Xinalax pa ri junabʼ 1934. Ri nunan nutat pa Suiza kepe wi, pero xebʼe pa Timmins, jun tinamit che kʼo pa Ontario (Canadá). Pa ri junabʼ 1939, ri nunan xumaj usikʼixik La Atalaya y xbʼe pa ri riqbʼal ibʼ kukʼ ri testigos rech Jehová. Amaqʼel kinukʼam rukʼ xuqujeʼ ri seis nuchaqʼ. Y naj ta tiempo xrayej xubʼan u bautismo.

Ri nutat utz ta xrilo che ri nunan xubʼan ri u bautismo, pero ri areʼ xuya ta kan upatanexik ri Jehová. Rukʼ sukʼilal xupatanij ri Jehová xuqujeʼ pa taq ri junabʼ cuarenta are chiʼ xqʼatex uwach ri qachak pa Canadá. Amaqʼel xukʼutu che nim kril wi ri nutat, paneʼ ri areʼ kubʼij kʼaxalaj taq tzij che. Ri xubʼan ri nunan xojutoʼo rech ri oj xuqujeʼ xqapatanij ri Jehová. Sibʼalaj xojkikotik are chiʼ ri nutat kukʼut chi más utzilal chqe.

Pa taq ri junabʼ 1950 xinbʼe pa Nueva York pa ri nim riqbʼal ibʼ ubʼiʼ «Aumento de la Teocracia». Chilaʼ xinchʼobʼ wi kiwach e kʼi qachalal re ronojel uwach Ulew y xinto che jujun chke xebʼe pa ri Tijobʼal re Galaad. Wariʼ xubʼano che más xwaj xinpatanij ri Jehová. Paneʼ nabʼe nuchomam che kinpatanij ri Jehová pa tiempo completo, are kʼu chiʼ xinta ri experiencias más xwaj xinbʼan wariʼ. Are chiʼ xinopan cho wachoch, xintaq bʼi ri nu solicitud rech kinux precursor regular. Ri sucursal rech Canadá xubʼij chwe che nabʼe rajawaxik kinbʼan nu bautismo. Rumal laʼ xinbʼan nu bautismo pa ri 1 re octubre 1950. Kʼateʼ jun ikʼ qʼaxinaq xinbʼan ri precursorado regular y xintaq bʼi pa Kapuskasing, jun tinamit che naj kʼo wi che ri wachoch.

 Pa ri junabʼ 1951, ri sucursal xubʼij che jachin ri ketaʼm francés we kkaj kebʼe pa Quebec, rumal che are waʼ ri chʼabʼal che ktzijox chilaʼ y kʼi ta Testigos e kʼo chilaʼ. Ri in wetaʼm francés xuqujeʼ inglés, rumal laʼ xintaq bʼi pa Rouyn. Kʼo ta nijun kinchʼobʼ uwach chilaʼ y junam rukʼ ri xinbʼij nabʼe kanoq xaq xiw ri dirección xyaʼ chwe. Tekʼuriʼ ri Amarcel xubʼan utzalaj wamigo y kajibʼ junabʼ xqapatanij ri Jehová rukʼ pa Quebec, tekʼuriʼ xinux precursor especial.

Are chiʼ xinkʼojiʼ pa Quebec xinbʼan invitar pa ri clase 26 re ri Tijobʼal re Galaad, che xbʼan pa South Lansing (Nueva York). Sibʼalaj xinkikotik are chiʼ xinbʼan graduar wibʼ pa ri 12 re febrero 1956 y xintaq bʼi pa jun lugar che kamik kbʼix Ghana che, b pa África Occidental. Are chiʼ majaʼ kinbʼek xintzalij pa Canadá rech kenkʼamaʼ ri nuwuj che kinkojo rech kinbʼe pa Ghana y xinchomaj che xaq kebʼ oxibʼ semanas kinbʼeytaj che ukʼamik ri nuwuj.

Are kʼu siete ikʼ xinkʼojiʼ pa Toronto, rumal che xweyej na ri nuwuj. Pa ri tiempo riʼ che xweyej xinkʼojiʼ kan kukʼ ri kʼulaj Cripps. Y ri kʼulaj riʼ kʼo jun kalkʼwal ali ubʼiʼ Sheila y utz xqil qibʼ rukʼ. Are chiʼ xa jubʼiqʼ kraj che kinbʼij kʼulanem che, xel lo ri nu visa. Oj kebʼ rukʼ Sheila xqabʼan orar che ri Jehová y ri in kinbʼe pa ri asignación che xyaʼ chwe are kʼu kqatzʼibʼaj cartas rech kqilo we pa ri petinaq kojkunik kojkʼuliʼk. Paneʼ xojbʼisonik che kqil ta chi qibʼ are kʼu xqilo che are ri más utz xqachaʼ ubʼanik.

Jun ikʼ xinbʼano rech xinopan pa Accra, ri capitál re Ghana, xinbʼe pa tren, barco y avión. Xinok solinel re distrito y xensolij ronojel ri congregaciones pa ri tinamit Ghana, Costa de Marfil y Togolandia (che kamik kbʼix Togo che). Ri sucursal xuya jun carro  doble chwe rech kinkunik kensolij ri e tinamit. Amaqʼel nutukel kinbʼek y sibʼalaj utz kinwilo kensolij ri congregaciones.

Pa taq ri fines de semana kinya ri nutobʼanik pa ri e nim riqbʼal ibʼ re circuito. E kʼo ta ja jawiʼ kebʼan wi ri nim riqbʼal ibʼ, rumal laʼ ri e qachalal xekibʼan kʼolbʼal che bʼanom che bambú y xkiya uxaq palmeras pa uwiʼ rech kojuchʼuq chuwach ri qʼij. Rumal che kʼo ta kkʼol wi ri jastaq che ktijowik, ri qachalal e kitikom chikop rech kepilik rech ri keʼopan pa ri nim riqbʼal ibʼ kʼo kkitijo.

Pa taq ri nim riqbʼal ibʼ kkʼulmataj jastaq che kuya tzeʼn. Knaʼtaj chwe are chiʼ jun misionero ubʼiʼ Herb Jennings, c che tajin kuya jun chʼabʼal pa ri nim riqbʼal ibʼ, xaq kʼateʼ jun alaj wakax ksumumik xok bʼik y xokʼow chrij ri qachalal che tajin kuya ri chʼabʼal. Ri wakax kuriq ta chik jas kubʼano y ri qachalal xuqujeʼ. Tekʼuriʼ kajibʼ qachalal che kʼo kichuqʼabʼ xkichap ri wakax y xkikʼam bʼik, e juntir ri e kʼo pa ri nim riqbʼal ibʼ xkiya aplausos.

Pa jun qʼij re ri semana kkʼut ri película ubʼiʼ La Sociedad del Nuevo Mundo en acción pa taq ri tinamit che e kʼo naqaj. Xlikʼibʼax jun saq sábana chuwach kebʼ cheʼ rech kil ri película. ¡Ri winaq sibʼalaj utz xkil ri película! Kʼi chke ri e kʼo chilaʼ kʼateʼ nabʼe mul kkil jun película. Kkiya aplausos are chi pa ri película kilitajik che tajin kabʼan ki bautismo ri winaq. Ri película xukʼut chkiwach che ri oj testigos rech Jehová oj kʼo cho ronojel ri uwach Ulew.

Kebʼ junabʼ chik tajin kinpatanij ri Jehová pa África, tekʼuriʼ xinkunik xinbʼe pa ri asamblea internacional pa ri junabʼ 1958 che xbʼan pa Nueva York. ¡Sibʼalaj xinkikotik are chiʼ xinwil uwach ri Sheila! Ri areʼ are precursora especial pa Quebec y xbʼe pa ri asamblea riʼ. Amaqʼel kqataq cartas chbʼil qibʼ are kʼu are chiʼ xqil chi jumul qibʼ xinbʼij che we kraj kkʼuliʼ wukʼ y ri areʼ xubʼij che kraj. Xintaq jun carta che ri qachalal Knorr d xinbʼij che we kraj che kbʼe ri al Sheila pa Galaad tekʼuriʼ ktaq bʼi pa África, y ri qachalal xubʼij che utz. Are chiʼ Sheila xopan pa Ghana, xojkʼuliʼ pa Accra pa ri 3 re octubre 1959. Xqanaʼo che ri Jehová tajin kojutewchij rumal che are xqaya upatanexik pa nabʼe lugar.

Pa ri junabʼ 1961 xojtaq bʼi pa Camerún, jawiʼ xinya wi nutobʼanik rech kbʼan jun kʼakʼ sucursal. Kʼi uwach chak xinbʼano y rumal che xinok che siervo re sucursal rajawaxik che kʼi kwetaʼmaj. Pa ri junabʼ 1965 xbʼix chqe che Sheila embarazada chik y xqaxiʼj qibʼ rumal che qachomam taj che kkʼojiʼ qalkʼwal. Are chiʼ tajin kkʼaman chqe che qeyem jun alaj neʼ xqachomaj che kojtzalij pa Canadá, are kʼu xqakʼulmaj jun nimalaj kʼax.

Ri alaj qaneʼ xkamik are chiʼ majaʼ kkʼojiʼk. Ri doctor xubʼij chqe che ala ri alaj qaneʼ. Y ksach ta wariʼ pa qajolom paneʼ qʼaxinaq chi 50 junabʼ, paneʼ sibʼalaj kojbʼisonik xojkanaj chilaʼ jawiʼ tajin kqapatanij wi ri Jehová.

Ri qachalal pa Camerún amaqʼel xbʼan kʼax chke rumal che kkaj taj kkinim kibʼ pa política. Ri kʼax más knimatajik are chiʼ kok jun kʼakʼ presidente. Pa ri 13 re mayo 1970 xkʼulmataj ri kqaj taj che kkʼulmatajik: ri qʼatbʼal tzij xuqʼatej uwach ri kichak ri testigos rech Jehová. Xelesax ri sucursal chqe che kʼateʼ cinco ikʼ tajin kqakojo. Xa pa jun semana qonojel ri oj misioneros xojesax lo pa ri tinamit. Sibʼalaj xojbʼisonik are chiʼ xeqaya kan ri qachalal rumal che sibʼalaj keqaloqʼoqʼej y kqaj taj che kʼo kkikʼulmaj.

Seis ikʼ xojkʼojiʼ pa ri sucursal re Francia y chilaʼ xqabʼan ronojel rech xeqatoʼ ri qachalal che e kʼo pa Camerún. Pa diciembre re ri junabʼ riʼ xojtaq bʼi pa ri sucursal re Nigeria, che are xilow ri chak che kbʼan pa Camerún. Ri qachalal re Nigeria rukʼ loqʼoqʼebʼal xojkikʼulaj y xojkikot pa ronojel ri tiempo che xojkʼojiʼ chilaʼ.

Pa ri junabʼ 1973 kʼax xqariq che uyaʼik kan ri qa asignación. Qʼaxinaq chi kʼi tiempo che Sheila yawabʼ. Are chiʼ oj kʼo pa jun nim riqbʼal ibʼ pa Nueva york rukʼ oqʼej xubʼij chwe: «Kinchʼij ta chik, sibʼalaj inkosinaq y xaq in yawabʼ». 14 junabʼ chik tajin kupatanij ri Jehová wukʼ pa África Occidental. Sibʼalaj kinkikot rukʼ, pero rajawaxik kqakʼex jujun jastaq pa qakʼaslemal. Are chiʼ ojtzijonaq chik y qabʼanom chi orar che ri Jehová, xqachomaj che kojtzalij pa Canadá rech kutzirik. Uyaʼik kan upatanexik ri Jehová pa tiempo completo sibʼalaj xuya bʼis chqe.

Are chiʼ xojopan pa Canadá, xinriq nuchak rukʼ jun wamigo re ojer kanoq, che kukʼayij carros pa ri norte re Toronto. Xqariq jun qachoch y xqaloqʼ ri jastaq che kajwataj chqe che e kojom chik rech kqanim ta qibʼ pa kʼasaj. Xqaj taj xqaloqʼ kʼi taq jastaq rumal che, kqaj kqapatanij chi jumul ri Jehová pa tiempo completo. Sibʼalaj xqamayo, rumal che xojkun chik xqamajij chi upatanexik ri Jehová pa tiempo completo.

Xinmajij uyaʼik tobʼanik pa taq sábados che uyakik jun ja jawiʼ kebʼan wi ri taq nim riqbʼal ibʼ pa Norval (Ontario). Are chiʼ xqʼax ri tiempo, xbʼix chwe che kinok superintendente re ri salón re asamblea. Y rumal che  Sheila yawabʼ ta chi más, xqakʼam wajun eqeleʼn che xyaʼ chqe. Rumal laʼ, pa junio 1974 xojbʼe pa ri apartamento che kʼo pa ri salón. Sibʼalaj xojkikotik che xqapatanij chi jumul ri Jehová pa tiempo completo.

Sibʼalaj kojkikotik rumal che Sheila más tajin kutzirik. Kebʼ junabʼ chik qʼaxinaq, xbʼix chwe che kinok solinel re circuito, y xqakʼam wajun eqeleʼn riʼ. Xeqasolij ri congregaciones re Manitoba, che are jun lugar che kʼo pa Canadá, kchʼobʼtaj uwach rumal che sibʼalaj kubʼan tew chilaʼ. Are kʼu sibʼalaj kojkikot rukʼ ri kiloqʼoqʼebʼal ri qachalal pa ri congregaciones che kjunamataj rukʼ jun qʼaqʼ che kojutoʼ chuwach ri tew. Xqetaʼmaj che ri más nim ubʼanik are kqapatanij ri Jehová rukʼ ronojel qanimaʼ are ta ri lugar.

Kʼi junabʼ chik in solinel re circuito, are chiʼ xojsikʼix pa Betel pa Canadá pa ri junabʼ 1978. Majaʼ naj, xyaʼ jun pixabʼ chwe che utz ta xinto are kʼu nim ubʼanik. Xbʼix chwe che kinya jun chʼabʼal che kuchʼij hora y media pa ri chʼabʼal francés pa jun riqbʼal ibʼ che nim ubʼanik pa Montreal. Pero, qas ta xchʼobʼotaj ri xinbʼij, rumal laʼ jun qachalal re ri Departamento de Servicio xtzijon wukʼ. Wilom taj che qas ta utz kinbʼan che uyaʼik chʼabʼal pa ri e riqbʼal ibʼ. Are kʼu utz ta xinta ri xbʼix chwe, xinnaʼo che ri qachalal xa utz ta kinrilo y che xa más tajin kuya uwiʼ ri xubʼij chwe. Utz ta ri xinbʼano rumal che xinkam ta ri pixabʼ che xuya chwe rumal che kinchomaj che utz ta xubʼan che ubʼixik chwe.

Qʼaxinaq chi jujun qʼij, jun chke ri Comité re Sucursal xtzijon wukʼ. Xinbʼij che che utz ta ri xinbʼano rumal che xinkʼam ta ri pixabʼ y xinbʼij che che kinbʼison rumal wariʼ. Tekʼuriʼ, xinbʼe rukʼ ri qachalal che xuya ri pixabʼ chwe y xintaʼ kuybʼal numak che y ri areʼ rukʼ loqʼoqʼebʼal xukuy numak. Wariʼ xukʼut chwe, che rajawaxik kinkʼut machʼachʼem y wariʼ ksach ta pa nujolom (Prov. 16:18). Amaqʼel kinbʼan orar puwiʼ ri xinbʼano y kwaj ta chik kpe woyowal are chiʼ kyaʼ jun pixabʼ chwe.

40 junabʼ chik in kʼo pa Betel re Canadá, y umajim lo pa ri 1985 che in jun chke ri Comité re Sucursal. Pa ri febrero 2021, xkam ri loqʼalaj wixoqil Sheila, y sibʼalaj kinbʼisoj. Y, más tajin kinriq yabʼil. Pero rumal che kiʼ tajin kinbʼano y rukʼ kikotemal tajin kinpatanij ri Jehová kinnaʼ ta ri qʼij che kqʼaxik (Ecl. 5:20, nota). Qastzij che tajin kinriq kʼax pa nukʼaslemal, are kʼu kinkikotik che tajin kinpatanij ri Jehová. Sibʼalaj kinkikotik rumal che más che 70 junabʼ tajin kinpatanij ri Jehová pa tiempo completo. Amaqʼel kintaʼ che ri Jehová che keʼutoʼ ri alabʼom alitomabʼ rech kkichaʼ upatanexik pa tiempo completo, rumal che upatanexik ri Jehová areʼ ri qas kuya kikotemal chqe pa ri qakʼaslemal.