Ri oj testigos rech Jehová kqabʼan ta ri cumpleaños rumal che qetaʼm che ri Dios utz ta krilo. Paneʼ ri Biblia kchʼaw ta chrij wajun nimaqʼij riʼ, are kʼu kukʼut jujun jastaq chqawach che kojutoʼ che uchʼobʼik che utz taj kbʼanik. Chqilaʼ kajibʼ rumal che kqabʼan ta ri cumpleaños y chqilaʼ ri kukʼut ri Biblia.

1.   Ri cumpleaños petinaq che ri qastzij taj kojonem. Jun diccionario enciclopédico, kubʼij che wajun nimaqʼij riʼ xmajix ubʼanik xa rumal che kchomaxik che ri qʼij re ri ucumpleaño ri winaq, ri «itzel taq uxlabʼal kkaj kkibʼan kʼax che» are kʼu «kumal ri rachiʼl che kekʼojiʼ rukʼ pa ri qʼij riʼ y ri utz taq tzij che kbʼix che kubʼano che kchajixik». Jun chi wuj kubʼij che rajawaxik ktzʼibʼax ri qʼij che xalax ri winaq «rech ksukʼumax ri horóscopo», che kil pa ri «astrología». Xuqujeʼ xubʼij che ri candelas che kkoj pa ri cumpleaños kʼo magia chupam che kubʼano che kyaʼ ri kraj ri winaq.

    Are kʼu ri Biblia kubʼij che utz taj kbʼan magia, chʼobʼonik, qʼijinik, itzinik o apachike uwach jastaq che kjunamataj rukʼ wariʼ (Deuteronomio 18:14; Gálatas 5:​19-​21). Rumal wariʼ ri Dios xukʼajisaj kiwach ri winaq che e k’o pa ri ojer tinamit Babilonia rumal che xkibʼan ri astrología, che are jun chi uwach qʼijinik (Isaías 47:11-​15). Ri oj testigos rech Jehová qas ta kqakoj qachuqʼabʼ che retaʼmaxik jawchi’ petinaq wi wa taq nimaqʼij riʼ, are kʼu kqaj kqanimaj ri kubʼij ri Biblia chrij ri qʼijinik.

2.   Ri nabʼe taq cristianos xkibʼan ta ri cumpleaños. Jun enciclopedia kubʼij che ri nabʼe taq cristianos xkibʼan ta ri cumpleaños rumal che keta’m che petinaq che ri qastzij taj kojonem (The World Book Encyclopedia). Ri Biblia kubʼij che ri apóstoles y ri nikʼaj chi winaq che xeteriʼ chrij ri Jesús xkiya kan jun kʼutbʼal chqawach qonojel ri oj cristianos (2 Tesalonicenses 3:6).

3.   Xa jun nimaqʼij xyaʼ kan ubʼixik chke ri cristianos che rajawaxik kkibʼano kʼo ta ubʼanik rukʼ ri alaxbʼal xaneʼ chrij ri ukamikal ri Jesús (Lucas 22:17-​20). Kqamay ta wariʼ xa rumal che ri Biblia kubʼij che «are utz na ri qʼij re kamikal chuwach ri qʼij re alanik» (Eclesiastés 7:1). Are chiʼ ri Jesús xkamik xubʼan utz taq jastaq che xqaj chuwach ri Dios, rumal laʼ ri qʼij re ri ukamikal are más nim ubʼanik chuwach ri qʼij che xalaxik (Hebreos 1:4).

4.   Ri Biblia kubʼij taj che ri cristianos rajawaxik kkibʼan ri cumpleaños. Qastzij wariʼ rumal che ri uTzij ri Dios xaq xiw kchʼaw chrij kebʼ cumpleaños kech winaq che xkiqʼijilaj ta ri Dios. Y ri Biblia kchʼaw chrij ri itzelal che xbʼan pa ri e cumpleaños riʼ (Génesis 40:20-​22; Marcos 6:​21-​29).

 Junam kukʼ ri nikʼaj chi tat nan, ri testigos rech Jehová sibʼalaj kekiloqʼoqʼej ri kalkʼwal. Rumal laʼ kkiya jujun taq sipanik chke pa apachike qʼij y kkibʼan nimaqʼij rech ri kalkʼwal kekikotik. Kkikoj kichuqʼabʼ rech kkesaj uwach ri Dios che kuya ronojel ri kajwataj chke ri keqʼijilan che (Mateo 7:​11). Rumal laʼ ri kalkʼwal ri testigos rech Jehová kebʼison taj xa rumal che kbʼan ta ri kicumpleaños. Are waʼ ri kkibʼij jujun alaj taq akʼalabʼ:

•   «Más katkikot na are chiʼ xaq kʼateʼ kyaʼ jun sipanik chawe» (Tammy, che kʼo 12 ujunabʼ).

•   «Ri nupapá y ri numamá kkiya ta sipanik chwe pa ri nucumpleaños are kʼu kkiya chwe pa nikʼaj chi qʼij. Y wariʼ utz kwilo» (Gregory, che kʼo 11 ujunabʼ).

•   «Ri akʼalabʼ xaq xiw kkitij pasteles y kebʼixonik. Ri kqabʼan oj are ri más utz na» (Eric, che kʼo 6 ujunabʼ).