Ri Biblia xukʼex ri kikʼaslemal

¿JAS xbʼanowik che jun achi xtzalij chi jumul pa ri kojonem che xkʼiy wi? ¿Jas xubʼan jun ala che uriqik ri utat che amaqʼel xutzukuj? Chqilaʼ ri kkiya ubʼixik.

«Xwaj xintzalij chi jumul rukʼ ri Jehová» (ELIE KHALIL)

XALAX PA RI JUNABʼ: 1976

TINAMIT: CHIPRE

NIKʼAJ CHIK: RI KʼOJOLAXEL CHE XTZALIJ LO RUKʼ RI UTAT

RI OJER NUKʼASLEMAL: Xinalax pa Chipre, are kʼu pa Australia xinkʼiy wi. Ri nutat nunan e testigos rech Jehová, xkikʼut chnuwach che rajawaxik kinloqʼoqʼej ri Dios xuqujeʼ ri uTzij, ri Biblia. Are kʼu, chiʼ kʼa in ala na xinniman ta chke. Kinel bʼi pa taq chaqʼabʼ pa ri wachoch y, kinbʼe kukʼ ri wachiʼl che junam kijunabʼ wukʼ, keqelaqʼaj carros y kinbʼan jastaq che utz taj.

Nabʼe xa kinkʼuʼ wibʼ chiʼ kinbʼan wariʼ rumal che kwaj taj che kebʼison ri nutat nunan, tekʼuriʼ chiʼ xqʼax ri tiempo kinxibʼij ta chi wibʼ. Ri e wachiʼl más nim kijunabʼ chnuwach y kkipatanij ta ri Jehová. Ri kachilanik xubʼan kʼax chwe. Rumal laʼ pa jun qʼij xinbʼij chke ri nutat nunan che ko ta chi kwaj kwetaʼmaj chrij ri kikojonik. Paneʼ rukʼ paciencia xkaj xinkitoʼo, are kʼu xinta ta ri xkibʼij. Sibʼalaj xebʼisonik.

Xinel bʼi pa ri wachoch y xinmajij utijik drogas. Xuqujeʼ xintiko y xinkʼayij marihuana. Xinbʼan jastaq che utz taj y xaq pa taq discotecas in kʼo wi. Xuqujeʼ, sibʼalaj in kʼaʼn. Sibʼalaj kpe woyowal are chiʼ kbʼixik o kbʼan jun jastaq chwe che utz taj. Y amaqʼel kinchʼojin kukʼ ri nikʼaj chik y kenchʼayo. Are xenbʼan ri jastaq che utz taj kubʼan jun cristiano.

RI BIBLIA XUKʼEX RI NUKʼASLEMAL: Xwachilaj jun winaq che kutij drogas che kʼa nitzʼ na xkam ri utat. Kʼi taq horas kojtzijon rukʼ chaqʼabʼ. Kʼi taq mul xubʼij chwe che kubʼisoj ri utat. Rumal che kʼa in nitzʼ na wetaʼmam chrij ri kʼastajibʼal, rumal laʼ xinbʼij che, che ri Jesús xeʼuwalijsaj ri e kaminaqibʼ y je kubʼan na pa ri petinaq (Juan 5:​28, 29). Xinbʼij che: «Chachomajampeʼ, kawil chi na jumul uwach ri atat, y qonojel kojkʼasiʼ na pa jun kotzʼiʼjalaj uwach Ulew». Sibʼalaj utz xuta wariʼ.

Kʼi taq mul, ri wachiʼl kuta chwe chrij ri kʼisbʼal taq qʼij o ri Trinidad. Y ri in kinkʼut kʼi taq texto chuwach pa ri Biblia che kchʼaw chrij ri Jehová, ri Jesús y ri kʼisbʼal taq qʼij (Juan 14:28; 2 Timoteo 3:​1-5). Are chiʼ más kinchʼaw chrij ri Biblia rukʼ ri wachiʼl, más kinchoman chrij Jehová.

Ronojel ri wetaʼmam chrij ri Biblia y ri xkikʼut ri nunan nutat chwe kʼa kʼo na pa ri wanimaʼ y nojimal chi nojimal xkʼiy chi jumul. Jujun taq mul are chiʼ in kʼo kukʼ ri wachiʼl y tajin kqatij drogas pa taq ri nimaqʼij xaq kʼateʼ kinchoman chrij ri Jehová. Paneʼ jujun chke ri wachiʼl kkibʼij che kekojon chrij ri Dios, are kʼu rukʼ ri kibʼantajik kkikʼutu che qastzij taj. Rumal che kwaj taj kinbʼan we junam kukʼ e areʼ, xwetaʼmaj che rajawaxik kintzalij rukʼ ri Jehová.

Junam taj che kabʼan ri awetaʼm rukʼ ri xaq kawetaʼmaj y kabʼan taj. Jujun jastaq kʼax ta xinbʼan kan che uyaʼik. Jun kʼutbʼal, kʼax ta xinbʼan kan che uyaʼik ri drogas xuqujeʼ ri ojer taq wachiʼl y xinmajij jun etaʼmanik re ri Biblia rukʼ jun kʼamal bʼe re ri congregación.

Are kʼu kʼo jujun che kʼax xinbʼan kan che uyaʼik, más na ri oyowal. Jujun taq mul kpe woyowal y wariʼ kubʼano che kinchomaj che in ajmak. Rumal laʼ xintzijon rukʼ ri testigo rech Jehová che tajin kyaʼow ri etaʼmanik re ri Biblia chwe. Rukʼ ri utzalaj ubʼantajik y ri upaciencia sibʼalaj xinutoʼo y xuya nuchuqʼabʼ. Jumul xubʼij chwe che kinsikʼij jun kʼutunem rech La Atalaya che kchʼaw chrij ri ukojik chuqʼabʼ. * Xinnikʼoj ri rajawaxik kinbʼano are chiʼ kpe woyowal. Kinchoman chrij ri kʼutunem y kinbʼan nuchʼawem che ri Jehová, nojimal chi nojimal xinkunik xinkʼex wibʼ. Pa abril re ri junabʼ 2000 xinbʼan nuqasanjaʼ y xinux testigo rech Jehová. Sibʼalaj xekikot ri nutat nunan.

RI TEWCHIBʼAL CHE NURIQOM: Kimik kinnaʼ chi jamaril y kʼo chi jun chʼajchʼoj retaʼmabʼal nukʼuʼx, rumal che kintij ta chi drogas y kinbʼan ta chi tzʼil taq mak. Apastaneʼ ri tajin kinbʼano we kinchakunik, we in kʼo pa ri riqbʼal ibʼ o tajin kinbʼan jun etzʼanem, sibʼalaj kinkikot pa ri nukʼaslemal.

Sibʼalaj kinmaltyoxij che ri Jehová che e kʼo utzalaj nutat nunan, rumal che amaqʼel xinkeyej. Xuqujeʼ kinchoman chrij ri tzij che xubʼij ri Jesús che kʼo pa Juan 6:44: «Man kʼo ta jun kkunik kpe wukʼ in, xuwi ri kkʼam uloq rumal ri Tataxel ri xinutaq uloq». Sibʼalaj kinkikotik che xinkunik xintzalij rukʼ ri Jehová rumal che xinukʼam uloq.

«Xwaj che kkʼojiʼ jun nutat» (MARCO ANTONIO ALVAREZ SOTO)

XALAX PA RI JUNABʼ: 1977

TINAMIT: CHILE

NIKʼAJ CHIK: XKʼOJIʼ PA JUN BANDA RE DEATH-METAL

RI OJER NUKʼASLEMAL: Xinkʼiy rukʼ ri nunan pa Punta Arenas, jun tinamit che kʼo ta wi etzelal pa Magallanes, naqaj che ri sur rech ri continente americano. Ri nutat nunan xkijach kibʼ are chiʼ kʼateʼ cinco nujunabʼ. Wariʼ xubʼan chwe che xinnaʼo che xaq nutukel in kʼolik. Rumal laʼ xwaj xkʼojiʼ jun nutat.

Ri nunan tajin kyaʼ etaʼmanik che chrij ri Biblia kumal ri testigo rech Jehová y kinukʼam bʼi pa taq ri riqbʼal ibʼ pa ri Ja rech Ajawbʼal. Are kʼu ri in utz ta kwilo kinbʼek, kintzukuj jas kinbʼan pa taq ri bʼe rech kinbʼe ta pa ri e riqbʼal ibʼ. Are chiʼ 13 nujunabʼ xinya kan bʼenam pa ri e riqbʼal ibʼ.

Pa ri tiempo riʼ are más utz kinta ri música y xinchomaj che kinkun che ubʼanik. 15 nujunabʼ are chiʼ xinmaj ubʼanik ri heavy-metal y death-metal pa taq festivales, bares y pa taq ri nimaqʼij che kkibʼan ri winaq. Xenwachilaj ri winaq che qas kenaʼw che ubʼanik ri música, wariʼ xubʼano che más utz xwil ri música. Xinbʼan estudiar música chilaʼ pa ri tinamit. Chiʼ 20 nujunabʼ xinbʼe pa Santiago ri capital, rech kinbʼan más estudiar ri música. Xuqujeʼ xinbʼe pa taq ri bandas re heavy-metal y death-metal.

Paneʼ je wariʼ, xinnaʼo che kʼo kajwataj na chwe, y rech kinchoman ta chrij kinqʼabʼarik y kintij drogas kukʼ ri banda che in kʼo wi, che xenwilo junam rukʼ ri nufamilia. Xinux jun itzel winaq y wariʼ xilitaj rukʼ ri watzʼyaq: amaqʼel qʼeq atzʼyaq kinkojo, nimaʼq ri wismachiʼ y sibʼalaj e nimaʼq ri nuwiʼ.

Rumal ri nubʼantajik amaqʼel kinnim wibʼ pa taq chʼoj, y kinchʼojin kukʼ ri policías. Jun qʼij are chiʼ in kʼo kukʼ ri wachiʼl, jujun traficantes rech drogas kkaj kechʼojin qukʼ. Rumal che in qʼabʼarel, xinmaj kichʼayik, y ri e areʼ sibʼalaj xinkichʼayo y xkiqʼaj ri bʼaq xewe.

Are kʼu, ri más xuya bʼis chwe are che xwetaʼmaj che ri nunovia kʼi junabʼ tajin kkichʼabʼej kibʼ rukʼ ri utzalaj wachiʼl, y ri e nikʼaj chi wachiʼl xkibʼij ta chwe. Sibʼalaj xinbʼisonik.

Xintzalij pa Punta Arenas y xinmajij ukʼutik música y violonchelo chkiwach e nikʼaj chik. Xuqujeʼ xinbʼan grabación pa taq ri bandas rech heavy-metal y death-metal. Pa ri tiempo riʼ xinchʼobʼ uwach Sussan, jun jeʼlalaj ali tekʼuriʼ xqukʼaj qibʼ rukʼ. Are chiʼ xqʼax ri tiempo, Sussan xubʼij chwe che ri unan kkojon chrij ri Trinidad are kʼu ri in kinkojon ta chrij, xuta chwe: «¿We qastzij kʼo ri Trinidad?». Xinbʼij che, che ri Trinidad qastzij taj, y paneʼ kinkun taj kinkʼut chuwach rukʼ ri Biblia, are kʼu wetaʼm jachin kekunik kekʼutuw chuwach. Xinbʼij che, che ri testigos rech Jehová kekunik kkikʼut chuwach rukʼ ri Biblia. Pa kʼi junabʼ nubʼanom ta chinuchʼawem che ri Dios: rumal laʼ xinta tobʼanik che.

Okʼowinaq chi kebʼ oxibʼ qʼij xinwil jun achi che xinchomaj che kinchʼobʼ uwach y xinta che we testigo rech Jehová. Paneʼ xuxiʼj ribʼ rumal ri nubʼantajik, are kʼu rukʼ utzilal xutzalij uwach ri nupreguntas che xintaʼ che chrij ri e riqbʼal ibʼ che kbʼan pa ri Ja rech Ajawbʼal. Wetaʼm che are ri Dios xtzalin uwach ri nuchʼawem chiʼ xinriq wajun achi riʼ. Xinbʼe pa ri Ja rech Ajawbʼal y kʼa chrij xintʼuyiʼ wi rech kinkil taj. Are kʼu, e kʼi xkichʼobʼ nuwach y xinkilo are chiʼ kʼa in nitzʼ na xinbʼe pa ri e riqbʼal ibʼ. Xkiya utz nupetik xinkimatzej rukʼ loqʼoqʼebʼal y xinnaʼ jamaril pa ri wanimaʼ. Xinnaʼo che jetaneʼ xintzalij pa ri wachoch. Are chi’ xinwil uwach ri Testigo che xyaʼow ri etaʼmanik chwe chi’ k’a in nitzʼ na, xinbʼij che, che kuya chi jun mul chwe.

RI BIBLIA XUK’EX RI NUK’ASLEMAL: Jun qʼij xinsikʼij ri kubʼij Proverbios 27:11, «Chatux ajnoʼj, nukʼojol, kabʼan kʼu na chwe chi sibʼalaj utz wech». Sibʼalaj xinmayo che kojkunik kqakikotemaj ri Bʼanol re ronojel ri kajulew paneʼ oj ajmakibʼ. Xinwetaʼmaj che ri Jehová are ri tat che kʼi junabʼ nutzukum.

Kwaj che kinkikotemaj ri nuTat che kʼo pa ri kaj y kinbʼan ri urayibʼal, are kʼu pa kʼi junabʼ xinqʼabʼarik y xintij drogas. Xinwetaʼmaj ri xraj xubʼij ri Jesús pa Mateo 6:24, che kubʼij: «man kʼo ta jachin jun kkunik keʼupatanij kebʼ ajawibʼ». Are chiʼ tajin kinkoj nuchuqʼabʼ che ukʼexik ri nukʼaslemal ri tzij che kʼo pa 1 Corintios 15:33 xopan pa wanimaʼ, chilaʼ kubʼij: «Ri e itzel taq achilanik kketzelaj ri e utzalaj taq naqʼatisabʼal». Xinwilo che kinkun taj kinya kan ri itzel nubʼantajik we amaqʼel kinbʼe pa ri lugar che kinbʼe wi y we amaqʼel kenwachilaj ri winaq che xenwachilaj nabʼe kanoq. Ri pixabʼ che kʼo pa ri Biblia xukʼut chunuwach che rajawaxik kinxutuj ronojel ri kubʼano che kinmakunik (Mateo 5:30).

Rumal che utz kinta ri música, kʼax xinbʼan kan che uyaʼik ri heavy-metal are kʼu rukʼ ri utobʼanik ri wachiʼl pa ri congregación xinkun kan che uyaʼik. Xinya kan ri qʼabʼarik y ri drogas, xinqupij ri nuwiʼ, xinwesaj ri wismachiʼ y xinkoj ta chi qʼeq atzʼyaq. Are chiʼ xinbʼij che Sussan che kwaj kinqupij ri nuwiʼ, ri areʼ xubʼij che kraj kbʼe wukʼ pa ri Ja rech Ajawbʼal, xubʼij che kraj kerilaʼ jas kabʼan chilaʼ. Sibʼalaj utz xrilo y chunaj taj xumajij jun etaʼmanik re ri Biblia. Are chiʼ xqʼax ri tiempo xojkʼuliʼk y pa ri junabʼ 2008, junam xqabʼan ri qaqasanjaʼ y xojux testigos rech Jehová. Kimik rukʼ kikotemal tajin kqapatanij ri Jehová rukʼ ri nunan.

RI TEWCHIBʼAL CHE NURIQOM: Xinkunik xinya kan ri uwach Ulew che kuya ta kikotemal y ri itzel taq achilanik. Kʼa utz na kinta ri música are kʼu kinchaʼ na ri kintatabʼej. Rukʼ ri wetaʼmam kentoʼ ri nufamilia y nikʼaj chi winaq más na ri alabʼom alitomabʼ. Kwaj kinkʼut chkiwach che ri jastaq che kutzujuj wajun uwach Ulew riʼ paneʼ kilitajik che utz are kʼu xa mes (Filipenses 3:8).

Are chiʼ xinqebʼ rukʼ ri Dios, xenriq sukʼalaj taq wachiʼl pa ri congregación ri kʼo wi loqʼoqʼebʼal y jamaril. Y más na, xinriq ri nutat che amaqʼel xintzukuj: ri Jehová.

[Nota]

[Comentario]

«Xinkunik xintzalij rukʼ ri Jehová rumal che xinukʼam uloq»