Ri nabʼe taq junabʼ re ri nukʼaslemal xinkʼojiʼ pa jun tinamit chunaqaj Leipzig, pa ri ojer República Democrática Alemana, naqaj che ri frontera rech Polonia che kimik are ri República Checa. Are chiʼ kʼo seis nujunabʼ xojbʼe pa Brasil rumal che chilaʼ kchakun wi ri nutat, tekʼuriʼ xojbʼe pa Ecuador.

Are chiʼ 14 nujunabʼ, ri nutat nunan xinkitaq chi lo pa Alemania rech kinbʼan estudiar pa jun internado. Rumal che xaq nutukel in kʼolik xaq nutukel kinbʼan ri e jastaq paneʼ ri nikʼaj chik utz ta kkilo.

Kʼo chi 17 nujunabʼ are chi’ ri nutat nunan xetzalij pa Alemania. Xinkʼojiʼ jun tiempo kukʼ, are kʼu rumal che xkʼaman chwe che xaq nutukel in kʼolik, utz ta kwilo che kkiya pixabʼ chwe y chiʼ kʼo 18 nujunabʼ, xinel bʼik.

Xinwilo che kʼo ta upatan ri kʼaslemal rumal laʼ xintzukuj jas xinbʼano. Xinbʼan investigar jujun taq grupos y organizaciones, xinwilo che ri utz kinbʼano are che kinwetaʼmaj y kinsolij ronojel ri uwach Ulew are chiʼ majaʼ kbʼan kʼax che kumal ri winaq.

Xinloqʼ jun numoto, xinel bʼi pa Alemania y xinbʼe pa África. Qʼaxinaq chi jubʼiqʼ tiempo xintzalij chi pa Europa rumal che qas ta chi utz ri numoto. Xinbʼan ubʼanik ri numoto, tekʼuriʼ xinbʼe pa Portugal. Xinchomaj che kinya kan ri numoto, y che are más utz we kinbʼe pa barco rech kwetaʼmaj ronojel ri uwach Ulew.

Xinbʼe kukʼ ri alabʼom alitomabʼ che kebʼek rech keqʼax b’i pa ri océano Atlántico. Kʼo Laurie chkixoʼl, ri xux wixoqil. Xojbʼe pa ri islas del Caribe xuqujeʼ pa Puerto Rico, tekʼuriʼ xojtzalij lo pa Europa. Oj kebʼ rukʼ Laurie xqatzukuj jun velero y xqabʼan ubʼanik rech kojkʼojiʼ chupam. Oxibʼ ikʼ chik qatzukum y xqabʼan ta chi ri qachomam rumal che xinkʼam bʼi pa ri ejército alemán.

15 ikʼ xinkʼojiʼ pa ri Marina y pa ri tiempo riʼ xojkʼuliʼk. Kqaj kqabʼan chi jumul ri xqabʼan nabʼe. Are chiʼ majaʼ kinkʼam b’i pa ri ejército xqaloqʼ jun qalancha y nojimal chi nojimal xqabʼan jun velero che. Ri qachomam are che kojkʼojiʼ chupam are chiʼ kqasolij ri uwach Ulew. Are chiʼ xinel lo pa ri Marina y majaʼ kqakʼis ubʼanik ri qabarco xeʼopan ri testigos rech Jehová qukʼ y xqamajij ri etaʼmanik chrij ri Biblia.

Nabʼe xinchomaj taj che rajawaxik kinkʼex ri nukʼaslemal: ya xinkʼuliʼ rukʼ ri ixoq che nabʼe xaq xqukʼaj qibʼ rukʼ y ya xinya kan utijik sikʼ (Efesios 5:5). Xuqujeʼ xinchomaj che sibʼalaj utz riʼ we kinkoj ri nukʼaslemal che retaʼmaxik ronojel ri ubʼanom ri Dios.

Are kʼu kʼo jujun bʼantajik che majaʼ kinkʼex pa ri nukʼaslemal. Nuyaʼom ta kan ukʼutik nimal y xaq nutukel kwaj kinbʼan ri jastaq, kwaj nim kinilik rumal ri kinkun che ubʼanik y ri nubʼanom. Xaq xiw xinchoman chbʼil wibʼ.

Are chiʼ xinsikʼij uwach ri Sermón del Monte (Mateo, capítulos 5-7). Xinmay ri xubʼij ri Jesús are chiʼ xchʼaw chrij ri kikotemal. Xubʼij che ri kenumik y ri kchaqij kichiʼ are ri keriqow ri kikotemal (Mateo 5:6). Xinchomaj ¿jasche kkikot jun winaq we knumik y kchaqij uchiʼ? Are chiʼ xwetaʼmaj más chrij ri Biblia xwilo che qonojel kajwataj ri Dios chqe, y rech kojkunik kqariqo rajawaxik kqetaʼmaj ri kqabʼan che uriqik. Junam rukʼ ri xubʼij ri Jesús: «Utz ke ri kkichʼobʼo chi kajwataj ri Dios chke» (Mateo 5:3).

Oj kebʼ rukʼ Laurie xqamajij retaʼmaxik chrij ri Biblia pa Alemania, are kʼu xojbʼe pa Francia tekʼuriʼ xojbʼe chi pa Italia. Apawijeʼ taneʼ ri kojbʼe wi e kʼo testigos rech Jehová chilaʼ. Ri más nim xwilo are ri loqʼoqʼenik che kʼo chkixoʼl. Xinwilo che xa e jun familia cho ronojel ri uwach Ulew (Juan 13:34, 35). Chiʼ xqʼax ri tiempo xqabʼan qasanjaʼ.

Paneʼ in Testigo chik are kʼu xinkʼex na jujun jastaq pa ri nukʼaslemal. Qachomam rukʼ Laurie che kojbʼe pa ri costa re África y kojqʼax bʼi pa ri Atlántico tekʼuriʼ pa Estados Unidos. Xaq oj kebʼ rukʼ ri wixoqil oj kʼo pa ri barco pa unikʼajil ri mar, xwilo che kjunamataj ta ri qabʼanik rukʼ ri Bʼanal qe. Rumal che kʼo nutiempo xinmajij usikʼixik ri Biblia. Ri relatos re ri Jesús xubʼano che xinchoman chrij. Paneʼ ri areʼ tzʼaqat y kʼo utz taq ubʼantajik are kʼu xunimarisaj ta ribʼ. Ri más nim ubʼanik chuwach are ta ri areʼ chbʼil ribʼ. Xaneʼ are ri uTat.

Are chiʼ xinchoman chrij ri ukʼutbʼal ri Jesús, xwilo che xaq xiw ta rajawaxik kinya jubʼiqʼ nutiempo che utzijoxik ri uQʼatbʼal tzij ri Dios, xaneʼ rajawaxik are ri más nim ubʼanik pa ri nukʼaslemal (Mateo 6:​33). Are chiʼ xojopan pa Estados Unidos, xqaya kan ubʼanik ri tajin kqabʼano y xojchoman chrij xaq xiw upatanexik ri Dios.

Ojer kanoq are chiʼ xaq xiw chwij in kinchoman wi xinchoman ta chrij ri kʼax che kinriqo rumal ri kinchaʼ ubʼanik. Kimik riʼ kʼo chi más nunojibʼal y kinchoman na chrij ri kinchaʼ ubʼanik (Isaías 48:17, 18). Xuqujeʼ wetaʼm chi ri kwaj kinbʼan pa ri nukʼaslemal: kinqʼijilaj ri Dios y kentoʼ ri winaq rech kketaʼmaj uwach.

Xnimar ri qachilanik rukʼ Laurie rumal che tajin kqabʼan ri kubʼij ri Biblia. Ri Jehová oj utewchin rukʼ jun alaj qalkʼwal che tajin kpatanin che.

Qariqom jujun taq kʼax pa ri qakʼaslemal are kʼu ri Jehová oj uyaʼom ta kanoq. Kqaj kqakubʼsaj más qakʼuʼx chrij rech kkʼistaj ta qakʼuʼx (Proverbios 3:​5, 6).