Xinkʼiy Paddington, jun nimalaj tinamit che kʼo pa Londres (Inglaterra). Xinkʼiy rukʼ ri nunan y kukʼ oxibʼ watz. Ri nutat amaqʼel kel bʼik rumal che kutij tzam.

Are chiʼ in nitzʼ ri nunan xubʼij chwe che kinbʼan nuchʼawem chaqʼabʼ. Kʼo jun alaj nuBiblia che xaq xiw kʼo ri Salmos chupam y xaq kinbʼan ri música rech kinkunik kinbʼixoj. Pa jun wuj xinsikʼij jun tzij che kʼo xubʼan pa ri nukʼaslemal, kubʼij: «Kopan jun qʼij che chilaʼ kkʼis ronojel». Ri e tzij riʼ xubʼano che kinwar ta chi chaqʼabʼ; kinchoman chrij ri kinkʼulmaj na pa ri petinaq. Kinbʼij: «Wariʼ qastzij taj. ¿Jasche in kʼo waral?». ¡Kwaj taj kinkamik!

Xwaj xwetaʼmaj más chrij ri ocultismo. Rumal laʼ xojbʼe kukʼ ri wachiʼl pa ri camposanto y xwaj xintzijon kukʼ ri kaminaqibʼ. Xuqujeʼ kqamulij qibʼ kukʼ rech kqil películas de terror. Paneʼ kuya xibʼin ibʼ chqe are kʼu utz kqilo.

Tajin chi kinbʼan itzel jastaq are chi kʼate 10 nujunabʼ. Xinmaj utijik tabaco y kinkun ta chik kinya kanoq tekʼuriʼ xinmaj chi rukʼ ri marihuana. 11 nujunabʼ are chiʼ xinmaj utijik tzam, paneʼ utz ta kinnaʼ ri ktijowik, are kʼu utz kinnaʼo are chiʼ kinqʼabʼarik. Sibʼalaj utz kinta ri música y utz kinnaʼo kinxojowik, are chiʼ kinkunik, amaqʼel kinbʼe pa nimaqʼij y pa taq discotecas. Kinel bʼi pa ri wachoch chaqʼabʼ y kintzalij loq are chiʼ ksaqirik y kʼo ta nijun kinilowik. Wariʼ kubʼan chwe che sibʼalaj kinkosik y kinbʼe ta chi pa ri escuela. Y, are chiʼ kinbʼek amaqʼel kintij tzam.

Are chiʼ xinel pa ri escuela qas ta kʼo utz nucalificaciones. Rumal che chiʼ ri nunan xretaʼmaj ri itzel taq jastaq che tajin kinbʼano xpe royowal wukʼ y xinel bʼi pa wachoch. Xinkʼojiʼ rukʼ ri nunovio Tony che are rastafari. Ri areʼ kubʼan elaqʼ, kukʼayij drogas y sibʼalaj kʼan. Y kʼateʼ 16 nujunabʼ are chiʼ xkʼojiʼ ri nabʼe qalkʼwal.

Xinchʼobʼ kiwach ri e testigos rech Jehová are chiʼ in kʼo pa jun lugar ri kekʼojiʼ wi ixoqibʼ che kʼo kal y che majaʼ kijunabʼ. Xinkunik xinkʼojiʼ chilaʼ rumal ri servicio sociales. Kebʼ testigos amaqʼel keʼopan che kilik jujun alitomabʼ. Jun qʼij are chiʼ tajin ketzijonik xinqebʼ kukʼ rech kinkʼut chkiwach che qastzij ta ri tajin kkikʼutu. Are kʼu ri e areʼ rukʼ utzilal y rukʼ ri Biblia xkitzalij uwach ri nupreguntas. Sibʼalaj utz xinwilo che rukʼ utzilal xetzijon wukʼ rumal laʼ xinmaj jun tijonik re ri Biblia kukʼ.

Ri xinwetaʼmaj pa ri Biblia xukʼex ri nukʼaslemal. Are chiʼ kʼa in nitzʼ kinxeʼj wibʼ kinkamik, are kʼu xwetaʼmaj ri xubʼij ri Jesús che kekʼastaj na ri kaminaqibʼ (Juan 5:28, 29). Xuqujeʼ xwetaʼmaj che ri Dios kinraj (1 Pedro 5:7). Ri tzij che kriqitaj pa Jeremías 29:11 xopan pa wanimaʼ, chilaʼ kubʼij: «In e wetaʼm ri e chomanik ri e kʼo wukʼ chiwe, chomanik che ubʼanik utzil chiwe man che ta etzelal, che uyaʼik jun eyebʼal kʼuxaj ri kpe na. In, ri Ajawaxel, kinjikibʼaʼ ubʼixik». Qas xinwilo che kinkunik kinkʼasiʼ amaqʼel pa jun kotzʼiʼjalaj uwach Ulew (Salmo 37:29).

Ri testigos rech Jehová xkikʼut utzilal chwe. Ri nabʼe mul che xinbʼe pa ri riqbʼal ibʼ xwilo che konojel e utz taq winaq (Juan 13:34, 35). ¡Kjunamataj ta rukʼ ri kabʼan che nukʼulaxik pa ri iglesia! Ri testigos rech Jehová itzel ta xechʼaw chrij ri nubʼantajik. Xkiya ri kitiempo y ri kiloqʼoqʼebʼal chwe, xuqujeʼ xinkitoʼo. Xinnaʼo che in kʼo pa jun utzalaj familia.

Are chiʼ xwetaʼmaj más chrij ri Biblia, xinchʼobʼo che rajawaxik kinkʼex ri nukʼaslemal rech kinkunik kinqaj chuwach ri Dios. Kʼax xinbʼan kan che uyaʼik ri tabaco. Y xwilo che kʼo música che kubʼano che kinrayij utijik marihuana, rumal laʼ xinkʼex ri música che kintatabʼej. Kinbʼe ta chi pa nimaqʼij y pa taq ri discotecas, wetaʼm che we kinbʼek kinmaj chi utijik tzam. Xintzukuj utz taq wachiʼl che kinkitoʼ che ubʼanik ri utzilal (Proverbios 13:20).

Pa ri tiempo riʼ, Tony xuqujeʼ tajin kaya etaʼmanik che chrij ri Biblia kumal ri testigos rech Jehová. Are chiʼ kkitzalij uwach ri upreguntas rukʼ ri Biblia, xrilo che ri tajin kretaʼmaj are ri qastzij. Xukʼex ri ukʼaslemal: xuya kan ri itzel taq rachiʼl, xuya kan ri elaqʼ y kutij ta chi marihuana. Xqilo che rech kojkunik kqapatanij ri Jehová, rajawaxik kojkʼuliʼk y rech utz kkʼiy ri qalkʼwal. Rumal laʼ xojkʼuliʼ pa ri junabʼ 1982.

Knaʼtaj chwe che xintzukuj pa ri revistas La Atalaya y ¡Despertad! * bʼantajik kech winaq che xkʼojiʼ jun kikʼaslemal junam wukʼ in. Wariʼ xinutoʼo rech más xinkoj nuchuqʼabʼ che ukʼexik ri nukʼaslemal. Amaqʼel kintaʼ che ri Jehová che kkʼistaj ta ukʼuʼx wukʼ. In y Tony xqabʼan qaqasanjaʼ pa julio 1982.

Rumal che xinux rachiʼl ri Jehová xubʼano che xkolotaj ri nukʼaslemal. Qilom rukʼ Tony che ri Jehová oj utoʼom chuwach ri kʼax che qariqom. Xqetaʼmaj ukubʼsaxik qakʼuʼx chrij are chiʼ kqariq kʼax y qilom che amaqʼel uchajim ri qafamilia (Salmo 55:22).

Rukʼ kikotemal xeqatoʼ ri qalkʼwal rech xeʼux rachiʼl ri Jehová. Kimik riʼ sibʼalaj kinkikotik are chiʼ kenwil ri uwiʼ taq numam che xuqujeʼ tajin kkichʼobʼ uwach ri Jehová.

Kinkʼastaj ta chi chaqʼabʼ che uchomaxik ri kinriq na pa ri petinaq o chrij ri kamikal. Oj kebʼ rukʼ Tony latzʼ qawach che kisolixik ri congregaciones kech ri testigos rech Jehová rech keqatoʼ ri qachalal. Y kqakʼut chkiwach ri winaq che, we kekojon chrij ri Jesús, xuqujeʼ kekunik kekʼasiʼ amaqʼel.