 13:16: «Chibʼanaʼ utzil. Chijachalaʼ ri jastaq iwech chbʼil iwibʼ. Masach waʼ pa  ijolom. Je taq sipanik wa keqaj chuwach ri Dios».

8. ¿Jas oj kunaq che ubʼanik rumal che ri Jehová uyaʼom qachuqʼabʼ? (Filipenses 2:13).

⁸ Ri Jehová kuya qachuqʼabʼ. Ri areʼ kʼo ta ukʼisik ri u poder y utz kunaʼo kukoj wariʼ che kitoʼik ri upatanelabʼ (chasikʼij Filipenses 2:13). ¿La kʼo jumul atom achuqʼabʼ che ri Jehová rech xatkunik xaxutuj jun tentación, rech xachʼij jun kʼax che tajin kakʼulmaj pa ri akʼaslemal o rech kabʼan ri achak re ronojel taq qʼij? Are chiʼ ri Jehová xuya ri achuqʼabʼ qastzij che xanaʼ junam riʼ ri xunaʼ ri apóstol Pablo, che xubʼij: «Ri in ronojel kinkowin chech pa Ri Jun, che are kyaʼow ri nuchuqʼabʼ» (Filip. 4:13, Ri Tyoxlaj Wuj).

9. ¿Jas kqabʼano rech kqesaj uwach ri Jehová y keqatoʼ ri nikʼaj chik? (Xuqujeʼ chawilaʼ ri wachbʼal).

⁹ Ri oj kojkun taj kqaya kichuqʼabʼ ri nikʼaj chik junam rukʼ ri kubʼan ri Jehová. Are kʼu kojkunik kqakoj ri qachuqʼabʼ rech keqatoʼ ri nikʼaj chik. Jun kʼutbʼal, we jun qachalal ya nim chi ri ujunabʼ o yawabʼ, kojkunik kqabʼan jun utaqkil o jujun taq chak pa ri rachoch. Y we kojkunik utz kqabʼij che kqaj kojtobʼan che uchʼajchʼobʼisaxik ri Ja rech Ajawbʼal. Are chiʼ kqakoj ri qachuqʼabʼ che ubʼanik ronojel wariʼ nim keqatoʼ wi riʼ ri qachalal.

10. ¿Jas kqabʼan che uyaʼik kichuqʼabʼ ri nikʼaj chik rukʼ ri kqabʼij?

¹⁰ Chnaʼtaj chqe che ri kqabʼij kʼo kubʼan pa kikʼaslemal ri nikʼaj chik, rumal laʼ chqabʼij utz taq tzij rech kuya kichuqʼabʼ ri nikʼaj chik. ¿La kʼo jun qachalal che kajwataj kubʼsal kʼuʼx che? We kʼolik, utz we katoʼ wajun qachalal riʼ. Katkunik katopan rukʼ cho rachoch, kachʼabʼej pa teléfono o kataq jun mensaje che. Rajawaxik taj kabʼij kʼi tzij che, xaneʼ chabʼij ri kel pa awanimaʼ. Rukʼ ri utz taq tzij che kel pa awanimaʼ ktobʼan waʼ che ukubʼsaxik ukʼuʼx ri winaq (Prov. 12:25; Efes. 4:29).

11. ¿Jas kubʼan ri Jehová rukʼ ri unojibʼal?

¹¹ Ri Jehová kuya qanoʼj. Ri discípulo Santiago xubʼij: «We kʼu kʼo jun chiwe kʼa kʼo kraj ri unoʼj, chutaʼ che ri Dios». Xuqujeʼ xubʼij chik: «Ri Dios kuyaʼ chke konojel, man xaq ta jubʼiqʼ kuyaʼo, xuqujeʼ are taq kyaʼtaj rumal, man kyoqʼon taj» (Sant. 1:5). Junam rukʼ ri kubʼij wajun versículo riʼ, ri Jehová kkanaj ta kan rukʼ ri unojibʼal, xaneʼ kuya chke nikʼaj chik. Xuqujeʼ «man kyoqʼon taj», kraj  kubʼij che kubʼan taj che kojbʼisonik rumal che rajawaxik na ri utobʼanik chqe, xaneʼ kraj che kqataʼ tobʼanik che (Prov. 2:1-6).

12. ¿Jas kqabʼano rech kqakʼut chkiwach nikʼaj chik ri qetaʼmam?

¹² ¿La tajin kqesaj uwach ri Jehová y kqakʼut chkiwach ri nikʼaj chik ri qetaʼmam? (Sal. 32:8). Kʼi kojkunik kqabʼano rech kqakʼut chkiwach ri nikʼaj chik. Jun chke wariʼ, are che keqatoʼ ri kʼateʼ xkimajij ri utzijoxik ri utzij ri Dios. Ri kʼamal taq bʼe rukʼ paciencia kekitoʼ ri tobʼanelabʼ y nikʼaj chi qachalal rech kkibʼan ri eqeleʼn che yaʼom chke pa ri congregación. Y e kʼi qachalal achijabʼ ixoqibʼ che kʼo nim ketaʼmabʼal che uyakik y che usukʼumaxik taq Ja rech Ajawbʼal kekitoʼ ri nikʼaj chik rech kekunik kechakun pa ri Ja rech Ajawbʼal o nikʼaj chi ja rech ri utinamit ri Dios.

13. ¿Jas kqabʼan che resaxik uwach ri Jehová are chiʼ keqatijoj ri nikʼaj chik?

¹³ Rajawaxik kqesaj uwach ri Jehová are chiʼ keqatijoj ri nikʼaj chik. Junam rukʼ ri qilom chik, ri areʼ rukʼ ronojel ranimaʼ kuya kinojibʼal ri kkitaʼ che. Ri oj xuqujeʼ rukʼ ronojel qanimaʼ kqaj kqakʼut chkiwach ri kʼateʼ tajin kketaʼmaj chrij ri Jehová o rech kkibʼan jun chak pa ri congregación. Kojkanaj ta kan rukʼ ri qetaʼmanik y kqachomaj taj che we kqakʼut chke ri nikʼaj chik, are kekanaj kan chuwach ri eqeleʼn che yaʼom chqe. Y kqabʼij taj «chretaʼmaj utukel, ri in kʼo ta xkʼutuw chnuwach». Pa ri utinamit ri Jehová jun winaq che je waʼ kubʼano utz ta kilitajik. Xaq xiw ta kqakoj ronojel qachuqʼabʼ che ukʼutik chkiwach ri nikʼaj chik ri qetaʼmam, xaneʼ xuqujeʼ kqabʼan rukʼ ronojel qanimaʼ (1 Tes. 2:8). Jeʼ wariʼ ri e areʼ «xuqujeʼ kekuʼin che kitijoxik nikʼaj chik» (2 Tim. 2:1, 2). We qonojel kqakʼut chkiwach ri nikʼaj chik ri qetaʼmam, más kojkikot riʼ y más kkʼiy ri qetaʼmabʼal.

ARE CHIʼ NIM TA KIL WI RI KQABʼANO

14. ¿Jas kkʼulmatajik are chiʼ keqatoʼ ri nikʼaj chik?

¹⁴ Kʼi taq mul, ri nikʼaj chik kkikʼut chqawach che nim kkil ri kqabʼan che kitoʼik, más na ri e qachalal. Weneʼ kkikʼut ri kimaltyoxinik chqe are chiʼ kkitaq jun mensaje chqe (Col. 3:15). Wariʼ kubʼano che más kojkikotik.

15. ¿Jas rajawaxik kqabʼano are chiʼ nim ta kil ri kqabʼano?

¹⁵ Rajawaxik kqetaʼmaj che e juntir taj kkimaltyoxij ri kqabʼano. Weneʼ kqaya ri qatiempo, qachuqʼabʼ y qapwaq che utoʼik jun qachalal tekʼuriʼ kumaltyoxij ta chqe. We je waʼ kkʼulmatajik, ¿jas rajawaxik kqabʼano rech kojbʼison taj? Chnaʼtaj chqe ri kubʼij ri texto re wajun kʼutunem riʼ Hechos 20:35. Ri kikotemal kqariq taj rumal che ri nikʼaj chik kemaltyoxinik; kqaya ri kojkun che uyaʼik paneʼ ri nikʼaj chik kkimaltyoxij taj. Chqilampeʼ ri kojtoʼwik.

16. ¿Jas chrij rajawaxik kojchoman wi?

¹⁶ Chachomaj che are tajin kawesaj uwach ri Jehová are chiʼ katsipanik. Ri areʼ kuya sipanik chke ri winaq paneʼ kkimaltyoxij taj (Mat. 5:43-48). Ri Jehová kubʼij chke ri upatanelabʼ che kkeyeʼj taj «che ktzalix na ukʼaxel ri kkisipaj», «nim kʼu ri tojbʼal» kkiriq na (Luc. 6:35). Rumal laʼ mubʼan kebʼ akʼuʼx we ri nikʼaj chik nim ta kkilo o kkimaltyoxij ta ri kabʼano. Chnaʼtaj chawe che ri Jehová  katutewchiʼj na rumal che keʼatoʼ ri nikʼaj chik y rumal che kaya «rukʼ kikotemal» (2 Cor. 9:7; Prov. 19:17).

17. ¿Jas kojtoʼwik rech kqesaj uwach ri Jehová? (Lucas 14:12-14).

¹⁷ Jun chik che kattoʼwik rech katkunik kawesaj uwach ri Jehová are che kabʼan pa ri akʼaslemal ri kubʼij Lucas 14:12-14 (chasikʼij). Qastzij che kʼo ta kubʼano che kqaya sipanik chke ri kekunik kkiya sipanik chqe, pero we kqilo che tajin kqaya sipanik rumal che kʼo kqaj, chqabʼanaʼ pa qakʼaslemal ri xubʼij ri Jesús: chqayaʼ sipanik chke ri kekun taj kkitzalij ukʼaxel chqe. We kqabʼan wariʼ, kojkikot riʼ rumal che tajin kqesaj uwach ri Jehová. We kqaya sipanik y kqeyeʼj taj che ktzalix ukʼaxel chqe, qas kojkikot riʼ paneʼ kkimaltyoxij ta chqe.

18. ¿Jas kojtoʼwik rech kqachomaj ta itzel jastaq chkij ri nikʼaj chik?

¹⁸ Chakʼexaʼ ri achomanik chkij ri nikʼaj chik (1 Cor. 13:7). We kqaya jun sipanik che jun winaq o kqatoʼo y kumaltyoxij ta chqe, chqachomaj: «¿La xa nim ta kril ri xinbʼan che utoʼik o ri sipanik che xinya che o xa xsach pa ujolom?». O weneʼ kʼo jun rumal che ri winaq xumaltyoxij ta ri xqabʼan che utoʼik. Weneʼ e jujun sibʼalaj kekikotik are chiʼ kqaya jun sipanik chke o ketoʼik, are kʼu kʼax kkiriqo che kemaltyoxinik. Weneʼ xa kekʼixik rumal che ketoʼik y más na we nabʼe kanoq ri areʼ xekitoʼ nikʼaj chik y kamik kkun ta chik ketobʼanik. Rumal che e loqʼ ri qachalal chqawach kqachomaj ta itzel taq jastaq chkij, xaneʼ kojsipan chke rukʼ ronojel qanimaʼ (Efes. 4:2).

19, 20. ¿Jasche rajawaxik kqakʼut paciencia? (Xuqujeʼ chawilaʼ ri e wachbʼal).

¹⁹ Chqakʼutuʼ paciencia. Ri qʼatal tzij Salomón xubʼij wariʼ chrij ri uyaʼik sipanik: «Chakʼiʼaqaʼ ri awa chupam ri jaʼ, okʼowinaq chi kʼu jun qʼijol kariq na» (Ecl. 11:1). Ri versículo riʼ kukʼut chqawach che weneʼ e jujun winaq kʼa matam  kkimaltyoxij chqe ri xqaya chke. Chqilampeʼ jun kʼutbʼal.

²⁰ Kʼi junabʼ chik che ri rixoqil jun solinel re circuito xutzʼibʼaj kebʼ oxibʼ tzij pa jun alaj nota che jun qachalal ixoq che kʼateʼ xubʼan u bautismo. Qʼaxinaq chi ocho junabʼ ri qachalal xutzalij uwach rukʼ jun carta che kubʼij: «Xintzʼibʼaj wariʼ rumal che rajawaxik kinbʼij chawe che ri nota che xaya chwe xinutoʼ pa kʼi junabʼ». Xuqujeʼ xubʼij wariʼ: «Ri xatzʼibʼaj qas utz xwilo, are kʼu ri qas xopan pa wanimaʼ are ri texto che kʼo chupam y sachinaq ta pa nujolom». a Are chiʼ xubʼij jujun taq kʼax che xuqʼaxej, xubʼij chik: «Kʼo jujun taq mul xinnaʼo che kwaj kinya kan upatanexik ri Jehová y ri eqeleʼn che yaʼom chwe, pero ri texto che xatzʼibʼaj chupam ri nota sibʼalaj xinutoʼo rumal che kukʼutunisaj chwe che rajawaxik kinkoj nuchuqʼabʼ y pa ocho junabʼ ri nota uyaʼom nuchuqʼabʼ». ¡Chatchoman chrij ri kikotemal ri xunaʼ ri rixoqil ri solinel re circuito are chiʼ xtaq ri carta che! We oj xuqujeʼ kʼo xqabʼan che utoʼik jun chik weneʼ kʼateʼ kumaltyoxij chqe are chiʼ qʼaxinaq chi «kʼi taq qʼij».

21. ¿Jasche utz che kqakoj qachuqʼabʼ che resaxik uwach ri Jehová che ksipanik?

²¹ Junam rukʼ ri xqanikʼoj, ri Jehová xojubʼano rech kojsipanik y más kojkikotik we oj kojyaʼow ri sipanik. Kojkikotik are chiʼ keqatoʼ nikʼaj chik y utz kqanaʼo che kkimaltyoxij chqe. Pero we kkimaltyoxij taj, kojkikotik rumal che rukʼ ronojel qanimaʼ kqabʼano. Apastaneʼ ri kqayaʼo, chnaʼtaj chqe ri kubʼij 2 Crónicas 25:9: «Ri Ajawaxel kʼo kʼi rukʼ rech kʼo na ri kuyaʼ chawe». ¡Xaq xiw ri Jehová kkunik kuya kʼi sipanik chqe! Y más kojkikotik rumal che kojutewchij. Sibʼalaj utz che kqesaj uwach ri Jehová che ksipanik.