Ri kkitzijoj ri uqʼatbʼal tzij ri Dios kkiya ubʼixik

Kkikot chi pa ri ukʼaslemal

JESÚS kubʼij che retaʼm kiwach ri uchij (Juan 10:14). We kʼo jun winaq utz ranimaʼ, kraj ri jamaril y ri sukʼilal kraj riʼ kqebʼ kukʼ ri utijoxelabʼ ri Jesús. Xuqujeʼ kuriq kikotemal pa ri ukʼaslemal, junam rukʼ ri xukʼulmaj jun ixoq che kel pa Bélgica. Chqilampeʼ ri xukʼulmaj:

«Are chiʼ ri testigos rech Jehová xechʼaw chuchiʼ ri wachoch, sibʼalaj kinbʼisonik y nuchomam ukamisaxik wibʼ. Sibʼalaj utz xinta ri xkibʼij che ri Dios kusachisaj uwach ri kʼaxkʼolil, are kʼu utz ta xinto che are ri Dios kilowik jampaʼ kusach uwach. Ocho junabʼ in bʼenaq ta chi pa ri iglesia, rumal che utz ta kwil ri kbʼan chilaʼ. Xinchʼobʼo che qastzij ri kkibʼij ri testigos rech Jehová y xwetaʼmaj che kajwataj ri Dios chqe pa ri qakʼaslemal.

Are kʼu xinkun ta chik xintzijon kukʼ ri testigos rech Jehová paneʼ in kisolim chi jujun taq mul. Sibʼalaj xinbʼisonik. Kebʼ cajetillas sikʼ kintij pa jun qʼij, xuqujeʼ xinmajij utijik drogas. Rumal che kwaj kintzijon rukʼ ri numam che kaminaq chik xwaj xwetaʼmaj chrij ri qʼijinik. ¡Sibʼalaj xubʼan kʼax chwe! Are chiʼ kok aqʼabʼ, kinnaʼo che kkibʼan kʼax ri itzel taq uxlabʼal chwe. Sibʼalaj kʼi ikʼ xkibʼan chwe. Are chiʼ kok aqʼabʼ kwaj taj xaq nutukel kinkʼojik rumal che kinxiʼj wibʼ.

Jumul chi’ xinbʼe pa bʼinem xinkʼex ri nubʼe, xinriq jun ja che tajin kyakik. Sibʼalaj xinmayo are chiʼ xenwil kʼi winaq che tajin kechakunik. Are chiʼ xinqebʼ kukʼ xinwilo che are ri testigos rech Jehová tajin kkiwok jun Ja rech Ajawbʼal. Xnaʼtaj chwe are chiʼ xinkisolij jujun taq mul cho wachoch, y xinchomaj: ¡Sibʼalaj utz riʼ wet konojel ri winaq e junam kuk’ ri testigos rech Jehová!

Xwaj che ketzalij che nusolixik, y xintzijon rukʼ jun che tajin kchakun chilaʼ. Xinbʼan nuchʼawem che ri Dios, chi’ qʼaxinaq chi diez qʼij xopan ri Testigo cho wachoch y xintzijon rukʼ. Xubʼij chwe che kumajij chi uyaʼik ri etaʼmanik chwe, y utz xinta ri xubʼij chwe. Aninaq xinusik’ij pa ri e riqbʼal ibʼ pa ri Ja rech Ajawbʼal. ¡Sibʼalaj utz xwil ri kkibʼan chilaʼ! Amaqʼel e nutzukum winaq che kkaj kibʼ, y kʼateʼ chanim ri’ xenriqo.

Rumal laʼ nuyaʼom ta kan bʼenam pa taq ri e riqbʼal ibʼ. Qʼaxinaq chi oxibʼ semanas xinya kan utijik sikʼ. Xenkʼaq bʼi ri libros re astrología y ri discos che kʼo música satánica chupam, tekʼuriʼ xinnaʼo che ri itzel taq uxlabʼal xkiya kan ubʼanik kʼax chwe. Xinbʼan pa nukʼaslemal ri upixabʼ ri Jehová, chi’ qʼaxinaq chi oxibʼ ikʼ xinmaj utzijoxik ri utzalaj taq tzij. Qʼaxinaq chi seis ikʼ, xinbʼan nuqasanjaʼ y chiʼ qʼaxinaq chi kebʼ qʼij nubʼanom nuqasanjaʼ xinmajij ri precursorado auxiliar.

Sibʼalaj kinmaltyoxij che ri Jehová inutoʼom. Kimik kinkikot chi pa ri nukʼaslemal. Qas xwilo che ri ubʼiʼ ri Jehová kjunamataj rukʼ jun takʼatik ja che kinuchajij y kinutoʼo (Proverbios 18:10). Kinnaʼo che kinjunamataj rukʼ ri salmista che xutzʼibʼaj ri Salmo 84:10 che xubʼij: ‹¡Are kʼo na kechbʼex che ri jun qʼij kʼolem chkiwach ri uwo ja re ri achoch la, chuwach ri jun mil naj chke! Are utz na puneʼ ta neʼ xa in chajil rech ri uchiʼ ri rachoch ri nuDios, che ukʼexwach ri kinkʼojiʼ pa taq kʼolbʼal re etzelal›».

Wajun ixoq che kʼo utz ranimaʼ qas xuriq kikotemal pa ri ukʼaslemal. Xuqujeʼ kkun jun winaq kuriqo we kutzukuj ri Jehová rukʼ ronojel ranimaʼ.