Xinkʼiy pa Acul jun tinamit che kʼo pa taq ri kʼachelaj pa ri oeste re Guatemala. Ri nufamilia kechʼaw pa ri chʼabʼal ixil xuqujeʼ xwetaʼmaj ri chʼabʼal riʼ y ri español. Xinkʼiy pa ri tiempo are chiʼ tajin kbʼan chʼoj pa ri tinamit che treita seis junabʼ xuchʼijo, pa ri chʼoj riʼ e kʼi ixiles xekamik.

Kajibʼ nujunabʼ are chiʼ ri wachalal che siete ujunabʼ tajin ketzʼan rukʼ jun granada y xpopobʼ o xpoqʼ pa uqʼabʼ. Wariʼ xubʼano che xkam ri wachalal y ri in kinkaʼy ta chik. Kʼa in nitzʼ na are chiʼ xinkʼam bʼi pa jun institución chke ri winaq che kekaʼy taj pa Guatemala chilaʼ xinwetaʼmaj wi usikʼixik wuj pa braille. Xinchʼobʼ taj jasche ri winaq che kujilowik kraj taj che kintzijon kukʼ nikʼaj chi akʼalabʼ, y ri nikʼaj chi akʼalabʼ kkaj taj kekʼojiʼ wukʼ. Amaqʼel nutukel in kʼolik kwaj che kopan ri kebʼ ikʼ che kinkʼojiʼ rukʼ ri nunan che sibʼalaj kinuloqʼoqʼej. Are kʼu ri areʼ xkamik are chiʼ kʼo diez nujunabʼ sibʼalaj xinbʼisonik.

Once nujunabʼ are chiʼ xintzalij pa ri nutinamit xinbʼe rukʼ ri jun chi wachalal y kukʼ ri ufamilia. Xkiya ri kajwataj chwe, are kʼu xinkitoʼ ta rukʼ ri kinaʼo jujun taq mul xinta che ri Dios: «¿Jasche xkam ri nunan? ¿Jasche kinkaʼy taj?». Ri winaq kkibʼij chwe che ri tajin kinkʼulmaj are waʼ ri kraj ri Dios. Rumal laʼ xinchomaj che ri Dios are jun itzel Dios y che kukʼut ta sukʼilal. Wet xinkunik xinkamisaj ta wibʼ riʼ.

Are chiʼ kinkaʼy ta chik wariʼ xubʼano che xinriq más kʼax. Are chi kʼa in nitzʼ na kʼi mul xinbʼan abusar sexualmente. Kʼo ta jun che xinbʼij wi, rumal che xinchomaj che kʼo ta nijun kintoʼwik. Ri winaq qas ta kinkichʼabʼej. Kinbʼisonik y utz ta kinaʼo kinkʼojiʼ kukʼ nikʼaj chik rumal che maj jachin chrij kinkubʼsaj wi nukʼuʼx.

Are chiʼ kʼo trece nujunabʼ, jun kʼulaj che e testigos rech Jehová xetzijon wukʼ are chiʼ xinel pa recreo. Jun ajtij che kel ukʼuʼx chwe xubʼij chke che keʼopan che wilik. Ri e areʼ xkibʼij chwe che ri Biblia kubʼij che ri e moyabʼ kekaʼy na y ri kaminaqibʼ kewalij na (Isaías 35:5; Juan 5:​28, 29). Utz xinta ri xkitzijoj chwe are kʼu rumal che in naqʼatal taj kintzijonik kinchʼaw taj. Paneʼ je wariʼ, ri e areʼ xkikʼut paciencia y loqʼoqʼebʼal chwe, amaqʼel xeʼopan che wilik rech kkikʼut chnuwach ri kubʼij ri Biblia. Diez kilómetros xkibʼinibʼej pa ri kʼachelaj rech xeʼopan che wilik.

Are chiʼ ri wachalal xubʼij chwe ri kibʼanik, xubʼij che e mebʼaʼ are kʼu qas chʼajchʼoj ri katzʼyaq kikojom. Qas qʼalaj che kinkaj rumal che kkiya jujun taq sipanik chwe. Qas wetaʼm che xaq xiw ri qastzij cristianos kkibʼan wariʼ.

Xwetaʼmaj chrij ri Biblia kukʼ ri publicaciones che e kʼo pa braille. Qas kinchʼobʼ ri tajin kwetaʼmaj, are kʼu kʼo jujun jastaq che kinkoj taj. Jun kʼutbʼal, kʼax xinbʼan che ukojik che ri Dios y ri winaq qastzij kel kikʼuʼx chwe. Xinchʼobʼo jasche xaq uyaʼom che kkʼulmataj ri kʼax, are kʼu kʼax xinbʼan che ukojik che are jun utzalaj Tat. *

Nojimal chi nojimal ri xwetaʼmaj pa ri Biblia xubʼano che xkʼextaj ri nuchomanik. Jun kʼutbʼal, xwetaʼmaj che ri Dios kbʼisonik are chiʼ ri upatanelabʼ kkiriq kʼax. Ri are kubʼij: «Qas wilom ri kʼax ri kuriq ri nutinamit [...] qas wetaʼm ri kʼax kkiriqo» (Éxodo 3:7). Are chiʼ xwilo che ri Jehová sibʼalaj kloqʼoqʼenik, xinchaʼ upatanexik pa nukʼaslemal. Pa ri junabʼ 1998 xinbʼan nuqasanjaʼ y xinux testigo rech Jehová.

Are chiʼ qʼaxinaq chi jun junabʼ che xinbʼan nuqasanjaʼ, xinya jun curso chke ri winaq che kekaʼy taj pa Escuintla. Jun qachalal che kʼo pa ri congregación rech ri tinamit riʼ xretaʼmaj che kʼax kinriqo are chiʼ kinbʼe pa ri e riqbʼal ibʼ pa Acul, rumal che kinbʼinibʼej junam rukʼ ri kkibʼinibʼej ri qachalal che kkiya ri etaʼmanik re ri Biblia chwe. Rumal laʼ ri qachalal xeʼutzukuj jun familia che e testigos rech Jehová rech kinkanaj kan kukʼ cho kachoch y rech kinbʼe pa ri e riqbʼal ibʼ. Kimik kʼa tajin kinkichajij jetaneʼ in kifamilia.

Kinkun taj kinbʼij ronojel ri xkibʼan ri qachalal che ukʼutik loqʼoqʼebʼal chwe. Qas wetaʼm che kukʼ ri testigos rech Jehová e kʼo wi ri qastzij cristianos (Juan 13:​34, 35).

Kimik kinaʼ ta chik che mat kʼo nupatan y che mat kʼo kubʼsal nukʼuʼx. Are ta kinchoman chrij che kinkaʼy taj are más kinya ri nutiempo rech kentoʼ ri nikʼaj che uchʼobʼik ri kubʼij ri Biblia. Kʼi tobʼanik kinya pa ri congregación xuqujeʼ kinya chʼabʼal pa nikʼaj chi congregaciones che kʼo naqaj. Xuqujeʼ sibʼalaj kinmaltyoxij che kinkunik kinya chʼabʼal pa ri nimaʼq taq riqbʼal ibʼ.

Pa ri junabʼ 2010, xinbʼe pa El Salvador pa ri Escuela de Entrenamiento Ministerial (kimik kbʼix, Tijobʼal chke ri kkiya ubʼixik ri Ajawbʼal che). Wajun tijobʼal riʼ inutoʼom rech kentoʼ más ri qachalal. Xinutoʼo rech kinaʼo che kʼo chi nupatan y che ri Jehová kinraj, che are kbʼanowik che konojel kekunik kkibʼan ri urayibʼal.

Ri Jesucristo xubʼij: «Are sibʼalaj utz na re ri kayanik chuwach ri kakʼamowik» (Hechos 20:35). Sibʼalaj kinkikotik paneʼ nabʼe xinchomaj che kinkun taj kinkikotik, kimik kinaʼo che kinkun chik kentoʼ chi ri nikʼaj.